Romanos 2-ൽ നിന്നുള്ള പ്രശസ്ത ബൈബിൾ വചനങ്ങൾ

പങ്ക് വെക്കു

Tora abiro niñerõcã mʉjãpe ãpẽrãrẽ “mʉjã ñañarẽrẽ tira ña” ĩ ĩñabesecaperacãrã, cʉ̃jãrã abirora tirecʉtira nimocãcaperacãrã “ʉ̃sãpʉare Manigʉ̃ ñañarõ tiherigawi” ĩ wãcũherimocãña. ¡Mʉjã tora abiro wãcũrã queoro wãcũrãmerã ya! Manigʉ̃ mʉjãcãrẽ mʉjãcã ñañarẽ tire wapare ñañarõ tigʉagawi. Mʉjãcã tora abiro ñañarẽrẽ tira nicapetacã Manigʉ̃ cʉ̃cã bopacaĩñarẽmenape mʉjãrẽ ñañarõ tiheriñerõcã “ʉ̃sãrẽ ñañarõ tiheriwi” ĩ wãcũherimocãña. ¡Buripe doca mʉjã ñurõ tʉomasĩña! Cʉ̃ mʉjãcã ñañarẽ tirecʉtirere tairo nʉcãrucũmocãwĩ mʉjãcã ñañarẽ tirecʉtirere wãcũpasʉti mʉjãrẽ wasoañerõcã bogʉ. Tairo binigʉ̃ marĩcʉ̃ mʉjãrẽ mata ñañarõ tiheriwi.

Tairo tira mʉjã no nirãnorẽ “cʉ̃jã ñañarẽrẽ tira ñawã” ĩ ĩñabeseherimocãña. Mʉjã tora abiro cʉ̃jãrẽ “cʉ̃jã ñañarẽrẽ tira ñawã” ĩ ĩñabesera mʉjãbasurupera ʉ̃sãcã ñañarẽrẽ tirara ña; tairo tinira wapa cʉorara ña ĩrã ya. Merẽ mʉjã cʉ̃jãcã tirecʉtiriwãmerã tirecʉtirara ña. Tairo tira tora abiro nirã ninirã ãpẽrãrẽ pẽrõgãno ĩñabesemasĩheriga.

Merẽ Manigʉ̃ judío basoca wadorena ñurõ timocã; judío basoca niherapere ñañarõ timocã tihegʉ ñawĩ. Buripe nipetirare ĩcãrõpewãme wado tigʉ ñawĩ.

Merẽ Moisére dotire cũriguere cʉ̃jãcã masĩrẽmena wadora Manigʉ̃ cʉ̃jãrẽ “ñurã ñawã” ĩ ĩñaheriwi. Buripe doca tie nipetire dotirere queoro yʉranopere Manigʉ̃ “ñurã ñawã” ĩ ĩñawĩ.

Tora abiro basoca nipetirare ĩñabesegʉ cʉ̃jã basocacãrõrẽ cʉ̃jãcã tiriawãmerĩcãrõmenarã cʉ̃jãrẽ queoro wapatigʉagawi.

Buri cametʉanʉcãrĩbasocapere diamacã maquẽ nirẽrẽ boheranorẽ buripe ñañarẽpe wadore tirugaranorẽ Manigʉ̃ cʉ̃jãmena cuagʉ cʉ̃jãrẽ bʉtoro ñañarõ tigʉagawi.

Buri mʉjãpe cʉ̃cã tairo ticapetacã cʉ̃rẽ cametʉanʉcãmocãrã icãta ñañarẽ tirecʉtirere wãcũpasʉti wasoaheri. Tora abiro tiremena mʉjãbasurupera sotoa Manigʉ̃cã mʉjãrẽ ñañarõ tiatere neõcũwʉmʉãrã ya. Tairo tigʉ Manigʉ̃ nipetira basocare ĩñabeseribʉreco eañerõcãrẽ cʉ̃cã mʉjãrẽ ĩcãrõpewãmemena ĩñabeserere eñogʉagawi. Tieyewapamenarã mʉjã bʉtoro ñañarõ tiyoãna pʉtʉaroacu.