ႁူဝ်းသေႇ 7

1မိူဝ်ႈဢၼ်ၵဝ် ႁဵတ်းႁႂ်ႈတၢင်းၸဵပ်း တၢင်းသႅပ်ႇဢီႉသရေႇလႃႉႁၢႆၼၼ်ႉၸိုင် ဢပႅတ်ႈဢေႇၽရိမ်ႇ ဢိၵ်ႇတင်း လွင်ႈတၢင်းဢၼ်ႁၢႆႉမိူၵ်ႈ ဢၼ်သမႃႇရီႉႁဵတ်းၼၼ်ႉ ထၢင်ႇသႃးပေႃႇမႃးဢေႃႈ။ ၶဝ်ၼၼ်ႉ ႁဵတ်းတၢင်းဢၼ် ပႅတ်ႉလႅၼ်ယဝ်ႉ။ ၽူႈလၵ်ႉၸၢင်ႈၶဝ်ႈ ၽၢႆႇတၢင်းၼႂ်းလႄႈ မုၵ်ႉၸူၼ်ၸိူဝ်းၸူၼ်ၼၼ်ႉ ၸၢင်ႈတိုၵ်းတေႃး ၽၢႆႇတၢင်းၼွၵ်ႈဢေႃႈ။- 2ၶဝ်ဢမ်ႇၶုၵ်းၸႂ်လႆႈ ၶႆႈၸႂ်ထူပ်း ၵႃႈၼႂ်းႁူဝ်ၸႂ်ၶဝ် လူၺ်ႈလွင်ႈဢၼ်ၵဝ်မၢတ်ႈတွင်း လွင်ႈတၢင်းဢၼ်ႁၢႆႉမိူၵ်ႈ ၵႃႈဢၼ်ၶဝ်ႁဵတ်းၼၼ်ႉ ဝႆႉယူႇၼၼ်ႉ။ တေႃႈၵႃႈမိူဝ်ႈလဵဝ်ၼႆႉ တၢင်းၵမ်တၢင်းၵျၢင်ႉ ၶဝ်ၼၼ်ႉ လွမ်ႉလဵပ်ႈႁွပ်ႈၶဝ်ဝႆႉယူႇသေလႄႈ မီးယူႇသိုဝ်ႈၼႃႈတႂ်ႈတႃၵဝ် ဢေႃႈ။

ဢၼ်ၵျၢမ်ႇပွင်ႁဵတ်းဢမ်ႇလီၵႃႈၼႂ်းႁေႃၶမ်း

3ၶဝ်ဢဝ်လွင်ႈတၢင်းဢၼ် ႁၢႆႉမိူၵ်ႈၶဝ်ၼၼ်ႉ ႁႂ်ႈၶုၼ်ႁေႃၶမ်း ၸူမ်းသိူဝ်းလႄႈ ဢဝ်ၵႂၢမ်းမူႉသႃႇ ႁႂ်ႈၶုၼ်တင်းလၢႆ ၸူမ်းသိူဝ်းဢေႃႈ။- 4ၶဝ်တင်းသဵင်ႈတင်းလူင်ၼၼ်ႉ ပဵၼ်ၵေႃႉဢၼ် ၽိတ်းပိူင်ႈလူၺ်ႈမေႇထုင်ႇ ဢၼ်ဢမ်ႇတြႃးလႄႈ ပဵၼ်မိူၼ်ၸိူဝ်ႉၼင်ႇ မုၵ်ႉၽႆးၽီးၽႆး ဢၼ်ၸဝ်ႈၶဝ်ႈ မုၼ်းသႂ်ႇၽႆးၼၼ်ႉဢေႃႈ။ မၼ်းယင်း ဢမ်ႇသူၼ်းၽႆးလႄႈ ယူႇၼိမ်ၼိမ်လီလီယူႇ ဢဝ်ၸႃႉၸဵမ်မိူဝ်ႈဢၼ် မၼ်းၼူတ်ႈၶဝ်ႈမုၼ်းလိပ်းယဝ်ႉလႄႈ တေႃႇထိုင်ႁွတ်ႈမၼ်းထၼ်ႈပေႃး ပွင်းၶိုၼ်ႈၼၼ်ႉဢေႃႈ။- 5ၼႂ်းဝၼ်းပွႆးဢၸႅၼ်ႇ ၶုၼ်ႁေႃၶမ်းႁဝ်းၼၼ်ႉ၊ ၶုၼ်တင်းလၢႆ မိင်းမဝ်းလူၺ်ႈ ဢၢႆႁႅင်းၼမ်ႉၸပိတ်ႈလႄႈ မၼ်းၸၢင်ႈယဵတ်ႇမိုဝ်းမၼ်း လူၺ်ႈၵၼ်တင်းၶဝ်ၸိူဝ်းဢၼ် ႁဵတ်းဢမ်ႇပေႃးၼင်ႇႁိုဝ် တီႈပိူၼ်ႈၼၼ်ႉဢေႃႈ။- 6ၼႂ်းမိူဝ်ႈဢၼ် ၶဝ်ယင်းတိုၵ်ႉ လွမ်တူၺ်းယူႇၼၼ်ႉၸိုင်၊ ၶဝ်ႁႂ်ႈႁူဝ်ၸႂ်ၶဝ် သုတ်ႉၸပ်းသုတ်ႉၸူး မိူၼ်ၸိူဝ်ႉၼင်ႇ မုၵ်ႉၽႆးၽီးၽႆးၼၼ်ႉယဝ်ႉ။ ပိၵ်ႉသမ်ႉ ၸဝ်ႈၶဝ်ႈမုၼ်းၶဝ်ၼၼ်ႉ ၼွၼ်းယူႇတင်းၶိုၼ်းသေၵေႃႈ ၶိင်ႇၵၢင်ၼႂ်ၽႆးၼၼ်ႉ မီးတၢင်းဢၼ်မႆႈယူႇ မိူၼ်ၸိူဝ်ႉၼင်ႇၽႆးဢၼ် လုၵ်ႉၶိုၼ်ႈယူႇဢေႃႈ။- 7ၶဝ်တင်းသဵင်ႈတင်းလူင်ၼၼ်ႉ မီးတၢင်းမႆႈ မိူၼ်ၸိူဝ်ႉၼင်ႇ မုၵ်ႉၽႆးၽီးၽႆးလႄႈ ၶဝ်ဢဝ်ၽႆးၶဝ်မႆႈၵူၼ်း ဢၼ်ၸီႇယၢင်ႇတြႃးၶဝ် တင်းလၢႆပႅတ်ႈယဝ်ႉ။ ၶုၼ်ႁေႃၶမ်းၶဝ် တင်းသဵင်ႈတင်းလူင်ၼၼ်ႉ လူမ်ႉတူၵ်းယဝ်ႉ။ ၼႂ်းၶဝ်ၼၼ်ႉ ဢမ်ႇမီးၵေႃႉဢၼ် သႅၼ်ႇႁွင်ႉႁႃၵဝ် သေၵေႃႉသေၵူၼ်း။

မဵဝ်းဢီႉသရေႇလႃႉလႄႈၵူၼ်းတၢင်ႇၸိူဝ်ႉတၢင်ႇမဵဝ်း

8 ဢေႇၽရိမ်ႇ ႁူမ်ႈပွင်းလေႃးလႄး လူၺ်ႈၵၼ်တင်း ၵူၼ်းတၢင်ႇၸိူဝ်ႉတၢင်ႇၶိူဝ်း တင်းလၢႆ ယူႇဢေႃႈ။ ဢေႇၽရိမ်ႇ ပဵၼ်ၶႅပ်းၶဝ်ႈမုၼ်း ဢၼ်ၽဝ်ၽၢၵ်ႇၼိုင်ႈ ၵူၺ်းလႄႈ ဢမ်ႇၽိုၼ်ႉဢမ်ႇဝၢႆႇ ၼၼ်ႉဢေႃႈ။- 9မၼ်းယင်းဢမ်ႇႁူႉလႄႈ ၵူၼ်းတၢင်ႇသိုင်ႇတၢင်ႇမိူင်း တင်းလၢႆ ဢွၼ်ၵၼ်ၵိၼ်ႁႅင်းမၼ်းယဝ်ႉယဝ်ႉ။ မၼ်းယင်းဢမ်ႇႁူႉလႄႈ ၶူၼ်ႁူဝ်ဢၼ်ႁွၵ်ႇဢၼ်ၶၢဝ် ၸွတ်ႇတူဝ်ႈဝႆႉ ၵႃႈၼိူဝ်ႁူဝ်မၼ်းယဝ်ႉယဝ်ႉ။- 10ပိၵ်ႉသမ်ႉမႃႇၼႃႉၸႂ်သုင် မဵဝ်းဢီႉသရေႇလႃႉ ၶၢမ်ႇသၢၵ်ႈသေႇယူႇ သိုဝ်ႈၼႃႈတႂ်ႈတႃ တူဝ်ၸဝ်ႈၵဝ်ႇသေၵေႃႈ၊ မဵဝ်းၼၼ်ႉ ဢမ်ႇၶိုၼ်းမႃးၸူးတီႈ ထႃႇဝရႃႉၽြႃး ၽြႃးပဵၼ်ၸဝ်ႈၶဝ်။ ဢမ်ႇထွၵ်ႈလူၺ်ႈလွင်ႈတၢင်း ၵႃႈမီးၸိူဝ်းၼၼ်ႉ သေလႄႈ ႁႃဢဝ်မၼ်းၸဝ်ႈ။- 11ဢေႇၽရိမ်ႇၼၼ်ႉ ပဵၼ်မိူၼ်ၸိူဝ်ႉၼင်ႇ ၼူၵ်ႉတူႈဢၼ်မိူၵ်ႈၼၼ်ႉလႄႈ ဢမ်ႇမီးၺၢၼ်ႇလႃးလႃး။ ၶဝ်ၸၢင်ႈသႅၼ်ႇႁွင်ႉႁႃ မိူင်းဢေႇၵိပ်ႉတူႉလႄႈ ၸၢင်ႈၵႂႃႇပိုင်ႈၵႂႃႇဢိင် မိူင်းဢႃႇသူႉရီႉဢေႃႈ။- 12ၼႂ်းမိူဝ်ႈဢၼ်ၶဝ် ယင်းတိုၵ်ႉၵႂႃႇယူႇၼၼ်ႉ၊ ၵဝ်တၵ်းဢဝ်တူင်ႇႁႅဝ်ႉ တူင်ႇၶိုမ်းၵဝ်လႄႈ သုမ်ႇႁူမ်ႇၶဝ်ဢေႃႈ။ ၵဝ်တၵ်းဢဝ်ၶဝ် ၶျႃးတူၵ်းတီႈတႅမ်ႇ မိူၼ်ၸိူဝ်ႉၼင်ႇ ၼူၵ်ႉၼိူဝ်ၽႃႉၵၢင်ႁၢဝ် ၼၼ်ႉဢေႃႈ။ ၵဝ်တၵ်းသင်ႇသွၼ် သုင်းမႃႉၶဝ် ၸွမ်းၵႃႈၼင်ႇဢၼ် ပရဵၵ်ႈသၢတ်ႈၶဝ် လႆႈငိၼ်းယဝ်ႉ ၼၼ်ႉဢေႃႈ။- 13ၶဝ်ၼၼ်ႉ မီးဢႃႉမင်ႇၵလႃႇ ၵွပ်ႈပိူဝ်ႈဢၼ် ၶဝ်ဢွၵ်ႇၵႂႃႇသေ ၵႃႈတီႈၵဝ်ၼၼ်ႉဢေႃႈ။ ၶဝ်ပဵၼ်တီႈပုၼ်ႈဢၼ် တၵ်းယႃႉၽဵဝ်ႈပႅတ်ႈ ၵွပ်ႈပိူဝ်ႈဢၼ် ၶဝ်ပုင်ႇၵၢၼ်ႇၵဝ်လႄႈ ပိၵ်ႉသမ်ႉၵဝ် ထုတ်ႇဢဝ်ၶဝ်သေၵေႃႈ ၶဝ်လၢတ်ႈၵႂၢမ်းမူႉသႃႇ ယူႇၽၢႆႇၼိုင်ႈတင်းၵဝ်ဢေႃႈ။- 14ၶဝ်ဢမ်ႇပႃးၸႂ်ၸေႇတၼႃႇ သေလႄႈ ႁွင်ႉႁႃၵဝ်။ ၶဝ်ဢွၼ်ၵၼ်ပွင်ႉၶၢင်း ပွင်ႉမိူၼ်ႇယူႇ ၵႃႈၼိူဝ်ၵူႇတီႈၼွၼ်း ၶဝ်ဢေႃႈ။ ၶဝ်ၸူႉၵၼ်တုမ်ၵၼ် ႁႂ်ႈလႆႈၶဝ်ႈသၢၼ်ၶဝ်ႈပိူၵ်ႇ ၼမ်ႉၸပိတ်ႈလႄႈ ဢွၼ်ၵၼ်ပုင်ႇၵၢၼ်ႇၵဝ်ဢေႃႈ။- 15ပိၵ်ႉသမ်ႉၵဝ် သင်ႇသွၼ်သုင်းမႃႉၶဝ် ႁႂ်ႈၶႅၼ်မိုဝ်းၶဝ် ၵႅၼ်ႇၶႅင်သေၵေႃႈ၊ ၶဝ်ၵျၢမ်ႇပွင် တၢင်းၵျၢမ်ႇတၢင်းပွင် ဢၼ်ဢမ်ႇလီ ယူႇၽၢႆႇၼိုင်ႈတင်းၵဝ်ဢေႃႈ။- 16ပိၵ်ႉသမ်ႉၶဝ်ၶိုၼ်းမႃးသေၵေႃႈ ၶဝ်ဢမ်ႇၶိုၼ်းမႃးၸူး တီႈၸဝ်ႈဢၼ်သုင်မျၢတ်ႈၼႃႇသေပိူၼ်ႈ ၼၼ်ႉ။ ၶဝ်ပဵၼ်ၸိူဝ်ႉၼင်ႇ ၵၢင်ႇဢၼ်ၸၢင်ႈလိင်ႇ ၸၢင်ႈလႅၼ်ၼၼ်ႉဢေႃႈ။ ၶုၼ်ၵဝ်ၸိူဝ်းၼၼ်ႉ တၵ်းလူမ်ႉတၢႆလူၺ်ႈလၢပ်ႇလူၺ်ႈလႅဝ်း ၵွပ်ႈပိူဝ်ႈတၢင်းဢၼ် ၶဝ်သူပ်းၸႃးငႃးၽၢႆၼၼ်ႉဢေႃႈ။ လွင်ႈတၢင်းၼႆႉ တၵ်းလႆႈပဵၼ်တၢင်းဢၼ် သႄႉသွမ်း ဢၼ်ၶဝ်တၵ်းလႆႈၶၢမ်ႇ ၵႃႈတီႈမိူင်းဢေႇၵိပ်ႉတူႉၼၼ်ႉဢေႃႈ။

നിലവിൽ തിരഞ്ഞെടുത്തിരിക്കുന്നു:

ႁူဝ်းသေႇ 7: CBMS

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး നെക്കുറിച്ച് കൂടുതലറിയുക