Kalinlinima 7
7
Izraɛl zuɣulaannim’ mali sara
1Musa ni daa ti Yawɛ jɛmbu suɣili la naai dahin’ shɛli, o daa boola kpam bahi di zuɣu m-mali di mini binshɛɣukam din be di ni zaa ka di be kasi, ka lan booi kpam bahi sara maligu bimbini mini di nɛma zaa zuɣu m-mali di gba ka di be kasi. 2Ka Izraɛl zuɣulaannim’ bɛn nyɛ bɛ yaannim’ dunoya ni dɔɣirikpamba mini bɛ ni daa kali zuliya shɛb’ la zuɣulaannim’ daa mali sara. 3Bɛ daa zaŋla Tɔrokɔnima ayɔbu mini naɣilahi pinaayi din daa nyɛ bɛ sara na nti sɔŋ Yawɛ tooni. Zuɣulaannim’ ayi kam daa laɣim sula tɔroko’ yini, ka bɛ ninvuɣ’ yino kam su naɣila’ yino. Ka bɛ daa zaŋ ba mali sara Yawɛ jɛmbu suɣili tooni. 4Di saha ka Yawɛ daa yɛli Musa, 5“Deem’ pina maa bɛ sani n-zaŋ ba ti Lɛvinima kaman sokam tuma ni nyɛ shɛm, ka bɛ zaŋ ba tum suɣili maa ni tuma.” 6Dinzuɣu ka Musa daa deei tɔrokɔnim’ maa mini naɣilahi maa n-zaŋ ba ti Lɛvinim’ maa. 7O daa zaŋla tɔrokɔnim’ ayi mini naɣilah’ anahi ti Gɛrishɔn bihi kaman bɛ tuma ni nyɛ shɛm; 8ka daa zaŋ tɔrokɔnim’ anahi mini naɣilah’ anii ti Mɛrari bihi kaman bɛ tuma ni nyɛ shɛm, ka maligumaana Aduna bia Itama nyɛ bɛ tuma zuɣulana. 9Amaa bɛ daa bi ti Kɔhat bihi la shɛli, dama bɛna n-daa su ni bɛ zaŋ neen’ shɛŋa din be kasi la buɣi bɛ bɔɣusapima zuɣu.
10Ka zuɣulaannim’ maa daa lan zaŋ bɛ pina ka sara maligu bimbini gbinna bɛ ni daa zaŋ sara maligu bimbini maa ti Naawuni ka booi kpam bahi di zuɣu saha shɛl’ la. 11Ka Yawɛ daa yɛli Musa, “Zuɣulaan’ yino kam zaŋm’ o pina na ti malimi sara dahin yini kam, sara maligu bimbini maa zaŋ ti Naawuni la zuɣu.”
12Aminadab ŋun daa nyɛ Juda zuliya ni nir’ la bia Nashɔn n-daa zaŋ o sara na ti mali dabisili din daŋ tooni dali. 13O sara daa nyɛla anzinfa parante yini din tibisim nyɛ kilɔgiram yini ni pirigili mini anzinfa tahili zaɣ’ yini din tibisim nyɛ giram kɔbisinii kaman Naawuni jɛmbu duu liɣiri tibisim zahimbu ni nyɛ shɛm. Ka bɛ daa zaŋ kpam ŋmiri zim viɛlli m-pali bina ayi maa ni bɛ zaŋ mali chi sara. 14O daa lan bo salima laa din tibisim nyɛ giram kɔbiga ni pia, ka tulaale zim pal’ li. 15O daa lan bo naɣilabil’ yino mini piɛla’ yino ni yuun’ yini piɛlabil’ yino mali sara shɛli bɛ ni zaŋdi nyɔri buɣim la. 16O daa lan bo bula’ yino so bɛ ni daa zaŋdi maani alahichi sanyoo sara la 17ni naɣilah’ ayi mini piɛlah’ anu ni bulah’ anu ni yuun’ yini piɛlabih’ anu shɛb’ bɛ ni daa zaŋdi maani biɛrisuŋ sara la. Aminadab bia Nashɔn sara n-daa bala.
18Dabisili din pah’ ayi dali, Zua bia Nɛtanɛl ŋun daa nyɛ Isaka zuliya zuɣulan’ la n-daa mali sara. 19O ni daa zaŋ shɛli mal’ o sara maa daa nyɛla anzinfa parante yini din tibisim nyɛ kilɔgiram yini ni biɛla mini anzinfa tahi’ yini din tibisim nyɛ giram kɔbisinii, kaman Naawuni jɛmbu duu liɣiri tibisim zahimbu ni nyɛ shɛm. Bɛ ni daa niŋ kpam ŋmiri zim viɛl’ shɛli ni bɛ zaŋ mali chi sara daa palila bina ayi maa. 20O daa lan bo salima laa din tibisim nyɛ giram kɔbiga ni pia, ka tulaale zim pal’ li. 21O daa lan bo naɣilabil’ yino mini piɛla’ yino ni yuun’ yini piɛlabil’ yino mali sara shɛli bɛ ni zaŋdi nyɔri buɣim la. 22O daa lan bo bula’ yino so bɛ ni daa zaŋdi maani alahichi sanyoo sara la 23ni naɣilah’ ayi mini piɛlah’ anu ni bulah’ anu ni yuun’ yini piɛlabih’ anu m-mali biɛrisuŋ sara. Zua bia Nɛtanɛl sara n-daa bala.
24Dabisili din pah’ ata dali, Hɛlɔn bia Ɛliab ŋun daa nyɛ Zɛbulɔn zuliya zuɣulan’ la n-daa mali sara. 25O sara daa nyɛla anzinfa parante yini din tibisim nyɛ kilɔgiram yini ni biɛla mini anzinfa tahi’ yini din tibisim nyɛ giram kɔbisinii kaman Naawuni jɛmbu duu liɣiri tibisim zahimbu ni nyɛ shɛm. Bɛ ni daa niŋ kpam ŋmiri zim viɛl’ shɛli ni bɛ zaŋ mali chi sara daa palila bina ayi maa. 26O daa lan bo salima laa din tibisim nyɛ giram kɔbiga ni pia, ka tulaale zim pal’ li. 27O daa lan bo naɣilabil’ yino mini piɛla’ yino ni yuun’ yini piɛlabil’ yino mali sara shɛli bɛ ni zaŋdi nyɔri buɣim la. 28O daa lan bo bula’ yino so bɛ ni zaŋdi maani alahichi sanyoo sara la 29ni naɣilah’ ayi mini piɛlah’ anu ni bulah’ anu ni yuun’ yini piɛlabih’ anu m-mali suhudoo sara. Hɛlɔn bia Ɛliab sara n-daa bala.
30Dabisili din pah’ anahi dali, Shɛdiu bia Ɛlizu ŋun daa nyɛ Rubin zuliya zuɣulan’ la n-daa mali sara. 31O sara daa nyɛla anzinfa parante yini din tibisim nyɛ kilɔgiram yini ni biɛla ni anzinfa tahi yini din tibisim nyɛ giram kɔbisinii kaman Naawuni jɛmbu duu liɣiri tibisim zahimbu ni nyɛ shɛm. Bɛ ni daa niŋ kpam ŋmiri zim viɛl’ shɛli ni bɛ zaŋ mali chi sara daa palila bina ayi maa. 32O daa lan bo salima laa din tibisim nyɛ giram kɔbiga ni pia, ka tulaale zim pal’ li. 33O daa lan bo naɣilabil’ yino mini piɛla’ yino ni yuun’ yini piɛlabil’ yino mali sara shɛli bɛ ni zaŋdi nyɔri buɣim la. 34O daa lan bo bula’ yino so bɛ ni zaŋdi maani alahichi sanyoo sara la 35ni naɣilah’ ayi mini piɛlah’ anu ni bulah’ anu ni yuun’ yini piɛlabih’ anu shɛb’ bɛ ni zaŋdi maani biɛrisuŋ sara la. Shɛdiu bia Ɛlizu sara n-daa bala.
36Dabisili din pah’ anu dali, Zurishadai bia Shɛlumiɛl ŋun daa nyɛ Simiɔn zuliya zuɣulan’ la n-daa mali sara. 37O sara daa nyɛla anzinfa parante yini din tibisim nyɛ kilɔgiram yini ni biɛla ni anzinfa tahi’ yini din tibisim nyɛ giram kɔbisinii kaman Naawuni jɛmbu duu liɣiri tibisim zahimbu ni nyɛ shɛm. Bɛ ni daa niŋ kpam ŋmiri zim viɛl’ shɛli ni bɛ zaŋ mali chi sara daa palila bina ayi maa. 38O daa lan bo salima laa din tibisim nyɛ giram kɔbiga ni pia, ka tulaale zim pal’ li. 39O daa lan bo naɣilabil’ yino mini piɛla’ yino ni yuun’ yini piɛlabil’ yino mali sara shɛli bɛ ni zaŋdi nyɔri buɣim la. 40O daa lan bo bula’ yino so bɛ ni zaŋdi maani alahichi sanyoo sara la 41ni naɣilah’ ayi mini piɛlah’ anu ni bulah’ anu ni yuun’ yini piɛlabih’ anu shɛb’ bɛ ni zaŋdi maani biɛrisuŋ sara la. Zurishadai bia Shɛlumiɛl sara n-daa bala.
42Dabisili din pah’ ayɔbu dali, Diuɛl bia Ɛliasaf ŋun daa nyɛ Gaad zuliya zuɣulan’ la n-daa mali sara. 43O sara daa nyɛla anzinfa parante yini din tibisim nyɛ kilɔgiram yini ni biɛla ni anzinfa tahi’ yini din tibisim nyɛ giram kɔbisinii kaman Naawuni jɛmbu duu liɣiri tibisim zahimbu ni nyɛ shɛm. Bɛ ni daa niŋ kpam ŋmiri zim viɛl’ shɛli ni bɛ zaŋ mali chi sara daa palila bina ayi maa. 44O daa lan bo salima laa din tibisim nyɛ giram kɔbiga ni pia, ka tulaale zim pal’ li. 45O daa lan bo naɣilabil’ yino mini piɛla’ yino ni yuun’ yini piɛlabil’ yino mali sara shɛli bɛ ni zaŋdi nyɔri buɣim la. 46O daa lan bo bula’ yino so bɛ ni zaŋdi maani alahichi sanyoo sara la 47ni naɣilah’ ayi mini piɛlah’ anu ni bulah’ anu ni yuun’ yini piɛlabih’ anu shɛb’ bɛ ni zaŋdi maani biɛrisuŋ sara. Diuɛl bia Ɛliasaf sara n-daa bala.
48Dabisili din pah’ ayopɔin dali, Ammihud bia Ɛlishama ŋun daa nyɛ Ifriim zuliya zuɣulan’ la n-daa mali sara. 49O sara daa nyɛla anzinfa parante yini din tibisim nyɛ kilɔgiram yini ni biɛla ni anzinfa tahi’ yini din tibisim nyɛ giram kɔbisinii kaman Naawuni jɛmbu duu liɣiri tibisim zahimbu ni nyɛ shɛm. Bɛ ni daa niŋ kpam ŋmiri zim viɛl’ shɛli ni bɛ zaŋ mali chi sara daa palila bina ayi maa. 50O daa lan bo salima laa din tibisim nyɛ giram kɔbiga ni pia, ka tulaale zim pal’ li. 51O daa lan bo naɣilabil’ yino mini piɛla’ yino ni yuun’ yini piɛlabil’ yino mali sara shɛli bɛ ni zaŋdi nyɔri buɣim la. 52O daa lan bo bula’ yino so bɛ ni zaŋdi maani alahichi sanyoo sara la 53ni naɣilah’ ayi mini piɛlah’ anu ni bulah’ anu ni yuun’ yini piɛlabih’ anu shɛb’ bɛ ni zaŋdi maani biɛrisuŋ sara la. Ammihud bia Ɛlishama sara n-daa bala.
54Dabisili din pah’ anii dali Pɛdazu bia Gamaliɛl ŋun daa nyɛ Manaasa zuliya zuɣulan’ la n-daa mali sara. 55O sara daa nyɛla anzinfa parante yini din tibisim nyɛ kilɔgiram yini ni biɛla ni anzinfa tahi’ yini din tibisim nyɛ giram kɔbisinii kaman Naawuni jɛmbu duu liɣiri tibisim zahimbu ni nyɛ shɛm. Bɛ ni daa niŋ kpam ŋmiri zim viɛl’ shɛli ni bɛ zaŋ mali chi sara daa palila bina ayi maa. 56O daa lan bo salima laa din tibisim nyɛ giram kɔbiga ni pia, ka tulaale zim pal’ li. 57O daa lan bo naɣilabil’ yino mini piɛla’ yino ni yuun’ yini piɛlabil’ yino mali bɛ ni zaŋdi sara shɛli nyɔri buɣim la. 58O daa lan bo bula’ yino so bɛ ni zaŋdi maani alahichi sanyoo sara la 59ni naɣilah’ ayi mini piɛlah’ anu ni bulah’ anu ni yuun’ yini piɛlabih’ anu shɛb’ bɛ ni zaŋdi maani biɛrisuŋ sara la. Pɛdazu bia Gamaliɛl sara n-daa bala.
60Dabisili din pah’ awɛi dali, Gidiɔni bia Abidan ŋun daa nyɛ Bɛnjamin zuliya zuɣulan’ la n-daa mali sara. 61O sara daa nyɛla anzinfa parante yini din tibisim nyɛ kilɔgiram yini ni biɛla ni anzinfa tahi’ yini din tibisim nyɛ giram kɔbisinii kaman Naawuni jɛmbu duu liɣiri tibisim zahimbu ni nyɛ shɛm. Bɛ ni daa niŋ kpam ŋmiri zim viɛl’ shɛli ni bɛ zaŋ mali chi sara daa palila bina ayi maa. 62O daa lan bo salima laa din tibisim nyɛ giram kɔbiga ni pia, ka tulaale zim pal’ li. 63O daa lan bo naɣilabil’ yino mini piɛla’ yino ni yuun’ yini piɛlabil’ yino mali sara shɛli bɛ ni zaŋdi nyɔri buɣim la. 64O daa lan bo bula’ yino so bɛ ni zaŋdi maani alahichi sanyoo sara la 65ni naɣilah’ ayi mini piɛlah’ anu ni bulah’ anu ni yuun’ yini piɛlabih’ anu shɛb’ bɛ ni zaŋdi maani biɛrisuŋ sara la. Gidiɔni bia Abidan sara n-daa bala.
66Dabisili din pahi pia dali, Ammishadai bia Ahiɛza ŋun daa nyɛ Dan zuliya zuɣulan’ la n-daa mali sara. 67O sara daa nyɛla anzinfa parante yini din tibisim nyɛ kilɔgiram yini ni biɛla ni anzinfa tahi’ yini din tibisim nyɛ giram kɔbisinii kaman Naawuni jɛmbu duu liɣiri tibisim zahimbu ni nyɛ shɛm. Bɛ ni daa niŋ kpam ŋmiri zim viɛl’ shɛli ni bɛ zaŋ mali chi sara daa palila bina ayi maa. 68O daa lan bo salima laa din tibisim nyɛ giram kɔbiga ni pia, ka tulaale zim pal’ li. 69O daa lan bo naɣilabil’ yino mini piɛla’ yino ni yuun’ yini piɛlabil’ yino mali sara shɛli bɛ ni zaŋdi nyɔri buɣim la. 70O daa lan bo bula’ yino so bɛ ni zaŋdi maani alahichi sanyoo sara la 71ni naɣilah’ ayi mini piɛlah’ anu ni bulah’ anu ni yuun’ yini piɛlabih’ anu shɛb’ bɛ ni zaŋdi maani biɛrisuŋ sara la. Ammishadai bia Ahiɛza sara n-daa bala.
72Dabisili din pahi piniyini dali, Okiran bia Pagiɛl ŋun daa nyɛ Asha zuliya zuɣulan’ la n-daa mali sara. 73O sara daa nyɛla anzinfa parante yini din tibisim nyɛ kilɔgiram yini ni biɛla ni anzinfa tahi’ yini din tibisim nyɛ giram kɔbisinii kaman Naawuni jɛmbu duu liɣiri tibisim zahimbu ni nyɛ shɛm. Bɛ ni daa niŋ kpam ŋmiri zim viɛl’ shɛli ni bɛ mali chi sara daa palila bina ayi maa. 74O daa lan bo salima laa din tibisim nyɛ giram kɔbiga ni pia, ka tulaale zim pal’ li. 75O daa lan bo naɣilabil’ yino mini piɛla’ yino ni yuun’ yini piɛlabil’ yino mali sara shɛli bɛ ni zaŋdi nyɔri buɣim la. 76O daa lan bo bula’ yino so bɛ ni zaŋdi maani alahichi sanyoo sara la 77ni naɣilah’ ayi mini piɛlah’ anu ni bulah’ anu ni yuun’ yini piɛlabih’ anu shɛb’ bɛ ni zaŋdi maani biɛrisuŋ sara la. Okiran bia Pagiɛl sara n-daa bala.
78Dabisili din pahi pinaayi dali, Inan bia Ahira ŋun daa nyɛ Naftali zuliya zuɣulan’ la n-daa mali sara. 79O sara daa nyɛla anzinfa parante yini din tibisim nyɛ kilɔgiram yini ni biɛla ni anzinfa tahi’ yini din tibisim nyɛ giram kɔbisinii kaman Naawuni jɛmbu duu liɣiri tibisim zahimbu ni nyɛ shɛm. Bɛ ni daa niŋ kpam ŋmiri zim viɛl’ shɛli ni bɛ zaŋ mali chi sara daa palila bina ayi maa. 80O daa lan bo salima laa din tibisim nyɛ giram kɔbiga ni pia, ka tulaale zim pal’ li. 81O daa lan bo naɣilabil’ yino mini piɛla’ yino ni yuun’ yini piɛlabil’ yino mali sara shɛli bɛ ni zaŋdi nyɔri buɣim la. 82O daa lan bo bula’ yino so bɛ ni zaŋdi maani alahichi sanyoo sara la 83ni naɣilah’ ayi mini piɛlah’ anu ni bulah’ anu ni yuun’ yini piɛlabih’ anu shɛb’ bɛ ni zaŋdi maani biɛrisuŋ sara la. Inan bia Ahira sara n-daa bala.
84Bɛ ni daa booi kpam bahi sara maligu bimbini maa zuɣu ka zaŋ li ti Naawuni saha shɛli, ka Izraɛl zuɣulaannim’ zaŋ binshɛŋa mali sara maa n-daa nyɛ; anzinfa parantɛnim’ pinaayi mini anzinfa taha pinaayi ni salima lahi pinaayi. 85Anzinfa parante yini kam tibisim daa nyɛla kilɔgiram yini ni biɛla, ka tahi’ yini kam tibisim daa nyɛ giram kɔbisinii. Ka anzinfa binyara maa zaa tibisim daa nyɛla kilɔgiram pisinaayopɔin ni biɛla kaman Naawuni jɛmbu duu liɣiri tibisim zahimbu ni nyɛ shɛm. 86Ka tulaale zim ni daa pali salima lahi pinaayi shɛŋa la zaɣ’ yini kam tibisim nyɛ giram kɔbiga ni pia kaman Naawuni jɛmbu duu liɣiri tibisim zahimbu ni nyɛ shɛm. Ka salima lahi maa zaa tibisim nyɛ kaman kilɔgiram yini ni giram pihitanaayi. 87Biŋkɔb’ shɛb’ zaa bɛ ni daa zaŋ mali sara shɛli bɛ ni zaŋdi nyɔri buɣim la daa nyɛla naɣilahi pinaayi mini piɛlahi pinaayi ni yuun’ yini piɛlabihi pinaayi m-pahi bɛ chi sara zuɣu ni bulahi pinaayi shɛb’ bɛ ni daa zaŋdi maani alahichi sanyoo sara la. 88Biŋkɔb’ shɛb’ zaa bɛ ni daa zaŋ mali suhudoo sara la daa nyɛla naɣilahi pisinaanahi mini piɛlahi pihiyɔbu ni bulahi pihiyɔbu ni yuun’ yini piɛlabihi pihiyɔbu. Bɛ ni daa booi kpam bahi sara maligu bimbini maa zuɣu ka zaŋ li ti Naawuni maa nyaaŋa, ka bɛ daa maan di sara shɛli m-bala.
89Saha shɛli Musa ni daa kpe Yawɛ chirigibu shee suɣili maa ni ni o mini Yawɛ ti tɔɣisi yɛtɔɣa la, ka o daa wum kukol’ shɛli Alikauli Adaka yɔrigu la zuɣusaa chɛrubinim’ ayi la sunsuuni ka di tɔɣisir’ o yɛtɔɣa.
Red Letter Dagbani Bible © Bible Society of Ghana, 2011