မၢတ်ႈထႄႇ 16

ယွၼ်းႁႂ်ႈႁဵတ်းၼႄတၼ်းၶူဝ်း

(တူၺ်း၊ မႃႇ 8:11-13။ လူႉ 12:54-56)

1မိူဝ်ႈၼၼ်ႉ ၽႃႇရီႉသႄး ဢိၵ်ႇတင်းၸတ်ႉတူႉၵႄးတင်းလၢႆ သုတ်ႉၸပ်းသုတ်ႉၸူးႁႂ်ႈလႆႈၸၢမ်းတူၺ်းယႃႉယူၵ်ႉမၼ်းၸဝ်ႈလႄႈ၊ ယွၼ်းႁႂ်ႈမၼ်းၸဝ်ႈၼႄပျႃး ၼီႉမိၵ်ႈလၢၵ်ႈၶၼႃႇၵႃႈၼိူဝ်ၽႃႉၵၢင်ႁၢဝ်ဢေႃႈ။- 2မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ သူၸၢင်ႈလၢတ်ႈၸၢင်ႈဝႃႈ၊ ႁူဝ်ၶမ်ႈၸမ်ႉ ပိူဝ်ႈဢၼ်ၼႃႈၽႃႉၵၢင်ႁၢဝ်လႅင်ၶွင်ႇဝႆႉလႄႈ ၽူၼ်တၵ်းပၢင်ႇလႅင်းသႂ်ဢေႃႈ။- 3ၵၢင်ၼႂ်ၸမ်ႉ၊ ပိူဝ်ႈဢၼ်ၽႃႈၽူၼ်ဢုမ်ႈ ဢိၵ်ႇတင်းၼႃႈၽႃႉၵၢင်ႁၢဝ်လႅင်ၵမ်ဝႆႉလႄႈ၊ မိူဝ်ႈၼႆႉၽူၼ်လူင်လူမ်းလူင်တၵ်းမႃးဢေႃႈ၊ ဝႃႈၼင်ႇၼႆဢေႃႈ။ ၼႃႈၽႃႉၵၢင်ႁၢဝ်ၼၼ်ႉၸိုင် သူၸၢင်ႈၶႆႈၸႂ်လႄႈႁူႉဢေႃႈ။ ၼီႉမိၵ်ႈလၢၵ်ႈၶၼႃႇၵၢပ်ႈၵႃႇလႃႉတင်းလၢႆၼႆႉၸိုင်၊ သူဢမ်ႇၸၢင်ႈၶႆႈၸႂ်လႄႈႁူႉႁိုဝ်။- 4ၵူၼ်းမဵဝ်းဢၼ်ႁၢႆႉမိူၵ်ႈလႄႈ ၸၢင်ႈလဵၼ်ႈၽူဝ်ဢွၼ်ႇၼႆႉ ယွၼ်းၼီႉမိၵ်ႈလၢၵ်ႈၶၼႃႇလႄႈ လိူဝ်သေၼီႉမိၵ်ႈလၢၵ်ႈၶၼႃႇ ယူဝ်းၼႃႉၼၼ်ႉ၊ ဢမ်ႇလႆႈၼႄပျႃး ၼီႉမိၵ်ႈလၢၵ်ႈၶၼႃႇဢၼ်လႂ်တီႈၶဝ်၊ ဝႃႈၼင်ႇၼႆသေယဝ်ႉ၊ မၼ်းၸဝ်ႈဢွၵ်ႇသေၵႃႈတီႈဢၼ်ၶဝ်မီးၼၼ်ႉလႄႈၵႂႃႇသေဢေႃႈ။

ၸိူဝ်ႉပႅင်ႈဢၼ်ၸၢင်ႈပဵၼ်ၽေး

(တူၺ်း၊ မႃႇ 8:14-21)

5မိူဝ်ႈဢၼ်တပႄးၸဝ်ႈတင်းလၢႆ ၵႂႃႇၵႃႈတီႈၽင်ႇၼမ်ႉၽၢႆႇပုၼ်ႉၼၼ်ႉၸိုင်၊ ၶဝ်လိုမ်းပႃးဢဝ်ၶဝ်ႈမုၼ်းၵႂႃႇဢေႃႈ။- 6ယေႇသူႉၵေႃႈလၢတ်ႈလႄႈဝႃႈ၊ ႁဵတ်းသတီႉလႄႈဝႄႈပႅတ်ႈၸိူဝ်ႉပႅင်ႈၽႃႇရီႉသႄး ဢိၵ်ႇတင်းၸတ်ႉတူႉၵႄးတင်းလၢႆတႃႉ၊ ဝႃႈၼင်ႇၼႆဢေႃႈ။- 7ၶဝ်ၵေႃႈ ၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်လၢတ်ႈၸႃၵၼ်လႄႈဝႃႈ၊ ပိူဝ်ႈဢၼ်ႁဝ်းဢမ်ႇပႃးၶဝ်ႈမုၼ်းမႃးလႄႈ မၼ်းၸဝ်ႈၸင်ႇဝႃႈယဝ်ႉ၊ ဝႃႈၼင်ႇၼႆဢေႃႈ။- 8ယေႇသူႉႁူႉသေယဝ်ႉ လၢတ်ႈလႄႈဝႃႈ၊ သူၸိူဝ်းဢၼ်ယုမ်ႇမၢတ်ႈၵေႇတင်းလၢႆၼႆႉဢိူၺ်း၊ ႁဵတ်းသင်လႄႈ ၵေႃႉၼိုင်ႈလႄႈၵေႃႉၼိုင်ႈ တွင်ႈထၢမ်လၢတ်ႈၸႃၵၼ် ၵွပ်ႈပိူဝ်ႈဢၼ်ဢမ်ႇပႃးၶဝ်ႈမုၼ်းမႃးၼၼ်ႉၼင်ႇႁိုဝ်။- 9သူယင်းဢမ်ႇဢဝ်သႂ်ႇၼႂ်းၸႂ်လႄႈ ၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ၵူၼ်းႁႃႈႁဵင်ၵိၼ်ၶဝ်ႈမုၼ်းႁႃႈႁူၺ်ႇလႄႈ သူၵဵပ်းဢဝ်ဢၼ်ၵိုတ်းဢၼ်ၵျၢၼ်ႇ လႆႈလၢႆပဵတ်ႈၼၼ်ႉ၊- 10ဢိၵ်ႇတင်းလွင်ႈဢၼ် ၵူၼ်းသီႇႁဵင်ၵိၼ်ၶဝ်ႈမုၼ်းၸဵတ်းႁူၺ်ႇလႄႈ သူၵဵပ်းဢဝ်ဢၼ်ၵိုတ်းဢၼ်ၵျၢၼ်ႇလႆႈလၢႆပဵတ်ႈၼၼ်ႉလႄႈ ယူႇလူးၵွၼ်ႇႁိုဝ်။- 11ႁဵတ်းႁိုဝ်လႄႈ သူဢမ်ႇႁူႉလွင်ႈဢၼ် ၵဝ်ဢမ်ႇဢဝ်လွင်ႈၶဝ်ႈမုၼ်းလၢတ်ႈတီႈသူၼၼ်ႉလႄႈယူႇၼင်ႇႁိုဝ်။ ၵူၺ်းၵႃႈ ဝႄႈပႅတ်ႈၸိူဝ်ႉပႅင်ႈ ၽႃႇရီႉသႄး ဢိၵ်ႇတင်းၸတ်ႉတူႉၵႄးတင်းလၢႆတႃႉ၊ ဝႃႈၼင်ႇၼႆဢေႃႈ။- 12မိူဝ်ႈၼၼ်ႉ တပႄးၸဝ်ႈၸိူဝ်းၼၼ်ႉၵေႃႈ ႁူႉလွင်ႈဢၼ်မၼ်းၸဝ်ႈဝႃႈ တၵ်းလႆႈဝႄႈပႅတ်ႈၸိူဝ်ႉပႅင်ႈၶဝ်ႈမုၼ်းဢမ်ႇၸႂ်ႈ၊ တၵ်းလႆႈဝႄႈပႅတ်ႈတၢင်းဢၼ် ၽႃႇရီႉသႄး ဢိၵ်ႇတင်းၸတ်ႉတူႉၵႄးတင်းလၢႆ သင်ႇသွၼ်ၼၼ်ႉၵူၺ်း ၼၼ်ႉဢေႃႈ။

ပေႇတရူႉႁပ်ႉၶၢမ်ႇၸဝ်ႈယေႇသူႉ

(တူၺ်း၊ မႃႇ 8:27-30။ လူႉ 9:18-21)

13မိူဝ်ႈဢၼ်ယေႇသူႉၵႂႃႇၵႃႈတီႈဝၢၼ်ႈၼွၵ်ႈၼႃးပၢင်ႇ ဝဵင်းၵေႇသရီႉၽီႉလိပ်ႉပူႉၼၼ်ႉၸိုင်၊ မၼ်းၸဝ်ႈထၢမ်တပႄးမၼ်းၸဝ်ႈၸိူဝ်းၼၼ်ႉလႄႈဝႃႈ၊ ၵူၼ်းတင်းလၢႆဝႃႈ လုၵ်ႈၵူၼ်းပဵၼ်ၽူႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊- 14ၶဝ်ၵေႃႈလဝ်ႊလၢတ်ႈလႄႈဝႃႈ၊ ၵမ်ႈၽွင်ႈဝႃႈ ပဵၼ်ယူဝ်းႁၢၼ်ႇဢၼ်ပၼ်ပပ်ႉတီႉၸမ်ႇၼၼ်ႉ၊ ဝႃႈၼင်ႇၼႆၶႃႈဢေႃႈ။ ၵမ်ႈၽွင်ႈၵေႃႈဝႃႈ ပဵၼ်ဢေးလီႉယႃႉ၊ ဝႃႈၼင်ႇၼႆၶႃႈဢေႃႈ။ ၵမ်ႈၽွင်ႈၵေႃႈဝႃႈ ပဵၼ်ယေႇရမီႉ၊ ဢမ်ႇၼၼ်ၵေႃႈ ပဵၼ်ပရေႃးၽႅတ်ႈသေပႃးပႃး၊ ဝႃႈၼင်ႇၼႆၶႃႈဢေႃႈ၊ ဝႃႈၼင်ႇၼႆဢေႃႈ။

15မၼ်းၸဝ်ႈသမ်ႉထၢမ်ထႅင်ႈလႄႈဝႃႈ၊ သူၸိုင် ဝႃႈၵဝ်ပဵၼ်ၽူႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊- 16သီႉမုၼ်ႇပေႇတရူႉၵေႃႈၶိုၼ်းလဝ်ႊလၢတ်ႈလႄႈဝႃႈ၊ ၸဝ်ႈႁဝ်းပဵၼ်ၸဝ်ႈၶရိၸ်ႈ လုၵ်ႈၽြႃးပဵၼ်ၸဝ်ႈ ဢၼ်ဢသၢၵ်ႈလိပ်းယူႇၶႃႈဢေႃႈ၊ ဝႃႈၼင်ႇၼႆဢေႃႈ။- 17ယေႇသူႉၵေႃႈၶိုၼ်းလၢတ်ႈလႄႈဝႃႈ၊ သီႉမုၼ်ႇပႃႇယူဝ်းၼႃႉဢိူၺ်း၊ မႂ်းမီးမင်ႇၵလႃႇဢေႃႈ။ လွင်ႈမၼ်းၸမ်ႉ ၼိူဝ်ႉလိူတ်ႈၽုၺ်ႇၼႄလွင်ႈတၢင်းၼႆႉဢမ်ႇၸႂ်ႈ၊ ပေႃႈၵဝ်ဢၼ်မီးယူႇၵႃႈၼိူဝ်မိူင်းၵၢင်ႁၢဝ်ၼၼ်ႉ ၽုၺ်ႇၼႄဢေႃႈ။- 18ၵဝ်သမ်ႉဝႃႈတီႈမႂ်းထႅင်ႈၸမ်ႉ၊ မႂ်းပဵၼ်ပေႇတရူႉဢေႃႈ။ ၵႃႈၼိူဝ်မၢၵ်ႇႁိၼ်ၼႆႉ ၵဝ်တၵ်းႁႂ်ႈၸိူဝ်းၸဝ်ႈတႄႇပဵၼ်ဢေႃႈ။ ၸိူဝ်းၸဝ်ႈၼၼ်ႉၸိုင်၊ ၽၵ်းတူမိူင်းမရၼႃႉတင်းလၢႆ ဢမ်ႇပႄႉဢမ်ႇၼႅင်ႇလႆႈ။- 19သေႃးမိူင်းၵၢင်ႁၢဝ်တင်းလၢႆၵေႃႈ ၵဝ်တၵ်းပၼ်တီႈမႂ်းဢေႃႈ။ ၵႃႈဢၼ်မႂ်းမတ်ႉၽုၵ်ႇဝႆႉၵႃႈၼိူဝ်လိၼ်မိူင်းၼႆႉၼၼ်ႉ၊ တၵ်းမတ်ႉၽုၵ်ႇဝႆႉယူႇၵႃႈၼိူဝ်မိူင်းၵၢင်ႁၢဝ်ပုၼ်ႉဢေႃႈ။ ၵႃႈဢၼ်မႂ်းပွႆႇလွတ်ႈၵႃႈၼိူဝ်လိၼ်မိူင်းၼႆႉၼၼ်ႉ၊ တၵ်းပွႆႇလွတ်ႈယူႇၵႃႈၼိူဝ်မိူင်းၵၢင်ႁၢဝ်ပုၼ်ႉဢေႃႈ၊ ဝႃႈၼင်ႇၼႆသေယဝ်ႉ၊- 20ၼင်ႇႁိုဝ်တၵ်းဢမ်ႇမွၵ်ႇလၢတ်ႈလွင်ႈဢၼ် မၼ်းၸဝ်ႈပဵၼ်ၸဝ်ႈၶရိၸ်ႈၼၼ်ႉ တီႈၽူႈလႂ်သေၵေႃႉသေၵူၼ်းၸိုင် မၼ်းၸဝ်ႈပိင်းၺၢပ်ႈဝႆႉတီႈတပႄးၸဝ်ႈၸိူဝ်းၼၼ်ႉဢေႃႈ။

ၸဝ်ႈယေႇသူႉႁေႃးလွင်ႈတၢင်းတၢႆမၼ်းၸဝ်ႈ

(တူၺ်း၊ မႃႇ 8:30-9:1။ လူႉ 9:22-27)

21ၸႃႉၸဵမ်မိူဝ်ႈၼၼ်ႉလႄႈ မၼ်းၸဝ်ႈၸႃႉၼႄပျႃးလွင်ႈဢၼ် တၵ်းလႆႈၵႂႃႇၵႃႈတီႈဝဵင်းယေႇရူႉသလႅမ်ႇ၊ လွင်ႈဢၼ်တၵ်းလႆႈၶၢမ်ႇၼမ်ၼႃႇလူင်လၢင် ၵႃႈၼႂ်းမိုဝ်းၵူၼ်းဢၼ်ပဵၼ်ၵႄႇပဵၼ်ႁူဝ်၊ ယိတ်ႈပရေႃးႁဵၵ်ႈလူင်တင်းၵူၼ်းထုတ်ႇၵျၢမ်းတင်းလၢႆ၊ လွင်ႈဢၼ်တၵ်းလႆႈၶၢမ်ႇတၢင်းဢၼ်ဢဝ်တၢႆ၊ လွင်ႈဢၼ်တၵ်းလုၵ်ႉၶိုၼ်းလိပ်း ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ တီႈတပႄးၸဝ်ႈၸိူဝ်းၼၼ်ႉဢေႃႈ။

22မိူဝ်ႈၼၼ်ႉ ပေႇတရူႉႁွင်ႉဢဝ်မၼ်းၸဝ်ႈ ၵႂႃႇႁူမ်ႈၵၼ်တင်းမၼ်းလႄႈ တၢင်ႇဢပႅတ်ႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ႁႂ်ႈလွင်ႈတၢင်းၼႆႉၵႆၵၼ်တင်းၸဝ်ႈႁဝ်းသေၵမ်းၶႃႈ။ ႁႂ်ႈလွင်ႈတၢင်းၼႆႉတၵ်းဢမ်ႇလႆႈပဵၼ်တီႈၸဝ်ႈႁဝ်းၶႃႈ၊ ဝႃႈၼင်ႇၼႆဢေႃႈ။- 23မၼ်းၸဝ်ႈဝၢႆႇၼႃႈၸူးသေလႄႈဝႃႈ၊ ၸႃႇတၢၼ်ႇဢိူၺ်း၊ သုတ်ႉပႃႈလင်ၵဝ်တႃႉ။ မႂ်းပဵၼ်လွင်ႈဢၼ်ၵဝ်တၵ်းၶီႈလိုတ်းလႄႈလူမ်ႉဢေႃႈ။ မႂ်းၸႂ်ဢမ်ႇၸပ်းဢမ်ႇၸွႆး လွင်ႈဢၼ်ၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈ၊ ၸႂ်ၸပ်းၸႂ်ၸွႆးလွင်ႈဢၼ်ၸၢပ်ႈသႅင်ႇၵၼ်တင်းၵူၼ်းတင်းလၢႆၵူၺ်းဢေႃႈ၊ ဝႃႈၼင်ႇၼႆဢေႃႈ။

24မိူဝ်ႈၼၼ်ႉ ယေႇသူႉၵေႃႈ လၢတ်ႈတီႈတပႄးၸဝ်ႈတင်းလၢႆလႄႈဝႃႈ၊ ပေႃးသေၵေႃႉသေၵူၼ်း မီးဢလူဝ်ႇၶႂ်ႈၸပ်းမႃးပႃႈလင်ၵဝ်ၸိုင်၊ ႁႂ်ႈမၼ်းပႄႇပႅတ်ႈတူဝ်ၸဝ်ႈၵဝ်ႇသေလႄႈ ႁၢပ်ႇဢဝ်သဝ်လၵ်းဝႃးၵၢပ်ႈ တူဝ်ၸဝ်ႈၵဝ်ႇၸွမ်းပႃႈလင်ၵဝ်တႃႉ။- 25လွင်ႈမၼ်းၸမ်ႉ ၽူႈလႂ်သေဢမ်ႇဝႃႈ၊ ၵေႃႉဢၼ်မီးဢလူဝ်ႇၶႂ်ႈၵႄႇသႄႇဢဝ်ဢသၢၵ်ႈတူဝ်ၸဝ်ႈၵဝ်ႇၼၼ်ႉ၊ ၵေႃႉၼၼ်ႉတၵ်းသုမ်းဢသၢၵ်ႈဢေႃႈ။ ၽူႈလႂ်သေဢမ်ႇဝႃႈ၊ ၵေႃႉဢၼ်သုမ်းဢသၢၵ်ႈၵွပ်ႈပိူဝ်ႈၵဝ်ၼၼ်ႉ၊ ၵေႃႉၼၼ်ႉတၵ်းထူပ်းဢသၢၵ်ႈတူဝ်ၸဝ်ႈၵဝ်ႇဢေႃႈ။- 26ၵူၼ်းသေၵေႃႉသေၵူၼ်း ပေႃးလႆႈဢုပ်ႉပိူင်ႇလေႃးၵႃႉၼႆႉတင်းသဵင်ႈတင်းလူင်လႄႈ ဝီႉၺိၺ်ႇတူဝ်ၸဝ်ႈၵဝ်ႇသုမ်းၸိုင် တၵ်းမီးၵျေးၸူးၵႃႈသင်။ တၵ်းဢဝ်တင်းဢုၵ်ႉၸႃႇ ဢၼ်လႂ်ထုတ်ႇဢဝ်ၸႂ်ဝီႉၺိၺ်ႇတူဝ်ၸဝ်ႈၵဝ်ႇ။- 27လုၵ်ႈၵူၼ်းတၵ်းမႃးလူၺ်ႈၵၼ်တင်းၽုင်းဢႃႇၼူႉၽေႃႇပေႃႈၸဝ်ႈ ဢိၵ်ႇတင်းတမၢၼ်ႇၵၢင်ႁၢဝ်တင်းလၢႆဢေႃႈ။ မိူဝ်ႈၼၼ်ႉ မၼ်းၸဝ်ႈတၵ်းတႅၼ်းပၼ်တီႈၵူႈၵေႃႉၵူႈၵူၼ်းႁင်းၽႂ်ႁင်းမၼ်း ၸွမ်းၵႃႈၼင်ႇဢၼ်တၢင်းၵမ်တၢင်းၵျၢင်ႉၶဝ်မီးၼၼ်ႉဢေႃႈ။- 28ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၵူၼ်းၵမ်ႈၽွင်ႈ ဢၼ်ၸုၵ်းယူႇၵႃႈတီႈၼႆႈၼႆႉ၊ ၸူဝ်ႈဢၼ်ၶဝ်ဢမ်ႇပႆႇလႆႈႁၼ်လုၵ်ႈၵူၼ်း မႃးတႄႇမိူင်းၸဝ်ႈၼၼ်ႉၸိုင်၊ တၵ်းဢမ်ႇလႆႈႁွတ်ႈထိုင်တၢင်းတၢႆ၊ ဝႃႈၼင်ႇၼႆဢေႃႈ။

നിലവിൽ തിരഞ്ഞെടുത്തിരിക്കുന്നു:

မၢတ်ႈထႄႇ 16: CBMS

ഹൈലൈറ്റ് ചെയ്യുക

പങ്ക് വെക്കു

പകർത്തുക