Ɛ́séɖɔ̀ 22
22
Gma ɓě ɓá kɔ̃̀ɔ̀-ɖɛ̀ bɛ̃̌ǐn po jè dyíɛ
1“Ɔ jǔ ké nyɔ ɖò dyi ɔ mǔè ɖòɛ̀ ɓìɖǐ mɔɔ ɔ ɓáɖáá ɖò dyíɖí, ké ɔ dyiɛ ɖáɓá, mɔɔ ké ɔ dyiɛ peɖe ní, nìí, ɔ ɓéɖé ɔ ké ɓìɖǐ hm̀m̌ tò ɓó ɓìɖǐ dyúáɖò jè. Ɔ dyi ɓáɖáá jǔǐn, ɔ ɓéɖé ɔ ké ɓáɖáá hĩinyɛ tò ɓó ɓáɖáá dyúáɖò jè. 2-4Dyíɖíí-nyɔ̀ɔ̀ ɓéɖé ɔ ké ɖɛ ɔ dyíɖíà kɛɛ bɛ̃̌ǐn po wɛ̃́ɛ́. Kɛɛ ɔ jǔ ké ɔ se ɖɛ ɖò ɓéɖé fɔɔ ní, nìí, wa mɛ peɖe ɔ ɓó dyíɖíí-kpàɔ̀ pɛ́ɛ̀ jè. Ɔ jǔ ké nyúà-ɖɛ̀ ɓɛ́ ɔ dyíɖíà kɛɛ se mɛ́, ké wa dyiɛ ɔ xwaún kpɔ̃̀ìn ní, kɛbì ɔ mɛ mɔ̀ jǎkasì mɔɔ ɓìɖǐ mɔɔ ɓáɖáá kɛɛ, ɔ mɛ pɛ́ɛ̀ dú sɔ̃́.
“Ɔ jǔ ké dyíɖíí-nyɔ̀ ɖò dyi gbǒ ɖò mú dyíɖíɛń nì ɓó máaún, ké nyɔ ɖò dyi ɔ ɖɛ ɖò nàmàìn, ké ɔ dyi mɛ́ ní, nyɔɔ̀ se kú-ɖáɓá-zàà dyé. Kɛɛ ɔ jǔ ké ɖɛɔ̀ dyi ná kpá ɓó zɔ̃-zɔ̃-ɓàɖà ní, nìí, wa mɛ kpɔ̃ nyɔɔ̀ kà nyɔ kpɔ̃à kú-ɖáɓá-nyɔ̀ɛ.
5“Ɔ jǔ ké nyɔ ɖò dyi ɔ nyúà-ɖɛ̀ ɓě dyi ɖiɛń kpa ɖé ɔ ɓíɖí-geɖeín mɔɔ ɖé ɔ géɖéè-gbǎ mú, ké ɔ dyi wa dyi táà, ɓɛ́ wa ké dà séín dyi ɖiɛ kpa pū, ké wa dyi nyɔ ɖò mɔ̀ùn ɓíɖí-geɖeín mɔɔ géɖéè-gbǎ mú wóɖóìn ní, ɔ mɛ po nyɔɔ̀ nììn ɓáá-ɖɛ̀ɔ̀ bɛ̃̌ǐn dyììn ɖé ɔ mìɔùn nììn geɖeɔ̀ mɔɔ ɔ géɖéè-gbǎɔ̀ wáká kpa ɖɛ kɛɛ tò-tò mú.
6“Ɔ jǔ ké nyɔ ɖò dyi nyɛ dyí po, ké nyɛɔ̀ dyi pìǐ múin mùìn, ké ɔ dyi nyɔ ɖò nììn mɔɔ́-jũ̌ mɔɔ ɔ geɖe gànáɔ̀ fɔ̃ ní, nìí, nyɔ ɓɛ́ ɔ poà nyɛɔ̀ dyíɛɛ ɓéɖé ɔ ké ɔ mǔèɔ̀ nììn ɓáá-ɖɛ̀ɔ̀ jè pɛ́ɛ̀.
7“Ɔ jǔ ké nyɔ ɖò dyi ɔ mǔè ɖò wíɖí mɔɔ ɖɛ ɖò nyí ɓó dyi dè jè, ké nyɔ ɖò dyiɛ ɖɛ-dyi-dè-nyɔ̀ɔ̀ xwa dyíɖí, ké wa dyi dyíɖíí-nyɔ̀ɔ̀ kpɔ̃ ní, dyíɖíí-nyɔ̀ɔ̀ mɛ pɛ́ɛ̀ ɖɛ ɔ dyíɖíà kɛɛ dú sɔ̃́. 8Kɛɛ ɔ jǔ ké wa se dyíɖíí-nyɔ̀ɔ̀ kpɔ̃ ní, nìí, wa mɛ dyà nyɔ wa nyíɔ́ kà ɖɛɔ̀ xwa dyi dè jèɛɛ ɓó ḿ dyúa, ɓɛ́ ɔ ké gboò kà ɔ se ɔ mǔèɔ̀ kɔ̃̀ɔ̀-ɖɛ̀ɔ̀ dyí ɖúɛ.
9“Nyɔ-kpò sɔ̃́ dyi ɖɛ ɖò ɓɛ́ ɔ sè ma xwáɖáún wɛ̃ɛ kɔ̃in vɔ̃̀ìn ní, kɛbì ɔ mɛ mɔ̀ ɓìɖǐ mɔɔ jǎkasì mɔɔ ɓáɖáá mɔɔ mú-po-ɖɔ̀ mɔɔ ɖɛ kã̀ìn séín nyɛɛ, wa mɛ dyà waà zaaɔ̀ ɓó ḿ dyúa. Nyɔ ɓɛ́ zaaɔ̀ mu kpɔ̃ùn wɛ̃ɛ mɛ pɛ́ɛ̀ ɖɛɔ̀ dú sɔ̃́ ɖé ɔ mǔèɔ̀ dyéɖéín.
10“Ɔ jǔ ké nyɔ ɖò dyi ɔ mǔè ɖò jǎkasì mɔɔ ɓìɖǐ mɔɔ ɓáɖáá mɔɔ nyúà-ɖɛ̀ kà kò ɖò xwa nyí ɓó dyi dè jè, ké nyúà-ɖɛ̀ɔ̀ dyi mɛ́ín mɔɔ ké ɔ dyi puà mɔɔ ké nyɔ-hwu-nyɔ̀ ɓě dyiɛ kpa ní, 11nìí, nyɔ ɓɛ́ wa nyíɔ́ kà nyúà-ɖɛ̀ɔ̀ xwa dyi dè jèɛɛ mɛ gboò ɓó ḿ dyúa kà ɓɛ́ ɔ se nyúà-ɖɛ̀ɔ̀ dyí ɖúɛ. Ɔ dyi ná nìǐn, nyɔ kɔ̃̀à nyúà-ɖɛ̀ɔ̀ kɛɛ mɛ po ɔ mǔèɔ̀ wuɖuɔ̀ jǎà, ɓɛ́ ɔ kéɛ jè dyi táà, ké ɔ mǔèɔ̀ mɛ ɓɔ́ nyúà-ɖɛ̀ɔ̀ bɛ̃̌ǐn poɛ. 12Kɛɛ ɔ jǔ ké nyɔ ɖò dyi nyúà-ɖɛ̀ɔ̀ ɔ xwaún dyíɖí ní, ɔ ɓéɖé ɔ kéɛ jè pɛ́ɛ̀. 13Ɔ jǔ ké kpɔ̃ɔ-nìmìì ɖò dyi nyúà-ɖɛ̀ɔ̀ dyi fáìn ní, nìí, ɔ mɛ dyà nyúà-ɖɛ̀-xwɛ̀ɔ̀ ɖɛ sè ɓó ɓɛ́ kpɔ̃ɔ-nìmììɔ̀ seà tà kɛɛ nyúà-ɖɛ̀ kɔ̃̀-nyɔ̀ɔ̀ gbo, ɓɛ́ ɖɛ nìà kɛ ké zàse jǔ. Ɔ dyi ná nìǐn, nyúà-ɖɛ̀ɔ̀ kɔ̃̀-nyɔ̀ɔ̀ se ɔ dyi kpɔ̃ɔ́ mu, ɓɛ́ ɔ ké nyúà-ɖɛ̀ɔ̀ jè pɛ́ɛ̀.
14“Ɔ jǔ ké nyɔ ɖò dyi ɔ mǔè ɖòɛ̀ nyúà-ɖɛ̀ zɔ̀, ké nyúà-ɖɛ̀ɔ̀ kɔ̃̀-nyɔ̀ɔ̀ se múin gã̀, ké nyúà-ɖɛ̀ɔ̀ dyi puà, mɔɔ ké ɔ dyi mɛ́ín, nìí, nyɔ ɓɛ́ nyúà-ɖɛ̀ɔ̀ mɛ́ìn kà xwaún wɛ̃ɛ ɓéɖé ɓɛ́ ɔ kéɛ jè pɛ́ɛ̀. 15Kɛɛ ɔ jǔ ké nyúà-ɖɛ̀ɔ̀ kɔ̃̀-nyɔ̀ɔ̀ dyi múin gã̀ ní, nìí, ɔ zɔ̀-nyɔ̀ɔ̀ se ɓéɖé ɔ kéɛ jè pɛ́ɛ̀. Ɔ jǔ ké nyɔ zɔ̀à nyúà-ɖɛ̀ɔ̀ kɛɛ dyiɔ́ má wíɖí ɖò pɛ́ɛ̀ ɓó kũ̀à ɓɛ́ nyúà-ɖɛ̀ɔ̀ nyuà kɛɛ jè ní, ɖɛ nìà kɛ mɛ mɔ̀ pɛ́ɛ̀-ɖɛ̀ɔ̀.
Gma ɓě ɓá kà Éézùɖùɛ̀-nyɔ̀ ɓěɔ̀ ké cĩ́ɛ nyuɛɛ jè dyíɛ
16“Ɔ jǔ ké gàa ɖò dyi màa-dyù gmɔ̀ ɖò ɓɛ́ ɔ séè toɖo kɔ̃ jè dyuò, ké gàa ɖò séè ɓéeín kpɔ̃ɛɛ pɛ́í po, ké ɔ kè ɔ dyi ɓó da nìǐn, nìí, gàaɔ̀ ɓéɖé ɔ ké màaɔ̀ wíɖí peɖe, ɓɛ́ màaɔ̀ ké ɔ gmàà jǔ. 17Kɛɛ ɔ jǔ ké màa-dyùɔ̀ ɓǎ se wɔ̃́ ɓɛ́ gàaɔ̀ ké ɔ dyúɔ̀ dyi kpɔ̃ ní, nìí, gàaɔ̀ ɓéɖé ɔ ké wíɖí jĩ̀ kà ɓɛ́ ɔ muɔ́ kà pɛ́ɛ̀ìn ɓó bùǐ-wìɖìɔ̀ jèɛɛ pɛ́ɛ̀ wɛ̃́ɛ́.
18“Ɓě ní ɖá ɓɛ́ ɓě ké màa ɓɛ́ ɔ mɔ̀ wɔ-pa-màà kɛɛ dyi táà, ɓɛ́ ɔ ké cĩ́.
19“Nyɔ ɓɛ́ ɔ kè nimii ɖò mu ɓó da nììn nyɛɛ, ɓě ɓéɖé ɓɛ́ ɓě ké ɔ ɖáɓá.
20“Nyɔ ɓɛ́ ɔ mu gèɖèpɔ́ɔ̀ kà kò ɖò gbo sáa zàùn ɓó ḿ wáún wɛ̃ɛ, ɓě ɓéɖé ɓɛ́ ɓě ké ɔ ɖáɓá wɛ̃́ɛ́.
21“Ɓě ní ɖá ɓɛ́ ɓě ké ɖíà ɖò bũ̌in nyìnììn mɔɔ ɓɛ́ ɓě ké ɔ dyi pĩ́à. Ɔ mɛ nì ɓě hwìɖǐi kà ɓě mɔ̀ùn mɔ̀ ma ɖíà ɖé Íjè-ɓòɖòɔ̀ kɔ̃ɛ. 22Ɓě ní ɖá ɓɛ́ ɓě ké jɔ̌ɔ̀-màà ɖò mɔɔ xwíè-dyù ɖò bũ̌in nyìnììn. 23Ɓě dyiɛ náa nyu, ké jɔ̌ɔ̀-mààɔ̀ mɔɔ xwíè-dyùɔ̀ dyi ḿ kpéi pòìn ní, nìí, ní mu ɔ kpé-po-wùɖùɔ̀ wɔ̃́ùn, 24ké ní mu ɓě dyoɖoún kpáìn, ké ní muɛ nyuùn ɓɛ́ ɓě ké gàsíà dyúa sè. Ɔ dyi ná nìǐn, ɓě nììn gmàà ɓě mu jɔ̌ɔ̀ sèìn, ɓɛ́ ɓě nììn dyú ɓě ké xwíè sè ɖekè.
25“Ɔ jǔ ké ɓě dyi ɓě mǔè Éézùɖùɛ̀-dyù ɓěɔ̀ ɖò ɓɛ́ ɔ dyé gǎ kɛɛ wíɖí kpaún pòìn ní, ɓě mɛ ɓɔ́ɔ nyuɛ kà wíɖí-kpànà-po-nyɔ̀ ɓěɔ̀ nyuà kɛ. Ɓě mɛ ɓɔ́ kpáná ɖò ɖé nyɔɔ̀ xwaún mɔ́ɔ. 26Ɔ jǔ ké nyɔ ɖò dyi ɔ mú-po-ɖɔ̀ɔ̀ ɔ mǔè ɖò tɔ̀ɔ̀-má mú nyí ní, ɖɔɔ̀ ní ɖá ɔ ké ɖé ɔ mǔèɔ̀ gbo goò. Ɔ mɛ tòɛ̀ ɖe hwɛ̀ dyóɖóɔ̀ ké zi, 27sepóɛɖé ɖɔ nìà kɛ ɖòùn mɔ̀ nyɔɔ̀ kpóɖó-dyùàɔ̀ kɔ̃in-ɓáìn-ɖɛ̀ ɓɛ́ ɔ ɓéɖéɛ. Ɔ seɛ ɓéɖéín, ɖɛ́ ɔ mu mú pɛ̃́ìn nyɛ́? Ɔ jǔ ké ɔ mǔèɔ̀ seɛ náa nyu, ké nyɔɔ̀ dyi ḿ kpéi pòìn ní, nìí, ní mu ɔ kpé-po-wùɖùɔ̀ wɔ̃́ùn, sepóɛɖé ḿ mɔ̀ wìì-ɓéɖé-Gèɖèpɔ́ɔ̀.
28“Ɓě ɖò ní ɖá ɓɛ́ ɓě ké ḿ vàɖǎ mɔɔ ɓɛ́ ɓě ké ɓěɛ̀ nàìn-nyɔ̀ ɓěɔ̀ ɖò vàɖǎ.
29“Ɓě mɛ nyí ḿ ɓěɛ̀ ɖii-ɖɛ̀ kè wã́ìn kĩ́ín-kĩ́ín sɔ̀ ɖé ɓěɛ̀ geɖe ɓěɔ̀ gboɛ. Ɓě mɛ dyàà ti ḿ ɖǎà dèɛɛ xwíníín.
“Ɓě mɛ nyí ḿ ɓěɛ̀ nyíɔ́-dyù-gàà ɓě. 30Kà dyúáɖòɔ̀ kǎà ɓě mɛ nyí ḿ ɓěɛ̀ ɓìɖǐ kè ɓěɛ̀ ɓáɖáá ɔ kè ɓěɛ̀ wiɖi ɓěɔ̀ nyíɔ́-dyù ɓíɔ́ ɓě ɖekè. Wa mɛ nì wa ɖe woɖoún ɓó wé mɛ̀nɛ̌ìn-sɔ̃́ xwíníín, kɛɛ ɓó wéɔ̀ mɛ̀nɛ̌ìn-tã nììnɔ̀ ní, ɓě mɛ nyí wa ḿ.
31“Ɓě mɛ mɔ̀ nyɔ ɓě ɓɛ́ wa kpá wáká ɓó ḿ bììɛɛ kánáá pū. Ɔ jèɛɛ, ɓě ní ɖá ɓɛ́ ɓě ké nimii ɖò ɓɛ́ kpɔ̃ɔ-nìmìì ɖǎ dyi fáìn nyɛɛ ɖò tà, kɛɛ ɓě mɛ nyíɛ gbe ɓě.
Селектирано:
Ɛ́séɖɔ̀ 22: ƁB02
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Bassa Bible © Bible Society Liberia, 2002.