ᐁᐠᓴᑕᐢ 39

1ᐁᑯᓯ ᐊᓂᒪ ᒋᐯᑕᑫᐧᑭᐣ, ᒥᓇ ᒋᐯᑕᑯᒥᐦᑫᐧᑭᐣ, ᒥᓇ ᐸᑲᐢᑭᒥᐦᑫᐧᑭᐣ, ᑭ ᐅᐦᒋ ᐅᓯᐦᑖᐊᐧᐠ ᐁ ᒥᔪᒋᑳᑌᑭ ᑭᑭᐢᑳᒋᑲᓇ, ᑭᑕ ᐋᐸᑕᑭ ᐁ ᐸᒥᑖᓱᕽ ᑲᓈᑕᓄᕽ, ᐁᑯᓯ ᑭ ᐅᓯᐦᑕᒪᐁᐧᐤ ᐁᕒᐊᓇ ᑲᓈᒋ ᑭᑭᐢᑳᒋᑲᓇ; ᑳ ᑎᐯᔨᐦᒋᑫᐟ ᑳ ᑭ ᐃᑕᓱᐋᐧᑖᐟ ᒧᓯᓴ.

2ᑭ ᐅᓯᐦᑖᐤ ᒫᑲ ᐊᓂᒪ ᐁᐦᐸᐟ ᐁ ᐋᐸᒋᐋᐟ ᐅᓵᐃᐧᓱᓂᔮᐊᐧ, ᒥᓇ ᒋᐯᑕᑫᐧᑭᐣ, ᒥᓇ ᒋᐯᑕᑯᒥᐦᑫᐧᑭᐣ ᒥᓇ ᐸᑲᐢᑭᒥᐦᑫᐧᑭᐣ, ᒥᓇ ᐁ ᒥᔪᒋᑳᑌᐠ ᐋᐧᐱᐢᑫᑭᐣ. 3ᑭ ᐸᐸᑭ ᓇᐸᑲᑕᐁᐧᐊᐧᐠ ᒫᑲ ᐅᓵᐃᐧᓱᓂᔮᐊᐧ, ᐁᑯᓯ ᑭ ᔮᔨᑳᐯᓭᐧᐊᐧᐠ, ᑭᑕ ᑭᔨᑲᐊᐧᐢᑌᐋᐧᒋᐠ ᒋᐯᑕᑫᐧᑭᓄᕽ, ᒥᓇ ᒋᐯᑕᑯᒥᐦᑫᐧᑭᓄᕽ, ᒥᓇ ᐸᑲᐢᑭᒥᐦᑫᐧᑭᓄᕽ, ᒥᓇ ᐋᐧᐱᐢᑫᑭᓄᕽ, ᑭᑕ ᐃᓯᒋᑳᑕᕽ ᑳ ᑲᑫᑖᐊᐧᑐᐢᑫᐟ. 4ᑭ ᐅᓯᐦᑖᐊᐧᐠ ᐊᐢᐱᑎᑎᒪᓀᑳᐧᒋᑲᓇ, ᐁ ᐊᑯᐢᑕᐃᑳᑌᑭ; ᐋᔨᑕᐤ ᐁ ᑭᓯᐱ ᐊᔮᑭ ᑭ ᐊᑯᐢᑕᐃᑳᑌᐊᐧ. 5ᐁᑯᓯ ᑳ ᒪᒫᑖᐊᐧᐢᑕᐃᑳᑌᐠ ᓇᐸᑭ ᑕᐦᑯᐱᒋᑲᐣ, ᐁᑯᑕ ᑳ ᑭᑲᒧᐠ, ᑭᑕ ᐅᐦᒋ ᐸᑲᐧᑌᐦᐅᕽ, ᑭ ᒫᒪᐊᐧᐣ ᒥᓇ ᑭ ᐃᓯᒋᑳᑌᐤ ᑖᐱᐢᑯᐨ; ᐁ ᐋᐸᒋᐦᐃᐦᐟ ᐅᓵᐃᐧᓱᓂᔮᐤ, ᒥᓇ ᒋᐯᑕᑫᐧᑭᐣ, ᒥᓇ ᒋᐯᑕᑯᒥᐦᑫᐧᑭᐣ, ᒥᓇ ᐸᑲᐢᑭᒥᐦᑫᐧᑭᐣ, ᒥᓇ ᐁ ᒥᔪᒋᑳᑌᐠ ᐋᐧᐱᐢᑫᑭᐣ; ᑳ ᑎᐯᔨᐦᒋᑫᐟ ᑳ ᑭ ᐃᑕᓱᐋᐧᑖᐟ ᒧᓯᓴ.

6ᑭ ᐊᐧᐁᐧᔨᐁᐊᐠ ᒫᑲ ᐊᓂᐦᐃ ᐋᓂᐠᐢ ᐊᓯᓂᔭ, ᐁ ᒥᒋᒫᐱᐢᑲᐋᐧᒋᐠ ᐅᓵᐃᐧᓱᓂᔮᕽ, ᐁ ᒪᓯᓈᐱᐢᑲᐦᐃᑳᓱᔨᐟ ᑳ ᐃᓯ ᒪᓯᓈᐱᐢᑲᐦᐃᑳᓱᐟ ᐊᑯᐢᑭᐊᐧᓯᑲᐣ ᐊᓯᓂ, ᐁ ᐊᐢᑌᑭ ᐅ ᐃᐧᔪᐃᐧᓂᐋᐧᐊᐧ ᐃᐢᕒᐁᐃᓬ ᐅᐟ ᐊᐋᐧᓯᒥᓴ. 7ᑭ ᐊᐢᑖᐤ ᒫᑲ ᐊᐢᐱᑎᑎᒪᓀᑳᐧᒋᑲᓂᕽ ᐁᐦᐸᑎᕽ, ᐁᐊᐧᑯᓂᐠ ᐊᓯᓂᔭᐠ ᑭᑕ ᒪᓂ ᑭᐢᑭᓯᑐᑖᐦᒋᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓴ; ᑳ ᑎᐯᔨᐦᒋᑫᐟ ᑳ ᑭ ᐃᑕᓱᐋᐧᑖᐟ ᒧᓯᓴ.

8ᑭ ᐅᓯᐦᑖᐤ ᒫᑲ ᐋᐧᐢᑭᑲᓈᐱᐢᐠ ᐁ ᐃᓯ ᓂᐦᑖᐃᐧᒋᑫᐟ ᑳ ᒪᒥᔪᐟ ᐅᑕᑐᐢᑫᐤ, ᑖᐱᐢᑯᐨ ᑳ ᐃᓯᒋᑳᑌᐠ ᐁᐦᐸᐟ; ᐁ ᐋᐸᒋᐦᐃᐦᐟ ᐅᓵᐃᐧᓱᓂᔮᐤ, ᒋᐯᑕᑫᐧᑭᐣ, ᒋᐯᑕᑯᒥᐦᑫᐧᑭᐣ, ᐸᑲᐢᑭᒥᐦᑫᐧᑭᐣ, ᒥᓇ ᐁ ᒥᔪᒋᑳᑌᐠ ᐋᐧᐱᐢᑫᑭᐣ. 9ᑭ ᓀᐅᑲᐦᑲᑫᔮᐤ; ᑭ ᓇᐳᒧᑖᐊᐧᐠ ᐋᐧᐢᑭᑲᓈᐱᐢᐠ, ᐯᔭᐠ ᒥᒋᐦᒋ ᑭ ᐃᐢᑳᐧᐤ, ᒥᓇ ᐯᔭᐠ ᒥᒋᐦᒋ ᑭ ᐃᐢᐱᑕᔭᑲᐢᑳᐤ, ᐁ ᓇᐳ ᐊᔭᐠ. 10ᑭ ᑭᑲᒧᐁᐊᐧᐠ ᒫᑲ ᓀᐋᐧᐤ ᐁ ᐱᒪᐱᔨᐟ ᐊᓯᓂᔭ; ᐯᔭᑳᐧᐤ ᐁ ᐱᒪᐱᒋᐠ ᓵᕒᑎᔭᐢ, ᑖᐸᐢ, ᒥᓇ ᑳᕒᐸᐣᑭᓬ, ᐁᐊᐧᑯ ᓂᐢᑕᒼ ᐁ ᐱᒪᐱᒋᐠ. 11ᑭᐦᑖᐧᒼ ᒫᑲ ᐁ ᐱᒪᐱᒋᐠ, ᐁᒪᕒᐊᓬᐟ, ᒥᓇ ᓵᐸᔭᕒ, ᒥᓇ ᑖᔭᒪᐣᐟ. 12ᐁᑯᓯ ᓂᐢᑖᐧᐤ ᐁ ᐱᒪᐱᒋᐠ, ᒉᓯᐣᐟ, ᒥᓇ ᐊᑫᐟ, ᒥᓇ ᐋᒥᑎᐢᐟ. 13ᐁᑯᓯ ᓀᐋᐧᐤ ᐁ ᐱᒪᐱᒋᐠ, ᐯᕒᐃᓬ, ᒥᓇ ᐋᓂᐠᐢ, ᒥᓇ ᒑᐢᐸᕒ; ᑭ ᐃᐧᐦᑫᐧ ᒥᒋᒫᐱᐢᑲᐋᐧᐊᐧᐠ ᐅᓵᐃᐧᓱᓂᔮᕽ ᐃᑕ ᐁ ᑭᑲᒧᒋᐠ. 14ᐊᓂᑭ ᒫᑲ ᐊᓯᓂᔭᐠ ᑭ ᑕᓯᐊᐧᐠ ᒣᐧᐦᒋ ᑳ ᑕᐦᑎᓂᔨᑭ ᐅ ᐃᐧᔪᐃᐧᓂᐋᐧᐊᐧ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᒥᑖᑕᐦᐟ ᓂᓱᓵᑊ ᐁ ᐋᐃᓯᔨᐦᑳᓱᒋᐠ; ᑖᐱᐢᑯᐨ ᑳ ᐃᓯ ᒪᓯᓈᐱᐢᑲᐦᐃᑳᑌᐠ ᐊᑯᐢᑭᐊᐧᓯᑲᐣ, ᑲᐦᑭᔭᐤ ᐁ ᐃᑕᐢᑌᔨᑭ ᐅ ᐃᐧᔪᐃᐧᓂᐋᐧᐊᐧ, ᐊᓂᑭ ᒥᑖᑕᐦᐟ ᓂᓱᓵᑊ ᐁ ᐃᑕᐦᑐᑌᐃᐧᓯᒋᐠ. 15ᐋᐧᐢᑭᑲᓈᐱᐢᑯᕽ ᒫᑲ ᑭ ᐅᓯᐦᑖᐊᐧᐠ ᐱᐋᐧᐱᐢᑯᔮᐱᓴ ᑖᐱᐢᑯᐨ ᐱᒪᓇᑳᐧᓂᓴ, ᐁ ᐱᒪᐃᑳᑌᑭ ᒣᒧᐦᒋ ᐅᓵᐃᐧᓱᓂᔮᐤ. 16ᑭ ᐅᓯᐦᑖᐊᐧᐠ ᒫᑲ ᓂᓱ ᐅᓴᐃᐧᓱᓂᔮᐤ ᒥᒋᒫᐱᐢᑲᐦᐃᑲᓇ, ᒥᓇ ᓂᓱ ᐅᓵᐃᐧᓱᓂᔮᐤ ᓵᐳᑕᐁᐧᔮᐱᐢᑲᐧ; ᐁᑯᓯ ᐊᓂᐦᐃ ᓂᓱ ᓵᐳᑕᐁᐧᔮᐱᐢᑲᐧ ᑭ ᐊᐢᑖᐊᐧᐠ ᐋᔨᑕᐤ ᐁ ᑭᓯᐹᐠ ᐋᐧᐢᑭᑲᓈᐱᐢᐠ. 17ᑭ ᐊᐢᑖᐊᐧᐠ ᒫᑲ ᐊᓂᐦᐃ ᓂᓱ ᐁ ᐱᒪᐃᑳᑌᑭ ᐅᓵᐃᐧᓱᓂᔭᐤ ᐱᐋᐧᐱᐢᑯᔮᐱᓴ ᐁᑯᑕ ᓵᐳᑕᐁᐧᔮᐱᐢᑯᕽ ᐁ ᑳᑭᓯᐱ ᐊᔮᐠ ᐋᐧᐢᑭᑲᓈᐱᐢᐠ. 18ᑫᐧᐢᑭ ᒫᑲ ᐁ ᑭᓯᐹᐯᑲᑭ ᐊᓂᐦᐃ ᑳ ᐱᒪᐃᑳᑌᑭ ᐱᐋᐧᐱᐢᑯᔮᐱᓴ ᑭ ᑭᑲᒧᑖᐊᐧᐠ ᐊᓂᑕ ᓂᓱ ᒥᒋᒫᐱᐢᑲᐦᐃᑲᓂᕽ ᐁᑯᓯ ᑭ ᐊᐢᑖᐊᐧᐠ ᐊᐢᐱᑎᑎᒪᓀᑳᐧᒋᑲᓂᕽ ᐊᓂᒪ ᐁᐦᐸᐟ ᐋᐧᐢᑭᑲᓂᕽ ᐃᑎᑫ. 19ᑭ ᐅᓯᐦᑖᐊᐧᐠ ᒫᑲ ᓂᓱ ᐅᓵᐃᐧᓱᓂᔮᐤ ᓵᐳᑕᐁᐧᔮᐱᐢᑯᓴ, ᐁᑯᓯ ᑭ ᑭᑲᒧᑖᐊᐧᐠ ᐊᔨᑕᐤ ᐁ ᑭᓯᐱ ᐊᔮᐠ ᐋᐧᐢᑭᑲᓈᐱᐢᐠ, ᐃᑕ ᐁ ᐃᓴᐁᐧᔮᐠ, ᐊᑖᒥᕽ ᐁᐦᐸᑎᕽ ᐃᑌᐦᑫ. 20ᑭ ᐅᓯᐦᑖᐊᐧᐠ ᒥᓇ ᓂᓱ ᓵᐳᑕᐁᐧᔮᐱᐢᑲᐧ ᐅᓵᐃᐧᓱᓂᔮᐤ, ᐁᑯᓯ ᑭ ᑭᑲᒧᑖᐊᐧᐠ ᐊᓂᐦᐃ ᐁ ᓂᓯᑭ ᐊᐢᐱᑎᑎᒪᓀᑳᐧᒋᑲᓇ ᐊᑖᒥᕽ, ᐋᐧᐢᑭᑲᓂᕽ ᐃᑌᐦᑫ, ᒋᑭ ᐃᑕ ᐁ ᐊᑯᐢᑕᐃᑳᑌᐠ, ᑕᐦᑯᒋᐢ ᐊᓂᒪ ᑳ ᒫᒫᑖᐊᐧᐢᑌᐃᑳᑌᐠ ᓇᐸᑭ ᑕᐦᑯᐱᒋᑲᐣ ᐁᐦᐸᑎᕽ. 21ᑭ ᐊᓯᑕᐱᑕᒪᐧᐠ ᒫᑲ ᐊᓂᒪ ᐋᐧᐢᑭᑲᓈᐱᐢᐠ ᓵᐳᑕᐁᐧᔮᐱᐢᑯᓴ ᐅᐦᒋ ᓵᐳᑕᐁᐧᔮᐱᐢᑯᓯᕽ ᐁᐦᐸᑎᕽ ᑳ ᐊᔮᑭ ᒋᐯᑕᑯᔮᐱ ᐁ ᐋᐸᒋᐦᑖᒋᐠ, ᐁᑯᑕ ᑭᑕ ᑭᑲᒧᐠ ᐊᓂᒪ ᑳ ᒪᒫᑖᐊᐧᐢᑌᐃᑳᑌᐠ ᓇᐸᑭ ᑕᐦᑯᐱᒋᑲᐣ ᐁᐦᐸᑎᕽ, ᐁᑯᓯ ᐊᓂᒪ ᐋᐧᐢᑭᑲᓈᐱᐢᐠ ᐁᑳ ᑭᑕ ᐋᐱᑯᓂᑳᑌᐠ ᐁᐦᐸᑎᕽ ᐅᐦᒋ; ᑳ ᑎᐯᔨᐦᒋᑫᐟ ᑳ ᑭ ᐃᑕᓱᐋᐧᑖᐟ ᒧᓯᓴ.

22ᑭ ᐅᓯᐦᑖᐊᐧᐠ ᒫᑲ ᑭᑕ ᐱᐦᑕᐁᐧᐢᑭᑳᑌᐠ ᐁᐦᐸᑎᕽ, ᐱᒪᐢᑌᐃᑫᐃᐧᐣ, ᒥᓯᐁᐧ ᐁ ᒋᐯᑕᑳᐧᐠ. 23ᐁᑯᓯ ᑭ ᐸᑯᓀᔮᐤ ᐊᓂᒪ ᒥᐢᑯᑖᑲᐩ ᑖᐊᐧᔨᕽ, ᑖᐱᐢᑯᐨ ᐁ ᐸᑯᓀᔮᐠ ᓇᑐᐸᔨᐊᐧᓵᑲᐩ, ᐁ ᑎᑎᐱᐢᑕᐃᑳᑌᐠ ᒥᓯᐁᐧ ᐋᐧᐢᑳ ᐃᑕ ᐁ ᐸᑯᓂᔮᐠ ᐁᑳ ᑭᑕ ᑖᑐᐸᔨᐠ. 24ᐁ ᑲᑫᓯᐯᑲᕽ ᒫᑲ ᒥᐢᑯᑖᑲᐩ ᑭ ᐅᓯᐦᑖᐊᐧᐠ ᓄᑎᒥᒥᓂᑳᓇ ᐁ ᒋᐯᑕᑳᐧᑭ, ᒥᓇ ᐁ ᒋᐯᑕᑯᒥᐦᑳᐧᑭ, ᒥᓇ ᐁ ᐸᑲᐢᑭᒥᐦᑳᐧᑭ ᒥᓇ ᐁ ᐋᐧᐱᐢᑳᑭ. 25ᐁᑯᓯ ᑭ ᐅᓯᐦᑖᐊᐧᐠ ᒣᒧᐦᒋ ᐅᓵᐃᐧ ᓱᓂᔮᐤ ᓴᓴᐁᐧᐅᔮᑲᓂᓴ, ᑭ ᐊᑯᑖᐊᐧᐠ ᒫᑲ ᓴᓴᐁᐧᐅᔮᑲᓂᓴ ᑕᑖᐢᑕᐁᐧᔭᐢ ᐊᓂᐦᐃ ᓄᑎᒥᒥᓂᑳᓇ ᐋᐧᓴᑳᒼ ᐁ ᑭᓯᐯᑲᕽ ᐊᓂᒪ ᒥᐢᑯᑖᑲᐩ, ᑕᑖᐢᑕᐁᐧᔭᐢ ᐊᓂᐦᐃ ᓄᑎᒥᒥᓂᑳᓇ. 26ᓴᓴᐁᐧᐅᔮᑲᓂᐢ ᐁᑲᐧ ᓄᑎᒥᒥᓂᑳᐣ, ᓴᓴᐁᐧᐅᔮᑲᓂᐢ ᐁᑲᐧ ᓄᑎᒥᒥᓂᑳᐣ, ᐁ ᑭᑫᔦᑲᕽ ᒥᐢᑯᑖᑲᐩ ᒥᓯᐁᐧ ᐋᐧᓴᑳᒼ, ᑭᑕ ᑭᑭᐢᑲᒥᕽ ᐁ ᐸᒥᑖᓱᕽ; ᑳ ᑎᐯᔨᐦᒋᑫᐟ ᑳ ᑭ ᐃᑕᓱᐋᐧᑖᐟ ᒧᓯᓴ.

27ᑭ ᐅᓯᐦᑕᒪᐁᐧᐊᐧᐠ ᒫᑲ ᐁᕒᐊᓇ ᒥᓇ ᐅᑯᓯᓯᔨᐊᐧ ᒥᐢᑯᑖᑲᔭ ᐁ ᒥᔮᐧᓯᐠ ᐋᐧᐱᐢᑫᑭᐣ ᐁ ᐱᒪᐢᑌᐃᑳᑌᐠ. 28ᒥᓇ ᐊᐢᑐᑎᐣ ᐁ ᒥᔮᐧᓯᐠ ᐋᐧᐱᐢᑫᑭᐣ, ᒥᓇ ᐁ ᒥᔮᐧᓯᑭ ᓯᑐᐢᑎᑳᓀᐱᓱᓇ ᐁ ᒥᔮᐧᓯᐠ ᐋᐧᐱᐢᑫᑭᐣ, ᒥᓇ ᐃᐧᑫᐧᐹᓇ ᐁ ᒥᔮᐧᓯᐠ ᐋᐧᐱᐢᑫᑭᐣ. 29ᒥᓇ ᐸᑲᐧᑌᐦᐅᐣ ᐁ ᒥᔪᒋᑳᑌᐠ ᐋᐧᐱᐢᑫᑭᐣ, ᒥᓇ ᒋᐯᑕᑫᐧᑭᐣ, ᒥᓇ ᒋᐯᑕᑯᒥᐦᑫᐧᑭᐣ, ᒥᓇ ᐸᑲᐢᑭᒥᐦᑫᐧᑭᐣ, ᐁ ᐃᓯ ᓂᐦᑖᐃᐧᑖᐟ ᐅᒪᓯᓂᐢᑕᐃᑫᐤ; ᑳ ᑎᐯᔨᐦᒋᑫᐟ ᑳ ᑭ ᐃᑕᓱᐋᐧᑖᐟ ᒧᓯᓴ.

30ᑭ ᐅᓯᐦᑖᐊᐧᐠ ᒫᑲ ᓇᐸᑳᐱᐢᑯᐢ ᑲᓈᒋ ᐊᐢᑐᑎᓂᕽ ᒣᒧᐦᒋ ᐅᓵᐃᐧᓱᓂᔮᐤ, ᐁ ᑭ ᒪᓯᓇᐦᐊᑭᐠ ᒫᑲ ᒪᓯᓇᐦᐃᑫᐃᐧᐣ, ᑖᐱᐢᑯᐨ ᑳ ᐃᓯ ᒪᓯᓈᐱᐢᑲᐦᐃᑳᓱᐟ ᐊᑯᐢᑭᐊᐧᓯᑲᓇᐣ ᐊᓯᓂ, ᑲᓈᑕᐣ ᐃᐧᔭ ᐅᐦᒋ ᑳ ᑎᐯᔨᐦᒋᑫᐟ. 31ᑭ ᑖᐦᑯᐱᑕᒪᐧᐠ ᒫᑲ ᒋᐯᑕᑯ ᑕᐦᑯᐱᒋᑲᓀᔮᐱ, ᑭᑕ ᑭ ᑕᑯᐱᑕᑭᐠ ᐊᐧᐢᑭᐨ ᐊᐢᑐᑎᓂᕽ; ᑳ ᑎᐯᔨᐦᒋᑫᐟ ᑳ ᑭ ᐃᑕᓱᐋᐧᑖᐟ ᒧᓯᓴ.

32ᐁᑯᓯ ᐃᓯ ᑭ ᑭᓯᒋᑳᑌᐤ ᑲᐦᑭᔭᐤ ᐊᑐᐢᑫᐃᐧᐣ ᒥᑭᐋᐧᐱᕽ ᐊᓂᒪ ᒫᐊᐧᒋᐦᐃᑐᐃᐧ ᒥᑭᐋᐧᑊ; ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᒫᑲ ᑭ ᐃᑐᑕᒪᐧᐠ ᑲᐦᑭᔭᐤ ᐊᓂᒪ ᑳ ᑎᐯᔨᐦᒋᑫᐟ ᑳ ᑭ ᐃᑕᓱᐋᐧᑖᐟ ᒧᓯᓴ, ᐁᑯᓯ ᑭ ᐃᑐᑕᒪᐧᐠ.

33ᑭ ᐯᑕᒪᐁᐧᐊᐧᐠ ᒫᑲ ᒧᓯᓴ ᒥᓯᐁᐧ ᒫᓄᑫᐃᐧᐣ, ᒥᑭᐋᐧᑊ, ᒥᓇ ᑲᐦᑭᔭᐤ ᐁ ᐃᓯᒋᑳᑌᐠ, ᓴᑭᐹᒋᑲᓇ, ᓇᐸᑭᑕᑲᐧ, ᓯᑖᐧᐢᑯᐃᑲᓈᑎᑲᐧ, ᒥᓇ ᒋᒪᒋᑲᓇ, ᒥᓇ ᑖᐱᑎᑖᑲᓇ, 34ᒥᓇ ᑳ ᐊᑲᐧᓇᐃᑳᑫᕽ ᔮᐯᒫᔭᑎᑯᔮᓇᐠ ᐁ ᒥᐦᑲᐧᑎᓱᒋᐠ, ᒥᓇ ᐊᑲᐧᓇᐃᑲᐣ ᐋᐦᑭᑯᔮᓇᐠ, ᒥᓇ ᐋᑯᔦᑲᐦᐃᑲᐣ ᑭᑕ ᒪᓂ ᐋᑯᔦᑲᑯᑌᐠ; 35ᑭᐢᑫᔨᑕᒧᐦᐃᐁᐧᐃᐧᓂᐊᐧᐟ, ᒥᓇ ᐊᐸᓱᔭ ᐁᑯᑕ ᑳ ᐋᐸᑕᑭ, ᒥᓇ ᑭᓭᐋᐧᑎᓯᐃᐧᓂᐊᐱᐃᐧᐣ. 36ᒥᒋᓱᐃᐧᓈᑎᐠ, ᑲᐦᑭᔭᐤ ᐊᓯᐊᐧᒋᑲᓇ ᐁᑯᑕ ᑳ ᐋᐸᑕᑭ, ᒥᓇ ᐋᐧᐸᐦᑕᐦᐃᐁᐧᐃᐧ ᐸᐦᑫᐧᓯᑲᐣ. 37ᑲᓈᒋ ᐋᐧᓴᐢᑯᑌᓂᑲᓇᑎᐠ, ᐋᐧᓴᐢᑯᑌᓂᑲᓇ ᐁᑯᑕ ᑳ ᐊᔮᑭ, ᐊᓂᐦᐃ ᐅᑎ ᐋᐧᓴᐢᑯᑌᓂᑲᓇ ᐁᑯᑕ ᑭᑕ ᐅᔭᐢᑖᕽ ᒥᓇ ᑲᐦᑭᔭᐤ ᐊᓯᐊᐧᒋᑲᓇ ᐁᑯᑕ ᑭᑕ ᐋᐸᑕᑭ, ᒥᓇ ᐱᒥ ᑭᑕ ᐋᐧᓴᐢᑯᑌᓂᑳᑫᕽ. 38ᐅᓵᐃᐧᓱᓂᔮᐤ ᐸᑭᑎᓈᓱᐃᐧᓈᐱᐢᐠ, ᒥᓇ ᑐᒥᓂᑲᓂ ᐱᒥ, ᒥᓇ ᐃᐧᑭᒫᓯᑲᐣ, ᒥᓇ ᑫ ᐊᑯᑌᐠ ᐁ ᐃᐢᑳᐧᑌᒥᐊᐧᕽ ᒥᑭᐋᐧᑊ. 39ᐅᓵᐋᐧᐱᐢᐠ ᐸᑭᑎᓈᓱᐃᐧᓈᐱᐢᐠ, ᒥᓇ ᐁ ᐊᔭᐹᐱᐢᑳᐠ ᐅᓵᐋᐧᐱᐢᐠ, ᐊᐸᓱᔭ ᒥᓇ ᐊᓯᐊᐧᒋᑲᓇ ᒥᓇ ᑳᓯᑫᐧᐃᐧᔮᑲᐣ ᒥᓇ ᐁ ᐊᐢᐸᐢᑌᐠ. 40ᐊᑯᒋᑲᓇ ᑳ ᐱᐢᑭᑖᔭᐋᐧᐠ, ᒋᒪᒋᑲᓇ, ᒥᓇ ᑖᐱᑎᑖᑲᓇ ᒥᓇ ᑭᐯᑲᒧᐦᒋᑲᐣ ᐁ ᐃᐢᑳᐧᑌᒥᐊᐧᕽ ᑳ ᐱᐢᑭᑖᔭᐋᐧᐠ, ᒋᐢᑌᑲᐱᒋᑲᓇ ᒥᓇ ᒋᐢᑌᑲᐦᐃᑲᓇ, ᒥᓇ ᑲᐦᑭᔭᐤ ᐋᐸᒋᐦᒋᑲᓇ ᑭᑕ ᐋᐸᑕᑭ ᐁ ᐊᑐᐢᑫᕽ ᒥᑭᐋᐧᐱᕽ, ᑭᑕ ᐋᐸᒋᐦᑖᕽ ᒫᐊᐧᒋᐦᐃᑐᐃᐧ ᒥᑭᐋᐧᐱᕽ. 41ᑳ ᒥᔪᒋᑳᑌᑭ ᑭᑭᐢᑳᒋᑲᓇ ᑭᑕ ᑭᑭᐢᑲᒥᕽ ᐁ ᐸᒥᑖᓱᕽ ᐃᑕ ᑳ ᑲᓈᑕᕽ, ᒥᓇ ᑳ ᑲᓈᑕᑭ ᑭᑭᐢᑳᒋᑲᓇ ᑭᑕ ᑭᑭᐢᑲᕽ ᐁᕒᐊᐣ ᐊᔭᒥᐦᐁᐃᐧᔨᓂᐤ, ᒥᓇ ᐅ ᑭᑭᐢᑳᒋᑲᓂᔨᐊᐧ ᐅᑯᓯᓴ, ᑭᑕ ᐸᒥᑖᓱᒋᐠ ᐊᔭᒥᐦᐁᐃᐧᔨᓂᐤ ᐅᐟ ᐊᑐᐢᑫᐃᐧᓂᕽ. 42ᒣᐧᐦᒋ ᑲᐦᑭᔭᐤ ᐊᓂᒪ ᑳ ᑎᐯᔨᐦᒋᑫᐟ ᑳ ᑭ ᐃᑕᓱᐊᐧᑖᐟ ᒧᓯᓴ, ᐁᑯᓯ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᑐᑕᒪᐧᐠ ᑲᐦᑭᔭᐤ ᐊᑐᐢᑫᐃᐧᐣ. 43ᒧᓯᐢ ᒫᑲ ᑭ ᐋᐧᐸᐦᑕᒼ ᑲᐦᑭᔭᐤ ᐊᓂᒪ ᐊᑐᐢᑫᐃᐧᐣ ᐳᑎ ᒫᑲ ᑲᐦᑭᔭᐤ ᑭ ᑐᑕᒥᔨᐊᐧ; ᒣᐧᐦᒋ ᑳ ᑎᐯᔨᐦᒋᑫᐟ ᑳ ᑭ ᐃᑕᓱᐁᐧᐟ, ᐁᑯᓯ ᑳ ᑭ ᐃᑐᑕᒥᔨᐟ; ᒧᓯᐢ ᒫᑲ ᑭ ᓴᐁᐧᔨᒣᐤ.

നിലവിൽ തിരഞ്ഞെടുത്തിരിക്കുന്നു:

ᐁᐠᓴᑕᐢ 39: KKMs

ഹൈലൈറ്റ് ചെയ്യുക

പകർത്തുക

താരതമ്യം

പങ്ക് വെക്കു

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

This Bible text is a corrected edition of the 1908 Western Cree Bible; it is in the public domain.

ᑲᓈᒋ ᑭᐦᒋ ᒪᓯᓈᐦᐃᑲᐣ നെക്കുറിച്ച് കൂടുതലറിയുക