3
Sorelo rakepen pral o foro Jerusalem
1Djungeles djal ko foreske, kai hadas pes pral o baro Debleste,
ko foreske, an koleste tchilatchepen un marepen hi!
2Te dell jek kol menshen kote trad, shunenn le gar,
un mukenn penge tchi te penell.
Ap o baro Debleste rikran le pen gar,
pengro Deblestar kamenn le tchi te djinell.
3Lengre pralstune hi har lewe, kai denn i bari gole.
Lengre tchatchepangre mursha hi har diwje djukle an i rati,
kai chan lauter, hoi maran le,
un mukenn tchi pral o wawar diweske.
4Lengre dikepangre#3:4 dikepangre, kate: profete krenn, har te well tchi,
un hi pherdo chochepen.
Lengre rashaja krenn sawo koowa,
hoi krell o Debleskro kheer pale-tchiddo,
un penenn o Debleskro lab gar tchatches dureder.
5Kowa lauter krenn le, ninna te djiwell o baro Dewel mank lende.
Job krell kek tchilatchepen.
Un leskro tchatchepen atchell soreles tardo.
Jaake har hako diwes o kham pre djal,
jaake sikrell lo hako diwes, har te djiwenn le an o tchatchepen.
Kol tchilatche menshe krenn pale te pale djungelo koowa, un ladjenn gar.
6O baro Dewel penell:
Me krom, te hi tsele natsjone buder gar koi.
Lengre forja hi paash.
Lengre sorele khera hi tele phagedo,
Kek menshe djiwenn buder koi.
Ap i dromma djal buder kek mensho.
Halauter hi krik.
7Me penom mange: Te dikenn mire menshe kowa lauter,
dikenn le pre ap mande,
un mukenn penge mandar tchomone te penell!
Palle wals lengro foro gar paash kerdo!
Un tchi wals pral lende,
hoi me penom, kai kamau te krell.
Kanna was wawartchandes: Lauter tchilatchepen krenn le un mukenn gar tele.
8Doleske djinenn, penell o baro Dewel,
ko diwes well, kai wau me,
un rakrau o tchatchepen win pral i phub.
Me lom mange glan, te anap i menshen khetne dran wawar themma ap i phub,
te tchorap miri choli pral lende win.
Awa, miri soreli choli, hoi chatchell har i jag,
well pral i tseli phub un chal lat pre.
O newo tsiro i menshenge Israel
9Pal kowa dau i menshen an i wawar themma djudje muja,
te kharenn le halauter o baro Debleskro lab an,
un mangenn les khetne an.
10Ninna dran o dur them Etiopia wenn mire menshe,
kai kate te kote tradedo wan,
te mangenn le man an,
un anenn mange kutch koowa.
11An ko tsiro hunte ladjenn tumer Israelitarja tumen buder gar doleske kai tumen pral mande hadan,
un jaake bud tchilatchepen kran.
Me lau kol pre-phurden, kai rikran jaake bud pendar, mashkral dran tumende krik.
Ap miri berga, kai me djiwau, dell buder kekes, kai krell pes bares.
12Kokres tchorwele menshen, un sawen, kai rikrenn gar bud pendar, mukau djido an tiro them.
Kolla patsenn pengro tselo djijeha ap o baro Debleste.
13Un kol pral-mukle menshe an o them Israel krenn kek tchilatchepen,
un chochenn gar,
un rakrenn gar dui tchipjentsa.
Lenge djal mishto,
un jon djiwenn kote kek darjah.
14Awenn bachteles, tumer Israelitarja!
Denn gole i bachtjatar, tumer ap i berga Zion!
Giwenn un khelenn o tselo djijestar,
tumer an o foro Jerusalem!
15O baro Dewel las tumari phagi tumendar krik,
un tradas kolen krik, kai rikran tumen tele.
O baro Dewel hi o baro rai pral Israel,
un hi pash tumende.
Tumer hunte trashenn buder kek bibacht.
16An ko tsiro well penlo ap i menshende an o foro Jerusalem:
Ma trashenn tumen, tumer an Jerusalem!
Ma mukenn tumare wasta tele te perell!
17Tumaro baro Dewel hi pash tumende,
job hi sorelo un hi ap tumari rig.
Leskro dji giwell pral tumende,
un job hi tumenge latcho.
Tumari doosh lell lo tumendar krik an peskro baro kamlepen,
un job dell gole i bachtjatar pral tumende,
18har ap i baro diwes, kai giwenn le i bachtjatar.
Me lau i bibacht tumendar krik, penell o baro Dewel.
Tumer hunte hidjrenn buder kek ladj ap tumende.
19O tsiro wella, kai dau i phagi halauterenge, kai tumen tele rikran,
un wau kolenge tumendar ap i rig, kai dukedo hi.
Un anau kolen khere, kai win tradedo wan.
Un krau, te wenn le sharedo un hadedo
an i tsele themma, kai i menshe rikrenn kanna tchi lendar.
20An ko tsiro anau tumen khere.
un anau tumen khetne.
An ko tsiro dikenn tumer:
Me krau, te well tumenge pale lauter mishto.
Me krau tumen bares un an-dikles an i tsele themma ap kai phub.
Kowa penell o baro Dewel.
