Mahte 7

A Jéyáng Râ Hkyô

Luk 6:37-38, 41-42

1Núngmòq jéyáng é a hui kó sháng gàq, ó lé le, hkâ jéyáng kó. 2Hkâsu mù gâ le, núngmòq jéyáng é su, núngmòq le, jéyáng é hui kôrâ nghut é htoq agó, núngmòq lìk byî é bung èq, núngmòq lé dum lìk byi râ nghut lhê.

3Yhûmsing myòq hkaû má lúng tô é siktúm lé lháng a myìt wú é nhîng, haî mù luî, nunggu nungmâng é myòqwàng lé myang lhê lhú? 4Yhûmsing é myòq má siktúm lhûng to luî nhîng, ‘Náng myòq má lúng tô é myòqwàng lé, ngò choq pyám byi lé.’ nghû luî, náng é gu-mang hpó lé hkâsu wó taí râ lhú? 5Gègùn labyoq kut sû ê, náng é myòq má lúng tô é siktúm lé hí choq pyám aq. Haû jáng shèq, nunggu nungmâng é myòq má wang tô é myòqwàng choq pyám byi râ matú, nàng san za myàng râ nghut lhê.

6Hkuî pé lé, yúnglhô é zê hkâbyi kó; wàq pê hí má, núngmòq é palhé wuizo lé hkâdú byi kó. Haú su kut jáng, haú bang gi, zè haú pé lé nâng pyeq pyám mù, núngmòq lé dum taû ngàt lò râ nghut lhê.

Dung Keq, Hô Keq, Hkum Má Kòk Keq

Luk 11:9-13

7Dung keq, haû jáng, núngmòq lé byi râ nghut lhê; hô keq, haû jáng, núngmòq myàng kôrâ nghut lhê; hkum má kòk keq, haû jáng, núngmòq lé hpóng byi râ nghut lhê. 8Hkâsu mù gâ le, ó yùq nghut kôle, dung sû wó râ; hô sû myàng râ; hkum kòk sû lé gi, hpóng byi râ nghut lhê.

9Núngmòq má, ó yùq wá, yhûmsing yhang zo mùk dûng le, lùqgòk byi kôrâ lhú? 10Ngozo dûng le, lhângmuì#7:10 Garai Gasang gi, lhângmuì a zo râ matú, Yudaq byu pé lé hkunmó hkyô tô é nghut lhê. byi kôrâ lhú? 11Agè ashop é bang núngmòq lháng gi, núngmòq é zo wuî lé, ge é chyûnghuq dàt byi kô le nhîng, mauhkûng htoq tsáng myhâng mâ é núngmòq é Îwa gi, Yhang lé dûng é bang lé, je riyhang ge é chyûnghuq byi râ nghut lhê! 12Haû mù, hai hkyô má nghut kôlhang, núngmòq gi, yhûmsîng ô nau é dông supé lé kut nhâng nau é su, yhángmòq lé le kut byi keq. Haî mù gâ le, haû gi, jep é târâ eq myìqhtoî pê é dang lo jùp tô é nghut ri.

Chyap É Hkúmdong Eq Lam É Hkúmdong

Luk 13:24

13Chyap é hkúmdong mai wàng keq. Hkâsu mù gâ le, lam é hkúmdong eq hkyô mó gi, htên byòq hkyô shut shuî e é nghut mù luî, haú dông wàng bang gi, myô akô nghut ri. 14Chyap é hkúmdong eq hkyô zo kúm gi, chyungxe duì hkyô shut shuî e é nghut mù luî, haú lé myang ho é bang gi, shaû akô nghut ri.

Agàm Eq Ashi

Luk 6:43-45

15Núngmòq chyáng jé lé lo é myìqhtoi pyoq pé lé, sidìq nyì keq; yhángmòq gi, saukuq wùt mù, núngmòq chyáng jé lé kôlhang, myàq zo myàq shuq nau é wàmhkuî pé nghut akô. 16Yhángmòq é múzó jizó lé wú mù, núngmòq gi, yhángmòq lé wú sé kôrâ nghut lhê. Zubyap mai tsibyiq shi, zugâm mai hkohúm-shi wó yu wú akô lhú? 17Ge é agàm gi, ge é ashi zui mù, a ge é agàm gi, a ge é ashi za dàt zuî ri. 18Ge é agàm gi, a ge é ashi a wó zui, a ge é agàm le, ge é ashi a wó zui nghut ri. 19Ge é ashi a zuî é shigâm hkangmó lé gi, htuq pyám mù, myi má dú kat pyám râ nghut lhê. 20Haû mù, yhángmòq é múzó jizó lé wú mù, núngmòq gi, yhángmòq lé wú sé kôrâ nghut lhê.

21Ngo lé, ‘Yhûmsîng ê, Yhûmsîng ê,’ ga, wùt é bang yùq hkangmó gi, mauhkûng mîngdán má myang wàng kôrâ a nghut; haû mauhkûng htoq mâ é Ngá wa ô nau é dông kut sû za shèq, myang wàng râ nghut lhê. 22Haú buìnyì má, byù myo myo gi, ‘Yhûmsîng ê, Yhûmsîng ê, Náng é myìng mai, ngá-mòq gi, myìqhtoi le htoi bê; nàt gang lé hkat htoq bê; làklaí alhô agàn ajung jung lé, kut bê a nghut lhú?’ ga luî, Ngo lé myi kôrâ nghut lhê. 23Haú hkûn, Ngò gi, ‘Núngmòq lé, Ngò hkâ-nhám le a sé; agè ashop hkyô kut é bang núngmòq, Ngá chyáng mai gâng ló byùq keq.’ nghû, yhángmòq lé san za tû taî kat râ nghut lhê.

Hpàqchyî Bò Sû Eq Ngòk Sû

Luk 6:47-49

24Haû mù, Ngá é dang shí pé lé wó gyô yù luî, châng kut é sû gi, hpàqchyî bò mù, lunghtân htoq má, yhûm saî é sû eq wuí nyi ri. 25Mau wô, wuì je, laìdun lò mù, yhûm haú lé lo htung kôlhang, yhûm haû gi, a htên byòq byùq râ nghut lhê; hkâsu mù gâ le, yhûm haû gi, lunghtân htoq má tsuq tô é yánmai nghut ri. 26Nghut kôlhang, Ngá é dang lé, wó gyô yù mù, a cháng sû gi, se-muî jàng má, yhûm saî é byù ngòk eq wuí nyî râ nghut lhê. 27Mau wô, wuì je, laìdun wò yup dùt lò mù, yhûm haú lé lo htung jáng, yù whuî a mù loshoq htên byòq byùq râ nghut lhê.” gâ ri.

28Yesuq mungdang ban taî é hkûn, shiwa byu pé gi, Yhang mhoqshit é hkyô lé maú hong bum akô; 29hkâsu mù gâ le, Yhang gi, yhángmòq é târâ sará pé eq a pung é za, ahkáng ayá wó sû rayùq su, mhoqshit é yánmai nghut ri.

Voafantina amin'izao fotoana izao:

Mahte 7: znot

Asongadina

Hizara

Dika mitovy