မႃႇလၶီႉ 1

တၢင်းႁၵ်ႉၽြႃးပဵၼ်ၸဝ်ႈဢၼ်မီးတီႈယႃႇၵုပ်ႈ

1ၼုၵ်ႈၵပၢတ်ႈ၊ ပျႃႇတိၵ်ႈ ဢၼ်ထႃႇဝရႃႉၽြႃး ဢဝ်မႃႇလၶီႉသေလႄႈ ပၼ်တီႈမဵဝ်းဢီႉသရေႇလႃႉၸမ်ႉ၊ ထႃႇဝရႃႉၽြႃးမီးဢမိင်ႉလႄႈဝႃႈ၊

2ၵဝ်ႁၵ်ႉသူယဝ်ႉ။ ၵူၺ်းၵႃႈ သူလၢတ်ႈလႄႈဝႃႈ၊ ၸဝ်ႈႁဝ်းႁၵ်ႉၶႃႈၸဝ်ႈႁဝ်းၶဝ် ၸိူဝ်ႉၼင်ႇႁိုဝ်တီႈၶႃႈ၊ ဝႃႈၼင်ႇၼႆဢေႃႈ။ ဢေးသေႃးၼၼ်ႉ ပဵၼ်ပီႈၸၢႆး ယႃႇၵုပ်ႈ ဢမ်ႇၸႂ်ႈႁိုဝ်။ ၼႂ်းဝႃႈၼၼ်သေၵေႃႈ ၵဝ်ႁၵ်ႉယႃႇၵုပ်ႈဢေႃႈ။- 3ၵဝ်ၸင်း ဢေးသေႃးလႄႈ ႁႂ်ႈလွႆ တီႈယူႇမၼ်းၸိူဝ်းၼၼ်ႉ ပဵၼ်တီႈဢၼ်လူႉလႅဝ်ပႅတ်ႈယဝ်ႉ။ ၵဝ်ဢဝ်လိၼ် တီႈဢၼ်မၼ်းၶၢမ်ႇဢမူၺ်ႇၼၼ်ႉ ဢၢပ်ႈပၼ်တီႈမႃလိၼ် ၵႃႈၼႂ်းထိူၼ်ႇတင်းလၢႆယဝ်ႉ၊ ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။- 4ပိၵ်ႉသမ်ႉၵူၼ်းမဵဝ်းဢေႇတုမ်ႇတင်းလၢႆလၢတ်ႈလႄႈဝႃႈ၊ ႁဝ်းလႆႈလူႉလႅဝ်ယဝ်ႉ။ ၵူၺ်းၵႃႈ ႁဝ်းသမ်ႉတၵ်းၶိုၼ်းတႄႇႁဵတ်း တီႈဢၼ်လူႉလႅဝ်ၸိူဝ်းၼၼ်ႉ ထႅင်ႈလူးၵွၼ်ႇဢေႃႈ၊ ဝႃႈၼင်ႇၼႆသေၵေႃႈ၊ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး မီးဢမိင်ႉၸမ်ႉ၊ ပိၵ်ႉသမ်ႉၶဝ်တႄႇႁဵတ်းသေၵေႃႈ ၵဝ်တၵ်းၵိူၼ်ႇယႃႉပႅတ်ႈဢေႃႈ။ ၵူၼ်းတၵ်း ဢွၼ်ၵၼ်ႁွင်ႉႁဵၵ်ႈၶဝ်ၼၼ်ႉလႄႈဝႃႈ၊ ၶွပ်ႇၼမ်ႉလႅၼ်လိၼ်မိူင်းတူႉၸရိူၵ်ႈ ဢိၵ်ႇတင်းမဵဝ်းၵူၼ်းဢၼ် ထႃႇဝရႃႉၽြႃးၸႂ်မႆႈၶႆႈၸႃႉတေႃႇ ယူႇသေႇသေႇ၊ ဝႃႈၼင်ႇၼႆဢေႃႈ။- 5မၢၵ်ႇတႃသူ တၵ်းႁၼ်လွင်ႈတၢင်းၼၼ်ႉလႄႈ သူတၵ်းလၢတ်ႈလႄႈဝႃႈ၊ ႁႂ်ႈထႃႇဝရႃႉၽြႃး မုၼ်ၽုင်းတၼ်းၶူဝ်းယႂ်ႇၼႃႇ ၵႃႈၼွၵ်ႈၶွပ်ႇၼမ်ႉလိၼ်လႅၼ်မိူင်းဢီႉသရေႇလႃႉ သေၵမ်းလူၺ်ႈ၊ ဝႃႈၼင်ႇၼႆဢေႃႈ။

ထႃႇဝရႃႉၽြႃးတၢင်ႇဢပႅတ်ႈတီႈယိတ်ႈပရေႃးႁဵၵ်ႈ

6လုၵ်ႈၸၢႆးၸၢင်ႈရူဝ်ႇသေႇၵူဝ်ယမ် ပေႃႈမၼ်းဢေႃႈ။ ၶႃႈၸၢင်ႈၵူဝ်ႁႄ ၸဝ်ႈမၼ်းဢေႃႈ။ ပေႃးၵဝ်ၼႆႉ ၸႂ်ႈပေႃႈၸိုင်၊ ၽူႈလႂ်ရူဝ်ႇသေႇၵူဝ်ယမ်ၵဝ်။ ပေႃးၵဝ်ၼႆႉ ၸႂ်ႈၸဝ်ႈၸိုင် ၽူႈလႂ်ၵူဝ်ႁႄၵဝ်၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး ထၢမ်တီႈသူဢၼ်ပဵၼ် ယိတ်ႈပရေႃးႁဵၵ်ႈ ဢၼ်ႁဵတ်းဢမ်ႇပေႃးၼင်ႇႁိုဝ် တီႈၼႃႇမႃႉၸိုဝ်ႈသဵင်ၸဝ်ႈၼၼ်ႉ ၸိူဝ်းၼႆႉဢေႃႈ။ ၵူၺ်းၵႃႈ သူထၢမ်လႄႈဝႃႈ၊ ၶႃႈၸဝ်ႈႁဝ်းၶဝ် ႁဵတ်းဢမ်ႇပေႃးၼင်ႇႁိုဝ် တီႈၼႃႇမႃႉၸိုဝ်ႈသဵင်ၸဝ်ႈႁဝ်း ၸိူဝ်ႉၼင်ႇႁိုဝ်ယဝ်ႉတီႈၶႃႈ၊ ဝႃႈၼင်ႇၼႆဢေႃႈ။- 7သူဢွၼ်ၵၼ်ဢဝ်တၢင်းၵိၼ် ဢၼ်ၵူဝ်ႈၵိူၵ်ႇၼၼ်ႉ ပုၵ်ႈၸေႃႇၵႃႈၼိူဝ်ယိတ်ႈပလၢင်ႇၵဝ်ယဝ်ႉ လူင်ပႄႇ။ သူထၢမ်လႄႈဝႃႈ၊ ၶႃႈၸဝ်ႈႁဝ်းၶဝ် ၶျႃးၸဝ်ႈႁဝ်းတူၵ်းတီႈတႅမ်ႇ ၸိူဝ်ႉၼင်ႇႁိုဝ်ယဝ်ႉ တီႈၶႃႈ၊ ဝႃႈၼင်ႇၼႆလႄႈ ၸၢင်ႈပဵၼ် ၵွပ်ႈပိူဝ်ႈဢၼ်သူဝႃႈ၊ ၶူင်ႇတီႈၵိၼ်ထႃႇဝရႃႉၽြႃးၼၼ်ႉ ယုတ်ႈယွၵ်းဢေႃႈ၊ ဝႃႈၼင်ႇၼႆၼၼ်ႉယဝ်ႉ။- 8ပေႃးသူဢဝ် တူဝ်ဢၼ်တႃမွတ်ႇၼၼ်ႉ ပုၵ်ႈၸေႃႇယိတ်ႈၸိုင်၊ မီးဢပႅတ်ႈဢမ်ႇၸႂ်ႈႁိုဝ်။ ပေႃးသူဢဝ် တူဝ်ဢၼ်တိၼ်ၵႅင်ႉ ဢိၵ်ႇတင်း တူဝ်ဢၼ်မီးတၢင်းၶႆႈတၢင်းပဵၼ်ၼၼ်ႉ ပုၵ်ႈၸေႃႇယိတ်ႈၸိုင်၊ မီးဢပႅတ်ႈဢမ်ႇၸႂ်ႈႁိုဝ်။ ဢဝ်သၢၵ်ႈပၼ်တီႈ ၶုၼ်မဵဝ်ႉဝုၼ်ႇမႂ်းသေၵမ်း။ မၼ်းတၵ်းထုၵ်ႇၸႂ်ၵျိူၵ်ႈၸႂ် တီႈမႂ်းႁိုဝ်။ တၵ်းထွၵ်ႈလူၺ်ႈၼႃႈမႂ်းႁိုဝ်။ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉဢေႃႈ။- 9မိူဝ်ႈလဵဝ်ၼႆႉ သူဢွၼ်ၵၼ်သူးတွင်း ၵႃႈတီႈၽၢႆႇၼႃႈထႃႇဝရႃႉၽြႃး ႁႂ်ႈမၼ်းၸဝ်ႈမီးတၢင်းဢၼ် ဢဵတ်းလူႁဝ်းသေၵမ်း။ လွင်ႈတၢင်းၼႆႉ ပဵၼ်မႃးၵွပ်ႈပိူဝ်ႈသူဢေႃႈ။ မၼ်းၸဝ်ႈတၵ်းထွၵ်ႈလူၺ်ႈၼႃႈသူ သေၵေႃႉသေၵူၼ်းႁိုဝ်။ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးမီးဢမိင်ႉဢေႃႈ။- 10ၼႂ်းသူၼႆႉ ၽူႈလႂ်တၵ်းဢိုတ်းၽၵ်းတူၵဝ်ၸိူဝ်းၼၼ်ႉ ႁႂ်ႈသူဢမ်ႇလႆႈသႂ်ႇၽႆး ၵႃႈၼိူဝ်ယိတ်ႈပလၢင်ႇၵဝ် လၢႆလၢႆလွၵ်ႇလွၵ်ႇ။ ၵဝ်ဢမ်ႇထုၵ်ႇၸႂ်ၵျိူၵ်ႈၸႂ်တီႈသူ။ ၵဝ်ဢမ်ႇႁပ်ႉတုင်းဢဝ် ၶိူင်ႈပုၵ်ႈၸေႃႇၵႃႈတီႈမိုဝ်းသူၼၼ်ႉ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးမီးဢမိင်ႉဢေႃႈ။- 11ၼႃႇမႃႉၸိုဝ်ႈသဵင်ၵဝ် တၵ်းလႆႈယႂ်ႇမျၢတ်ႈ ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ ဢဝ်ၵႃႈတီႈၸႃႉၸဵမ် တီႈဢၼ်ၵၢင်ဝၼ်းဢွၵ်ႇတေႃႇထိုင်ႁွတ်ႈ တီႈဢၼ်ၵၢင်ဝၼ်းတူၵ်းၼၼ်ႉဢေႃႈ။ တၵ်းလႆႈမီးတၢင်းဢၼ် ဢဝ်ၼၢမ်ႇသႃႇတုတ်ႇၽႆး တီႈၼႃႇမႃႉၸိုဝ်ႈသဵင်ၵဝ် ဢိၵ်ႇတင်း တၢင်းဢၼ်သၢၵ်ႈၵၢပ်ႈၶိူင်ႈပုၵ်ႈၸေႃႇ ဢၼ်မူတ်းသႂ်ၼၼ်ႉ ၵူႈတီႈၵူႈလႅၼ်ဢေႃႈ။ ၼႃႇမႃႉၸိုဝ်ႈသဵင်ၵဝ် တၵ်းလႆႈယႂ်ႇမျၢတ်ႈၼႃႇ ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်း တင်းလၢႆဢေႃႈ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉဢေႃႈ။- 12ၵူၺ်းၵႃႈ ၵွပ်ႈပိူဝ်ႈဢၼ်သူလၢတ်ႈလႄႈဝႃႈ၊ ၶူင်ႇတီႈၵိၼ်ထႃႇဝရႃႉၽြႃး ၼၼ်ႉ ပဵၼ်ဢၼ်ၵူဝ်ႈ၊ဢၼ်ၵိူၵ်ႇလႄႈ မၢၵ်ႇမၼ်းႁူင်းမၼ်း ဢၼ်ဝႃႈတၢင်းၵိၼ်မၼ်းၸဝ်ႈၼၼ်ႉ ယုတ်ႈယွၵ်းဢေႃႈ၊ ဝႃႈၼင်ႇၼႆၼၼ်ႉလႄႈ သူၶျႃးၶူင်ႇတီႈၵိၼ်မၼ်းၸဝ်ႈ တူၵ်းတီႈတႅမ်ႇယဝ်ႉ။- 13လႆႈသမ်ႉ သူလၢတ်ႈလႄႈဝႃႈ၊ လွင်ႈတၢင်းၼႆႉ ပဵၼ်ဢၼ်ယၢပ်ႇၸႂ်ၽိုတ်ႇၸႂ် ၼႃႇလူင်လၢင်လူင်ပႄႇ၊ ဝႃႈၼင်ႇၼႆသေလႄႈ ၸၢင်ႈဢွၼ်ၵၼ်ႁဵတ်း သဵင်ဢၼ်ပၢဝ်ႇသူပ်း ႁဵတ်းပျၢၵ်ႈဢေႃႈ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉဢေႃႈ။ သူဢွၼ်ၵၼ်ဢဝ် တူဝ်ဢၼ်ႁိမ်ဢဝ်ႁူင်ႇဢဝ်၊ တူဝ်ဢၼ်တိၼ်ၵႅင်ႉ၊ တူဝ်ဢၼ်မီးတၢင်းၶႆႈတၢင်းပဵၼ်ၼၼ်ႉ မႃးယဝ်ႉ။ သူဢွၼ်ၵၼ်ဢဝ် ၶိူင်ႈပုၵ်ႈၸေႃႇဢၼ်ၸိူဝ်ႉၼင်ႇၼၼ်ၼၼ်ႉ မႃးယဝ်ႉလူင်ပႄႇ။ ၵဝ်တၵ်းလႆႈၶၢမ်ႇဢဝ် ၵႃႈတီႈမိုဝ်းသူႁိုဝ်။ ဝႃႈၼင်ႇၼႆလႄႈ ထႃႇဝရႃႉၽြႃးထၢမ်ဢေႃႈ။- 14ႁႂ်ႈၵေႃႉဢၼ် ပႅတ်ႉလႅၼ်လႄႈ မီးသူဝ်းပေႃႈ ၵႃႈၼႂ်းၽုင်သူဝ်းမၼ်းယူႇသေၵေႃႈ ဝႆႉၵတီႉသဵတ်ႈၸႃႇသေလႄႈ ဢဝ်တူဝ်ဢၼ်ဢၢင်ႇၵႃႇလူႉၼၼ်ႉ ပုၵ်ႈၸေႃႇယိတ်ႈတီႈထႃႇဝရႃႉၽြႃးၼၼ်ႉ မီးဢႃႉမင်ႇၵလႃႇ သေၵမ်းလူၺ်ႈ။ ၵဝ်ၼႆႉပဵၼ်ၶုၼ်ႁေႃၶမ်း ဢၼ်ယႂ်ႇမျၢတ်ႈၼႃႇဢေႃႈ။ ၼႃႇမႃႉၸိုဝ်ႈသဵင်ၵဝ်ၼႆႉ ပဵၼ်တီႈဢၼ်လီၵူဝ်လီႁႄ ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းဢေႃႈ။

നിലവിൽ തിരഞ്ഞെടുത്തിരിക്കുന്നു:

မႃႇလၶီႉ 1: CBMS

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး നെക്കുറിച്ച് കൂടുതലറിയുക