ማርቈስት ወንጌል 10

ፈወነ 10

ድቕርዝቍዝ ኣልተው ዋቕረ

(ማቲ. 19፡1-12፤ ሉቃ. 16፡18)

1እየሱስም ጝጊስ ጕ ይዅዳ ኻግሪል፣ ዮርዳኖስት እጂ ፅበው ጅልወይዝጐም ፊሩ፤ ኽዝቭድም እንደ ገነ ጝጋቢል ኣኽቭሹ፤ ጘጝም እንዝ ሚቅ ፃቫⶖ ዊነጘ ክንሱ።

2ፈሪሳኒስም ላው ላውድ ፊትንጠጘ በንጛንስቅ ጝጐ ኣልትጝ፦ «እጅር ጝውነት ዳቕርጠ ፊቅድሸኵመ?» ይጝ ዋቕር። 3እየሱስም፦ «ሙሴ እን ዊገይዝቍዝ ክታት ወረጘ የው ኣዙ» ዩ። 4ጛይም፦ «ሙሴመ ጝርድቕሪዙ ወረቂት ይው ዳቕራንስ ፊቅድኩ» ይⶖ።#ዘዳ. 24፡1-4፤ ማቲ. 5፡31። 5እየሱስም፦ «ሙሴ እኒን ኽግድየንት ፃፈውድ ክታዘንድ ደንዳን ኣቓንስቅ የጝ። 6ዊገድ ግን እደረ በውገ ፍጥርቲስ ግልወዝመ እውነስ ፃቭ ፋጥሩ።#ዘፍ. 1፡27፤ 5፡2። 7ኣቓንስቅም እጅር ጚር ጝኘት በረኵ፤ ጝእውነ ጅቅም ጣምርሸኵ።#ዘፍ. 2፡24። 8ጝታቪልም ላው ኣካል ኣጘኵ፤ ጝዝለ ጛይ ላው ኣካል ጛይጚ ሊጘም ኣየቍ። 9እንዝ ማጥን እደረ ላው ፃቨውድየንት ኣውማውም ቲዛው» ዩ።

10ጝኒል ጥውጛንድም ጝክንደጥድ እን ዊገድየንት ጕይጝ እንደ ገነ ዋቕር። 11እየሱስም፦ «ኣውማው ጝእውነት ዳቕር ላየ እውነት ድወው እጅርድቅ ጝእውነት ዲጊል ሻርሙጠኵ።#ማቲ. 5፡32፤ 1ቈረ. 7፡10-11። 12ጚይም ጝርጕርየት ዳቕርድር ላየ ግልወ ድውረውዝየ ሻርሙጥች የነት የጝ» ዩ።

እየሱስ ኽፃናታንድ በርከጘ

(ማቲ. 19፡13-15፤ ሉቃ. 18፡15-17)

13እቅም እየሱስ ኽፃናታንድዛት ጝናኒዝ ዳቓንስ ማጥን ጝጐ ነስⶖ፤ ጝክንደጥድ ግን ጛት ጋስፅⶖ። 14እየሱስም እኒንት ቓላንድ ቈጣሽ፦ «ኽፃናታንድዛት ይጐ ተርጝነ በጥን ኪልክልትርነ፤ ምላሰንድም እደረት ምጝግስትየን እንየቊዝ ጚ። 15እማንዝ የኵን፤ እደረት ምጝግስትየንት ኽፃኒዝጘ ለምራውድቅ እጝቅ ስሪስቅ ጝርግል ጥዋውም» ዩ።#ማቲ. 18፡3። 16ኽፃናታድዛትም ኣቅቩ፤ ጝናንድም ጝታዲጊል እቍር በርኩ።

ኻፍታም ውርጋጠዙ ዋቕረድ

(ማቲ. 19፡16-30፤ ሉቃ. 18፡18-30)

17እየሱስም ዊነው ስፍረይስ ጕ ጕደነድየንት ኪርማንድ፣ ላው እጅር ጝጐ ውጥያⶖ ተሩ፤ ጝበዊልም ግርቨቭሽ፦ «ቀሰው ክንሰተወ! ዘላልምዙ ርዅየ ዊርሳንስ ወረጘ ፃቭጨ ጥውሽኵ» ዩ። 18እየሱስም፦ «ወረጘ ይት ቀሰው ይራ? ላው እደረትለ ቀሰውም እጀው። 19ትዛዛንድዛት ኣርቕረኵ፤ ቁተ፤ ሻርሙጥተ፤ ስተ፤ ኻሽትዝ ሚዝርድተ፤ ኻጝስተ፤ ኪር ክኘት ኪብርዝ» የው ዊሱ።#ዘፀ. 20፡12-16፤ ዘዳ. 5፡16-20። 20እጅርድም፦ «ክንሰተወ! እንዛትመ እጝቅትቅ መልውሲጘቀ ኪርም ሊሚጥኩን» ዩ። 21እየሱስም እጅርድየንት ቓል ቀኑ፦ «እደስለስ ላው ዊገ እዳቐኵ፤ ፊትር ፃይረው ኻፍትድቅ ቂ፤ ጊንዝቭድም ድኺዝ ይይ፤ ሲመይስ ንቕፀው ኻፍት ችጝትር፤ ጝዝግረ ለው ይት ቲክን» ዩ። 22እጅርድም እኒንት ወሻንድ ጭቕጘ ኻዝኑ፤ ንቕፀው ኻፍትም ፃየው ዊናንስቅ ቲክዛ ጝጝን ዋጥሩ።

23እየሱስም ዋጥር የው ቓል ጝክንደጥድዛት፦ «ኻፍታማኒዝ እደረት ምጝግስትየንትል ጥወነው ውርጘ ቺግርዘው የጝፈ!» ዩ። 24ጝክንደጥድም ጝዊገይዝ ጊርምሽⶖ፤ እየሱስ ግን እንደ ገነ ዊስ፦ «ይቝርወ! እደረት ምጝግስትየንትል ጥወነው ውርጘ ቺግርዘው የጝፈ። 25ኻፍታም እጅር እደረት ምጝግስትየንትል ጥወነዊስ ግምለ ሚርቨዙ እልዝ ጭልቓን ቀለኵ» ዩ።

26ጝክንደጥድም በውገትዊስ ሽ ጭቕጘ ጊርምሸነውዝ፦ «እደስለ ኣው የጝ ቓድጠ ቸለድ?» ይⶖ። 27እየሱስም ጛት ቓላ፦ «እርግጥ እን ዊገድ እጅርዝ ቸልሻውም፤ እደረስ ግን ቀላል የጝ፤ እደረስ ቸልሻው ዊገም እጀው» ዩ።

28ቢጥሮስም፦ «እንወ! ይን እጝቅትቅ በርን ክት ቲክኑን» ዩ። 29እየሱስም፦ «እማንዝ የኵን፤ ይቍዝመ ወንጌልዝቍዝ የው ጝጝንድየንት ዊንም ጝፅንድዛት ዊንም ጝኘት ዊንም ጚርት ዊንም ጝቝርት ዊንም ጝቺዝጝድየንት በረውድቅ፣ 30ነን እን ዚምኒዝ ስድት ጅቅ፣ ጝጝንጥድ፣ ጝፅንት፣ ጝኵየንጣንድ፣ ጝቝርት፣ ጝቻፅጝድ እፅቭ ድርቭ ለምርጡ፤ ተረው ኣልሚዝም ዘላልምዙ ርዅየ ዊርስጡ። 31ዊገድ ግን ንቕፀቍ ነን በውጥ ኣቐቍ እገጥ ኣጥቍ፤ ነን እገጥ ኣቐቍም በውጥ ኣጥቍ» ዩ።#ማቲ. 20፡16።

እየሱስ እንደ ገነ ጝክርጘይዝቊዝ ዊግተጘ

(ማቲ. 20፡17-19፤ ሉቃ. 18፡31-34)

32እየሩሳልየም ትጐ ፊርጥጘ ጒደነይል ፅብጛⶖ፣ እየሱስ ጝታበው በዊል ፊራⶖ ዊኑ፤ ጝክንደጥድም እንዝ ጊርምሽⶖ፣ ላጥ ጝት ቲክነቍድ ቈሽ ጐውትጝ ዊንⶖ፤ እንደ ገነም ፅጭ ሊጘድዛት ኽዝቪስ ቲዝ ወረጘ ጝግል ችጝጠ ኣቀጘ እንት የው ድቁ፦ 33«እንወ! እየሩሳልየም ፍንቅ፤ እጅር ኵር ካኽነጣነ ኻልቅጢዝመ ወሪትት ኽግ ክንሰጢዝ ዲቍሽት ይውሽትጡ፤ ጛይም ክርጘዙ ፍርድ ፊርድጥቍ፤ ኣኽዛቫኒዝም ዲቍስጝ ይውጥቍ። 34ኣኽዛቫንድም ኣፊዝጥቍ፤ ጝዲጊልም ትፍ ይጥቍ፤ ድድብጥቍ፤ ጝዝ ግረም ቍውጥቍ፤ ጘጝ ግን ሻቘ ግርቅዝ ግረ ክርጘይስ ጕጡ» ዩ።

ያይቈቭስመ ይዃንስስታ ዋቕረድ

(ማቲ. 20፡20-28)

35ዘቭዲወስት ቝር ያይቈቭስመ ይዃንስስ እየሱስ ትጐ ኣልትጝ፦ «ክንሰተወ! ጨውነውድየንት እጝቅትቅ ፃቭተ በነኵን» ይ። 36ጘጝም፦ «ወረጘ ፃቭጨ በንርና?» ዩ። 37ጛይም፦ «ክምጝግስቲዙ ክቭሪዝ ይናጊስ ላውድ ክለዊዝ ላውድ ክፃግቪዝ ጐይናንስ ፊቅጅ» ይⶖ። 38እየሱስም፦ «ጨውርነውድየንት ኣርቓይርነቅም፤ ያን ዝቀው ሚከረይዙ ፅወድየንት ዚትርነ፣ ያን ጣምቅጨው ጥምቅትድ ጣምቅሽትርነ ቸልትርንቅመ?» ዩ።#ሉቃ. 12፡50። 39ጛይም፦ «የይ ቸልንቅ» ይⶖ፤ እየሱስም፦ «ያን ዝቀው ፅወድየንት ዚትርንቅ፤ ያን ጣምቅጨው ጥምቅትድም ጣምቅሽትርንቅ። 40ዊገድ ግን ይለወይዝመ ይፃግቪዝ ጐየነውድ እደረ ኣስለቊዝ ይውሽተውጚ ያን ይወው ዊገም ኣየው» ዩ።

41ላጥ ፅቃ ክንደጥድም እን ዊገድየንት ወሽጛንድ ያይቈቭስመ ይዃንስስታል ኻልክሽ። 42እየሱስም እጝቅትቅ ጝጐ ኣኽቭ፦ «ኣኽዛቫነ ኻልቅጥ ይሽተቍድ ጝታኽዝቭድ ኻይልዝ ቅመቍ ኣጘጘ፣ ጝታሽማንድም ጛግል ስልጣን ፃየቍ ኣጘጘ ኣርቕርነኵ።#ሉቃ. 22፡25-26። 43ክታጭስ ግን እነየው ኣጠ ጥውሻውም፤ ክታማኽሊስ ኣውማው ኽየው ኣጠ በነውድቅ ክታኣገልጋይ ኣነ።#ማቲ. 23፡11፤ ማር. 9፡35፤ ሉቃ. 22፡60። 44ንየቱ ኣጠ በነውድም እጝቅት በረ ኣነ። 45እጅር ዅርም ተረውድ ኣግልግልጠ፣ ጝርዅየድየንትም ንቕፀቊዝ ጝታቺ ዲቊስ ይውጠጚ ጝት ኣግልግልጛንስም ኣየው» ዩ።

እየሱስ ኻርቨ በርጠሚወስት ቓዘጘ

(ማቲ. 20፡29-34፤ ሉቃ. 18፡35-43)

46እየሱስስመ ጝክንደጢዝም እያሪኰ ኻትመይል ተርⶖ፤ ንቕፀው ኽዝቭ ጅቅም ኣቕጝ እያሪኰስ ፍጛንድ፣ ጠሚወስት ዅር ኻርቨ በርጠሚወስ ጒደን ደዪል ጐይ ጨዋⶖ ዊኑ። 47ጘጝም ጝዝ ዲቈውድ ናዝሪቱ እየሱስ ኣቐጘ ወሻንድ፦ «ዳዊትት ዅር እየሱስወ! ኣለቀይ ይቅር ይ» ያⶖ ቓፅጠ ኪርሙ። 48ንቕፀቍ እቅም፦ «እፈ ዝም ይ!» ይጝ ጋስፁ፤ ጘጝ ግን፦ «ዳዊትት ዅርወ! ኣለቀይ ይቅር ይ!» ያⶖ ቐናዝ ቓፁ።

49እየሱስም ችብር የው፦ «ጭጝጥን» ዩ፤ ጛይም ኻርቨድየንት፦ «ኣይዝዀች ጕ፤ እየሱስ ጭጘኵ!» ይⶖ። 50ጘጝም ጝኣልቨድ ማል ብድግ የው ጕ እየሱስ ትጐ ፊሩ። 51እየሱስም፦ «ወረጘ ፃቫንስ የጝ በንረውድ?» ዩ፤ ኻርቨድም፦ «ክንሰተወ! ቓልጨ በነኵና» ዩ። 52እየሱስም፦ «ፊጥ፤ ክእምንትድ ቓዝኩ» ዩ፤ በውዝም ጝልጣንድ ቓድⶖ፤ ጒደነይስም እየሱስት ቲክን ፊሩ።

നിലവിൽ തിരഞ്ഞെടുത്തിരിക്കുന്നു:

ማርቈስት ወንጌል 10: ኽምጣኣኪ

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

ኽምጣጘ ኣይር ኪዳን നെക്കുറിച്ച് കൂടുതലറിയുക