Nùb róòm 3
3
1Nɨ́m Jwîf ndóŋ kùb ɓe kíí á ku à? Kèè lê ndɨ̀ɨ́ á kpɔ́knɨ ní? 2Nɨ́m ŋgáb ndóŋ kùb ɓe kíí á ku, á cè kpɔ́kɓànɨ. Tíí yàyè, ŋgáb ɨ́ du nùb ya ókyaye ɓwáár bɨ Mèèín ndu. 3Hȩ nùb kù mvókín Jwîf bɨ no ya du bɨ́ Mèín jə̀ŋwáá, kí ɨ́ ɓa nɨ́ hàrɨ̀nɨ Mèín jə̀ŋ ɓwáár noò ru à? 4Ɗàɓàwá! Dugɨ hȩ nɨ̀vɨ́tɨ̀b du bɨ́ tɨ́kàŋkáàŋ, á ɗúnɨ Mèín ndɨ̀ŋhá nɨ́m nóò ɗóhîn ɓe àmɨɨr, ɓetí káàtà Mèèín á wáànɨ ɨnè:
«Á ɗúnɨ kùb ɗə̀ŋhɨ̀ àmɨɨr woò nyindí wó ɓɔ̧ne ya.
Nyindí ŋgù̧ní woò a dùcè nɨ́ nyindí kùb sə̧ré dùr.»
5Duú ɓè ɓáŋhîn nɨ́m du ndɨ̀ŋniì du àm túmnɨ ɨnayâna Mèín á ɗɨ́ɗɨ̧́ɨ̧́, nɨ́m ma ɓa tànɨ i̧? Mèín nɨ ɗɨ́ɗɨ̧́ ɗàà àm ŋgə́ túmnɨ nɨ́m jábɨ́rí à? (Mɨ nyin hȩ nùb lâs nyiŋlɨ́ŋndé á.) 6Ɗàɓàwá! Ɓetí Mèín tɨ dùyè ɗɨ́ɗɨ̧́ ɗàà, ŋgə́ yè nɨ́ nɨ̀vɨ́tɨ̀b ŋgùnnɨ ɗàà.
7Ɨ́dù, duú ɓè kààŋ moò du ndɨ̀ŋnɨ ɨnayâna àmɨɨr Mèèín fó̧ɓà laŋtɨ̧ɨ̧́ àm ŋgə́ a dù ɓe mgbíhɨ́rí, kùb ma áce mɨ cɨcóm àm níì? 8Óo duú u̧, nɨ́m ma duce: «Nɨ́m ndɨ̀ŋná ɓáŋhîn ɗà nyɔ̧ɔ̧́ a fô̧ no» na tàwá ɓe ní? Nùb kù á, ŋgáb ɗúú nyìnɓáàŋnɨ ɓe ɨ́r moò, ŋgáb a tà mɨ tɨ taá u̧. Nùb kɨ́ ŋgwìn Mèèín kwá bɨ ŋgáb, á cè hàrák ɓe ŋgáb.
Nò ɗɨ́ɗɨ̧́ nɨ ɗàà
9Ɨnayâ, kí du nɨ́m nùb du Jwîf lè nɨ́m ndóóŋ nɨ́ nùb meré á hàye? Ɗàɓàwá! Mɨ túumcií ɨnayâna nùb lâs, dùgɨ̀ Jwîf, dùgɨ̀ Jwîf sé, cum ɨ́ du nɨ́ ŋgáb kɨ́ɨ́nɨ ru. 10Káàtà Mèèín á wáànɨ ɨnè:
«Nò ɗɨ́ɗɨ̧́ nɨ ɗàà, dùgɨ̀ mwi̧ ɓà rɨ,
11Nò kù nɨ ɓe kɨ̀cáàb ɗàà,
nò má jɨ̀r Mèèín nɨ ɗàà.
12Nùb lâs mbɨ́ɨ́ bɨ́ jɨ̀r nyɔ̧ɔ̧́, ŋgáb lâs ɨ́ fòb bɨ́.
Nò ndɨŋ nyɔ̧né nɨ ɗàà dùgɨ̀ mwi̧ ɓà rɨ.
13Ɓɔ̧ ŋgábè á nɨ́ hȩ sèè kumnîn.
Ɓɔ̧ ŋgábè á ɓɔ̧ mbáŋní,
nyindí ŋgábè ɓɔ̧ne á hȩ mɨ̀njɨ̀m nyó̧ní.
14Ɓɔ̧ ŋgábè á káá kɨ́ káá, ɓe nyindí ɓáŋhɨ́b no ɗéé.
15Ŋgáb á gurub kɔ́klîn ɓe kwíhèé nɨ̀rì.
16Yɨ́ ŋgáb ndóŋndé lâs á ɓáàŋ ɓe jábɨ́r.
17Ŋgáb bɨ àm ju ɗóóŋ ɗə̀ə̀ŋwá.
18Ju ŋgáb du dùniì, ŋgáb Mèín lùɓànɨ ɗàà.»
19Nɨ́m ɗəəŋtɨ́ nɨ́m ɓíì Mèèín du tàniì lâs, ŋgə́ tana nùb kùb du kpɔ́ɔ̀nɨ ŋgáb jə̀ŋ ɓíì Mòyíìs rɨ á, àm nò kù tɨ̀ kwaɓaye nɨ́m ŋgə́ nyinndé, ɗà àm a bì nùb lâs Mèèín tíí. 20Ɓetí nò ɓa dùnɨ Mèèín íhín nò ɗɨ́ɗɨ̧́ àm nò kɨ́ tɨ ndɨŋ nɨ́m ɓíì ta ndɨ̀ŋte nɨ ɗàà, ɓíì duɗóo nɨ àm tana nɨ̀vɨ́tè ɨnayâna ŋgə́ comtɨ́ yáá na á.
Kùb sei bɨ nò ɗɨ́ɗɨ̧́ ɓe ə́ə́m á
21Ɨ́dù ɗàrò, Mèín túumnaá nɨ́m hȩ ŋgə́ du ndɨ̀ŋnɨ nɨ́m sèì no tíí nùb ɗɨ́ɗɨ̧́ɨ̧́, nɨ àm nɨ́m jəŋ ɓíì Mòyíìs sé nɨ́m du nùb ɗɨ́ɗɨ̧́. Nɨ́m ɓíì Mòyíìs ɓe tɨ́kɨ̀nɨ́b Mèèín du tàniì á túùmnɨ àm kɨ́ àmɨɨr á. 22Mèín ndɨŋ nɨ nɨ̀vɨ́tɨ̀b sèì no tíí nùb ɗɨ́ɗɨ̧́ ɓe ə́ə́m ŋgáb ə́mne Yésù Krístùù á. Nùb ŋgə́ ndɨŋ sèì nùb ɗɨ́ɗɨ̧́ kɨ́ du bɨ nùb lâs ə́mne Krístùù á, ɓetí gɔ̀ nɨ mvókín ŋgábè no ɗàà. 23Ŋgáb lâs comtɨ́, ŋgáb lâs məmceé ju mgbíhɨ́rí Mèèín. 24Ɨ́dù Mèín ɓe nyàŋnjɔ̧̀ noò, á ndɨ̀ŋnɨ ŋgáb sèì no tíí nùb ɗɨ́ɗɨ̧́. Ŋgə́ cè tàwá ŋgáb gòm nɨ́m kù, sé cwá Yésù Krístùù ɨ́ du ŋgáb céínhó̧nɨ cumí ru. 25Mèín ya gɔkkíí Krístù satɨgàà. Cwá ŋgə́ kú kɨ́ no á ŋgə́ gamwona nùb ə́mne ŋgéé tɨ́ɨ́r cumbi ru. Ɓe ndɨ̧̀ɨ̧́ u̧nè kɨ́, Mèín yi ɗú túùmnɨ ɨnayâna ní á ɗɨ́ɗɨ̧́ na á. 26Ɓwâ yi tíí, ŋgə́ yaá ɓwê há ɗɨ́ɗɨ̧́, ŋgə́ yaá ɓe jíhɨ́r, àm kɨ́ á ŋgə́ yi du túùmnɨ nɨ̀vɨ́tɨ̀b jábɨ́r ɓe ɨ́r cuum ŋgábè ɗàà ru. Ɗàrò, ŋgə́ á há nɨ ɗɨ́ɗɨ̧́ ɓetí ŋgə́ á ɗúnɨ ní dù ɗɨ́ɗɨ̧́, ní a ndɨ̀ŋcè nùb lâs ə́mne Yésùù dùɓwê ɗɨ́ɗɨ̧́.
27Sàmàìn nɨ̀vɨ́tɨ̀b wútɨkwa síhé nɨ ɗàà, dugɨ ŋgób. Ɓetí nɨ́m du tíí nɨ jə̧̀ə̧́ ɓíhì sé, du nɨ ə́mnèé Yésùù á. 28Ɓetí nɨ́m péé nɨ́ ɨnayâna nɨ̀vɨ́tɨ̀b sei bɨ Mèèín tíí nùb ɗɨ́ɗɨ̧́ ɓe ə́ə́m á, nɨ ɓe jə̧̀ə̧́ nɨ́m ɓíì ta ndɨ̀ŋte sé. 29Kèè Mèín duhó̧ɗóo nɨ kɨ́ Jwîf bɨ á, ŋgə́ nɨ́ kɨ́ gbààŋ bɨ kwè sé ɓwê à? Ŋgə́ duɓwéeɓahá kɨ́ gbààŋ bɨ kwè lâs á. 30Ɓetí Mèín á há nɨ mwi̧ ndúk. Ŋgə́ ɓa ndɨ̀ŋnɨ Jwîf bɨ, dùgɨ̀ nùb du Jwîf séé sèì no tíí nùb ɗɨ́ɗɨ̧́ á, ɓe ə́ə́m ŋgáb du ɓe kíí. 31Kí du ɓwâ nɨ́m du ɓe ə́mní, nɨ́m pə́ nɨ́ ɓíì dùnɨ nɨ́m sam á hàye? Ɗàɓàwá! Nɨ́m ndɨŋɓacéye nɨ ɓíì sèì nɨ́m jíri á.
© 2007 Alliance Biblique du Cameroun, B.P. 1133, Cameroon