မၢတ်ႈထႄႇ 22

22
ၵႂၢမ်း​ဢူႉပမႃႇ​လွင်ႈ​ပွႆး​သွင်ႇ​မင်ႇၵလႃႇ
(တူၺ်း၊ လူႉ 14:15-24)
1ၵမ်း​ၼၼ်ႉ ယေႇသူႉ​သမ်ႉ​ဢဝ်​ၵႂၢမ်း​ဢူႉပမႃႇ​သေ​လႄႈ ႁေႃး​လၢတ်ႈ​တီႈ​ပရဵၵ်ႈသၢတ်ႈ​တင်း​လၢႆ​လႄႈ​ဝႃႈ​ၸမ်ႉ၊- 2မိူင်း​ၵၢင်​ႁၢဝ်​ၸဝ်ႈ မိူၼ်​ၸိူဝ်ႉ​ၼင်ႇ​ၶုၼ်​လူင်​ပႃး​ၼိုင်ႈ ဢၼ်​ႁဵတ်း​ပွႆး​သွင်ႇ​မင်ႇၵလႃႇ ပုၼ်ႈ​လုၵ်ႈ​ၸၢႆး​တူဝ်​ၸဝ်ႈ​ၵဝ်ႇ​ၼၼ်ႉ​လႄႈ၊- 3ပွႆႇ​ၸႂ်ႉ​ၵူၼ်း​ဢွၼ်ႇ​မၼ်း​တင်း​လၢႆ​ၵႂႃႇ ႁႂ်ႈ​လႆႈ​ႁွင်ႉ​ဢဝ်​ၶဝ်​ၸိူဝ်း​ဢၼ် ၽိတ်ႈ​ပၢင်း​ယဝ်ႉ​ၼၼ်ႉ​မႃး​သေ​ၵေႃႈ ၶဝ်​ဢမ်ႇ​မီး​ဢလူဝ်ႇ​ၶႂ်ႈ​မႃး​ၼၼ်ႉ​ဢေႃႈ။- 4လိုၼ်း​ၼၼ်ႉ​သမ်ႉ ပွႆႇ​ၸႂ်ႉ​ၵူၼ်း​ဢွၼ်​တၢင်ႇ​ၵေႃႉ​တင်း​လၢႆ​ၵႂႃႇ​လႄႈ​သင်ႇ​လၢတ်ႈ​ဝႃႈ၊ ၵဝ်​မႄး​ႁႅၼ်း​ပွႆး​ၵဝ်​ဝႆႉ​ယဝ်ႉ။ ဢဝ်​ၸႃႉ​ၸဵမ်​ဝူဝ်း​လႂ်၊ တရိၵ်ႈသၢၼ်ႇ​ဢၼ်​ပီး​လီ​မၼ်း​လီ​လႂ် တၢႆ​ယဝ်ႉ​ယဝ်ႉ။ မႄး​ႁႅၼ်း​ၵူႈ​ၸိူဝ်ႉ​ၵူႈ​ပိူင်​ဝႆႉ​ယဝ်ႉ။ လၢတ်ႈ​တီႈ​ၶဝ်​ၸိူဝ်း​ဢၼ် ၽိတ်ႈ​ပၢင်း​ၼၼ်ႉ​လႄႈ​ဝႃႈ၊ မႃး​ၵႃႈ​တီႈ​ပွႆး​သွင်ႇ​မင်ႇၵလႃႇ​ၼႆႉ​သေ​ၵမ်း၊ ဝႃႈ​ၼင်ႇ​ၼႆ​တႃႉ၊ ဝႃႈ​ၼင်ႇ​ၼႆ​ဢေႃႈ။- 5ၵူၺ်း​ၵႃႈ ၶဝ်​ၼၼ်ႉ ႁဵတ်း​ဢမ်ႇ​ပေႃး​ၼင်ႇ​ႁိုဝ်​လႄႈ​ၵႂႃႇ​ပႅတ်ႈ​သေ​ဢေႃႈ။ ၵေႃႉ​ၼိုင်ႈ ၵႂႃႇ​ၵႃႈ​တီႈ​တူင်ႈ​ၼႃး​မၼ်း​ဢေႃႈ။ ၵေႃႉ​ၼိုင်ႈ ၵႂႃႇ​ၵႃႈ​တီႈ​ဢၼ်​မၼ်း​သိုဝ်ႉ​မၼ်း​ၶၢႆ​ၼၼ်ႉ​ဢေႃႈ။- 6ၶဝ်​ၸိူဝ်း​ဢၼ်​ၵိုတ်း​ဢၼ်​ၵျၢၼ်ႇ​ၼၼ်ႉ​ၵေႃႈ တီႉ​ဢဝ်​ၵူၼ်း​ဢွၼ်ႇ​ၸိူဝ်း​ၼၼ်ႉ​သေ​ယဝ်ႉ၊ ၼိၵ်ႈ​ၸၢၵ်ႈ​ငႅၼ်း​သႄး​ဢဝ်​တၢႆ​ဢေႃႈ။- 7ၶုၼ်​လူင်​ၼၼ်ႉ ငိၼ်း​သေ​ယဝ်ႉ၊ ၸႂ်​မႆႈ​ၶႆႈ​ၸႃႉ​လႄႈ ႁႂ်ႈ​ၶီႇ​သိုၵ်း​ၵႂႃႇ​ယႃႉ​ပႅတ်ႈ​ၶဝ်​ၸိူဝ်း​ဢၼ် ဢဝ်​ဢသၢၵ်ႈ​ၵူၼ်း​တၢႆ​ၸိူဝ်း​ၼၼ်ႉ​လႄႈ ဢဝ်​ၽႆး​တုတ်ႇ​ဝဵင်း​ၶဝ်​ပႅတ်ႈ​ဢေႃႈ။
8လိုၼ်း​ၼၼ်ႉ​ၸင်ႇ ၶုၼ်​လူင်​ၼၼ်ႉ ႁွင်ႉ​ဢဝ်​ၵူၼ်း​ဢွၼ်ႇ​မၼ်း​တင်း​လၢႆ​လႄႈ​ဝႃႈ၊ ပွႆး​သွင်ႇ​မင်ႇၵလႃႇ​ၵဝ်​ၸိုင် မႄး​ႁႅၼ်း​ဝႆႉ​ယဝ်ႉ။ ပိူဝ်ႈ​ဢၼ်​ၶဝ်​ၸိူဝ်း​ဢၼ် ၽိတ်ႈ​ပၢင်း​ယဝ်ႉ​ၼၼ်ႉ ဢမ်ႇ​ထိူၵ်ႈ​ဢမ်ႇ​တၢၼ်ႇ​လႄႈ၊- 9ၵႂႃႇ​ၵႃႈ​တီႈ​ႁူဝ်​တႃႈ​ႁူဝ်​တၢင်း​သေ​လႄႈ ၽိတ်ႈ​ပၢင်း​ၵူၼ်း​ၵႃႈ​ဢၼ်​ထူပ်း​ဢၼ်​ႁၼ်​ၼၼ်ႉ​မႃး​ၵႃႈ​တီႈ​ပွႆး​ၼႆႉ​တႃႉ​ဝႃႈ​ၼႆ၊- 10ၵႃႈ​ၼင်ႇ​ဢၼ်​ဝႃႈ​ၼၼ်ႉ ၵူၼ်း​ဢွၼ်ႇ​ၸိူဝ်း​ၼၼ်ႉ ၵႂႃႇ​ၵႃႈ​တီႈ​သဵၼ်ႈ​တၢင်း​သၢႆ​တႃႈ​လႄႈ ႁႂ်ႈ​ၵူၼ်း​ဢၼ်​လီ​ဢၼ်​ၸႃႉ ၵႃႈ​ဢၼ်​ထူပ်း​ႁၼ်​ၼၼ်ႉ ၸူႉ​ၵၼ်​တုမ်​ၵၼ်​လႄႈ ပွႆး​ၼၼ်ႉ​တဵမ်​ဝႆႉ​တင်း​ၵူၼ်း​ဢၼ်​ဢိင်​ယူႇ​ဢေႃႈ။- 11မိူဝ်ႈ​ဢၼ်​ၶုၼ်​လူင်​ၶဝ်ႈ​မႃး ႁႂ်ႈ​လႆႈ​တူၺ်း​ၶဝ်​ၸိူဝ်း​ဢၼ်​ဢိင်​ယူႇ​ၼႂ်း​ပွႆး​ၼၼ်ႉ​ၸိုင်၊ မၼ်း​ၸဝ်ႈ​ထူပ်း​ႁၼ်​ၵူၼ်း​ဢၼ်​ဢမ်ႇ​ၼုင်ႈ​ၶူဝ်း​ပွႆး​သွင်ႇ​မင်ႇၵလႃႇ​ၼၼ်ႉ​ၵေႃႉ​ၼိုင်ႈ​လႄႈ၊- 12ထၢမ်​လႄႈ​ဝႃႈ၊ ပီႈ​ၼွင်ႉ​ဢိူၺ်း၊ ယင်း​ဢမ်ႇ​ပႃး​ၶူဝ်း​ပွႆး​သွင်ႇ​မင်ႇၵလႃႇ​လႄႈ၊ ႁဵတ်း​သင်​လႄႈ ၶဝ်ႈ​ၼႂ်း​ပွႆး​ၼႆႉ​ၼင်ႇ​ႁိုဝ်။ မိူဝ်ႈ​ဢၼ်​ဝႃႈ​ၼင်ႇ​ၼႆ​ၸိုင်၊ ၵေႃႉ​ၼၼ်ႉ​ဢမ်ႇ​လၢတ်ႈ​ၵႂၢမ်း​ၵႃႈ​သင်​လႆႈ​လႄႈ​ယူႇ​ဢေႃႈ။- 13မိူဝ်ႈ​ၼၼ်ႉ ၶုၼ်​လူင်​မီး​ဢမိင်ႉ​တီႈ​ၵူၼ်း​ၸႂ်ႉ​ၵူၼ်း​သွႆ​မၼ်း​တင်း​လၢႆ​လႄႈ​ဝႃႈ၊ မတ်ႉ​တိၼ်​မတ်ႉ​မိုဝ်း​ၵေႃႉ​ၼၼ်ႉ​တႃႉ။ ဢဝ်​မၼ်း​ၶျႃး​တူၵ်း​ၵႃႈ​ၼႂ်း​လပ်း​သိင်ႇ​ၵႃႈ​တီႈ​ၼွၵ်ႈ​တီႈ​ဢၼ်​လႆႈ​ႁႆႈ​လႆႈ​ႁွင်ႉ၊ တီႈ​ဢၼ်​လႆႈ​ၵတ်း​ၶဵဝ်ႈ​ၵတ်း​ၽၼ်း​ပုၼ်ႉ​တႃႉ၊ ဝႃႈ​ၼင်ႇ​ၼႆ​ဢေႃႈ။- 14ပိၵ်ႉ​သမ်ႉ​ၶဝ်​ၸိူဝ်း​ဢၼ်​မၼ်း​ၸဝ်ႈ​ႁွင်ႉ​ဢဝ်​ၼၼ်ႉ ၼမ်​ၼႃႇ​သေ​ၵေႃႈ၊ ၶဝ်​ၸိူဝ်း​ဢၼ်​မၼ်း​ၸဝ်ႈ​လိူၵ်ႈ​ၵဵပ်း​ဢဝ်​ၼၼ်ႉ ၵေႇ​ၼႃႇ​ဢေႃႈ၊ ဝႃႈ​ၼင်ႇ​ၼႆ​ဢေႃႈ။
လွင်ႈ​ထၢမ်း​ၶွၼ်ႇ
(တူၺ်း၊ မႃႇ 12:13-17လူႉ 20:20-26)
15မိူဝ်ႈ​ၼၼ်ႉ ၽႃႇရီႉသႄး​တင်း​လၢႆ ဢွၵ်ႇ​ၵႂႃႇ​သေ​ယဝ်ႉ၊ တိူင်ႇ​ပၢင်ႇ​တွင်ႈ​ထၢမ်​ၵၼ်​လႄႈ​ဝႃႈ၊ တၵ်း​ဢဝ်​တင်း​ၵႂၢမ်း​ၵၢင်​ဢဝ်​မၼ်း​ၸဝ်ႈ​လႆႈ​ၸိူဝ်ႉ​ၼင်ႇ​ႁိုဝ် ဝႃႈ​ၼင်ႇ​ၼႆ​ယဝ်ႉ​ၸင်ႇ၊- 16ပွႆႇ​ၸႂ်ႉ​တပႄး​ၶဝ် ဢိၵ်ႇ​တင်း​တပႄး​ႁေႇရူတ်ႈ​တင်း​လၢႆ ၵႂႃႇ​တီႈ​မၼ်း​ၸဝ်ႈ​လႄႈ ႁႂ်ႈ​လဝ်ႊ​လၢတ်ႈ​လႄႈ​ဝႃႈ၊ သြႃႇ​ၸဝ်ႈ၊ ပိူဝ်ႈ​ဢၼ်​ၸဝ်ႈ​ႁဝ်း​ဢမ်ႇ​ထွၵ်ႈ​လူၺ်ႈ​ၼႃႈ​ၵူၼ်း​လႄႈ ႁဝ်း​ၶႃႈ​ႁူႉ​လွင်ႈ​ဢၼ်​ၸဝ်ႈ​ႁဝ်း​မီး​သဵတ်ႈ​ၸႃႇ၊ လွင်ႈ​ဢၼ်​ၸဝ်ႈ​ႁဝ်း​ၼႄ​ပျႃး​သဵၼ်ႈ​တၢင်း​ၽြႃး​ပဵၼ်​ၸဝ်ႈ ၸိုဝ်ႈ​ၸိုဝ်ႈ​ၸႂ်ႈ​ၸႂ်ႈ၊ လွင်ႈ​ဢၼ်​ၸဝ်ႈ​ႁဝ်း​ဢမ်ႇ​ၵူဝ်​ၽူႈ​လႂ်​သေ​ၵေႃႉ​သေ​ၵူၼ်း​ၼၼ်ႉ​ၶႃႈ​ဢေႃႈ။- 17ပိူဝ်ႈ​ၼႆ​လႄႈ ၸဝ်ႈ​ႁဝ်း​ထၢင်ႇ​ၸိူဝ်ႉ​ၼင်ႇ​ႁိုဝ်​ၶႃႈ။ ထုၵ်ႇ​လီ​ပၼ်​ၶွၼ်ႇ​တီႈ ၶုၼ်​ႁေႃ​ၶမ်း​ၵေႇသႃႇ​ၶႃႈ​ႁိုဝ်။ ဢမ်ႇ​ထုၵ်ႇ​လီ​ပၼ်​ၶႃႈ​ႁိုဝ်။ လၢတ်ႈ​ပၼ်​တီႈ​ႁဝ်း​ၶႃႈ​သေ​ၵမ်း​ၶႃႈ၊ ဝႃႈ​ၼင်ႇ​ၼႆ​ဢေႃႈ၊- 18ယေႇသူႉ​ႁူႉ​ႁၼ်​လွင်ႈ​ဢၼ်​ၸႂ်​ၶဝ်​ႁၢႆႉ​မိူၵ်ႈ​ၼၼ်ႉ​ယူႇ​လႄႈ​လၢတ်ႈ​ဝႃႈ သူ​ၸိူဝ်း​ဢၼ် ၸၢင်ႈ​ထိမ်ႇ​ၸၢင်ႈ​မႅပ်း​ၼႆႉ​ဢိူၺ်း၊ ႁဵတ်း​သင်​လႄႈ သူ​ၸၢမ်း​တူၺ်း​ယႃႉ​ယူၵ်ႉ​ၵဝ်​ၼင်ႇ​ႁိုဝ်။- 19ၼႄ​ပျႃး​ငိုၼ်း​ၵဵပ်း​ၶွၼ်ႇ​ၶႅပ်း​ၼိုင်ႈ တီႈ​ၵဝ်​တႃႉ၊ မိူဝ်ႈ​ဢၼ်​ဝႃႈ​ၼင်ႇ​ၼႆ​ၸိုင်၊ ၶဝ်​ၼၼ်ႉ​ဢဝ်​တေႇၼႃႇရီႇ​ၶႅပ်း​ၼိုင်ႈ မႃး​တီႈ​မၼ်း​ၸဝ်ႈ​ဢေႃႈ။- 20မၼ်း​ၸဝ်ႈ​ၵေႃႈ​ထၢမ်​လႄႈ​ဝႃႈ၊ ႁၢင်ႈ​ၼႆႉ​လိၵ်ႈ​ၼႆႉ​ၸမ်ႉ ပဵၼ်​ႁၢင်ႈ​ၽူႈ​လႂ်၊ ပဵၼ်​လိၵ်ႈ​ၽူႈ​လႂ်၊ မိူဝ်ႈ​ဢၼ်​ဝႃႈ​ၼင်ႇ​ၼႆ​ၸိုင်၊ ၶဝ်​ၼၼ်ႉ​လဝ်ႊ​လၢတ်ႈ​လႄႈ​ဝႃႈ၊- 21ပဵၼ်​ႁၢင်ႈ​ပဵၼ်​လိၵ်ႈ​ၶုၼ်​ႁေႃ​ၶမ်း​ၵေႇသႃႇၶႃႈ​ဢေႃႈ၊ ဝႃႈ​ၼင်ႇ​ၼႆ​ဢေႃႈ။ ယေႇသူႉ​ၵေႃႈ​လၢတ်ႈ​လႄႈ​ဝႃႈ၊ ဢဝ်​ၶွင်​ၶုၼ်​ႁေႃ​ၶမ်း​ၵေႇသႃႇ ပၼ်​တီႈ​ၶုၼ်​ႁေႃ​ၶမ်း​ၵေႇသႃႇ​တႃႉ။ ၶွင်​ၽြႃး​ပဵၼ်​ၸဝ်ႈ​ၵေႃႈ ဢဝ်​ပၼ်​တီႈ​ၽြႃး​ပဵၼ်​ၸဝ်ႈ​တႃႉ၊ ဝႃႈ​ၼင်ႇ​ၼႆ​ဢေႃႈ။- 22ၶဝ်​ၼၼ်ႉ​ငိၼ်း​သေ​ယဝ်ႉ၊ ဢၢမ်း​ၼႃႇ​လူင်​လၢင်​လႄႈ​ၸင်ႇ ဢွၵ်ႇ​ၵႃႈ​တီႈ​မၼ်း​ၸဝ်ႈ​ၵႂႃႇ​သေ​ဢေႃႈ။
လွင်ႈ​လုၵ်ႉ​ၶိုၼ်း​လိပ်း
(တူၺ်း၊ မႃႇ 12:18-27လူႉ 20:27-40)
23ဝၼ်း​ၼၼ်ႉ ၸတ်ႉတူႉၵႄး ဢၼ်​ဝႃႈ​တၢင်း​ဢၼ်​လုၵ်ႉ​ၶိုၼ်း​လိပ်း​ဢမ်ႇ​မီး၊ ဝႃႈ​ၼင်ႇ​ၼႆ​ၸိူဝ်း​ၼၼ်ႉ သုတ်ႉ​ၸပ်း​သုတ်ႉ​ၸူး​တီႈ​မၼ်း​ၸဝ်ႈ​သေ​လႄႈ​လဝ်ႊ​ထၢမ်​လႄႈ​ဝႃႈ၊- 24သြႃႇ​ၸဝ်ႈ၊ မူဝ်းသေႇ​ၸီႇ​ယၢင်ႇ​ဝႆႉ​လႄႈ​ဝႃႈ၊ ပေႃး​သေ​ၵေႃႉ​သေ​ၵူၼ်း​ယင်း​ဢမ်ႇ​မီး​လုၵ်ႈ​မီး​လၢင်း​လႄႈ​တၢႆ​ၵႂႃႇ​ၸိုင် ၼွင်ႉ​ၸၢႆး​မၼ်း​တၵ်း​လႆႈ​သိမ်း​ဢဝ်​မေး​မၼ်း​ၼၼ်ႉ​လႄႈ ႁႂ်ႈ​ၸိူဝ်ႉ​ၶိူဝ်း​ပီႈ​ၸၢႆး​မၼ်း​သိုပ်ႇ​ၵႂႃႇ​ဢမ်ႇ​ၶၢတ်ႇ၊ ဝႃႈ​ၼင်ႇ​ၼႆ​ဝႆႉ​ယဝ်ႉ​ၶႃႈ​ယဝ်ႉ။- 25ၵႃႈ​တီႈ​ႁဝ်း​ၶႃႈ မီး​ပီႈ​ၼွင်ႉ​ၸဵတ်း​ၵေႃႉ​ၶႃႈ​ဢေႃႈ။ ပီႈ​ၸၢႆး​ၵေႃႉ​ယႂ်ႇ ဢဝ်​မေး​လႄႈ​တၢႆ​ၵႂႃႇ​ၶႃႈ​ဢေႃႈ။ မၼ်း​ယင်း​ဢမ်ႇ​မီး​လုၵ်ႈ​မီး​လၢင်း​လႄႈ ႁႂ်ႈ​မေး​မၼ်း​ၵိုတ်း​ဝႆႉ တီႈ​ၼွင်ႉ​ၸၢႆး​မၼ်း​ၶႃႈ​ဢေႃႈ။- 26မိူၼ်​ၼင်ႇ​ၼၼ် ၸႃႉ​ၸဵမ်​ၵေႃႉ​တူႉတီႉယႃႉ၊ ၵေႃႉ​တႃႉတီႉယႃႉ၊ ၵေႃႉ​ၼိုင်ႈ​ယဝ်ႉ​ၵေႃႉ​ၼိုင်ႈ ၶဝ်​ပီႈ​ၼွင်ႉ​ၸဵတ်း​ၵေႃႉ လႆႈ​ဢဝ်​မႄႈ​ယိင်း​ၼၼ်ႉ​ယဝ်ႉ​ၸင်ႇ၊ တၢႆ​ၵႂႃႇ​ၶႃႈ​ဢေႃႈ။- 27လိုၼ်း​ၶဝ်​တင်း​သဵင်ႈ​တင်း​လူင်​ၼၼ်ႉ၊ မႄႈ​ယိင်း​ၼၼ်ႉ​ၵေႃႈ​တၢႆ​ၵႂႃႇ​ၶႃႈ​ဢေႃႈ။- 28ပိူဝ်ႈ​ၼႆ​လႄႈ ၼႂ်း​ၶိင်ႇ​ၵႃႇလႃႉ​ဢၼ်​တၵ်း​လႆႈ​လုၵ်ႉ​ၶိုၼ်း​ၼၼ်ႉ၊ ၼႂ်း​ၶဝ်​ပီႈ​ၼွင်ႉ​ၸဵတ်း​ၵေႃႉ​ၼၼ်ႉ၊ မႄႈ​ယိင်း​ၼၼ်ႉ တၵ်း​လႆႈ​ပဵၼ်​မေး​ၽူႈ​လႂ်​ၶႃႈ။ ၶဝ်​ပီႈ​ၼွင်ႉ​တင်း​သဵင်ႈ​တင်း​လူင် လႆႈ​ဢဝ်​မႄႈ​ယိင်း​ၼၼ်ႉ​ယဝ်ႉ​ၶႃႈ​ဢေႃႈ၊ ဝႃႈ​ၼင်ႇ​ၼႆ​ဢေႃႈ။- 29ယေႇသူႉ​ၵေႃႈ​ၶိုၼ်း​လၢတ်ႈ​လႄႈ​ဝႃႈ၊ ပိူဝ်ႈ​ဢၼ်​သူ​ဢမ်ႇ​ႁူႉ​ၵျၢမ်း​လိၵ်ႈ ဢိၵ်ႇ​တင်း​တၼ်း​ၶူဝ်း​ၽြႃး​ပဵၼ်​ၸဝ်ႈ​လႄႈ သူ​ၽိတ်း​ပိူင်ႈ​ဢေႃႈ။- 30ၶိင်ႇ​ၵႃႇလႃႉ​ဢၼ်​တၵ်း​လႆႈ​လုၵ်ႉ​ၶိုၼ်း​ၼၼ်ႉ ယင်း​ဢမ်ႇ​ၸၢင်ႈ​ႁဵတ်း​တၢင်း​ဢၼ် ဢဝ်​မေး၊ တၢင်း​ဢၼ်​ဢဝ်​ဢၢပ်ႈ​ပၼ်​ၵၼ်​လႄႈ ပဵၼ်​ၸိူဝ်ႉ​ၼင်ႇ​တမၢၼ်ႇ​ၵၢင်​ႁၢဝ်​ၽြႃး​ပဵၼ်​ၸဝ်ႈ တင်း​လၢႆ​ယူႇ​ဢေႃႈ။- 31လိူဝ်​သေ​ၼၼ်ႉ လွင်ႈ​ဢၼ်​ၶဝ်​ၸိူဝ်း​ဢၼ်​တၢႆ​ယဝ်ႉ​တင်း​လၢႆ လုၵ်ႉ​ၵႃႈ​တၢင်း​တၢႆ​ၶိုၼ်း​လိပ်း​ၼၼ်ႉ​ၸိုင် သူ​ဢမ်ႇ​ယၢမ်ႈ​လႆႈ​ၽတ်း ၵႂၢမ်း​ဢၼ်​ၽြႃး​ပဵၼ်​ၸဝ်ႈ မီး​ဢမိင်ႉ​တီႈ​သူ​လႄႈ​ဝႃႈ၊- 32ၵဝ်​ပဵၼ်​ၽြႃး​ဢႃႇပြႃႇႁၢမ်ႇ၊ ၽြႃး​ဢီႉၸၢၵ်ႈ၊ ၽြႃး​ယႃႇၵုပ်ႈ​ဢေႃႈ၊ ဝႃႈ​ၼင်ႇ​ၼႆ​ၼၼ်ႉ​ႁိုဝ်။ ၽြႃး​ပဵၼ်​ၸဝ်ႈ ပဵၼ်​ၽြႃး​ၶဝ်​ၸိူဝ်း​ဢၼ်​တၢႆ​ယဝ်ႉ​ဢမ်ႇ​ၸႂ်ႈ၊ ပဵၼ်​ၽြႃး​ၶဝ်​ၸိူဝ်း​ဢၼ် ဢသၢၵ်ႈ​လိပ်း​ယူႇ​ဢေႃႈ၊ မၼ်း​ၸဝ်ႈ၊ ဝႃႈ​ၼင်ႇ​ၼႆ​ဢေႃႈ။- 33ပရဵၵ်ႈသၢတ်ႈ​တင်း​လၢႆ ငိၼ်း​မၼ်း​ၸဝ်ႈ​သင်ႇ​သွၼ်​သုင်း​မႃႉ​ပၼ်​ၼၼ်ႉ​သေ​ယဝ်ႉ၊ ဢၢမ်း​ၼႃႇ​လူင်​လၢင်​ဢေႃႈ။
ပိင်း​ၺၢပ်ႈ​တြႃး​ဢၼ်​ယႂ်ႇ​မျၢတ်ႈ​သေ​ပိူၼ်ႈ
(တူၺ်း၊ မႃႇ 12:28-34လူႉ 10:25-28)
34 ၽႃႇရီႉသႄး​တင်း​လၢႆ ငိၼ်း​လွင်ႈ​ဢၼ်​မၼ်း​ၸဝ်ႈ ၵႄႈ​လိတ်ႈ​ၵႂၢမ်း​ၸတ်ႉတူႉၵႄး​ၸိူဝ်း​ၼၼ်ႉ​သေ​ယဝ်ႉ၊ ၸူႉ​ၵၼ်​တုမ်​ၵၼ်​တီႈ​မၼ်း​ၸဝ်ႈ​ဢေႃႈ။- 35ၵူၼ်း​မေႃ​ၵျၢမ်း​ဢၼ်​ပႃး​ၼႂ်း​ၶဝ်​ၼၼ်ႉ​ၵေႃႉ​ၼိုင်ႈ၊ ၼင်ႇ​ႁိုဝ်​တၵ်း​လႆႈ ၸၢမ်း​တူၺ်း​ယႃႉ​ယူၵ်ႉ​မၼ်း​ၸဝ်ႈ​ၸိုင် လဝ်ႊ​ထၢမ်​လႄႈ​ဝႃႈ၊- 36သြႃႇ​ၸဝ်ႈ၊ ၼႂ်း​ၵျၢမ်း​ပိင်း​ၺၢပ်ႈ​တီႉ​ၼၼ်ႉ ပိင်း​ၺၢပ်ႈ​ဢၼ်​လႂ် ယဵင်ႈ​ၶႅၼ်း​ယႂ်ႇ​မျၢတ်ႈ​ၼႃႇ​သေ​ပိူၼ်ႈ​ၶႃႈ၊ မိူဝ်ႈ​ဢၼ်​ဝႃႈ​ၼင်ႇ​ၼႆ​ၸိုင်၊- 37မၼ်း​ၸဝ်ႈ​ၵေႃႈ​လၢတ်ႈ​လႄႈ​ဝႃႈ၊ ၽြႃး​ပဵၼ်​ၸဝ်ႈ​မႂ်း ထႃႇဝရႃႉ​ၽြႃး​ၸိုင် မႂ်း​တၵ်း​လႆႈ​ပႃး​တင်း​ၸႂ်​သဵင်ႈ​သဵင်ႈ၊ တင်း​ႁူဝ်​ၸႂ်​သဵင်ႈ​သဵင်ႈ၊ တင်း​ၺၢၼ်ႇ​ၵႃႈ​မီး​တင်း​သဵင်ႈ​တင်း​လူင်​သေ​လႄႈ ႁၵ်ႉ​ဢေႃႈ​ဝႃႈ​ၼႆ၊- 38ပိင်း​ၺၢပ်ႈ​ဢၼ်​ဝႃႈ​ၼင်ႇ​ၼႆ​ၼၼ်ႉ ပဵၼ်​ပထမႃႉ​ပိင်း​ၺၢပ်ႈ​ဢေႃႈ။ ပိင်း​ၺၢပ်ႈ​ဢၼ်​ယႂ်ႇ​ၵေႃႈ​ပဵၼ်​ဢေႃႈ။- 39လိူဝ်​သေ​ၼၼ်ႉ တူႉတီႉယႃႉ​ပိင်း​ၺၢပ်ႈ​ဢၼ်​ဝႃႈ၊ ၵေႃႉ​ဢၼ်​ၸၢပ်ႈ​သႅင်ႇ​ၵၼ်​တင်း​တူဝ်​ၸဝ်ႈ​ၵဝ်ႇ​ၼၼ်ႉ​ၸိုင်၊ မႂ်း​တၵ်း​လႆႈ​ႁၵ်ႉ​မိူၼ်​ၸိူဝ်ႉ​ၼင်ႇ တူဝ်​ၸဝ်ႈ​ၵဝ်ႇ​ဢေႃႈ​၊ ဝႃႈ​ၼင်ႇ​ၼႆ​ၼၼ်ႉ မိူၼ်​ၸိူဝ်ႉ​ၼင်ႇ ပထမႃႉ​ပိင်း​ၺၢပ်ႈ​ၼၼ်ႉ​ဢေႃႈ။- 40ပိင်း​ၺၢပ်ႈ​သွင်​ပႃး​ၼႆႉ​ၸမ်ႉ၊ ပဵၼ်​ဢၼ်​ဢုပ်ႉ​ပိူင်ႇ ၵျၢမ်း​ပိင်း​ၺၢပ်ႈ​တီႉ​တင်း​ၵျၢမ်း​ဢၼႃႇၵၢတ်ႈတီႉ​ၵႃႈ​မီး​တင်း​သဵင်ႈ​တင်း​လူင်​ဢေႃႈ၊ ဝႃႈ​ၼင်ႇ​ၼႆ​ဢေႃႈ။
လွင်ႈ​ၸဝ်ႈ​ၶရိၸ်ႈ
(တူၺ်း၊ မႃႇ 12:35-37လူႉ 20:41-44)
41ၼႂ်း​မိူဝ်ႈ​ဢၼ်ၽႃႇရီႉသႄး​တင်း​လၢႆ ၸူႉ​ၵၼ်​တုမ်​ၵၼ်​ယူႇ​ၼၼ်ႉ​ၸိုင် ယေႇသူႉ​ၵေႃႈ​ထၢမ်​လႄႈ​ဝႃႈ၊ သူ​ထၢင်ႇ​ၸဝ်ႈ​ၶရိၸ်ႈ​ပဵၼ်​ၸိူဝ်ႉ​ၼင်ႇ​ႁိုဝ်။- 42ပဵၼ်​လုၵ်ႈ​ၽူႈ​လႂ်၊ မိူဝ်ႈ​ဢၼ်​ဝႃႈ​ၼင်ႇ​ၼႆ​ၸိုင်၊ ၶဝ်​ၼၼ်ႉ​လဝ်ႊ​လၢတ်ႈ​လႄႈ​ဝႃႈ၊ ပဵၼ်​လုၵ်ႈ​တႃႇဝိတ်ႈ​ၶႃႈ​ဢေႃႈ၊ ဝႃႈ​ၼင်ႇ​ၼႆ​ဢေႃႈ။- 43မၼ်း​ၸဝ်ႈ​ၵေႃႈ​လၢတ်ႈ​လႄႈ​ဝႃႈ၊ ပေႃး​ပဵၼ်​ၸိူဝ်ႉ​ၼင်ႇ​ၼႆ​ၸိုင်၊ ႁဵတ်း​သင်​တႃႇဝိတ်ႈ​ပႃး​တင်း​ဝီႉၺိၺ်ႇ​ၸဝ်ႈ​သေ​လႄႈ ႁွင်ႉ​ၸဝ်ႈ​ၶရိၸ်ႈ​လႄႈ​ဝႃႈ၊ ၸဝ်ႈ​ႁဝ်း၊ ဝႃႈ​ၼင်ႇ​ၼႆ​ၼင်ႇ​ႁိုဝ်။- 44ၵႂၢမ်း​ဢၼ်​တႃႇဝိတ်ႈ​ဝႃႈ​ၼၼ်ႉ​ၸမ်ႉ၊ ထႃႇဝရႃႉ​ၽြႃး​လၢတ်ႈ​တီႈ​ၸဝ်ႈ​ၵဝ်​ၶႃႈ​လႄႈ​ဝႃႈ၊ ၸူဝ်ႈ​ဢၼ်​ၵဝ်​ဢမ်ႇ​ပႆႇ​ဢဝ်​ရၢၼ်ႇ​သူႇ​မႂ်း​တင်း​လၢႆ ၶျႃး​ဝႆႉ​ႁႂ်ႈ​ပဵၼ်​တီႈ​တၢင်ႇ​တိၼ်​မႂ်း​ၼၼ်ႉ​ၸိုင်၊ ၼင်ႈ​ယူႇ​ၵႃႈ​တီႈ​ၽၢႆႇ​ၶႂႃ​ၵဝ်​တႃႉ၊ ဝႃႈ​ၼင်ႇ​ၼႆ​ဢေႃႈ။- 45ပိူဝ်ႈ​ၼႆ​လႄႈ ၸဝ်ႈ​ၶရိၸ်ႈ​ၼၼ်ႉ၊ ပေႃး​တႃႇဝိတ်ႈ​ႁွင်ႉ​ဝႃႈ ၸဝ်ႈ​ႁဝ်း၊ ဝႃႈ​ၼင်ႇ​ၼႆ​ၸိုင်၊ ပဵၼ်​လုၵ်ႈ​မၼ်း​ၸိူဝ်ႉ​ၼင်ႇ​ႁိုဝ်။ မိူဝ်ႈ​ဢၼ်​မၼ်း​ၸဝ်ႈ ထၢမ်​ဝႃႈ​ၸိူဝ်ႉ​ၼင်ႇ​ၼႆ​ၸိုင်၊- 46ၽူႈ​လႂ်​သေ​ၵေႃႉ​သေ​ၵူၼ်း ဢမ်ႇ​ၶိုၼ်း​လဝ်ႊ​လၢတ်ႈ​ၵႂၢမ်း​သေ​ၵမ်း​လႆႈ။ ၸႃႉ​ၸဵမ်​မိုဝ်ႉ​ဝၼ်း​ၼၼ်ႉ​လႄႈ​ၵမ်း​လိုၼ်း ၽူႈ​လႂ်​ဢမ်ႇ​ႁတ်း​လဝ်ႊ​ႁတ်း​ထၢမ်​တီႈ​မၼ်း​ၸဝ်ႈ သေ​ၵေႃႉ​သေ​ၵူၼ်း။

നിലവിൽ തിരഞ്ഞെടുത്തിരിക്കുന്നു:

မၢတ်ႈထႄႇ 22: CBMS

ഹൈലൈറ്റ് ചെയ്യുക

പങ്ക് വെക്കു

പകർത്തുക

None

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക