AYohana 3

AYeso nɛ aNikodimos

1Atuk akak nɛ wuwuri, karɔ mi te hwyi, akɔk-ashon baYahuda akak fi iyerek wu kin yet aNikodimos, a kin yet azining ayɛt BaFarasi. 2A tsɛ sɛ aYeso natuk a da ma ku rip, yɛ, “Anet Itees, ngma yit in rēn yit fok ngɔn yet Anet Itees fɛ́ Adakunom wu a da tom. Nek vit ayɔng fɛ́ a da kyem ne a raas ntomong abes yɔng fi ngɔn tsin raas e, kɛ da Adakunom se gung ni wu awo.”

3AYeso fɛ̀ ni wu, “Atsak atsitsak, vit anet fɛ́ a da kyem a nɔ ayɛt Igwɔm Adakunom, i se gbing-gbing ma ba tɛ ba ku tes ninyɛn.”

4ANikodimos tɛ ban ku nye irip, yɛ, “Ba da tsa anɛ fɛ́ ba da tɛ ba tes anet fɛ́ a mi kop ɛ, a da tɛ nɔ nafa anyining nɔng ba da tɛ ba ku tes ɛ?”

5AYeso fɛ̀ ni wu, “Won in da tak atsak, vit ayɔng fɛ́ a da kyem a nɔ ayɛt igwɔm Adakunom dang nɛ ba ku tes nɛ ashi nɛ Kabik. 6Anet kyem a tes anet kyɛk, wɛt ikyɛng fɛ́ Kabik tes yet kabik. 7A bi da te yɔɔt nek ikyɛng fi in fɛ̀ awo, yɛ, ‘Ma ba tɛ ba ki tes yin ninyɛn awo.’ 8Kyon ti fi kuwun di fɛsɛm sak abak arɔ fi kushim; idɔng i se kpaf anɔng nɛ ayɔng fɛ́ Kabik tes.”

9ANikodimos ban ku rip, yɛ, “Na anɛ fi i da sot anɔng ɛ?”

10AYeso fɛ̀ ni wu, “Ngɔn yet agbat anet itees ntsi bafi aIsrela, wɛt ni ngɔn gaat irēn ikyɛng deng ɛ? 11Won in da tak atsak, iyit cɛɛt yit ikyɛng fi in rēn yit, in taas yit ikyɛng fi in man di yit, ngma nɛ anɔng, ni iyin ra yin dang di nɔɔk yin atsak ni ifɛ̀ yit. 12Ki in cɛɛt naton nkyɔrɔk azatse nang ni ra yin dang nɔɔk yin atsak, nɛ anɛ fi i da kyem i nɔɔk yin atsak ki in ki tak yin ifɛ̀ azanɛn ɛ? 13Vit ayɔng fɛ́ a kin man tsɛ azanɛn, tit azining e yɔng fɛ́ a ne azanɛn, Arim Anet. 14Kpaf tɛ fɛ́ aMusa kin di nabak ihwyen ayet ayit, anɔng wu fi i se gbing-gbing ba bi nabak Arim Anet. 15Nɔng ngma bayɔng fɛ́ ba nɔɔk atsak ni wu, ba bi sɛ kutset vit igang.

16“Nek ishim fɛ́ Adakunom bɛ́ nek kazatse makiyi, a nɔɔk azizɛɛt ari wu, nɔng ngma ayɔng fɛ́ a nɔɔk atsak ni wu, a da wey awo, tit a da sɛ kutset vit igang. 17Da Adakunom tom Ari wu sak azatse nɔng a da ra kazatse ishɔt awo, tit nek kazatse ka di sɛ isheshek ni bɔk wu.

18“Bayɔng fɛ́ ba nɔɔk atsak ni wu, vit ishɔt naton ba, awɛt bayɔng fɛ́ ba raba dan nɔɔk atsak ni wu, ishɔt me ka ba ya gyam nek ba raba dan nɔɔk atsak ni iyerek atutup arim Adakunom. 19Ishɔt ka ba ya nek: mgbɛy ne naton, in bɛ́ azatse, wɛt banet wat ishim nhwyi aza mgbey nek nggɔn bá yet nman e. 20Ngma ayɔng fɛ́ a raas aduk nggɔn, da a shim mgbɛy awo, a shim a bɛ́ bakat ni mgbɛy awo, kɔng ba bi di ikyɛng fɛ́ a se ne. 21Awɛt ayɔng fɛ́ a raas atsak, ayɔng nɔɔs ayɛt mgbɛy, nɔng kaangan bin di weshek fok ikyɛng fɛ́ a se ne, Adakunom wu a tsin ku sɛ mo.”

AYohana anet abatisma nɔɔk aYeso iratek

22Ama anɔng, aYeso nɛ bafi imɛɛs wu, ba tseng sak ni mben aJudiya, a tsɛ sok izen azɔng ni iba, nɛ ba raas abatisma.

23Ni izen e yɔng, ne aYohana se ni raas abatisma nɛ Anon bakat nɛ aSalim, nek karɔ me kin bɛ̀ ashi dot, banet woso tang kudang sak azɔng, nɔng ba da ka ba ra abatisma. 24(Ikyɛng e deng kin te nɛ ba resek dan te kpaf aYohana ari inyang.) 25Ni izen e yɔng, bafi imɛɛs aYohana kpa nanan nɛ anet aYahuda akak, naton nggɔn ikusu. 26Bafi imɛɛs e tsɛ ba sɛ aYohana ba fɛ̀ ni wu, yɛ, “Anet Itees, anet yame fi in kin ku sɛ yit ni nyi kukyɛk aJodan, ayɔng fi ngɔn kin fɛ̀ fok ayet Anet-Isheshek yit, a yɔng a se ni ras abatisma bà. Banet yɔng ba tang kudang sak azɔng, ba raba dan bɛs azeng narɔ yit.”

27AYohana fɛ̀ ni ba, “Vit anet fɛ́ a da kyem a sɛ ikikak, tit Adakunom wu a ku nɔk. 28Iyin ice yin rēn yin fok, in man ki tak yin, yɛ, ‘Da imi wu in yet Anet-Isheshek e awo, tit ayɔng fɛ́ ba tom e, fi in tsin ku nye irèn.’ 29Ni weneng, amatek agwol e wu a sok agwol e. Ifɛ́ afidang wu yet na a ku sɛ mo itɛrɛk iyɛ kyɛk, nek anɔng, iyɛ ikan in, mi shining nek iwu. 30I se gbing-gbing iwu nɛ a ya kashon ni i rasak, ni imi ban kyɛɛs.

31“Ayɔng fɛ́ a ne azanɛn, a wat akaangan. Ngma ayɔng fɛ́ a ne azatse, a yet a fɛ́ azatse, kucɛɛt wu yet kufe azatse. Ayɔng fɛ́ a ne azanɛn wat akaangan. 32Iwu cɛɛt naton ikyɛng fɛ́ a kin man di, ni idɔng fɛ́ a kin man fok, ngma nɛ anɔng vit ayɔng fɛ́ a shan ifɛ̀ wu. 33Ngma ayɔng fɛ́ a shan kucɛɛt wu, a mi tonong weshek, yɛ, Adakunom yet atsak. 34Nek ayɔng fɛ́ Adakunom tom e, a cɛɛt kucɛɛt Adakunom, nek Adakunom ku nesek Kabik vit nkum. 35Ada me shim ari me, nek anɔng, a nɔɔk kaakyɛ ni bɔk wu.#3:35 Ban di yin: AMatiyu 11:27; ALuka 10:22. 36Ngma ayɔng fɛ́ a nɔɔk atsak ni ari me, a bɛ̀ kutset vit igang. Awɛt ayɔng fɛ́ a rawu ari me, vit iwu ni sɛ kutset, tit ishɔt Adakunom fi ikyɛk naton wu.”

നിലവിൽ തിരഞ്ഞെടുത്തിരിക്കുന്നു:

AYohana 3: IbaasNT

ഹൈലൈറ്റ് ചെയ്യുക

പങ്ക് വെക്കു

പകർത്തുക