मरकुस 5
5
ईसु भुत ने एक माणेह मे गेथो काडे
(मत्ती 8:28-34; लुका 8:26-39)
1ईसु अने तीना चेला दर्यान ह़ेली धेड़े, गेरासन्या मुलक पुग्या। 2ईसु ढुंड्या मे गेथो उतर्यो; ता वीटळ्ळा भुत लागलो एक माणेह मड़ाट्या मे गेथो नीकळीन ईसु भणी दवड़ीन आयो। 3तीहयो माणेह मड़ाट्या मे रेतो हतो। तीहया माणेह ने हातकड़ी अने पोगकड़ी अने ह़ाकळ वेर बांदता हता, ते बी तीहयो कोय सी नी बंदायतो हतो। 4काहाके तीने काय केतरा कावा हातकड़ी अने पोगकड़ी अने ह़ाकळ्ये वेर बांदता हता पण तीहयो तीमने आजड़ो दीन तोड़ नाखत्लो। अने ह़ाकल्या ने तोड़ीन वेखड़ी देत्लो अने ईने कोय बी बदाड़ नी सकता हता। 5तीहयो रात-दाड़ो मड़ाट्या मे अने बड़ा मे आड़तो फीरतो हतो, अने आह़फा ने दगड़ा दी-दीन सुंदतो हतो।
6तीहयु माणेह थोड़ोक सेटो रीन ईसु ने आवत्लो देख्यो अने दवड़ीन जाय्न ईसु अगळ मांडा ना भरहे पड़्यो। 7ज्योरेत आड़ीन केदो, “ए ईसु आखा मे मुख्या भगवान ना सोरा;#मत्ती 4:3; लुका 1:32; 6:35; नेवताळा ना काम 16:17; ईब्रानीयो 7:1 मारी ह़ाते तारु ह़ु काम? मने डंड ना आपे करीन भगवान नी आण घाल देदो।” 8काहाके ईसु तीने केतो हतो, “ए वीटळ्ळा भुत, आहया माणेह मे गेथो नीकळ जा!”
9ईसु तीहया माणेह ने पुछ्यो, “तारु ह़ु नाम से?” अने तीहयो ईसु ने केदो, “मेळा, काहाके आमु घणा ढेरका से।” 10अने भुत ईसु सी वीन्ती कर्या, “आमने आहया मुलक मे गेथो ना मोकले।”
11तां एक बड़ी पोर गुवाळ्या ह़ुवर्या ना एक मोट्ला टोळा ने चारवा बाज र्या हता। 12भुत अळी ईसु सी वीन्ती कर्या, “आमने ह़ेला ह़ुवर्या मे मोकली दे, ता आमु हीमनी मे भराय जीया।” 13ईसु वीटळ्ळा भुत ने हुकम आप्यो; तत्यार तीहया वीटळ्ळा भुत तीनी मे गेथा नीकळीन ह़ुवर्या मे जाय्न भराय ज्या; अने तीहया ह़ुवर्या बेक हजार हता, अने आखा ह़ुवर्या आड़खे गेथा दर्या मे कुद पड़्या, अने पाणी मे डुबीन मर ज्या।
14आहयु देखीन गुवाळ्या दवड़ीन फळ्या अने गाम मे जाय्न जे हयु, तीनी खबर कर देदा, अने जे हयु तीहयु देखवा आखा माणहु आया। 15जत्यार तीहया ईसुन्तां आया, ता तीहया ते माणेह ने देख्या जीने पेले भुत लागला हता। हाव तीहयो वारु हय्न लुगड़ा पेरीन होगो हय्न बही र्यो हतो, एतरे तीहया बीही ज्या। 16भुत लागला माणेह ने अने ह़ुवर्या ने ह़ु हयु, तीहयु देखवा वाळा माणहु, जाय्न बीजा माणहु ने की देदा।
17तत्यार माणहु आवीन ईसु ने वीन्ती कर्या के “अमारु मुलक सोड़ीन जती रे।”
18ईसु पासो जवा करीन ढुंड्यु मे बहवा बाज ज्यो; ता जीने पेले भुत लागला हता, तीहयो माणेह ईसु ने केदो: “मने तारी ह़ाते आव्वा दे।”
19ईसु तीने केदो: “नी, मार ह़ाते ना आवे, पण घोर जा अने भगवान मालीक तार पोर दया करीन तारी वाटु केतरु वारु काम कर्यो तीहयु तारा माणहु ने देखाड़जे।”
20तीहयो ता गेथो आह़फा ना दीकापुलीस जीला मे आखी जागे जाय्न परच्यार करवा बाज ज्यो के ईसु मारी वाटु घणु वारु काम कर्यो अने माणहु तीनी वात ह़मळीन वहराय जता हता।
आयर नी मरली सोरी अने पोगराळा दुख वाळी बयर
(मत्ती 9:18-26; लुका 8:40-56)
21गरासन्या मुलक गेथो ईसु पासो ढुंड्या मे बहीन दर्या नी ह़ेली धेड़े ज्यो; तत्यार तां घणा ढेरका माणहु भेळा हय ज्या।#मरकुस 4:1 22आयर नाम नु एक माणेह हतु, तीहयो तीमना भक्तीन घोर ना अदीकार्या मे नो एक हतो।#लुका 13:14 तीहयो आवीन ईसु ना पोगे पड़्यो। 23तीहयो ईसु सी वीन्ती कर्यो, “मारी नान्ली सोरी मरवा वाळी से। दया करीन मारी ह़ाते चाल, अने तीनी पोर हात मेल अने तीहयी वारु हय्न जीवत्ली रेय!”
24ईसु तीनी ह़ाते चाल पड़्यो अने हुड़ु-हुड़ु माणहु बी तीनी ह़ाते चाल पड़्या। अने तीनी ह़ाते चालन्या माणहु चमदाय्न अने धकलाय्न ईसु पोर पड़ जता हता।
25एक बयर हती तीने बारे साल सी पोगराळो दुख हतो। 26तीहयी घणी दुखी हती अने दाकतर्या मे ईलाज करावी-करावीन आखा पय्हा खरचो कर देदली। ते बी वारु नी हयी। पण अळी जादा मांदी हय जी। 27तीहयी ईसु ना बारा मे आहयु ह़मळीन गड़दी मे तीनी पसळ गेथी आयी अने तीनु लुगड़ु सीम लेदी, 28काहाके तीहयी केती हती “कदी मे ईसु नु लुगड़ु सीम लेही, ता मे वारु हय जही करीन माणहु नी भीड़ मे धकलाय्न ईसु नु लुगड़ु सीम लेदी।”
29अने तीनु लोय वयवा बंद हय ज्यु, अने तीने आह़फी ना डील मे मालम पड़्यु, के मे हीड़ा-पीड़ाम मे गेथी छुटीन वारु हय जी। 30अने तत्यारुत ईसु ने बी आह़फा ना डील मे मालम पड़ ज्यु के मारी मे गेथो आरगाय आपवा नो जोर नीकळलो से, अने ईसु पासो फीरीन गड़दी मे वाळा माणहु ने पुछ्यो, “मारु डगलु कोय छीम्यु?”
31तीना चेला तीने केदा, “आहया माणहु ते चमदाय्न अने धकलाय्न तारी पोर पड़ र्या ता तु काहा पुछ र्यो के; मने कोय छीम्यु?”
32ते बी मने कोय छीम्यो आहयु देखवा करीन ईसु च्यारो-मेर भाळवा बाज ज्यो। 33मारु घणु जबर भलु हयलु से, ईसम जाणीन तीहयी बीहती अने कापती जाय्न ईसुन्तां आवी। अने ईसु ना पोगे पड़ी, अने आखा ने जे कंय हयु तीहयु ह़ाचलीन की देदी। 34ईसु तीने केदो, “ओ बेटी, तु ते मार पोर भरहो करी, करीन तु हीड़ा-पीड़ाम गेथी छुटीन वारु हय जी।#मत्ती 9:22 एतरे ह़ुकना जीवे जती रे, तारो रोग जती र्यो हाव तु बेफीकर रेजे।”
35ईसु तीहयी बयर ने केवात बाज र्यो हतो ता थोड़ाक माणहु आयर ना घोर गेथा आवीन तीने केदा, “तारी सोरी नी बची, एतरे मास्तर ने उदड़े ना दमे।”
36ईसु तीमनी वात ह़मळ्यो पण ध्यान नी देदो, ते बी आयर ने केदो, “बीहे ना, पण नीस्तो मारी पोर भरहो राख।” 37ईसु बीजा माणहु ने वाट्ये रेवा दीन पतरस ने, याकुब ने अने याकुब ना भाय युहन्ना ने एतरो आह़फा ह़ाते आव्वा देदो। 38अने ईसु तीमनी ह़ाते आयर ना घोर ज्यो; अने घोर मे माणहु ने घणा जादा रड़त्ला देख्यो अने ह़मळ्यो। 39ईसु तीमने केदो, “तमु काहा रड़ीन-कल्पी र्या? सोरी मरी नी, पण ह़ुव्वा बाज र्यी।”
40माणहु ईसु नी वात ह़मळीन ईसु ने हाह़वा बाज ज्या। अने ईसु तीमने आखा ने घोर मे गेथो बारो काड देदो, अने आय्ह़-बाहा ने अने तीन चेला ने लीन तीना कोपरा मे ज्यो तां ह़ारीक सोरी मरली पड़ रेली हती। 41ईसु सोरी नो हात धरीन तीमनी बोली मे केदो, “तलीता कुमी, आनु मतलब से, ‘ओ सोरी, मे तने केम उठ!’”
42अने तीहयी नान्ली सोरी तत्यारुत जीवती हय्न उठ जी अने तां ह़ारीक हींडवा बाज ज्यी; तीहयी सोरी बारे साल नी हती। अने तीहया आहयु देखीन घणा घबराय ज्या। 43ईसु तीमने हुकम आपीन केदो, आहयी वात कोयने मालम नी हयवा देजो, “अने आहयु बी केदो के सोरी ने खावा आपो।”
നിലവിൽ തിരഞ്ഞെടുത്തിരിക്കുന്നു:
मरकुस 5: PPt2025
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025
