Kalinlinima 11
11
Bɛ boli nimaani yuli Tabɛra
1Ka niriba maa daa ti ŋumdi bɛ kparima ni niŋdi Yawɛ bɛ yɛlimuɣisira zuɣu, ka Yawɛ daa wum li, ka o suhu yiɣisi pam. Di saha ka Yawɛ daa chɛ ka buɣim taai bɛ sani n-di bɛ suɣa maa gulinyaansi luɣ’ shɛŋa. 2Amaa ka niriba maa daa kuhi niŋ Musa; ka Musa daa suhi Yawɛ ka buɣim maa kpi. 3Ka bɛ daa boli nimaani yuli Tabɛra,#11.3 TABƐRA: Hiburuli ni yuli ŋɔ gbinni nyɛla “Nyɔbu” bee “Buɣim dibu.” Yawɛ buɣim ni daa di bɛ sani maa zuɣu.
Musa pii zuɣulaannim’ pisopɔin
4Ninvuɣ’ yoya bɛn daa be bɛ ni daa kpiri kɔre pam; ka Izraɛlnim’ gba daa lan kum ka yɛli, “Ti bi zaɣisi ka ti di nya nimdi ŋubi. 5Ti teei ti ni daa yi ŋubiri zahim shɛli yoli Ijipti la mini kukombanim’ ni watamilo ni gabo ni alibarisa ni tafarinom la yɛla; 6amaa pumpɔŋɔ ti gbarigimi, ka binshɛli kani n-naɣ’ pahila manna shɛli ti ni kul lihiri ŋɔ.”
7Manna maa daa ŋmanila tiwal’ shɛli din biɛlim pɔripɔra, ka di kɔtomsi nyɛ zaɣ’ piɛlifaa kaman dɔzim la. 8#Yibu 16.31 Ka niriba maa daa chani gindi pihiri li na nti niɛmdi li nɛya zuɣu bee n-zaŋ li niŋdi toya ni tɔra, ka zaŋdi li niŋdi duɣuri ni duɣira, ka mal’ li maani maha; ka di nyaɣisim ŋmanila bɛ ni zaŋ kpam mali mahi’ shɛŋa. 9#Yibu 16.13-15 Maligim daa yi ti luri bɛ biɛhigu maa shee yuŋ saha shɛli, ka manna maa gba dol’ li luri na.
10Ka niriba maa mini bɛ malibu zaa daa yina ti ʒe bɛ suɣa dunoya ni kumda, ka Musa daa wum bɛ kumsi maa; ka Yawɛ suhi daa yiɣisi pam, ka di daa bi niŋ Musa nyaɣisim. 11Ka Musa daa bɔhi Yawɛ, “Bɔ n-niŋ ka a niŋ mani ŋun nyɛ a dabili ŋɔ lala? Bɔ n-niŋ ka a zaŋ niriba ŋɔ zaa ʒi’ tibisili ʒili ma ka bi sɔŋ ma? 12Mani n-daa tiɣi niriba ŋɔ zaa pua bee mani n-daa dɔɣi ba, ka a ni yɛli ma, ‘Kpuɣim’ ba buɣi kaman biyol’ ni buɣiri bimɔɣiriga shɛm la tahi a ni daa lo alikauli ni a ni zaŋ tiŋgbɔn shɛli ti bɛ yaannim’ la ni?’ 13Ya ka n lee yɛn nya nimdi ti niriba ŋɔ zaa? Dama bɛ kumdimi niŋdi ma ka yɛra, ‘Tim’ ti nimdi ka ti ŋubi’. 14N kɔŋko ku tooi gbibi niriba ŋɔ zaa, dama bɛ galisi nyaŋ ma. 15A yi yɛn niŋ ma la lala, nyin’ niŋm’ ma nirilim n-dii ku ma, ka lala chɛ ka n ku nya n nandahima biɛhigu.”
16Ka Yawɛ daa yɛli Musa, “Laɣimmi Izraɛl kpamba ninvuɣ’ pisopɔin shɛb’ a ni mi ka bɛ nyɛ niriba maa kpamba ni zuɣulaannim’ bɛn su ba n-zaŋ ba ka Yawɛ chirigibu shee suɣili maa gbinna, ka bɛ ti zani nimaani pah’ a zuɣu. 17N ni siɣina ti tɔɣisi ya yɛtɔɣa nimaani; ka zaŋ shi’ so ŋun be a zuɣu maa yiko shɛli niŋ bɛ ni, ka bɛ ʒi niriba maa ʒili maa sɔŋ a, ka a kɔŋko ku lan ʒi li. 18Yɛlim’ niriba maa, ‘Malimiya yimaŋ’ kasi gu biɛɣuni. Yi sa ni ŋubi nimdi’, dama yi kum niŋ Yawɛ yɛra, ‘Ti bi zaɣisi ka ti di nya nimdi ŋubi. Ti ni daa be Ijipti la daa so’. Dinzuɣu Yawɛ ni tin ya nimdi ka yi ŋubi. 19Pa dahin yini ka yi yɛn ŋub’ li bee daba ayi bee daba anu bee biɛɣu pia bee biɛɣ’ pisi, 20amaa gol’ muni zaa hal ka di ti yiri yi nyɛhi ni, ka nyɔni yi nyee, dama yi zaɣisi Yawɛ ŋun be yi sani ŋɔ ka kumdi niŋd’ o yɛra, ‘Bɔzuɣu ka ti daa lee yi Ijipti na?’ ”
21Amaa ka Musa daa yɛli, “M mini ninvuɣ’ shɛb’ bɛn chani ŋɔ kalinli nyɛla ninvuɣ’ tuhi’ kɔbisiyɔbu, ka a yɛli, ‘N ni ti ba nimdi ka bɛ ŋubi gol’ muni zaa’? 22Ti ni nya piɛri mini niɣi n-ku n-ti ba ka di saɣi ba? Bee ti yi gbahi teeku zahim zaa ti ba, di ni saɣi ba?”
23Ka Yawɛ daa bɔhi Musa, “Yawɛ yiko malila tariga? To, a ni nya n yɛligu maa ni niŋ yɛlimaŋli yi sani bee di ku niŋ.”
24Dinzuɣu ka Musa daa chaŋ ti zaŋ Yawɛ yɛtɔɣa maa yɛli niriba maa; ka daa laɣim Izraɛlnim’ kpamba ninvuɣ’ pisopɔin na nti chɛ ka bɛ zani gili suɣili maa. 25Di saha ka Yawɛ daa be sagban’ ni n-siɣina ti tɔɣis’ o yɛtɔɣa, ka zaŋ shi’ so ŋun daa be Musa ni la yiko shɛli niŋ kpamba pisopɔin maa ni; shia maa ni daa kul siɣi bɛ zuɣu na saha shɛli, ka bɛ daa tɔɣis’ anabitali yɛtɔɣa. Amaa bɛ daa bi lan niŋ lala yaha.
26Niriba ayi daa kpalim bela yiŋa, yino yuli n-daa booni Ɛldad, ka ŋun’ la mi yuli booni Mɛdad, ka shia maa daa siɣi bɛ zuɣu na; bɛ gba daa be bɛ ni sab’ shɛb’ yuya maa ni, amaa ka bɛ daa lee bi chaŋ suɣili maa gbini, ka bɛ gba daa tɔɣis’ anabitali yɛtɔɣa yiŋa. 27Ka nachimbil’ so daa guui chaŋ ti yɛli Musa, “Ɛldad mini Mɛdad be yiŋa n-tɔɣisir’ anabitali yɛtɔɣa.” 28Ka Nan bia Jɔshua ŋun daa nyɛ Musa sɔŋda ni o ninvuɣ’ gahinda ni yino la daa yɛli, “N dan’ Musa, karim’ ba.”
29Amaa ka Musa daa bɔh’ o, “N zuɣu ka a zabiri nyuli maa? N di bi zaɣisi ka Yawɛ niriba zaa nyɛla anabinima, ka Yawɛ di zaŋ o shia niŋ bɛ ni.” 30Ka Musa mini Izraɛl kpamba maa daa lab’ yiŋa.
31Di saha ka pɔhim daa yi Yawɛ sani n-ʒe kɔrinsi teeku ni na ti luhi gili suɣa maa shee luɣilikam m-paai kilomita bɔbili wɔɣilim tariga, ka bɛ ni do tiŋ’ shɛm dubu nyɛ kaman mita yini laasabu. 32Ka niriba maa daa yiɣisi dindali maa wuntaŋ’ ni mini yuŋ ni dabisi’ shɛli din paya dali zaa n-gbahi kɔrinsi maa; ŋun daa bi gbahi ba pam ni daa gbahi shɛb’ tibisim daa bi pooi kilɔgiram ayi ni biɛla, ka bɛ daa zaŋ ba sɔŋ yɛrigi gili suɣa maa shee zaa. 33Amaa bɛ nyina ni daa na gbab’ nimdi maa ka di na bi lu bɛ puuni saha shɛli, ka Yawɛ suhu daa yiɣisi bahi niriba maa zuɣu, ka o chɛ ka alɔbo titali lu bɛ zuɣu. 34Dinzuɣu ka bɛ daa boli nimaani yuli Kiburɔtihataava,#11.34 KIBURƆTIHATAAVA: Hiburuli ni yuli ŋɔ gbinni nyɛla, “Kɔrɛnim’ gbala.” bɛ ni daa sɔɣi ninvuɣ’ shɛb’ bɛn kpiri kɔre pam nimaani la zuɣu. 35Ka niriba maa daa yi Kiburɔtihataava maa n-chaŋ Hazɛrɔt.
Red Letter Dagbani Bible © Bible Society of Ghana, 2011