Mahte 13

Kyôshi Sân É Dangtú

Mrk 4:1-20; Luk 8:4-15

1Haú nyí má yhang, Yesuq gi, yhúmhkaû mai htoq ló mù, wuìnhông yàm má ê zung tô ri. 2Byù hpûng mó gi, Yhâng é lhînghkyùq má zùp zîng lé bûm kô é yánmai, Yhang gi, lhaî hkaû má dòq zung tô ri. Shiwa byu pé kúm gi, ginkúm htoq má yàp tô bum akô. 3Hau htâng, Yhang gi, haú bang lé, dangtú pé dông myo myo taî é má, “Kyô hkyó sû rayùq gi, kyôshi san râ ga htoq e ló ri. 4Yhang, kyôshi sân kat é hkûn, ra-am gi, hkyô má gyó ang mù, nghoq pê èq lé hte zô pyâm ri. 5Ra-am gi, myi-tse a htu é lùqgòk yò pé má gyó ang mù, myi-tse a htu é yánmai, luì za yùq htoq lô kôle, 6a-myìt a wó chîn hing é nghut mù, buì htoq lô jáng, lhap kyuq pyám bê nghut ri. 7Dum ra-am gi, zugyóm hkaû má gyó ang luî, zubyap haú pé kô lò mù, wùp pyâm ri. 8Ra-am dum nghut jáng, myìhpún bo é jang má gyó ang luî, ashi zuî lo é gi, sân kat é htoq rashô tú, hkyuq xê tú, sum xê tú, myô jàt lo é nghut ri. 9Gyô yù râ nohkyap dàp sû gi, gyô yù sháng gàq.” ga le taî ri.

10Haú hkûn, chángzô pé gi, Yhâng chyáng lé mù, “Nàng gi, haî mù, shí bang lé, dangtú dông taî lhê lhú?” ga myî akô.

11Haû jáng, Yhang tû taî é gi, “Mauhkûng mîngdán eq sêng é sê gyo wuî é hkyô pé lé sê gyo râ ahko ahkáng, núngmòq lé byî to bê, nghut kôlhang, yhángmòq lé gi, a byi shî é nghut lhê. 12Wó to sû lé gi, yhang agùn agó wó râ matú, jàt byi shirâ nghut lhê. A wó su chyáng mai kúm gi, yhang wó tô é lé lháng yu pyám byi shirâ nghut lhê. 13Yhángmòq gi, wú to kôlhang, a myàng kó; gyô nyì kôlhang, a wó gyo, a sê gyo kó nghut é yánmai, yhángmòq lé Ngò dangtú dông taí râ é nghut lhê. 14Haû gi,

‘Núngmòq gi, wó gyô nyì kôlhang, sê gyo kôrâ a nghut;

myang nyì kôlhang, wú sé kôrâ a nghut.

15Hkâsu mù gâ le, byù shí bang gi, myìt nhikshi jìt byùq bê;

yhángmòq é nohkyap gi, a wó gyo kó,

myòqjí le chûm byùq bekô nghut ri.

Haû su a nghut le gi, yhángmòq, myòq myàng no gyo mù,

i-myìt bun bóng luî, lhing lò kômù,

Ngò, yhángmòq lé yâ gè byi berâ nghut lhê.’#Esai 6:9-10

gâ é, Esai-a é myìqhtoi dang lé lhoqdìk é nghut ri. 16Nghut kôlhang, núngmòq é myòq gi, wó myâng mù, núngmòq é nohkyap gi, wó gyô é yánmai, núngmòq gi, hkungsô wó nyi ri. 17Hkâsu mù gâ le, Ngò, núngmòq lé teng za taí kôlé, núngmòq wó myâng, wó gyô é pé lé, myìqhtoî pé eq díngmán bang myo myo gi, myàng naù gyo naû kôlhang, a wó myâng, a wó gyo kó nghut ri.

18Ahkuî, kyôshi san sû eq sêng é dangtû é lichyúm lé rago gyô wú keq; 19Hkyô má gyó âng é kyôshi gi, mauhkûng mîngdán eq sêng é danglù lé wó gyo kôlhang, a sê gyô é yánmai, haû agè ashop sû lé lô mù, yhâng é i‑myìt hkaû má sân kat tô é kyôshi lé, lé yu pyám byî é hui sû lé gá nau é nghut lhê. 20Lùqgòk yò pé má gyó âng é kyôshi gi, mungdang lé wó gyo jáng, radá dâm gabú myìt èq hàp yù kôlhang, 21a-myìt a wó chîn é yánmai, razùp zo za yùq mù, mungdâng é yánmai, wuîhkê é eq zing-rî é hui kôjáng, hân hân yhik ló byùq é sû lé gá nau é nghut lhê. 22Zugyóm má gyó âng é kyôshi gi, haû mungdang lé wó gyô yù kôlhang, shí i-pyàt lhê é myìt wui myìt hke hkyô pé eq hkyô shuî nghoq jung ngùn hîng zèhkoq èq hup pyâm é yánmai, ashi a wó zuî é sû lé gá nau é nghut lhê. 23Nghut kôlhang, myìhpún bo é jang má gyó âng é kyôshi kúm gi, mungdang lé wó gyo mù, sê gyô yu é sû lé gá nau é nghut lhê. Haú yùq ashi zuî é gi, sân kat é htoq rashô tú, hkyuq xê tú, sum xê tú, myô jàt lo é nghut ri.” gâ ri.

Myòqgàm Dangtú

24Yesuq, yhángmòq lé dangtú dông xoq taî kyô é gi, “Mauhkûng mîngdán gi, ge é kyôshi lé, yò má sân kat sû rayùq eq du ri. 25Byu pé yhup myhî tô bum é u lé, yhâng é gyè gi, lé jé mù, gùq gàm gyoro má, myòqshi lé sân to hkó luî, taû ló byùq bê nghut ri. 26Gùq gàm yùq lò mù, gùqnhâm htoq lo é hkûn, myòqgàm le bo yùq htoq lo ri.

27Yhûmsîng hpô é duìnhâng zoshâng wuì gi, yhâng chyáng lé jé mù, ‘Yhûmsîng ê, ge é kyôshi lé za yò má sân tô é a nghut lhú? Myòqgàm pé gi, hká mai htoq lo é lhú?’ ga myi kôjáng, 28haû yhûmsîng hpó gi, ‘Gumlau gye èq kut é nghut ri.’ ga tû taî ri.

Haû jáng, duìnhâng zoshâng wuì gi, ‘Ngá-mòq, myòq haú pé lé ê nùt pyám râ lé, nàng ô nau ri lhú?’ ga myî akô.

29Haú hkûn, yhang gi, ‘Hká nùt pyám kó; hkâsu mù gâ le, núngmòq, myòq haú pé lé nùt é hkûn, gùq gàm pé lé le bo záng nùt pyám kôrâ nghut lhê. 30Kyô shu yòq jé shoq rahá yùq to kó sháng gàq; haú hkûn, myòqgàm pé lé hí hkyin tsîng yù mù, nyhê hkyô pyám râ matú hkyom dîng to luî, gùq lé kúm gi, shû yù mù, ngá é chyî má tsing kat to râ matú, kyô shu bang lé ngò taí râ nghut lhê.’ ga tû taî ri.” gâ ri.

Angshi Cham Eq Múnchi Dangtú

Mrk 4:30-34; Luk 13:18-21

31Hau htâng, Yesuq gi, yhángmòq lé gótû dangtú ralhum dum xoq taî é gi, “Mauhkûng mîngdán gi, byù rayùq èq, yhâng hkyâm má hô tô é angshi cham eq wuí ri. 32Angshi cham haû gi, kyô-myui jí bànshoq htoq má je tiq é nghut kôle, yùq kô lò jáng, hkyâm má hô é mhan-haq hpoqnòq gàm bànshoq htoq má je kô é agàm dùt lò mù, akoq pé má, maulat nghoq zô pé lé wó zung nô bum lhê.” gâ ri.

33Yhang, gótû dangtú dum xoq taî é gi, “Mauhkûng mîngdán gi, myiwe rayùq èq súngsô mún sum bûng má yu nyhó luî, haú pé bànshoq lé wó lhoqdau nhang é múnchi eq wuí ri.” gâ ri.

34Yesuq gi, byù mòqmó lé, haú pé bànshoq dangtú dông mai chyat taî ri; yhángmòq lé, dangtú a bo é haî lháng a taí wú nghut ri. 35Haû gi,

“Ngá nhut lé hpóng mù, dangtú dông mai taí râ;

mingkan lé sânghi hpan é mai zaú tô é hkyô pé lé taî sân kyo râ nghut lhê.”#Hkya-on 78:2

ga, myìqhtoi dông taî tô é dang lo dìk é nghut ri.

Myòqgàm Dangtú Lé Taî Sân Kyô É Hkyô

36Hau htâng má, Yesuq gi, byù mòqmó mai htoq ló mù, yhúmhkaû má wang ló ri. Haú hkûn, Yhâng é chángzô pé gi, Yhâng chyáng lé lô kômù, “Yò mâ é myòqgàm dangtú eq sêng é hkyô lé taî sân kyo laq.” ga taî akô.

37Haû jáng, Yhang tû taî é gi, “Ge é kyôshi san sû gi, haû Byu Yhangzo nghut ri. 38Yò gi, mingkan nghut ri; ge é kyôshi gi, mauhkûng mîngdán é yhang zô pé nghut akô. Myòqgàm pé kúm gi, haû Tsádán é yhang zô pé nghut akô; 39haú lé châng hkat sân é gumlau gyè gi, nàt Tsádán nghut ri. Kyô shu yòq gi, mingkan htûm é ahkyíng nghut ri; kyô shu bang gi, maumang lagyô pé nghut akô.

40Haû myòqgàm pé lé, nùt yù mù, myi má nyhê pyâm é su, haû mingkan htûm é ahkyíng má dùt râ nghut lhê. 41Haû Byu Yhangzo gi, Yhâng é maumang lagyô pé lé nhâng râ nghut lhê; haû mù, haú bang gi, hkyô lhoqnghoq nhang é bang bànshoq eq agè ashop hkyô kut é bang lhúnglháng lé, Yhâng é mîngdán mai hkyin she htoq yû mù, 42gyúng nyi é myibung hkyûng hkaû má dú kat pyám kôrâ nghut lhê; haú má, ngaùbyi ngaùnhap eq zuì kyik kyik shoq hpuzô nyì kôrâ nghut lhê. 43Haú hkûn, díngmán bang gi, yhángmòq Yhâng wâ é mîngdán má buì su dùq bó nyî kôrâ nghut lhê. Nohkyap dàp sû gi, gyô yù sháng gàq.

Haq Tô É Sùtzè Dangtú

44Mauhkûng mîngdán gi, yò má haq tô é sùtzè eq wuí ri. Sùtzè haú lé myang é sû gi, haú lé saî haq to mù, gabú myìt èq taû ló luî, yhang wó é bànshoq lé ûng pyám mù, yò haú lé wui yu ri.

45Dum, mauhkûng mîngdán gi, réng é palhé lé châng ho wún é wuìloq kut sû eq wuí ri. 46Yhang gi, gyai hpaû é palhé lé myàng jáng, yhang wó é bànshoq lé ló ûng pyám mù, haú lé wui yu ri.

Gùn Lé Dangtú Yu É Hkyô

47Mauhkûng mîngdán gi, nhông má, ngozo ajà jà lé wó dú nghop yu é gùn eq le wuí ri. 48Gùn haú má ngozo byíng jáng, ngo kóng bang gi, wuì yàm má she htoq yû mù, zung to luî, ge é pé lé gi, ngo-pyap má gùq kat yû luî, a ge é pé lé gi, dú pyâm akô. 49Haû eq rajung za, mingkan htûm é ahkyíng má le, maumang lagyô pé gi, gyó lé lô mù, agè ashop é bang lé, díngmán bâng chyáng mai gam htoq yû luî, 50ngaùbyi ngaùnhap eq zuì kyik kyik shoq hpuzô nyì râ nghut é, gyúng nyi é myibung hkyûng hkaû má dú kat pyám kôrâ nghut lhê.

51Shí hkyô bànshoq lé núngmòq sê gyo bekô lhú?” gâ ri.

Haú hkûn, yhángmòq gi, “Sê gyo bê.” ga tû taî akô nghut ri.

52Hau htâng, Yesuq gi, yhángmòq lé, “Mauhkûng mîngdán eq séng luî, mhoq yû bê é târâ sará ó nghut kôle, yhang mhoq é hkyô gi, yhûmsing é sùt-púnglhúng hkaû mai zè sik zè xau lé yu htoq é yhûmsîng hpó rayùq eq wuí ri.” ga dum taî ri.

Myìqhtoi, Myòqdong A Wó Dùt É Jang

Mrk 6:1-6; Luk 4:16-30

53Yesuq gi, dangtú haú pé lé ban taí jáng, haú jowò mai htoq e ló bê nghut ri. 54Yhang gi, Yhâng é yhummau má jé ló jáng, byu pé lé, yhángmòq é târâjong má mhoqshit ri; haú hkûn, yhángmòq gi, gyô maú byùq kôluî, “Byù shí yùq gi, hpàqchyî byéng-yá shî eq hpungwup a-tsam mó shí pé lé, hká mai wó yu é nghut lhê lhà? 55Yhang gi, làksimâ hpô é yhang zo a nghut lhú? Yhâng nû é myìng gi, Mariq gâ lhê a nghut lhú? Yhang gû pé gi, Yakuq, Yosep, Simun eq Yudaq gâ é bang a nghut kó lhú? 56Yhâng nhammó pé le, ngá-nhúng eq rahá nghut nyi lhê a nghut kó lhú? Haû su nghut le nhîng, haú pé bànshoq lé, Yhang hká mai wó yu é nghut lhê lhà?” ga myî bùm kômù, 57Yesuq lé myìt a ngón dùt bùm bekô nghut ri.

Yesuq kúm gi, yhángmòq lé, “Myìqhtoi rayùq gi, yhûmsing é yhummau eq yhûmsing é yhûm má za, myòqdong a lhaq wó wú é nghut lhê.” ga tû taî kat ri.

58Yhángmòq lùmjíng myìt a bò kô é yánmai, Yesuq gi, haú má, làklaí alhô agàn myo myo a kut shit lo nghut ri.

Voafantina amin'izao fotoana izao:

Mahte 13: znot

Asongadina

Hizara

Dika mitovy