ማርቈስት ወንጌል 5

ፈወነ 5

እየሱስ ጋኒናን ጭጘው እጅር ቓዘጘ

(ማቲ. 8፡28-34፤ ሉቃ. 8፡26-39)

1ባኽርድየንትም ከርጝ ገርገሲኑን የነው ኻግሪዝጐ ተርⶖ። 2እየሱስም ታኰይስ ጊመጘ ርኵስ መንፈስዝ ፃይሸው እጅር መቃቭር ስፍረይስ ፍ ዲምቅሽጠ ጝጐ ተሩ። 3እኒን እጅርድ መቃቭር ስፍረይል ዊኑ ፅበውድ፤ ኣውማውቅ ጝት ሰንስለትዝ እኳ እፅቍጠ ቸላውም ዊኑ። 4እክሰው ግርየም ልኵ እፅቈነ ብረትዝመ ሰንሰለትዝ እፅቍሻ ዊኑ፤ ዊገድ ግን ጝናኒዙ ሰንሰለትድ ቅዛⶖ፣ ጝሊኲዙ ብረትድየንትም ቅጥዝጥዝ ሸው ማላ ዊኑ፤ ጝት ፃይ ችብስጠ ቸለው ኣውማውም ዊኒየው። 5መቃቭራንዝመ ኣብቕዝ ማኽሊል ኻር ጊርቅ ጅልዋ፣ ቓፃⶖ፣ ጝሰወነትድየንትም ቕርጘዝ ቀቨቀቫ ዊኑ።

6እጅርድየንም እየሱስት እክልስ ቓለጘ ጝጐ ውጢ ጝበዊል ግርቨቭሽ ሲግዱ። 7ኽየው ድመዝም ቓፅ፦ «ልውል እደረት ዅር እየሱስወ! ክት ይጅቅ ውር ውላ ፃይረር? ይት ኣሰቃይዛይረጘ እደረስ ፃይስኩን» ዩ። 8እኒንት የውድም እየሱስ፦ «ርኵስ መንፈስ ክተ! እን እጅሪስ ፍ!» የው ኣዝ ዊናንስቅ የጝ።

9እየሱስም፦ «ክሽⶖድ ኣው የጝ?» የው ዋቕሩ፤ እጅርድም፦ «ንቕፀቍ ኣናንስቅ ይሽድ ለጊወን#5፡9 ለጊወን፦ የነውድ ሰራዊት የነት ይጝ። የጝ» ዩ። 10ኻግሪስም ጅግዛየጘ ጭቕጘ ጨዉ።

11ጘጝ ብጣይል ችጝሸቍ ኵምብልትጢል መጝገ ኣሰመ ውላቕ ዊኑ። 12ርኵሳን መንፈሳንድም እየሱስት፦ «ኣለቀይ ኣሰምጢል ፊርን ጥውነ ፊቅጅ» ይጝ ጨውⶖ። 13ጘጝም ፊቅዱ፤ ርኵሳን መንፈሳንድም እጅሪስ ፍጝ ኣሰምጢል ጥውⶖ፤ ሊጘ ሽኽ ኣቐቝ ኣሰምጥድም ቀልቅለይዙ ጫፊስ በጕርጝ በጕርጝ ባኽሪል ጥውጛ ስርሽ።

14ምቕድም ሰይጝ ፊርጝ፤ ጂጘድየንት ኻትመይልም ገጠሪልም ጂጝዝ፤ ኽዝቭድም ኣቐው ዊገድየንት ቓልጠ ጝፅበው ጝፅበው ስፍረይስቅ ፉ። 15እየሱስ ትጐ ተርጛንድም ርኵሳን መንፈሳኒዝ ፃይሽ ዊነው እጅርድ ኣልቨ ሲር፣ ጝኣይምረውድ ዋጥር፣ ዳኽነ ጐይ ቓልጛንድ ዳጝግፅ። 16እኒንት ቓለቍ እቅድም ርኵስ መንፈሲዝ ፃይሽ ዊነው እጅሪዝመ ኣሰምጢል ፃቭሽተው ዊገድየንት እጝቅዝቅ ድቍⶖ። 17እንዝ ግረም እቅድ እየሱስት ጝታኻግርድየንት ሊቅ ፊራንስ ማጥን ጨውጥጘ ኪርምⶖ።

18እየሱስ ታኰይል ጥውጠ ጓንድም ርኵሳን መንፈሳኒዝ ፃይሽ ዊነው እጅርድ፦ «ኣለቀይ ክጅቅ ተጨ» የው ጨዉ። 19እየሱስ ግን ፊቅድየውም፤ ዊገድ ግን፦ «ክጝን ፊጥ፤ ኣደረ ኣወየው ቀሰው ዊገ ፃቨጘዝመ ክጭስ ቓሊሰው ስቝርቲዝቍዝ ክዚምዳኒዝ ድቍ» ዩ። 20እጅርድም ፊሩ፤ እየሱስ ፃቨው ዊገድየንትም ፅቃ ኻትምጥ ይሽተው ኻግሪልቅ ኣውጁ፤ ወሸቍድም እጝቅ ዲንቅሽⶖ።

እየሱስ ክትረይ እፈረስመ ፅዊትረይ እውነስ ፃቨው ታምርድ

(ማቲ. 9፡18-26፤ ሉቃ. 8፡40-56)

21እየሱስም እንደ ገነ ታኰይዝ እጂ ከራንድ ንቕፀው ኽዝቭ ጝጐ ኣኽቭሹ፤ ባኽር ደዪልም ፅባⶖ፦ 22ምኵራቭ ኻልቅጢስ ላው እያይረውስ ይሽተው እጅር ጝጐ ተሩ፤ እየሱስትም ቓላንድ ጝልኲል ሊቭ፦ 23«ይቝረ መልወየን ክርተ ጕርኩች፤ ቓድር ርዅየዝ ፅብራንስ ማጥን ኣለቀይ ተትር ክናንድ ጝርዲጊል እቝር» የው ጨዉ። 24እየሱስም ላብጠ ፊሩ፤ ንቕፀው ኽዝቭም ትክቭክቭሻ ጝት ቲክኑ።

25ጝግልም ፅጭ ሊጘ ምት ምሉ ጝርብረድ ቅብርጛ ዊንደይ ላይ እውነ ዊንች። 26ንቕፀቍ ጥላ ኣርቐቊል ጅልውራⶖ ጝርጊንዝቭድቅ ጨርስራንም እኳ ፅውዘድ ግን ወሱጚ ቺዝየውም። 27እየሱስት ጂጘድ ወሽራንድም ጝእግርገይዝ እቀ ማኽሊዝ ፃቭር ተትር ጝኣልቨድየንት ዳቕች። 28እኒንት ፃቭረውድም፦ «ጛልቨይዝ ጫፍድ እኳ ዳቓን ቓጭር» ይር ኣምንዳንስቅ የጝ። 29ኣይንድም ቅብራⶖ ዊነው ጝርብረድ በውዝ ችብሩ፤ ጝርስቃይስ ቓድረጘም ጝርሰውነቲዝ ኣርቕች።

30እየሱስም ኻይል ጝጊስ ፈጘ ኣርቕ፣ ኽዝቪዝጐ ዋጥር የው፦ «ኣው የጝ ያልቨድ ዳቐውድ?» ዩ። 31ጝክንደጥድም፦ «ኽዝቭድ ኣፂት ትክቨትክቭሻ ቓልዳⶖመ፦ ‹ይት ኣው የጝ ዳቐውድ› ይራ?» ይⶖ።

32እየሱስ ግን እኒንት ፃቨውድ ኣው ኣቐጘ ቓልጠ እግርገ ዋጥር ዩ። 33እውነየንም ጝርጭስ ኣቐው ዊገድየንት ኣርቕራንስቅ ጐውትር ቈጥቈጥ ይራⶖ ተትር ጝበዊል ደፋሽች፤ ኣቐው እማንተው ዊገድየንትም ድቍች። 34እየሱስም፦ «ይቝረወ! ከእምንትድ ቓዝኩ፤ ዲግተዝ ፊጥ፤ ክስቃይቲስም ፈው» ዩ።

35እየሱስም ዊግታⶖ ሲጝቀ ምኵራቭ ኻልቀ እያይረውስት ጝኒስ እቅ እፃሽጝ ተርጝ፦ «ክቝረ ክትርኵች፤ እደስለ ውር ፃቭተ ክንሰተድየንት ዝላዝራ?» ይⶖ። 36እየሱስ ግን እቅድ ዊግትጘው ዊገድየንት ቸለል የው ምኵራቪዙ ኻልቀድየንት፦ «ኣምን ጭቝጚ ጐውተ» ዩ።

37እየሱስም ቢጥሮስስመ ያይቈቭስ፣ ያይቈቭት ዝን ይዃንስስታዝለ ላየ ኣውማውቅ ጝት ቲክንጠ ፊቅድየውም። 38ምኵራቭ ኻልቀይዝ ጝኒል ችጘጘም እየሱስ እቅድ ቓፅጛⶖ ዋይ ዋይ ይጛⶖ ሊዝጛንድ ቓሉ። 39ጝኒልም ጥው፦ «እን ቓፀይዝመ ሊዚዝ ወረጘ የጝ? እፈረየን ኽርይርኵችጚ ክሪረይም» ዩ።

40እቅድ ግን እቘርⶖ፤ ጘጝ ግን እቅድዛት እጝቅትቅ ጝኒስ ፊሰት ግረ፣ እፈረየንቲርስመ ጝርኘስ፣ ጝክንደጥድዛትም ቲክንዝ እፈረየን ፅብረዊል ጥዉ። 41ጝዝእለም እፈረየንት ናንድ ፃይ፦ «ጣሊተ ቍሚ» ዩ፤ ትርⶖምድም፦ «እፈረ ክተ ጕ» የነት የጝ። 42እፈረየንም በውዝ ጕር ችብርች፤ እነኒረም ዋጥርጥርች፤ ጝርእድሚድም ፅጭ ሊጘ ምት ዊኑ፤ እቅድም ኣቐው ዊገይዝ ጭቕጘ ዲንቅሽⶖ። 43እየሱስም ኣቐው ዊገድ ኣውማውቅ ኣርቓየጘ ቐናዝ ጣጝቅቅሱ፤ ጝርስም ዀነው ይውጛንስ ማጥን ኣዙ።

നിലവിൽ തിരഞ്ഞെടുത്തിരിക്കുന്നു:

ማርቈስት ወንጌል 5: ኽምጣኣኪ

ഹൈലൈറ്റ് ചെയ്യുക

പങ്ക് വെക്കു

പകർത്തുക