ႁူဝ်းသေႇ 4

ထႃႇဝရႃႉၽြႃးမီးဢမူႉၵၼ်တင်းမဵဝ်းဢီႉသရေႇလႃႉ

1ၵူၼ်းမဵဝ်းဢီႉသရေႇလႃႉၶဝ်ဢိူၺ်း၊ ဢွၼ်ၵၼ်ထွမ်ႇဢဝ် ဢမိင်ႉထႃႇဝရႃႉၽြႃးတႃႉ။ ထႃႇဝရႃႉၽြႃးမီးလွင်ႈဢၼ် တၵ်းထူပ်းတြႃးၵၼ်တင်းၵူၼ်းဝၢၼ်ႈ ၵူၼ်းမိူင်းတင်းလၢႆဢေႃႈ။ လွင်ႈမၼ်းၸမ်ႉ ၵႃႈတီႈမိူင်းၼၼ်ႉ ဢမ်ႇမီးသဵတ်ႈၸႃႇ၊ ဢမ်ႇမီးၵရူႉၼႃႇ၊ ဢမ်ႇမီးတၢင်းဢၼ်ႁူႉၸၵ်းၽြႃးပဵၼ်ၸဝ်ႈလႃးလႃး။- 2မီးတၢင်းဢၼ်ၵိၼ်ႇလႃႇ၊ တၢင်းဢၼ်လၢတ်ႈၵႂၢမ်းမူႉသႃႇ၊ တၢင်းဢၼ်ဢဝ်ဢသၢၵ်ႈၵူၼ်းတၢႆ၊ တၢင်းဢၼ်လၵ်ႉဢုၵ်ႉၸႃႇပိူၼ်ႈ၊ တၢင်းဢၼ်ၽိတ်းပိူင်ႈမေးပိူၼ်ႈ ၸိူဝ်းၼၼ်ႉၵူၺ်းဢေႃႈ။ ၽုတ်းဢွၵ်ႇလၼ်ဢွၵ်ႇလႄႈ လိူတ်ႈသိုပ်ႇလိူတ်ႈၵႂႃႇတိၵ်းတိၵ်းဢေႃႈ။- 3ပိူဝ်ႈၼႆလႄႈ မိူင်းတၵ်းလႆႈတမ်ႇၼွႆႉမွင်ၸႂ်လႄႈ ၶဝ်ၵႃႈဢၼ်ယူႇၵႃႈၼႂ်း မိူင်းၼၼ်ႉၸိူဝ်းၼၼ်ႉ ဢိၵ်ႇတင်း တူဝ်ထိူၼ်ႇႁၢႆႉတင်းလၢႆ တင်းၼူၵ်ႉၵၢင်ႁၢဝ်တင်းလၢႆ တၵ်းႁႅင်းလဵၵ်ႉႁႅင်းၵေႇၵႂႃႇလႄႈ ပႃပၢင်ႇလၢႆႇတင်းလၢႆ တၵ်းသဵင်ႈမူတ်းၵႂႃႇဢေႃႈ။

4ၼႂ်းဝႃႈၼၼ်သေၵေႃႈ ယႃႇပေႁႂ်ႈၽူႈလႂ် လႆႈႁႄႉလႆႈၶႅၼ်။ ယႃႇပေႁႂ်ႈၽူႈလႂ် လႆႈသင်ႇသွၼ်သုင်းမႃႉ။ လွင်ႈမၼ်းၸမ်ႉ ၵူၼ်းမဵဝ်းလဵဝ်ၵၼ်တင်းမႂ်းၸိူဝ်းၼၼ်ႉ ပဵၼ်ၸိူဝ်ႉၼင်ႇ ၵေႃႉဢၼ်ႁဵတ်းၶတ်းၵၼ်တင်း ယိတ်ႈပရေႃးႁဵၵ်ႈၼၼ်ႉဢေႃႈ။- 5ပိူဝ်ႈၼႆလႄႈ မႂ်းတၵ်းလႆႈလူမ်ႉတၢႆတူၵ်း ၶိင်ႇၵၢင်ဝၼ်းလႄႈ ပရေႃးၽႅတ်ႈၵေႃႈ တၵ်းလႆႈလူမ်ႉလႆႈတူၵ်း လူၺ်ႈၵၼ်တင်းမႂ်း ၶိင်ႇၵၢင်ၶိုၼ်းဢေႃႈ။ မႄႈမႂ်းၵေႃႈ ၵဝ်တၵ်းယႃႉပႅတ်ႈဢေႃႈ။- 6ၵူၼ်းၵဝ်တင်းလၢႆ လႆႈသုမ်းလႆႈၸွမ်း ၵွပ်ႈပိူဝ်ႈဢၼ် ပိင်ႇၺႃႇၵေႇလႄႈ ၵဝ်တၵ်းပႄႇမႂ်းပႅတ်ႈ ႁႂ်ႈမႂ်းဢမ်ႇလႆႈပဵၼ် ယိတ်ႈပရေႃးႁဵၵ်ႈၶဝ် ၵွပ်ႈပိူဝ်ႈဢၼ် မႂ်းပႄႇပိင်ႇၺႃႇပႅတ်ႈၼၼ်ႉဢေႃႈ။ ၵဝ်တၵ်းလူင်လိုမ်း လုၵ်ႈလၢင်းမႂ်းတင်းလၢႆ ပႅတ်ႈ ၵွပ်ႈပိူဝ်ႈဢၼ် မႂ်းလူင်လိုမ်းတြႃး ၽြႃးပဵၼ်ၸဝ်ႈမႂ်းပႅတ်ႈၼၼ်ႉဢေႃႈ။- 7ၶဝ်ၼၼ်ႉ ၸွမ်းၵႃႈၼင်ႇဢၼ် ၶဝ်ယႂ်ႇၽႄႈၼမ်ၵိုၼ်းမႃး ၼၼ်ႉသေလႄႈ ၽိတ်းပိူင်ႈၵဝ်ယဝ်ႉ။ ပိူဝ်ႈၼႆလႄႈ ၵဝ်တၵ်းႁႂ်ႈမုၼ်ၽုင်းၶဝ်ၼၼ်ႉ ပဵၼ်တၢင်းဢၼ်ဢူၵ်းဢၼ်ဢၢႆဢေႃႈ။- 8ၶဝ်ၸၢင်ႈၵိၼ်ဢပႅတ်ႈ ၵူၼ်းၵဝ်တင်းလၢႆယူႇသေလႄႈ ၸႂ်ၸပ်းၸႂ်ၸွႆး တူႉၸရိူၵ်ႈၼၼ်ႉယူႇဢေႃႈ။- 9ပိူဝ်ႈၼႆလႄႈ တၵ်းလႆႈပဵၼ်တီႈယိတ်ႈပရေႃးႁဵၵ်ႈ မိူၼ်ၸိူဝ်ႉၼင်ႇဢၼ်ပဵၼ် တီႈၵူၼ်းတင်းလၢႆ ၼၼ်ႉဢေႃႈ။ ၵဝ်တၵ်းပၼ်တၢမ်ႇ ၸွမ်းၵႃႈၼင်ႇ သဵၼ်ႈတၢင်းၶဝ်မီးၼၼ်ႉလႄႈ ပၼ်ဢၵျူဝ်းဢပႅတ်ႈ ၸွမ်းၵႃႈၼင်ႇဢၼ်ၶဝ် ႁဵတ်းႁင်းၽႂ်ႁင်းမၼ်းၼၼ်ႉဢေႃႈ။- 10ၶဝ်ၼၼ်ႉတၵ်းၵိၼ်လႄႈ ဢမ်ႇလႆႈဢိမ်ႇလႆႈတဵမ်။ ၶဝ်တၵ်းႁဵတ်းမေႇထုင်ႇဢၼ်ဢမ်ႇတြႃးလႄႈ ဢမ်ႇလႆႈယႂ်ႇၽႄႈ ၼမ်ၵိုၼ်းမႃး။ လွင်ႈမၼ်းၸမ်ႉ ၶဝ်ထၢတ်ႇသေပေႃးသေတၢင်းဢၼ်ဝႆႉဢမူႉ လူၺ်ႈလွင်ႈ ထႃႇဝရႃႉၽြႃးၼၼ်ႉယဝ်ႉယဝ်ႉ။

ၵူၼ်းဢီႉသရေႇလႃႉဝႆႈသႃၽြႃးတၢင်ႇသူႇတၢင်ႇပႃး

11တၢင်းဢၼ် မေႇထုင်ႇဢၼ်ဢမ်ႇတြႃး ဢိၵ်ႇတင်း ၼမ်ႉၸပိတ်ႈ တင်းၼမ်ႉၸပိတ်ႈဢၼ်မႂ်ႇ ၸိူဝ်းၼၼ်ႉ ၸၢင်ႈႁႂ်ႈႁူဝ်ၸႂ် မဝ်းမိင်းလိုမ်းတူဝ်ဢေႃႈ။- 12ၵူၼ်းၵဝ်တင်းလၢႆ ၸၢင်ႈတိူင်ႇပၢင်ႇတွင်ႈထၢမ် လူၺ်ႈၵၼ်တင်းၼိူဝ်ႉမႆႉလႄႈ ၶွၼ်ႉတဝ်ႉၶဝ်ၼၼ်ႉ ၸၢင်ႈပၼ်တၢင်းၵျၢမ်ႇတၢင်းပွင်တီႈၶဝ်ဢေႃႈ။ ၸႂ်တၢင်းဢၼ်ၶဝ်ႁဵတ်းမေႇထုင်ႇ ဢၼ်ဢမ်ႇတြႃးၼၼ်ႉ ႁႂ်ႈၶဝ်ၽိတ်းတၢင်းပိူင်ႈတၢင်းၵႂႃႇလႄႈ ၶဝ်ယင်းဢမ်ႇယူႇ ၵႃႈတီႈၽြႃးပဵၼ်ၸဝ်ႈၶဝ်၊ ၸၢင်ႈႁဵတ်းမေႇထုင်ႇ ဢၼ်ဢမ်ႇတြႃးယူႇဢေႃႈ။- 13ၶဝ်ၸၢင်ႈပုၵ်ႈၸေႃႇယိတ်ႈ ၵႃႈၼိူဝ်လွႆတင်းလၢႆလႄႈ ဢဝ်ၼၢမ်ႇသႃႇ တုတ်ႇၽႆးၵႃႈၼိူဝ်ၵုင်းတင်းလၢႆ၊ ၵႃႈတႂ်ႈတူၼ်ႈလီႉပၼႃႉ၊ တူၼ်ႈဢေးလႃႇ ဢၼ်ႁူမ်ႈလီ ၵတ်းလီၸိူဝ်းၼၼ်ႉဢေႃႈ။ ပိူဝ်ႈၼႆလႄႈ လုၵ်ႈယိင်းသူၸိူဝ်းၼၼ်ႉ ၸၢင်ႈႁဵတ်းမေႇထုင်ႇဢၼ်ဢမ်ႇတြႃးလႄႈ လုၵ်ႈပႂ်ႉသူၸိူဝ်းၼၼ်ႉ ၸၢင်ႈလဵၼ်ႈၽူဝ်ဢွၼ်ႇဢေႃႈ။- 14ၵဝ်တၵ်းဢမ်ႇပၼ်တၢမ်ႇ တီႈလုၵ်ႈယိင်းသူ ၸိူဝ်းၼၼ်ႉ ၼႂ်းမိူဝ်ႈဢၼ်ၶဝ်ႁဵတ်းမေႇထုင်ႇ ဢၼ်ဢမ်ႇတြႃးၼၼ်ႉ ဢိၵ်ႇတင်း တီႈလုၵ်ႈပႂ်ႉသူၸိူဝ်းၼၼ်ႉ ၼႂ်းမိူဝ်ႈဢၼ် ၶဝ်လဵၼ်ႈၽူဝ်ဢွၼ်ႇၼၼ်ႉ။ လွင်ႈမၼ်းၸမ်ႉ ၵူၼ်းၸၢႆးတင်းလၢႆ ၸၢင်ႈဢွၼ်ၵၼ် ၸုၼ်ႉပႅတ်ႈမေးၶဝ်သေလႄႈ ႁူမ်ႈပွင်းလူၺ်ႈၵၼ်တင်း မႄႈမွၵ်ႇယႃႈလႄႈ ပုၵ်ႈၸေႃႇယိတ်ႈလူၺ်ႈၵၼ်တင်းမႄႈၽႄႉမႄႈလေႃတင်းလၢႆ ဢေႃႈ။ ၵွပ်ႈပိူဝ်ႈၼင်ႇၼၼ်လႄႈ ၵူၼ်းဢၼ်ဢမ်ႇမီးပိင်ႇၺႃႇၸိူဝ်းၼၼ်ႉ တၵ်းလႆႈသုမ်းလႆႈၸွမ်းဢေႃႈ။- 15မဵဝ်းဢီႉသရေႇလႃႉဢိူၺ်း၊ ပိၵ်ႉသမ်ႉမႂ်းႁဵတ်း မႄႈမွၵ်ႇယႃႈသေၵေႃႈ ယႃႇပေႁႂ်ႈမဵဝ်း ယူႉတႃႉၽိတ်းပိူင်ႈသေၵမ်း။ သူယႃႇပေဢွၼ်ၵၼ် သုတ်ႉၸပ်းသုတ်ႉၸူး ၵႃႈတီႈဝဵင်းၵီႉလႃႉၵႃႇလႃႉ။ ယႃႇပေဢွၼ်ၵၼ် ၶိုၼ်ႈၸူးၵႃႈတီႈဝဵင်းပေႇသဝႅၼ်ႇလႄႈ တိူင်ႇဝႃႈၵိၼ်ႇဝႃႈ လႄႈဝႃႈ၊ ၵႃႈၼင်ႇဢၼ် ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉ၊ ဝႃႈၼင်ႇၼႆၼၼ်ႉ၊- 16မဵဝ်းဢီႉသရေႇလႃႉၼၼ်ႉ ၸၢင်ႈႁဵတ်းဢမ်ႇထုၵ်ႇၶတ်းၵၼ် မိူၼ်ၸိူဝ်ႉၼင်ႇ ဝူဝ်းမႄႈသိုဝ်ႇ ဢၼ်ၸၢင်ႈတိုတ်ႉၸၢင်ႈတိုဝ် ၼၼ်ႉဢေႃႈ။ တေႃႈလဵဝ်ၼႆႉ ထႃႇဝရႃႉၽြႃးတၵ်းလဵင်ႉထိင်းၶဝ် မိူၼ်ၸိူဝ်ႉၼင်ႇဢၼ်လဵင်ႉထိင်းသူဝ်းဢွၼ်ႇ ၵႃႈၼႂ်းတီႈဢၼ်ၵႂၢင်ႈလီလႃးလီၼၼ်ႉဢေႃႈ။- 17ဢေႇၽရိမ်ႇၼၼ်ႉ မီးတၢင်းဢၼ်ၸပ်းၸွမ်း တီႈရုၵ်ႈထူႉတင်းလၢႆ ယူႇဢေႃႈ။ ယႃႇမၼ်းတႃႉ။- 18ၶဝ်ပူၼ်ႉၶိင်ႇ ဢၼ်ၶဝ်ၶၢမ်ႇပွႆးၵိၼ်ပွႆးၶူပ်း ၼၼ်ႉယဝ်ႉ။ ၶဝ်ဢွၼ်ၵၼ် ႁဵတ်းမေႇထုင်ႇဢၼ်ဢမ်ႇတြႃးယူႇ ၶိူဝ်းၶိူဝ်းယႂ်းယႂ်းယဝ်ႉ။ ၶုၼ်ၶဝ်ၸိူဝ်းၼၼ်ႉ ဢွၼ်ၵၼ်ၸႂ်ၸပ်းၸႂ်ၸွႆး လွင်ႈတၢင်းဢၼ် လီဢူၵ်းလီဢၢႆၼၼ်ႉယူႇယဝ်ႉ။- 19လူမ်းဢဝ်ပိၵ်ႇတူဝ်ၸဝ်ႈၵဝ်ႇတင်းလၢႆ ပတ်ႉထူဝ်းလႄႈ ပႃးၵႂႃႇဢေႃႈ။ ၶဝ်ၼၼ်ႉ တၵ်းဢူၵ်းဢၢႆ ၵွပ်ႈပိူဝ်ႈယိတ်ႈ ဢၼ်ၶဝ်ပုၵ်ႈၸေႃႇ ၸိူဝ်းၼၼ်ႉဢေႃႈ။

നിലവിൽ തിരഞ്ഞെടുത്തിരിക്കുന്നു:

ႁူဝ်းသေႇ 4: CBMS

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး നെക്കുറിച്ച് കൂടുതലറിയുക