Ɛ́séɖɔ̀ 21
21
Gma ɓě ɓá kà gǐì-ɓǎ ké ɔ gǐì kpɔ̃ɔ nyuɛɛ jè dyíɛ
(Dìtɔ̀wáɖánámɛ̀ 15:12-18)
1Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Dè Éézùɖùɛ̀-dyù ɓěɔ̀ gma ɓěɛ̀ dyí ɖekè. Gma ɓěɔ̀ kɛà kɛ̀. 2Ɔ jǔ ké waà nyɔ ɖò dyi ɔ mǔè Híìbúɖúù-nyɔ̀ ɖò dɔ̃, ɓɛ́ ɔ ké ɔ gǐì jǔ ní, gǐìɔ̀ mɛ nyu nyɔɔ̀ kũ̀à ɓó zɔ̃ mɛ̀nɛ̌ìn-ɖò xwíníín. Kɛɛ ɖé zɔ̃ɔ̀ mɛ̀nɛ̌ìn-sɔ̃́ nììnɔ̀ xwíníín nyɛɛ, gǐì-ɓǎɔ̀ ɓéɖé ɓɛ́ ɔ ké gǐìɔ̀ buɛ̀. Gǐìɔ̀ se ɓéɖé ɔ ké ɖɛ ɖò pɛ́ɛ̀ ɓó ɔ buɛ̀ jèɔ̀. 3Gǐì-ɓǎɔ̀ dyi ma ɔ ɖòùn dɔ̃ ní, nìí, ɔ ɖòùn mɛ buɛ̀. Ké ɔ dyi ma nyɔ́nɔ́ dyà ní, nìí, ɔ kè ɔ nyɔ́nɔ́ɔ̀ mɛ mu. 4Kɛɛ ɔ jǔ ké ɔ gǐì-ɓǎɔ̀ dyi ma ɔ nyɔ́nɔ́ nyí, ké màaɔ̀ kè gǐìɔ̀ dyi gàa-dyù mɔɔ màa-dyù ɓě wóɖóìn ní, nìí, gǐì-ɓǎɔ̀ mɔ̀ nyɔ kɔ̃̀ màaɔ̀ kè dyú ɓěɔ̀, ké gàaɔ̀ ɖòùn ɔ mɛ buɛ̀. 5Kɛɛ ɔ jǔ ké gǐìɔ̀ dyiɛ wĩín zà, ké ɔ dyi níiń, ‘Ḿ ɖɛ̀ɓɛ̀ ní gǐì-ɓǎɔ̀ kè ní gmààɔ̀ ɔ kè ní dyú ɓěɔ̀ mú, ké ḿ se mɔ́ ḿ ké wa dyi táào’ ní, 6nìí, ɔ gǐì-ɓǎɔ̀ mɛ kpa ɔ ɓó ní gbǒɔ̀ wĩín, ɓɛ́ ɔ ké ɔ ɓó gbǒ-kĩ̀ǐnɔ̀ mɔɔ xwìɖì-tɛ̃́ínɔ̀ gbo kpa, ɓɛ́ ɔ ké sṹɔ̀ dyí ɖú, ɓɛ́ ɔ ké ɔ ɖùǔɔ̀ fíè. Ɔ ɖǎ ná nìǐn, ɔ mɔ̀ǎ ɔ gǐì-ɓǎɔ̀ gǐì ɖé ɔ fɛ̀ɛ̀-wè séín mú.
7“Ɔ jǔ ké gàa ɖò dyi ɔ dyú-màà ɖò gǐì mú peɖe ní, gma ɓá gǐì-gàà dyíɛɛ se ɔ mɔ̀ùn dyí ɓá. Ɔ mɔ̀ùn mɛ ɓɔ́ buɛ̀ fɔɔ. 8Kɛɛ ɔ jǔ ké gǐì-mààɔ̀ gǐì-ɓǎ ɓɛ́ ɔ gã ma kà ɔ ɓó ɔ mìɔùn bììɛɛ hwòɖǒ se ɔ múin dèìn ɖe ní, nìí, nyɔ peɖeà màaɔ̀ kĩ́ín nyɛɛ mɛ gbǎà màaɔ̀. Gǐì-ɓǎɔ̀ mɛ ɓɔ́ màaɔ̀ ɖíà ɖò gbo pèɖèɛ̀n, sepóɛɖé ɔ ɖǎ màaɔ̀ cá. 9Ɔ jǔ ké gǐì-ɓǎɔ̀ dyi màaɔ̀ mɔ́ ɓó ɔ dyú-gàà bìì ní, ɔ ɓéɖé ɔ ké màaɔ̀ kpɔ̃ kà ɔ kéɔ́ kà ɔ mìɔùn nììn xwíníín-zà-dyù-màà kpɔ̃ɔ nyuɛ. 10Ɔ jǔ ké gǐì-ɓǎɔ̀ dyú-gààɔ̀ dyi nyɔ́nɔ́ ɖìè ɖò dyi kpɔ̃ ní, ɔ ní ɖá ɔ ké ɔ gmàà sùàɔ̀ ɓɔ́, kɛɛ ɔ mɛ nyu ɖɛ séín ɓɛ́ gàa kɔ̃̀ ɔ ké ɔ màa bìì nyuɛ kà dyúáɖò kà ɔ nyuɛ ma kà kĩ́ín nyɛ. Ɖɛ ɓěɔ̀ hwɔìn kà ɖii-ɖɛ̀ kè ɖɔ ɔ kè ɖɛ tɔ̀ɔ̀ ɓě nì ɓó ɖeɛ. 11Kɛɛ ɔ jǔ ké ɔ se ɖɛ ɓěɛ̀ màaɔ̀ bìì nyu ní, nìí, ɔ ɓéɖé ɓɛ́ ɔ ké màaɔ̀ buɛ̀. Nyɔ ɖò se ɓéɖé ɔ ké ɖɛ ɖò pɛ́ɛ̀ ɓó màaɔ̀ buɛ̀ jèɔ̀.
Gma ɓě ɓá kú ɖáɓá jè kè nyɔ ɖò puà jè dyíɛ
12“Ɔ jǔ ké nyɔ ɖò dyi ɔ mǔè ɖò ɖáɓá ní, wa ɓéɖé ɓɛ́ wa ké ɔ mɔ̀ùn ɖáɓá ɖekè. 13Kɛɛ nyɔɔ̀ seó ɖei dyé, ké ɔ dyiɛ nyuín, nìí, nyɔ ɖáɓáà kúɔ̀ kɛɛ mɛ gbǔ, ɓɛ́ ɔ ké pá ɖò ní mu da zàùn wɛ̃ɛ mú pèɖèìn. 14Kɛɛ nyɔ ɖò dyi gmɔ̀ǐn-gmɔ̀ nyu, ké ɔ dyi ɔ mǔè ɖò gbààǔn po, ké ɔ dyi ɔ ɖáɓá, ké ɔ dyi ɖé ní sáa-kɔ̃-zàìn-gbààɔ̀ gbo pèɖèìn ní, kɛbì ɔ mɛ nyuɛ náa kɛɛ, wa mɛ zà ɓó ɔ, ɓɛ́ wa ké ɔ ɖáɓá.
15“Nyɔ ɓɛ́ ɔ po ɔ ɖe mɔɔ ɔ ɓǎ gbààǔn wɛ̃ɛ, wa ɓéɖé ɓɛ́ wa ké ɔ ɖáɓá.
16“Nyɔ ɓɛ́ ɔ dyíɖí ɔ mǔè-nyɔ̀ǔn-dyù ɖò, ké ɔ peɖe ɔ, mɔɔ ké wa mu nyɔɔ̀ ɔ xwaún kpɔ̃̀ìn nyɛɛ, wa ɓéɖé ɓɛ́ wa ké ɔ ɖáɓá.
17“Nyɔ ɓɛ́ ɔ vàɖǎ ɔ ɖe mɔɔ ɔ ɓǎ kɛɛ, wa ɓéɖé wa ké ɔ ɖáɓá.
18“Ɔ jǔ ké gàa sɔ̃́ dyi gbààǔn kpáìn, ké ɖò dyi ɔ mǔè ɖò sɔ́ɔ́-kpò taɓa, mɔɔ ké ɔ dyi ɔ ɓe, ké ɔ dyi ɔ puà, ké nyɔ wa puàà kɛɛ se mɛ́, kɛɛ ɔ dyi wɛ́-ɓìɖìì dyi kpá, 19hwɛ̀ ké ɔ dyi dyí sɔ̀, ké ɔ dyi kùì kɔ̃ún kpá, ké ɔ dyi píé sí, ké ɔ dyi dyi nà ní, nìí, wa mɛ ɓɔ́ nyɔ ɓɛ́ ɔ puàà ɔ mǔèɔ̀ kɛɛ ɖáɓáa, kɛɛ ɔ mɛ hwǒò nyɔ ɔ ɖǎà puà kɛ, ɓɛ́ ɔ ké dyi káná, ké ɔ mɛ pɛ́ɛ̀ nyɔ ɔ puàà kɛ ti ɓɛ́ ɔ ɖǎà mú gbɔɔ̀ kɛɛ jè.
20“Ɔ jǔ ké nyɔ ɖò dyi ɔ gǐì-gàà mɔɔ gǐì-màà ɖò ɓà-cù ɓàɖàìn, ké gǐìɔ̀ dyi ɓà-cùɔ̀ dyúa sèǐn, wa ɓéɖé ɓɛ́ wa ké gǐì-ɓǎɔ̀ gǎ ɖò kɔ̃ tò. 21Kɛɛ ɔ jǔ ké gǐìɔ̀ se mɛ́, ké wé dyúáɖò mɔɔ sɔ̃́ dyi zi ní, nìí, ɓě mɛ ɓɔ́ gǐì-ɓǎɔ̀ gǎ ɖò kɔ̃ tòɛ̀, sepóɛɖé gǐìɔ̀ mɔ̀ ɔ kɔ̃̀ɔ̀-ɖɛ̀.
22“Ɔ jǔ ké nyɔ ɓě dyi vɔ̃uń nì, ké wa dyi màa nì zùù kɔ̃ ɖò dyí ɓe, ké ɖɛ nìà kɛ dyiɛ nyu ké màaɔ̀ dyi dyú se ku wóɖóìn, ké ɖɛ ɖò se màaɔ̀ kè dyúɔ̀ nyuín, nìí, màaɔ̀ dyú-ɓǎ mɛ po nyɔ nyuà ɖɛ gbàɔ̀ kɛɛ wíɖí jĩ̀ kà ɓɛ́ tɔ̀ɔ̀-ɓìɔ̀ ɓěɔ̀ wɔ̃́ìn gboɛɛ dya. 23Kɛɛ ɔ jǔ ké ɖɛ ɖò dyi màaɔ̀ mɔɔ dyúɔ̀ nyu, ké wa ɖòɛ̀ gĩɔ dyi ɓó wóɖó ní, nìí, nyɔ nyuà ɖɛɔ̀ kɛɛ nììn fɛ̀ɛ̀ɔ̀ mɛ ziɛ múin ɖekè. 24Ɖɛ kã̀ìn séín mu màaɔ̀ mɔɔ dyúɔ̀ gbo kpáùn wɛ̃ɛ, kǎà wa mɛ nyuɛ nyɔɔ̀ bũ̌ ɖekè, kɛbì ɔ mɛ mɔ̀ dyéɖé mɔɔ nyɛ́nɛ́ mɔɔ sɔ̃ mɔɔ ɓo 25mɔɔ sĩi-jè mɔɔ ɖɛ-ɖaɓa-bɛ̃̀ mɔɔ mú-bunuìn-bɛ̃̀ kɛ.
26“Ɔ jǔ ké nyɔ ɖò dyi ɔ gǐì-gàà mɔɔ ɔ gǐì-màà ɖò dyéɖéín ɓe, ké ɔ dyiɛ nyu ké gǐìɔ̀ dyéɖéɔ̀ dyi dyíin nyìnììn ní, ɔ mɛ táà gǐìɔ̀ dyi, ɓɛ́ ɔ ké mu ɓó ɔ dyéɖéɔ̀ jè. Ɖɛ nìà kɛ mɔ̀ ɔ dyéɖéɔ̀ pɛ́ɛ̀-ɖɛ̀. 27Ɔ jǔ ké ɔ dyi ɔ gǐì-gàà ɖò mɔɔ ɔ gǐì-màà ɖò nyɛ́nɛ́-ɓò ɖò wɔ̃ún jaɖa ní, ɔ mɛ táà gǐìɔ̀ dyi, ɓɛ́ ɔ ké mu ɓó ɔ nyɛ́nɛ́-ɓòɔ̀ jè. Ɖɛ nìà kɛ mɔ̀ ɔ nyɛ́nɛ́-ɓòɔ̀ pɛ́ɛ̀-ɖɛ̀.
Gma ɓě ɓá ɖɛ kò-kò ɓě kɔ̃̀-nyɔ̀ jè dyíɛ
28“Ɔ jǔ ké ɓìɖǐ ɓíɔ́ ɖò dyi màa ɖò mɔɔ gàa ɖò gmɛ̌ taɓa, ké ɔ dyi mɛ́ ní, wa mɛ taɓaìn ɓìɖǐɔ̀ sɔ́ɔ́-kpò dyi, ɓɛ́ ɔ ké mɛ́, ké nyɔ ɖò ní ɖá ɔ ké ɓìɖǐɔ̀ tà. Kɛɛ wa mɛ ɓɔ́ ɓìɖǐɔ̀ kɔ̃̀-nyɔ̀ dyi kpɔ̃ɔ ɓó ɖɛ ɓìɖǐɔ̀ nyuà kɛɛ jè. 29Kɛɛ ɔ jǔ ké ɓìɖǐ ɓíɔ́ɔ̀ dyi nyɔǔn gmɛ̌-gbo-po-nyɔ̀ jǔ kĩ́ín, ké wa dyi ɔ kɔ̃̀-nyɔ̀ɔ̀ náún po kóɖó-kóɖó ɓáa jè dyí, ké ɔ se ɓìɖǐɔ̀ gba-gba mú po, ké ɔ dyi nyɔ ɖò ɖáɓá ní, nìí, wa ɓéɖé wa ké ɓìɖǐɔ̀ sɔ́ɔ́-kpò dyi taɓaìn, ɓɛ́ ɔ ké mɛ́, ké ɔ kɔ̃̀-nyɔ̀ɔ̀ mɔ̀ùn ɓéɖé ɔ ké mɛ́ ɖekè. 30Kɛɛ ɔ jǔ ké wa dyi ɔ wíɖí dya po ní, nìí, ɔ mɛ gbǎà ɔ mìɔùn nììn fɛ̀ɛ̀ɔ̀ dyììn ɖé wíɖí wa muà ɔ dya poùn wɛ̃ɛ pɛ́ɛ̀-pɛ́ɛ̀ mú. 31Gma dyúáɖò nìà kɛ nì ɓó nyɔ ɖòɛ̀ dyú ɓɛ́ ɓìɖǐ ɓíɔ́ ɖò mu gmɛ̌ taɓaùn, ké ɔ mu mɛ́ìn nyɛɛ jè ɖekè. 32Ɔ jǔ ké ɓìɖǐ ɓíɔ́ ɖò dyi nyɔ ɖòɛ̀ gǐì ɖáɓá ní, ɓìɖǐɔ̀ kɔ̃̀-nyɔ̀ mɛ pɛ́ɛ̀ séɓàɖà-cɛ̀kò kpáɖá-nyɔ ɓaɖa-bùè ɖé gǐì-ɓǎɔ̀ dyéɖéín, ké wa mɛ taɓaìn ɓìɖǐɔ̀ sɔ́ɔ́-kpò dyi, ɓɛ́ ɔ ké mɛ́.
33“Ɔ jǔ ké nyɔ ɖò dyi ɓí ɖò kĩ̀ǐn wĩín zà, mɔɔ ké ɔ dyi ɓí ɖò ɓúɖú, ké ɔ seɛ ɖɛ kɔ̃in ɓáìn, ké ɓìɖǐ ɓíɔ́ ɖò mɔɔ jǎkasì ɖò dyi ɖé kpá ní, 34nìí, nyɔɔ̀ ɓéɖé ɔ ké nyúà-ɖɛ̀ɔ̀ jè pɛ́ɛ̀. Ɔ ɖǎ nyúà-ɖɛ̀ɔ̀ jè pɛ́ɛ̀ ɖéɛ kɔ̃̀-nyɔ̀ɔ̀ dyéɖéín ní, nìí, ɔ mɛ ɖúɛ xwɛ́ɔ̀ dyí, ɓɛ́ ɔ ké ɔ kɔ̃̀ɔ̀-ɖɛ̀ jǔ.
35“Ɔ jǔ ké nyɔ ɖòɛ̀ ɓìɖǐ ɓíɔ́ ɖò dyi ɔ mǔè ɖòɛ̀ ɓìɖǐ ɓíɔ́ ɖáɓá ní, nìí, wa mɛ peɖe ɓìɖǐ ɓɛ́ ɔ ɖáɓáà ɔ mǔèɔ̀ kɛ, ɓɛ́ wa kéɛ wíɖíɔ̀ geìn. Kà dyúáɖòɔ̀ kǎà wa mɛ geìn ɓìɖǐ mɛ́-mɛ́ɔ̀, ɓɛ́ ɔ ké wɔ̃ ɓɛ́ìn. 36Kɛɛ ɔ jǔ ké wa dyiɛ dyuò kà ɓìɖǐ ɓíɔ́ɔ̀ mɔ̀ gmɛ̌-po-nyɔ̀ kĩ́ín nyɛ, ké ɔ kɔ̃̀-nyɔ̀ɔ̀ seɛ gba-gba mú po ní, nìí, ɔ kɔ̃̀-nyɔ̀ɔ̀ mɛ po ɓìɖǐ ɓíɔ́ɔ̀ bɛ̃̌ǐn, ɓɛ́ ɔ ké nyɔ ɖǎà mɛ́ɛ dyí ɖú. Nyúà-ɖɛ̀ zi nyúà-ɖɛ̀ bɛ̃̌ǐn.
Селектирано:
Ɛ́séɖɔ̀ 21: ƁB02
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Bassa Bible © Bible Society Liberia, 2002.