လူႉၵႃႇ 3-ൽ നിന്നുള്ള പ്രശസ്ത ബൈബിൾ വചനങ്ങൾ

പങ്ക് വെക്കു

မိူဝ်ႈ​ဢၼ်​ၵူၼ်း​တင်း​သဵင်ႈ​တင်း​လူင်​ၸိူဝ်း​ၼၼ်ႉ​ၶၢမ်ႇ​ ပပ်ႉတီႉၸမ်ႇ ​ၸိုင်၊ ယေႇသူႉ ​ၵေႃႈ​ၶၢမ်ႇ​ ပပ်ႉတီႉၸမ်ႇ ​လႄႈ၊​ၼႂ်း​မိူဝ်ႈ​ဢၼ်​မၼ်း​ၸဝ်ႈ​သူး​တွင်း​ယူႇ​ၼၼ်ႉ၊ၵၢင်​ႁၢဝ်​ၽုၺ်ႇ​ပိုတ်ႇ​သေ​လႄႈ၊- ဝီႉၺိၺ်ႇ​ဢၼ်​မူတ်း​ၸၢင်ႇ​ၸဝ်ႈ ပဵၼ်​ပုင်ႇ​ႁၢင်ႈ​ၸိူဝ်ႉ​ၼင်ႇ​ၼူၵ်ႉ​တူႈ​ၼၼ်ႉ​လူင်း​မႃး​ၵႃႈ​ၼိူဝ်​မၼ်း​ၸဝ်ႈ​လႄႈ သဵင်​ၸဝ်ႈ​ပဵၼ်​မႃး​ၵႃႈ​ၼိူဝ်​ၵၢင်​ႁၢဝ်​လႄႈ​ဝႃႈ၊​ၵေႃႉ​ၼႆႉ​ၸမ်ႉ၊ပဵၼ်​လုၵ်ႈ​ဢၼ်​ၵဝ်​ႁၵ်ႉ​ၼႃႇ၊​တီႈ​ဢၼ်​ၵဝ်​ထုၵ်ႇ​ၸႂ်​ၵျိူၵ်ႈ​ၸႂ်​ၼႃႇ​ဢေႃႈ၊​ဝႃႈ​ၼင်ႇ​ၼႆ​ဢေႃႈ။

ယူဝ်းႁၢၼ်ႇ ၶိုၼ်း​လၢတ်ႈ​တီႈ​ၵူၼ်း​တင်း​သဵင်ႈ​တင်း​လူင်​ၼၼ်ႉ​လႄႈ​ဝႃႈ​ၸမ်ႉ၊ ၵဝ်​ဢဝ်​သူ​ပၼ်​ ပပ်ႉတီႉၸမ်ႇ ​ၼႂ်း​ၼမ်ႉ​ဢေႃႈ၊ ၵေႃႉ​ဢၼ်​ယႂ်ႇ​မျၢတ်ႈ​ၼႃႇ​သေ​ၵဝ်​ၼႆႉ​မႃး​ယူႇ​ဢေႃႈ၊ ၵဝ်​ၼႆႉ​ယင်း​ဢမ်ႇ​ထိူၵ်ႈ​ၵႄႈ​ဢဝ်​သၢႆ​ၶႅပ်း​တိၼ်​ၵေႃႉ​ၼၼ်ႉ၊ ၵေႃႉ​ၼၼ်ႉ ၼႂ်း​ဝီႉၺိၺ်ႇ​ဢၼ်​မူတ်း​ၸၢင်ႇ​ၸဝ်ႈ​လႄႈ​သင်၊ ၼႂ်း​ၽႆး​လႄႈ​သင်၊ တၵ်း​ဢဝ်​သူ​ပၼ်​ ပပ်ႉတီႉၸမ်ႇ ​ဢေႃႈ၊ ဝႃႈ​ၼင်ႇ​ၼႆ​ဢေႃႈ။

မၢၵ်ႇ​ဢၼ်​ၵိုင်ႇ​ၵၼ်​တင်း​တၢင်း​ဢၼ်​ၶုၵ်း​ၸႂ်​လႆႈ​မႆႈ​ၸႂ်​ၸိုင်​မၢၵ်ႇ​တႃႉ။ ဢႃႇပြႃႇႁၢမ်ႇ ​ပဵၼ်​ပေႃႈ​ႁဝ်း​ဝႃႈ​ၼႆ​ယႃႇ​ပေ​ထၢင်ႇ​ပေ​ဝႃႈ​ၼႂ်း​ၸႂ်။ ၵဝ်​ဝႃႈ​ၸမ်ႉ၊ ၼႂ်း​မၢၵ်ႇ​ႁိၼ်​တင်း​လၢႆ​ၼႆႉ​ၽြႃး​ပဵၼ်​ၸဝ်ႈ ဢဝ်​ဢွၵ်ႇ​ၽၢၼ်ႇ​သၢင်း​ႁဵတ်း​ပဵၼ်​လုၵ်ႈ ဢႃႇပြႃႇႁၢမ်ႇ ​တင်း​လၢႆ​လႆႈ​ယူႇ​ဢေႃႈ။

တေႃႈ​လဵဝ်​ၼႆႉ ဢဝ်​တင်း​တႃ​မၢတ်ႇ​ဝႆႉ​ၵႃႈ​တီႈ​ႁိမ်း​ႁၢၵ်ႈ​တူၼ်ႈ​မႆႉ​ယူႇ​လႄႈ တူၼ်ႈ​ဢၼ်​ဢမ်ႇ​မၢၵ်ႇ​မၢၵ်ႇ​ဢၼ်​လီ​ၵႃႈ​မီး​တင်း​သဵင်ႈ​တင်း​လူင်​ၸိုင် ၽၼ်း​လူမ်ႉ​လႄႈ​ၶျႃး​သႂ်ႇ​ၼႂ်း​ၽႆး​ဢေႃႈ။

ၼႂ်း​ၵျၢမ်း​ပရေႃးၽႅတ်ႈ​ ဢီႉသႃႇယႃႉ ​မႃး​လႄႈ​ဝႃႈ​ၸမ်ႉ၊သဵင်​ၵေႃႉ​ဢၼ်​ႁွင်ႉ​သႅၼ်ႇ​ၵႃႈ​တီႈ​ၼႂ်း​ထိူၼ်ႇ​လႄႈ​ဝႃႈ၊မႄး​သဵၼ်ႈ​တၢင်း​ထႃႇဝရႃႉ​ၽြႃး​တႃႉ၊​ႁႂ်ႈ​သဵၼ်ႈ​တၢင်း​မၼ်း​ၸဝ်ႈ​သိုဝ်ႈ​တႃႉ။- တီႈ​ဢၼ်​ၶူင်ႈ​ဢၼ်​ယၢၼ်း​ၵႃႈ​မီး​ၸိုင် တၵ်း​လႆႈ​ထူမ်​ဢေႃႈ။ လွႆ​လူင်​လွႆ​ဢွၼ်ႇ​ၵႃႈ​မီး​ၸိုင်၊ တၵ်း​လႆႈ​ၵိူၼ်ႇ​ႁႂ်ႈ​တဵမ်​ဢေႃႈ။ သဵၼ်ႈ​တၢင်း​ဢၼ်​ၵူတ်ႉ​ဢၼ်​ငွၵ်း​တင်း​လၢႆ​ၸိုင်၊ တၵ်း​လႆႈ​ႁႂ်ႈ​သိုဝ်ႈ​ဢေႃႈ။ တၢင်း​ဢၼ်​ႁူၵ်ႉ​ႁၵ်း​ၶုၵ်း​ၶီ​ၶုၵ်း​ၶၵ်း​တင်း​လၢႆ​ၵေႃႈ တၵ်း​လႆႈ​ၽဵဝ်ႈ​ႁႂ်ႈ​လိူမ်ႈ​ဢေႃႈ။- ၵူၼ်း​တင်း​သဵင်ႈ​တင်း​လူင်​တၵ်း​လႆႈ​ႁၼ်​တၢင်း​ဢၼ်​ၵႄႇ​ၶျွတ်ႈ​ၽြႃး​ပဵၼ်​ၸဝ်ႈ​ဢေႃႈ၊ ဝႃႈ​ၼင်ႇ​ၼႆ​ဢေႃႈ။