Sacharja 6

O ochtato dikepen: Star wurdja

1Un me dikom pale pre un dikom star wurdja. Kolla wan mank dui berge win. Kol berge his dran lolo saster. 2Glan o ersto wurdin his lole graja, glan o duito kale graja, 3glan o triinto parne graja un glan o starto wurdin his kalo-parne graja. Jon halauter his sorelo. 4Un me penom ap o bolepaskro, kai mantsa rakrell: “Miro rai, koon hi kalla?”

5Un o bolepaskro penas: “Kolla hi kol star duche#6:5 duche, kate: winte tel o bolepen, kolla his tardo glan o rajeste pral i tseli phub, un wenn kanna win.”

6I kale graja djan ap i serwi rig#6:6 serwi rig, oder nordetikri rig , i parne graja djan ap i rig, kai o kham tele djal, un i kalo-parne graja djan ap i tchatchi rig#6:6 tchatchi rig, oder rig, kai o kham pralstunes hi.

7Kol sorele graja wan sik win, te djan le an i themma trujel. Un o bolepaskro penas lenge: “Djan koi un dikenn tumen trujel ap i phub!” Un jon djan an i themma trujel.

8Palle das o bolepaskro gole ap mande: “Kol graja, kai djan ap o serwo drom, hoi djal an o them Babilonia, kolla kran, hoi o baro Dewel kote kamas te krell.”

I stadi dran rup un sonakai i baro rashajeske Jeshua

9O baro Dewel penas mange: 10-11“Kol mursha, o Heldai, o Tobija un o Jedaja, wan khere dran o them Babilonia. Le lendar rup un sonakai, un dja kau diwes an o kheer o murshestar Josia, koleskro dad o Zefanja hi. Un kre i stadi dran o rup un o sonakai un tchip kowa ap o shero o baro rashajestar Jeshua, koleskro dad o Jozadak hi. 12Un pen leske: Kowa penell o baro Dewel, ko rai pral o bolepen un i phub: Ko mursh, kai well kharedo ‘newo ruk’, well baro ap peskri platsa. Un job krell o baro Debleske i newo kheer. 13Job hi kowa, kai krell o baro Debleske i kheer, un job well sharedo har i baro rai. Job hi beshdo ap peskri raili beshepaskri un hi o rai pral peskre menshende. Un i rashai hi tardo ap peskri tchatchi rig. Un kol dui djiwenn latches khetne. 14Un o baro rajeskri stadi atchell an o baro Debleskro kheer, te wenn kol mursha Heldai, Tobija, Jedaja un Josia gar bistedo.”

15Dran dur themma wenna kolla, kai krenn o baro Debleskro kheer. Un palle dikenn tumer, kai o baro Dewel, ko rai pral o bolepen un i phub, kowa hi, kai bitchras man pash tumende. Te krenn tumer kowa, hoi tumaro baro Dewel tumenge penell, wella kowa halauter jaake.

നിലവിൽ തിരഞ്ഞെടുത്തിരിക്കുന്നു:

Sacharja 6: Sint2021

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

Erste Auflage

Die Lizenzvereinbarung erlaubt eine nicht-kommerzielle Nutzung des Textes. Änderungen des Textes sind jedoch untersagt. Der Rechteinhaber, Romanes-Arbeit-Marburg e.V., muss bei jeder Veröffentlichung erwähnt werden. Für jegliche kommerzielle Verbreitung muss ein Herausgeber beim Rechteinhaber eine schriftliche Genehmigung beantragen.

Herausgeber und Vertrieb: Romanes-Arbeit-Marburg e.V., Germany

info@romanes-arbeit-marburg.de

ISBN: 978-3-00-068366-4

Illustrationen von Louise Bass und Horace Knowles © The British amp Foreign Bible Society, 1954, 1967, 1972, 1994, 1995

Farbige Illustrationen mit Erlaubnis von Louise Bass

O Debleskro Drom 2021 (Sinte) നെക്കുറിച്ച് കൂടുതലറിയുക