Levitiku 23
23
Ifesta soothanliwa
1Yave aamweerela Moisesi: 2“Mwaaleele aYixrayeli: ‘Ifestasaka, ifesta sithanliwe ni Yave muneeraanyu mulaleiyeke ntoko mithukumano sootteela, ti iya:
eSaabadu
3Aakhala mahuku mathannamosa oovaraanyu muteko, mene nihuku nanaathannameeli ti eSaabadu ya wiitthuuwa, nihuku na muthukumano wootteela. Muhivareru muteko wakhalaru muneeraanyu mukhalewo; ti eSaabadu wa Yave.
mPaska* ni ipaawu soohikhalano eferementu
4Ifesta sithanliwe sa Yave, mithukumano sootteela muneeraanyu mulaleiye mweehuhunimwaya ti iya: 5mPaska* a Yave ompacera mweehuhuni ya wiila vanihukuni nanaamuloko nimaxexe na mweeri woopacera. 6Vanihukuni nanaamuloko nimathanu na mweereene yoowo empacera efesta ya Yave, efesta ya ipaawu soohikhalano eferementu; wa mahuku mathannameeli muceeke ipaawu soohikhalano eferementu. 7Vanihukuni noopacera mpakeke muthukumano wootteela ni muhivareru muteko. 8Mumpakele Yave sooveleela soorehereriwa vayikho wa mahuku mathannameeli ni vanihukuni nanaathannameeli, mpakeke muthukumano wootteela ni muhivareru muteko.
Efesta ya soowiima soopacera
9Yave aamweerela Moisesi: 10“Mwaaleele aYixrayeli: ‘Nyuwosa mwaavolowaka mweelaponi kineeraaka koovaheeni ni mwaahephaka, munruuhele musaserdoti* ehupu ya etrigu yoopacera muneeraanyu muhephe. 11Owo iinainihere ehupu eyo ohoolo wa Yave weera mwaakhuleleliwe; musaserdoti* iinainihere ehupu eyo waaxiiye eSaabadu. 12Nihuku musaserdoti* aneeraawe iinainihe ehupu, mumpakele Yave yooveleela yoohisa ya eputtiputthi erino eyaakha emoha ni yoohirakala. 13Mumveleeleletho Yave yooveleela ya irooro ya ikiilu* ixexe ya ephepa yooreerela yooweetheeliwa makhura yoorehereriwa vayikho, yoowunkhela yooreeraxa nitho yooveleela yoowura ya eliitru* emoha ya eviinyu. 14Muhiceru yooca naari erooro yoowaarikiwa hata ekithi mpaka nihuku nenenenno muneeraanyu munruuhele yooveleela eyo Mulukwaanyu. Nna nikhaleke nlamulo noohimala wa ikhapirasanyu sootheene nakhalaru nipuro muneeraanyu mmake.
Efesta ya isimana
15Okhuma waaxiiye eSaabadu, nihuku nenenenno muneeraanyu muruuhe ehupu ya yooveleela yoowiinainihera, mwaalikeleleke isimana ithannapiili sookwanelasene. 16Mwaalikelele mahuku miloko mithanu mpaka waaxiiye eSaabadu yanaathannapiili ni vano mumveleelele Yave yooveleela ya erooro enyowani. 17Muneeraanyu mmakeru, murwaaneke owaani ipaawu piili soopakiwa ni eferementu ya ikiilu* ixexe sa ephepa yooreerela soowooxiwa ntoko yooveleela yoowiinainihera ya soowiima soopacera wa Yave. 18Mveleele vamoha ni ipaawusene seiyo iputtiputthi ithannapiili ilopwana, khula eputtaputthi ya eyaakha emoha ni yoohirakala, mwaamombe mulopwana mmoha ni anapunci eeli. Iyo nsikhale soomveleelela Yave soohisa vamoha ni sooveleelasaya sa irooro ni soowura – sooveleela soorehereriwa vayikho, soowunkhelaxa sinimusiveliha Yave. 19Vahoolowaya mmwiive napunci mmoha ntoko yooveleelela yoottheka ni iputtiputthi piili, khula eputtiputthi ya eyaakha emoha, ntoko yooveleelela murettele. 20Musaserdoti* iinainihere vamaithoni wa Yave iputtiputthi piili iyo ntoko yooveleela yoowiinainihera vamoha ni ipaawu sa soowiima soopacera. Eyo ti yooveleela yootteela wa Yave ni ti sa musaserdoti*. 21Nihuku nenenenno mpakeke muthukumano wootteela ni muhivareru muteko. Nna nikhaleke nlamulo noohimala wa ikhapirasanyu sootheene nakhalaru nipuro muneeraanyu mmake. 22Nyuwosa mwaahephaka mmattamwanyu, muhiphiye mmakoteloni hata muhittottattotte simmoramora mwaahephaka. Mwaahiyere oohaawa ni anamarwa. Miyo ti Yave Mulukwaanyu.
Efesta ya mapalapatta
23Yave aamweerela Moisesi: 24“Mwaaleele aYixrayeli: ‘Vanihukuni noopacera na mweeri wanaathannamiili nikhaleke nihuku noowiitthuuwa, muthukumano wootteela opakiweke ni oruma wa mapalapatta. 25Muhivareru muteko, mene mumveleelele Yave yooveleela yoorehereriwa vayikho.
Nihuku na orehererela wiiwanana ni Yave
26Yave aamweerela Moisesi: 27Nihuku nanaamuloko na mweeri wanaathannamiili ti nihuku na orehererela wiiwanana ni Yave. Mpakeke muthukumano wootteela, mwiiyevihe ni mumveleelele Yave yooveleela yoorehereriwa vayikho. 28Muhivare muteko vanihukuni nenenenno, niwoko ti nihuku na orehererela wiiwananawanyu ohoolo wa Yave Mulukwaanyu. 29Yoowo aneera ahiiyevihe vanihukuni nenenenno onoomalamalihiwa mmulokonimwawe. 30Kinoomphwata eriyari ya mulokwaawe yoowo aneera avare muteko vanihukuni nenenenno. 31Muhivareru muteko. Nna nikhale nlamulo noohimala wa ikhapirasanyu sootheene mmapuroni ootheene muneeraanyu mukhale. 32Ti eSaabadu ya wiitthuuwa wa nyuwo ni muntthuneya wiiyeviha. Okhuma oxekuwa wa nihuku nanaathannamaxexe na mweeri owo mpaka oxekuwa wa waaxiiye muntthuneya ottittimiha eSaabadu eyo.
Efesta ya mmikotthani
33Yave aamweerela Moisesi: 34“Mwaaleele aYixrayeli: “Vanihukuni nanaamuloko ni mathanu na mweeri wanaathannamiili efesta ya mmikotthani wa Yave epacereke ni eyo epwaherereke wa mahuku mathannameeli. 35Nihuku noopacera okhaleke muthukumano wootteela; muhivareru muteko. 36Mumveleelele Yave sooveleela soorehereriwa vayikho ni vanihukuni nanaathannamararu mpake muthukumano wootteela ni mumveleelele Yave yooveleela yoorehereriwa vayikho. Ti muthukumano woottittimiheya; muhivareru muteko. 37Iya ti ifesta sikhalihiwe ni Yave sintthuneya olaleiya ntoko mithukumano sootteela weera aruuheliwe Yave sooveleela soorehereriwa vayikho – sooveleela soohisa ni sa etrigu; sooveleela sikina ni soovaha sooyeehiwa soonyesererihiwa wa khula nihuku. 38Ohiya toko sooveleela seiyo, sookhalatho seiyo sa iSaabadu sa Yave, soovahasanyu, ni sakhalaru seiyo muroromelinghaanyu nitho sa otthunawanyu munimvahaanyu Yave. 39Hiiho naapaceraka vanihukuni nanaamuloko ni mathanu na mweeri wanaathannamiili muhempheene sootheene muruwenraanyu, mumpakele efesta Yave wa mahuku mathannameeli; nihuku noopacera ni nanaathannamararu ekhaleketho a wiitthuuwa. 40Vanihukuni noopacera murukuleke soowiima sooreerela sa nyiri, makukhu a mavare, iphandi soopombaxa sa isalgeru* ni muhakalale vamaithoni wa Yave Mulukwaanyu wa mahuku mathannameeli. 41Mpake yeeyo ntoko efesta wa Yave wa mahuku mathannameeli a iyaakha sootheene. Nna nikhale nlamulo noohimala wa ikhapirasanyu sootheene mmapuroni ootheene muneeraanyu mukhale. Mpake efesta ela mmweerini wanaathannamiili. 42Mukhaleke mmikotthani wa mahuku mathannameeli. aYixrayeli ootheene ekhaleke mmikotthani 43weera ikhapirasanyu sisuwele weera Miyo kaahaapakiha aYixrayeli okhala mmikotthani kaakhumihaleene wExipitu. Miyo ti Yave Mulukwaanyu.’” 44Vano Moisesi ahaalaleera aYixrayeli ifesta aakhalihalaawe Yave.
നിലവിൽ തിരഞ്ഞെടുത്തിരിക്കുന്നു:
Levitiku 23: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.