If you would like a copy of this version please contact info@davaraudiobibles.org

Bhadrawahi Bible, CC-BY-SA-4.0, Beyond Translation. (Text)
Bhadrawahi New Testament Audio Bible, CC-BY-SA-4.0, Davar Partners International, Hosanna/Faith Comes by Hearing, 2021. Bhadrawahi Old Testament Audio Bible, CC-BY-SA-4.0, Davar Partners International, Beyond Translation, 2026. (Audio)

Bhadrawahi Bible

Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.

यहोवा मलाकी नेबेरे ज़िरिये इस्राएली लोकन सेइं एन ज़ोते।

यहोवा एन अपने लोकन सेइं ज़ोते, “मीं तुसन सेइं प्यार कियोरोए? पन तुस पुछ़तथ, ‘तीं असन सेइं केन्च़रे प्यार कियोरोए?’” यहोवा एन ज़ोते, “कुन एसाव याकूबेरो ढ्ला न थियो? पन फिरी भी मीं याकूबे सेइं प्यार कियो पन एसाव ट्लारो न समझ़ो ते तैसेरो पहाड़ी मुल्ख बेरान केरतां छ़डो, ते तैसेरी मीरास जंगलेरे गिद्दां केरि ठार बनाई।” एदोम ज़ोते, “इश्शो मुल्ख उज़ड़ी जेव, पन असां खण्डरन फिरी बनामेले;” सेना केरो यहोवा इन ज़ोते, “अगर तैना बनान भी, पन अवं डोली छ़डेलो; तैन केरू नवं दुष्ट कौम पेलू, ते तैन जो एरे लोक ज़ोवं गालू ज़ैन पुड़ यहोवा सदा क्रोधे राए।” तुश्शी एछ़्छ़ी इस हेरेली, ते तुस ज़ोले, “यहोवारो प्रताप इस्राएलेरी सरहद्दी करां अग्रोवं भी बद्धतो गाए।”

यहोवा ज़ोते, “मट्ठू बाजी केरि, ते नौकर मालिकेरी इज़्ज़त केरते। ते अगर अवं बाजी आईं, त मेरी इज़्ज़त केरनी कोड़िए? ते अगर अवं मालिक आईं त मेरो डर मन्नो कोड़ि राहोरोए? सेना केरो यहोवा, तुसन याजकन सेइं भी ज़ैना भी मेरे नंव्वेरू अपमान केरतथ ऐह गल पुछ़ते। पन तुसां पुछ़तथ, ‘असेईं कौस गल्‍ली मां तेरे नंव्वेरू अपमान कियोरोए?’ तुसां मेरी वेदी पुड़ अशुद्ध रोट्टी च़ाढ़तथ। फिरी भी तुसां पुछ़तथ, ‘असां कोस गल्‍ली सेइं तीं अशुद्ध लगतम?’ एस गल्‍ली मां भी, कि तुसां ज़ोतथ, ‘यहोवारी मेज़ घटियाए।’ ज़ैखन तुसां कांने जानबर बलि केरनेरे लेई नेड़े आनतथ त कुन एन बुरू नईं? ते ज़ैखन तुसां टोन्टे ते बिमार जानबर आनतथ त कुन एन बुरू नईं? अगर अपने हाकिमे कां एरी ज़ेरि भेंट आनथ; त कुन तै खुशी भोल्हो या तुसन पुड़ अनुग्रह केरेलो? सेना केरो यहोवा एन पुछ़ते।
“हुनी अवं तुसन सेइं ज़ोताईं, परमेशरे कां प्राथना केरा कि तै असन लोकन पुड़ अनुग्रह केरे। इन तुश्शे हथ्थन सेइं भोवरूए; तैखन कुन तुसां समझ़तथ कि परमेशर तुसन मरां कोन्चेरी तरफदारी केरेलो? सेना केरो यहोवा एन ज़ोते। रोड़ू भोथू कि तुसन मरां कोई भवनेरू दार बन्द केरतां छ़डेथो, कि तुसां मेरी वेदी पुड़ बेफैइदी अग न बैली बटेथे! सेना केरो यहोवा एन ज़ोते, अवं तुसन पुड़ कधे खुशी नईं, ते न तुश्शे हथ्थे च़ढ़तल कबूल केरेलो। किजोकि दिहाड़ो निस्सने करां, दिहाड़ो डुबने तगर गैर कौमन मां मेरू नवं महाने, ते हर कोन्ची ठैरी मेरे नंव्वे पुड़ धूप ते शुद्ध च़ढ़तल च़ाढ़ी गातीए; किजोकि गैर कौमन मां मेरू नवं महाने, सेना केरो यहोवा एन ज़ोते। पन तुसां याजक एन ज़ोइतां अपवित्र बनातथ कि यहोवारी मेज़ अशुद्धे, ते ज़ै खानेरी चीज़ तैस पुड़ेरां मैलतीए तै भी घटियाए। फिरी तुसां एन भी ज़ोतथ, ‘ऐह केत्रो बड्डो ज़ुलमे!’ सेना केरो यहोवा एन ज़ोते। तुसेईं तैस खानेरी चीज़रे लेई नक पुच़ोड़ू ते ज़ुलमे सेइं हासिल केरतां टोन्टे ते बिमार जानबर बलि केरनेरे लेई आनतथ! त कुन एरी ज़ेरि भेंट अवं तुश्शे हथ्थे कबूल केरेलो? यहोवा एन ज़ोते। ज़ैस धोखे बाज़ेरे केन्नी मां नर जानबर भोए पन तै बन्धू केरतां परमेशरेरे लेई नुक्स दार च़ाढ़े तै लानतीए भोए; अवं त महाराज़ो आईं, ते मेरू नवं गैर कौमन मां डरेरे काबले, सेना केरो यहोवा एन ज़ोते।”

കേൾക്കുക मलाकी 1