2 Mamwenye 18

Che Hesekia akutendekwa mwenye jwa ku Yuda

(2 Indu ya katema 29:1-2; 31:1)

1Pa chaka cha tatu cha utawala wa che Hoshea mwana ju che Ela, mwenye jwa ku Isilaeli, che Hesekia mwana jwa che Ahasi mwenye jwa ku Yuda, ŵatandite kutawala, 2ŵaliji ni yaka ishilini na tano paŵatandite kutawala. Ŵatawele ku Yuda kwa yaka ishilini na tisa achitamaga ku Yelusalemu. Achikulugwe ŵaliji che Abi mwali ju che Sekalia. 3Ŵatesile yambone paujo pa Ambuje Akunnungu mpela iŵatesile che Daudi ambujegwe. 4Ŵapajonasile pamalo pati ŵapopelaga ku matumbi ni kukasanya inyago, ŵakatenye imila ya nnungu Ashela. Iyoyo ŵakasenye lijoka lya shaba liŵaŵilanjikwe Nehushitani lyati che Musa ŵalikolosisye, pakuŵa mpaka pa moŵa go Ŵaisilaeli ŵaliji nkulitutumichisya ubani. 5Che Hesekia ŵankulupilile Ambuje Akunnungu, Akunnungu ŵa ku Isilaeli. Ngapagwa juŵaliji mpela jwele pasikati ja mamwenye ŵa ku Yuda akanaŵe kuŵa mwenye pane aŵala ŵaŵalongolele kuŵa mamwenye. 6Nsyene jo ŵaliji jwa kukulupilichika kwa Ambuje Akunnungu, nganaleka kunkuya, ni ŵagakamwile makanyo ga Ambuje Akunnungu gaŵapele che Musa. 7Nipele, Ambuje Akunnungu ŵaliji pamo ni jwelejo, ŵantesile aikombole yose iŵaitendaga. Ŵangalawiche mwenye jwa ku Ashulu ni kukana kuntumichila. 8Ŵaaputile Ŵafilisiti mpaka musi wa ku Gasa ni mipika jakwe, kutandilila ku misi jijalini ni sanja mpaka ku misi jesyunguchisye mapupa.

9Pachaka cha ncheche cha utawala wa mwenye che Hesekia, nombe chaliji chaka cha saba cha utawala wa mwenye che Hoshea mwana ju che Ela mwenye jwa ku Isilaeli, che Shalimanesa mwenye jwa ku Ashulu ŵaugungumuchile musi wa Samalia ni kuusyungula ni ŵangondo ŵakwe achisakaga kuujigala. 10Kumbesi kwa chaka chaatatu, Ŵaashulu ŵaujigele musi wo. Kwayele musi wa Samalia ŵajigalikwe pa chaka cha sita cha utawala wa mwenye che Hesekia, chaaka chichaliji cha tisa cha utawala wa che Hoshea mwenye jwa ku Isilaeli. 11Mwenye jwa ku Ashulu ŵaasamichisye Ŵaisilaeli ku Ashulu ni kwaŵika ŵane mwa ŵelewo mu musi wa Hala ni ŵane mungulugulu mwa lusulo lwa Haboli ku chilambo cha Gosani ni ku misi ja ku Media. 12Yele yatyochele pakuŵa Ŵaisilaeli nganajitichisya liloŵe lya Ambuje Akunnungu, Akunnungu ŵao, pamalo pakwe ŵalikasile lilangano lyakwe ni yose yati jwakutumichila jwa Ambuje Akunnungu che Musa ŵalamwile. Nganagapikanila makanyo gakwe namose kugatindimisya.

Ŵaashulu akwajogoya ŵandu ŵa ku Yelusalemu

(2 Indu ya katema 32:1-19; Isaiah 36:1-22)

13Pa chaka cha kumi na nne cha utawala wa mwenye che Hesekia, mwenye che Senekalibu jwa ku Ashulu ŵajigungumuchile misi jose ja ku Yuda jijasyunguchikwe mapupa ni kujijigala. 14Che Hesekia ŵatumile utenga ku che Senekalibu ku Lakishi ni kunsalila, “Neŵile. Choonde ntyoche pa chilambo changu noneji tinanlipe chachilichose chinkuchisaka.” Mwenye jwa ku Ashulu ŵaalajisye che Hesekia aichenasyo tani kumi sya madini ga feza ni tani jimo ja madini ga sahabu. 15Nipele che Hesekia ŵampelechele madini feza gose gagaliji mu Nyuumba ja Ambuje Akunnungu ni gagaliji mu mbiko ja nyuumba ja chimwenye. 16Iyoyo peyo mwenye che Hesekia ŵamatwile sahabu kutyochela mminango ja Nyuumba ja Ambuje Akunnungu ni ajila sahabu jati nsyene ŵajiŵisile mu felemu sya nnango, syose ŵampelechele che Senekalibu mwenye jwa ku Ashulu. 17Nipele mwenye jwa ku Ashulu ŵantumile jwankulu jwakwe jwa mipingo ja ngondo, ni jwakutumichila jwakwe jwankulu ni chilongola jwa ŵangondo wakwe, pamo ni mpingo wekulungwa wa ŵangondo ŵa ku Lakishi, kwaula kwa mwenye che Hesekia kwele ku Yelusalemu ko. Ŵaiche mpaka ku Yelusalemu ni kwima mungulugulu nkolola waukwilimisya meesi kutyochela ku litanda lilyajili cha kulutando kwa musi, ku litala lyalikwaula ku Luŵala lwa kuchapila iwalo. 18Ŵalajisye aŵilanjikwe mwenye che Hesekia nambo ŵajawile che Eliakimu mwana jwa che Hilikia juŵajimililaga nyuumba ja chimwenye, ni che Sheba juŵaliji jwakulemba pamo ni che Yoa mwana ju che Asafu jwakulemba ikumbuchisyo ya mwenye. 19Pelepo ajula chilongola jwa ŵangondo ŵansalile, “Mwasalile che Hesekia ‘Yelei ni yakusala mwenye jwali ni machili gose, mwenye jwa ku Ashulu. Ana chindu chachi chinkuchikulupilila? 20Nkuti tukwete litala lyambone lya kuputana ngondo ni ŵangondo ŵetu akwete machili, nambo nkwamba kuŵecheta pe maloŵe genu gangali mate. Ana nduni junkunkulupilila kwika mwa kung'alauka une? 21Nnole, sambano nkujikulupilila Misili, ŵali mpela mpesi wetemeche wati tiunsome nkono mundu jwalijose jutaukulupilile. Yele ni nti che Falao mwenye jwa ku Misili yaali kwa ŵandu wose ŵakunkulupilila.’”

22“Nambo mmwe mwasalilaga, ‘Tukunkulupilila Ambuje Akunnungu, Akunnungu ŵetu,’ Ana ngaŵa Akunnungu jujojo jwati che Hesekia ŵapajonasile peuto pakupopelela papaliji penani ni ilisa yakwe, ŵasalile ŵandu ŵa ku Yuda ni ŵandu ŵa ku Yelusalemu kuti ŵapopelele Ambuje Akunnungu paujo pa chilisa chachili ku Yelusalemu?” 23Nipele njilane ni ambuje ŵangu mwenye jwa ku Ashulu none chinampe falasi elufu mbili iŵaga chinkombole kwapata ŵandu ŵakukwana kukwela falasi wo. 24Mmwejo pamo ni mpingo wenu wamwana wa ŵangondo nkukombola chinauli kumpunda namose jwankulu jumo jwa mpingo wenandi ni wangali machili wa ambuje ŵangu, nachiŵamuno nkukulupilila ku Misili kunyichisye mutuka sya ngondo ni ŵakwela falasi? 25Kupunda yeleyo uli nkuganisya nyiche pangali malajisyo ga Ambuje Akunnungu kuti nangungumuchile ni kuchigungumuchila chilambo chi? Ambuje Akunnungu ni uŵasalile, “Nchigungumuchile chilambo chi ni kuchijonanga!”

26Pelepo che Eliakimu mwana jwa che Hilikia, che Shebina ni che Yoa, ŵansalile jwankulu jwa ŵangondo jo, “Choonde, mmechete noweji kwa Chialamu, pakuŵa tukuchimanyilila, nkaŵecheta noweji kwa Chiebulania, pakuŵa ŵandu ŵaali pachanya lipupa akupikanila.”

27Jwankulu jwa ŵangondo jula ŵansalile, “Uli ambuje ŵangu andumile kuutyosya utenga wu kwa ambuje ŵenu ni kukwenu pe? Uli ngananduma nombe kwa ŵandu ŵaali pachanya lipupa ŵati talye manyi gao ni kung'wa makweso gao mpela ŵanyamwe?” 28Nipele jwankulu jwa mipingo ja ŵangondo ŵajimi, ŵanyanyisye ni ŵatite kwa Chiebulania, “Mpilikane maloŵe ga mwenye jwali ni machili gose, mwenye jwa ku Ashulu! 29Chelechi ni chaakusala mwenye: Nkakunda che Hesekia annambusye. Ngaakombola kunkulupusya kutyochela kwa ŵangondo ŵetu. 30Nkakunda kuti che Hesekia annyenje kuti munkulupilile Ambuje Akunnungu paakunsalila kuti, ‘Ambuje Akunnungu chankulupusye ni musi wu ngautajikwa mmakono mwa mwenye jwa ku Ashulu.’ 31Nkampikanila che Hesekia, pakuwa mwenye jwa ku Ashulu akuti, ‘Nkunde kuti une nantawale. Pelepo kila jumo jwenu chakombole kulya isogosi ya msabibu ŵakwe nsyene, isogosi ya ntini ŵakwe nsyene ni kung'wa meesi ga chiliŵa chakwe nsyene, 32mpaka kanyuma panchinyiche ni kwajausya kwatalika ku chilambo mpela achi chenu, chilambo chachili ni yakulya ni divai ja sambano, chilambo chachili ni mikate ni migunda ja misabibu ni miseituni ni uchi. Nsagule kuŵa ŵajumi pane kwasika.’ Nkampilikanila che Hesekia pakunnambusya achitiji, ‘Ambuje Akunnungu chankulupusye.’ 33Uli, kwana jwalijose pasikati ja minungu ja ŵandu ŵa ilambo ine jwachikulupwisye chilambo chakwe kutyochela mmakono mwa mwenye jwa ku Ashulu? 34Uli, jili kwapi minungu jajikupopelelwa ni ŵandu ŵa ku Hamati ni ku Alipadi. Jili kwapi minungu jajikupopelelwa ni ŵandu ŵa ku Sefalifaimu, ni ku Hena ni ku Iva? Uli ikombwele kujikulupusya Samalia kutyochela kukwangu? 35Pasikati ja minungu ja ilambo yi, uli apali nnungu juŵakombwele kuchilupusya chilambo chakwe kutyochela kwauneji? Kwantiuli sano Ambuje Akunnungu akukombola kuukulupusya musi wa ku Yelusalemu?”

36Nambo ŵandu wose ŵamyalele jii, nganajanga chilichose, pakuŵa mwenye che Hesekia ŵaasalile, “Nkaanjanga.” 37Nipele che Eliakimu mwana jwa che Hilikia, juŵajimililaga nyuumba ja chimwenye ni che Shebina jwakulemba ni che Yoa mwana jwa che Asafu jwakulemba ikumbuchisyo ya mwenye, ŵanjaulile mwenye che Hesekia akuno ali apapwilepapwile iŵalo yao, ŵansalile maloŵe gaŵasalilwe ni ajula jwankulu jwa mipingo ja ngondo.

നിലവിൽ തിരഞ്ഞെടുത്തിരിക്കുന്നു:

2 Mamwenye 18: YBV

ഹൈലൈറ്റ് ചെയ്യുക

പങ്ക് വെക്കു

പകർത്തുക