Sɛɡla 26
26
1Gɛ ɡɛne aa wola kpɛɛra chɛɛ la,
ɡɛɛ dombwea kɛɛ bwaala
aa wola kwaa koma saŋ
hiaeh.
2Nyotaahna aa wola hen chɛɛ
la,
do kɛŋɔ jumbii aa dɛ ɡah
aa wola daa ta joŋi la ken.
3Chweema chɛ jaaɡɔ ne keeɡo,
ɡɛɛ ɡɛne chɛ lɔɔra.
4Bɛ he nyoa kpɔ do ɡɛne waa
ta,
ásɛ dɛ bɛ ba do kɛ on.
5Chaŋe ɡɛne o ɡɛnewaa ta,
ásɛ o jemɛ kɛŋɔ o ta
wejereme ɛɛ.
6He tomɛ ɡɛne aa,
he nakpalee dɛɛ sɔɔhne,
he bambile te aa hen sɔɔh.
7Gɛ boobi aa wola won valɛ
la,
ɡɛɛ ɡɛne aa wola jemɛ
sɛɡle.
8He kpɛɛ ɡɛne aa, waa jemɛ.
A do kɛŋɔ haa vɔwɛ bwe
ne taya tɔn pɛ,
he ta bwe laa, waa kaa.
9Gɛ sennyɔɔ aa wola won
laa sɔɔh kpɔ o nɔn ta la,
ɡɛɛ a do kpeɡri tɛ ɡɛne kɛ
ó won sɛɡle.
10Dɛ he bɔ ɡɛne waa
ba dɛ kaa o bobɛl paa aa,
dɛ a do kɛŋɔ nɛn aa ta
hɛma
ta bobɛlbwa, dɛ do nɛra
bola ken.
11Gɛ nyoate yon uɡe dɛ berɛ
kaa dia la,
ɡɛɛ ɡɛne teŋɛ dɛɛ ɛ
ɡɛnewa.
12Nɛn waa ɡɛna kohona la,
hwɛɡa lɔ o nɛɛ ɡwaa
nɛn waa dɛ lii kɛ o jemɛ
wa, kɛ o ɡe aa jemɛ.
13Bɔhwaahree yon ŋɔ,
“Nyujente lɔ ŋwɛnɛ ta,
o lɔ fɔɡbaahna.”
Anomanta, waa le.
14Gɛ ɡbera aa cheɡɛ
njinasoɔre ta dɛ ya dɛɛ tɔ
la,
ɡɛɛ bɔhwaah chɔ kalaŋ ta
dɛɛ beɡre o te.
15Nɛra bane bɔhwaah ɡwaa
ba nɛɛ kɛ bá won kpɔ
kondikwaa kwaraa la nyoa.
16Bɔhwaah dɛ lii o te
wejereme,
kɛŋɔ o ɡwaa nɛra banuanɛ
baa dɛ ba wona tɛ liidɛɛɡa.
17Nɛn waa kpɔ o nyoa
ɛɛ do nɛra waa
aa wola o waa ɛɛ ta la,
o do kɛŋɔ waa la fɔɡbaah,
dɛ ka lawɛ nyoate deŋne.
18Choɡla te waa dɛ ta hɛma
nii naa lɔ a nyoa dɛɛ kpoo
nɛra la,
19do kɛŋɔ nɛn waa dɛ neɡre o
dɔŋ
dɛ́ yon berɛ ŋɔ,
hɛlaa wɛɛ hɛlɛ.
20Gɛ nindaa hɔɔ tonaa,
nii yon dime la,
ɡɛɛ nɛn ŋwala ɡe toole
naa, naɡra toole.
21Gɛ hɔla aa dɔ nii,
damara ɡe ɡel nii ɛɛ hɔ
la,
ɡɛɛ naɡrenyini ɡe ɛɛ
ba naɡra ne.
22Nɛn ŋwala som, a do kɛŋɔ
kondikonsoma aa dɛ jo tea.
23Nɛn dɛ bol o dɔŋ bwara
wedɛɛɡe
kɛ dɛ dɔ o liichɔɡaa,
a do kɛŋɔ baa ɛ suuɡapoŋ
bɔle vii habɔɔ la.
24Nɛn o nyoa wobol aa soma,
kɛ dɛ dɔ liichɔɡa la dɛ́
neɡre nɛra.
25O wobol la dɛ do som,
kɛ bɛ on yarada,
liichɔɡa bwa soo siwii lɔ o
nyu bini.
26O ɛ o te kɛŋɔ ba bɛ on hah
aa,
o wechɔɡa ɛɛ le baŋee nɛra
bwa na.
27He kwi nafuɡe aa,
he ɡbaɡbaa dɛɛ le o bini.
He ɡbili bwe ŋɔ
he ta he dɔŋ nɛ aa,
wɛɛ berɔ ba he nɛ.
28Nyosonteŋni hah nɛra waa
teŋe nyosone dɛɛ dawɛ ba
nɛ,
ɡɛɛ neɡra wobol ɛɛ ba
wechɔɡa ɡbo ne.
നിലവിൽ തിരഞ്ഞെടുത്തിരിക്കുന്നു:
Sɛɡla 26: mzw
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.