Luke 24
24
1တနင်္ဂနွေနေ့ အပါးဟင်းမတ်စောစောယာ တာဆလောင်ရက်နာ ပြင်ဆင်ပီကား အမွေးနံ့သာ ရည်ရက်အင်လာဂိုး သင်္ချိုင်းဂူယာ ထုန်လင်ကဟေ။ 2အမာရက်နာ သင်္ချိင်းဂူအဟုန်းငင် ပိတ်ပီဟေကား တလုံးဗြောင်ငင် လူးဟူးဝါနာ ဖယ်ရှားပီကအကြောင့် လင်းစန်ဗြောင်ငါ ထုန်းတုန်းဟေကား ပိုလင်ကဟေ။ 3သင်္ချိုင်းဂူတာဟုန်းငါ ဆင်ဟေကရပ် ကိုယ်တော်ယေရူက ရုပ်ခန္ဓာယင် အပိုနန်း။ 4အမှရက်နာ အဆာမီဖြစ်ဟေငါးဟေကား စဉ်းစားဂို့အလှုနန်းဖြစ်တုန်းကရပ် ရုတ်တရက် အဝတ်အဖြူ တူပီးကို့ ကိုယ်ရောင်ကိုယ်ဝါတောက်ပတုန်းဟေကား လူးနှစ်ဟူးနာ အမှာရက်ကဘေးယာဖော်ဗာ(ဖ်)ကို အမာရက်ကအနား စက်တုန်းလင်ကဟေ။ 5တာဆလောင်ရက်နာ ထိတ်လန့်တုန်လှုပ်ဂို ကဇက်ဖုန်းယာ ဒူးထောက်ဂိုး ဆာဗား(ဖ်)လင်ကဟေ။ ဆို့ဆော် အိမ်မလူးနိန်ဟူးနာ "ဆိန်းဟေကလူးရက်အင်ပီးဟေက သင်္ချိုင်းငါ အဇာရိဂို အဆက်ဆိမ်းဟေကားလူးဝင် ဗန်(ဖ်)ကိုဆုံးတုန်းကယား။ 6ကိုယ်တော်နာ မှနေရာ အငါနန်း။ အမှာနာ ဆိန်းကမှဘင်း ရှင်ပြန်ထမြောက်ကလင်နန်း။ ဂါလိလဲယာ အမာအိမ်မက်တာ ငါဒက်ဟေကအချိန်နာ နနိန်ရက်အင် အမာငါ့ပီဒက်ဟေကား သတိလှုဝန်ဂီ။ 7"လူ့သားတော်ယင် အပြစ်ဒုစရိုက်သမားရက်က လက်ထဲယာ အက်လင်ကား။ အမာရက်နာ "လူ့သားတော်"ယင် လက်ဝါးကပ် တိုင်ယာတင်ကိုး ကတိုက်လင်ကား။ ညီးင့ဒင့်ယေ့ အမှာနာ ဆုံးရက်မြောက်ဟေကရယက်အာ ရှင်ပြန်ထမြောင်လင်က" ငါးကို ငါ့ပီဒက်ဟေအရိလဲ"ငါ့ကို ငါ့လင်ကဟေ။ 8မှအခါ အိမ်မ တာဆာလောင်နာ ကိုယ်တော်ယေရှု ငါ့ပီဒက်ဟေကား သတိလှုကလင်ဂို့။ 9သင်္ချိုင်းဂူဘင်း ပြန့်က လင်ကို့ သာဝကတစ်ဆယ့်နှစ်ဦးအိမ် အယောက်ကလူးစုတ်ရက်အင် မှအကြောင်းအရာ စုတ်ရက်အင် ငါ့ဆနပ်လင်ကဟေ။ 10သာဝကရက်အင် မှအကြောင်းအရာရက်အင် ငါ့ဆနပ်ဟေက တာဆာလောင်ရက်နာ မာဂဒလမြို့သူ မေရိ၊ ယောဟန္န၊ ယာကုပ်ကအနူး(ဖ်)ဖြစ်ဟေကား မာရိအိန်း အယောက်က တာဆာလောင်အချို့ရက်ဖြစ်လင်ကဟေ။ 11သာဝကရက်နာ အိမ်မတဆလောင်ရက်က ပြိစ်တုန်းဟေကတူးရက်နာ အဓိပ္ပာယ်အငါပါ(လ်)ငါ့ကို့ ထင်ဟေအကြောင့် အမာရက်စာ အယုံကြည်ပါ(လ်)။ 12ဆိုဆော် ပေတရုနာ ရိကို သင်္ချိူင်းဂူယာကပ်လင်ကို့ အတာဟုန်းငါယူလင်ကရပ် ကိုယ်တော်ကရုပ်ခန္ဓာကိုယ်ယင် အပိုထမ်း ခန္တာကိုယ်ယင် ရစ်ပတ်ပီဟေကား အဝတ်ရက်ငါ့တုန်းကမယ် ပိုလင်ကဟေ။ မှအကြောင့် အမာစာ အိမ်မအဖြစ်အပျက်အင် အံ့ဩကို့ ကိန်းငါပြန့်လင်ကဟေ။ 13အိမ်မရယက်အာ ကိုယ်တော်ယေရူအိမ်တပည့်တော်ထဲယာက နိန်ဟူးနာ ဂျေရုဆလင်ငါဘင်း ခုနှစ်မိုင်ခန့်စန်ဟေက ဧမောက်ထိန်ငါလင်လင်ကဟေ။ 14အမှာရက်နာ ကိုယ်တော်ယေရှုအကြောင်း ဖြစ်ပျက်ဒက်ကင် အကြောင်းအရာရက်အင် ဆွေးနွေးဂို့ လင်တုန်းလင်ကဟေ။ 15အိမ်မဒေလေ ဟူးဝါအိန်းဟူးဝါ အပြန်အလှန်ဆွေးနွေးဂို့ လင်တုန်းဇမ်း ကိုယ်တော်ယေရှုနာ ချဉ်းကပ်ဗန်(ဖ်)ကို့ အမာရက်အိန်းမက်တာ လမ်းလျှောက်ဂို့ ကြွလင်ကဟေ။ 16ဘုရားရှင်နာ အမာရက်အင် ကိုယ်တော်ယင် မှတ်ကိုအလှုမား ကာစီပီကို့ အမာရက်စာ ကိုယ်တော်ယင် ပိုကယေ့ မှတ်ကိုအလှုပါ(လ်)။ 17ကိုယ်တော်ယေရှုနာ "နနိန်ရက်လင်တုန်းစမ်း အဆာမီကအကြောင်းရက်အင် ပြိစ်တုန်းဟေကယား" ငါ့ကို ကတာကရပ် အမာရက်နာ မျက်နှာညှိုးငယ်ကို့ စက်တုန်းလင်ကဟေ။ 18အမာရက်ကအထဲယာက ကလောဖငါ့ဟေက အမိန်းငါဟေကလူးနာ ကိုယ်တော်ယင် " မှရက်ပိုင်းထဲယာ ဂျေရုဆလင်မြို့ယာ အဇာရက်ဖြစ်တက်ဟေယားငါ့ဟေကား အချေးက နင်ဟူးဝါမယ်ငါဟေ"ငါ့ကို 19ကိုယ်တော်နာ "အဆာမီကအူဇာရက်ဖြစ်တက်ကယား"ငါ့ကို ကတာလင်ကရပ် အိမ်မားလူးနာ "နာဇရက်မြို့သား ကိုယ်တော်ယေရူက အဖြစ်ပျက်ရက်မယ်ဖြစ်ဟေ။ အမာနာ အံ့ဩကမီဟေကားအမူရက်အင် လိစ်တက်ကို့ ဝမ်းမြောက်ဖွယ်ရာ မင်္ဂလာသတင်းတူးယင် ဟောဆနပ်တက်ကား အရိယာသူတော်စင် တစ်ပါးဖြစ်ဟေ။ အမာကဟောပြောမူရက်အလ် တန်ခိုးအာနုဘော်ပြောင်ဟေ လူးရက်အ(လ်) အထင်ကြီးဟေ။ 20ညီးင့ဒင့်ယေ့ ငါရက်က ဂျူးပုရောဟိတ်အကြီးအကဲရက်အိမ် ခေါင်းဆောင်ရက်နာ အမင်ရိန်ဂိုး ရောမအာဏာပိုင်းရက်က တာဟူးယာအက်တက်ဟေ။ အိမ်မာအာဏာရက်နာ အမင် သေဒဏတ်အဟြန်ကအတွက် အမာနာ လက်ဝါးကပ်တိုင်ဖုံးယာ ဇေ့နက်ကို ကတိုက်စာဟင်းဟေ။ 21အမာနာ ငါရက်ကား အစ္စရေလူမျိုးအပေါင်းရက်အင် ရွေးနူတ်ကယ်ကလူးဖြစ်လင်ကငါ့ကို့ ငါရက် မျှော်လင်းပီကယေ့ အတတ်က(လ်) အိမ်မအဖြစ်ပျက်ရက်ဖြစ်ဒက်ကား သုံးရက်ကြားဒက်နန်း။ 22ညီးင့ဒင့်ယေ့ ငါရက်ကအထဲယာက တာဆာလောင်အချို့နာ အံ့ဩစရာရက် ပြိစ်တုန်းလင်ကဟေ။ အမာရက် ယက်အပင်းဟမတ်စောစောယာ သင်္ချိုင်းဂူယာ လင်ဟေကရပ် 23ကိုယ်တော်ယေရူကခန္ဓာ ကိုယ်ယင် အပိုဒက်ထမ်း ဟမန်းဒေဝါတစ်ချို့ထုန်းဗာ(ဖ်)ကို ကိုယ်တော်နာ အဆက်ပြန်ကို ဆိမ်းယင်နန်းငါ့ကို အမာရက်အင် ဗန်(ဖ်)ကို့ငါဗာ(ဖ်)ဟေငါ့ကို ငါရက်အင် ပြန်ကိုငါ့ဆနပ်ဟေ။ 24အိမ်မ အကြောင့် ငါ့ရက်ကအထဲယာက လူးအချို့ယေ့ သင်္ချိုင်းဂူယာ လင်ကိုယူဝါကရပ် အိမ်မတာဆလောင် ရက်ငါ့ဒက်ကဒေဖြစ်ကို အမာရက်အ(လ်) ကိုယ်တော်ယေရှုက ခန္ဓာကိုယ်ယင် အပိုဒက်ပါ(လ်)" ငါ့ဂို ငါ့ဆနပ်လင်ကဟေ။ 25မှနောက်အာ ကိုယ်တော်နာ အမှာရက်အင် "နနိန်ရက်အဇာကြောင့် နားအလည်ကယာ။ အရိယာသူတော်စင်ရက်က ငါ့ဟေကရက်အင် ယုံကြည်ဂါဇိစ် အဇာအတွက်ကြောင့် နောက်ကျတုန်းယာ။ 26မေရှိယာနာ အမှာကဘုန်းတန်ခိုးတော်ရက်အင် အလှုမိကထပ် ဒုက္ခဝေဒနာယင် ခံစားပိုကဟေကား အချေးကလဲ" ငါးဂို့ ငါ့လင်ကဟေ။ 27မှနောက်အာ ကိုယ်တော်နာ မောရှေအိမ် အရိယာသူတော်စင်အပေါင်းရက်က ကျမ်းရက်အာဘင်း အမာကအကြောင့်ယင် ဆနပ်ပီဒက်ကား အနက်အဓိပ္ပာယ်ယင် အိမ်မားလူးရက်အင် ရှင်းပြဆနပ်လင်ကဟေ။ 28အိမ်မနိန်ဟူးလင်တုန်းက ထိန်အနား ထုန်ဟေကရပ် ကိုယ်တော်နာ လင်းစံပြောင်ယာ ဆက်လက်ကိုလင်ကပုံစံယင် ပိုပိုကို့ 29အမာရက်နာ "စမိဆင်ဟင်းနက်ဂို့ တဗျင်းနောက်ကျတုန်နန်းဖြစ်ဂို့ ငါ့ရက်အိမ်မက်တာ တည်းခိုငင်" ငါးဂို့ ကိုယ်တော်ငင် ဖိတ်လင်ကဟေ။ မှကြောင့် ကိုယ်တော်နာ အမာရက်အိမ်မက်တာ ကိန်းအတာဟုန်း ငါ တည်းခိုကဇိစ် ဆင်လင်ကဟေ။ 30ဆာအူကဇိစ် တုန်းဟေကရပ် ကိုယ်တော်နာ တဗန်(ဖ်)ငင်အကို့ကို ဘုရားဂုဏ်တော်ယင် ချီးမွမ်းလင်ကဟေ။ တဗန်း(ဖ်)ယင်အဆိုက်ကို အိမ်မားလူးရက်ဇိစ် အီလင်ကဟေ။ 31အိမ်မကရပ် အမြင်အာရုံဖွင့်အီနက်ကို အမာရက်စာ ကိုယ်တော်ယင် မှတ်ကို့လှုလင်ကဟေ။ ညီးင့ဒင့်ယေ့ တစ်ချိန်တည်းယာမယ် ကိုယ်တော်စာ အမာရက်ကမြင်ကွင်းယာဘင်း ပျောက်ကလင် ကဟေ။ 32အိမ်မလူးရက်အ(လ်) "လင်းငါ ကိုယ်တော်နာ ငါရက်အင် ကျမ်းစာရှင်းပြဆနပ်တုန်းစမ်း ငါရက်ကစိတ်ထဲယာ အမင်ရင်းရင်းနှီးနှီးချေးဟေငါ့ကို ခံစားပိုဟေကအရိလဲ"ငါ့ကို ဟူးဝါအိမ်ဟူးဝါ ပြိစ်တုန်းလင်ကဟေ။ 33မှနောက်အာ အမာရက်စာ ချက်ချင်းရိကို ဂျေရုဆလင်မြို့ယာ ပြန့်လင်ကရပ် သာဝကတစ်ဆယ့်တစ်ယောက်ရက်နာ အယောက်ကလူးရက်အိမ်မက်တာ စုကိုတုန်းဟေကား ပိုလင်ကဟေ။ 34အိမ်မစုဝေးတုန်းကလူးအပေါင်းရက်နာ ပြန်ကိုထုန်ဗာ(ဖ်)ဟေကလူးနိန်ယင် ကိုယ်တော်ယေရူစာ ဆိန်းကမဘင်း အမှန်ဒင့် အဆက်ပြန်ကိုဆိမ်းယင်နန်း ရှိမုန်ယင် ဖူးမြင်ခွင့်အီဒက်က အကြောင်းယင် ငါ့ဆနပ်လင်ကဟေ။ 35အိမ်မအခါ ဧမောက်ထိန်ငါဘင်း လူးနိန်ဟူးယေ့ လင်းငါ အမာရက်ကြုံဒက်ပိုဟေကရက်အိမ် တဗန်း(ဖ်)ယင် အဆိုက်နက်ကရပ် ကိုယ်တော်ယေရူ ဖြစ်ကြောင်းယင် အမာရက်ချေးလင်ကပုံယင် ငါ့ဆနပ်လင်ကဟေ။ 36အတတ်ကဒေလေ တပည့်တော်ရက်နာ အိမ်မအကြောင်းအရာ အဖြစ်အပျက်ရက်အင် ငှားတုန်းကရပ်ဒင့် ကိုယ်တော်နာ အမာရက်ကအလယ်ယာ ကိုယ်ထင်ဆနပ်ကိုး အမာရက်အင် " ဘုရားရှင်နာ နနိန်ရက်အင် ငြိမ်းချမ်းမူအင် အီလင်ပါစေ" ငါးဂို့ ငါ့ဆနပ်လင်ဟေ။ 37ညီးင့ဒင့်ယေ့ တပည့်တော်ရက်နာ တစ္ဆေယင်ပိုတုန်းပိုဟေငါ့ကို ထင်မှတ်ကို အစက်လင်ကဟေ။ 38ဆို့ဆော် ကိုယ်တော်ယေရှုနာ "နနိန်ရက် အဇာရိဂိုး အစက်တုန်းကယာ။ အဇားရိဂို ယုံမှားသံသယဆင်တုန်းကယာ။ 39ငါကတာဟူး၊ အတာရက် ယူငင်း။ ငင်ထိယူယင်း၊ ဟမန်ရက်ကား အဆန်ရက် အမှာရာရက် အငါပါ(လ်)။ ငါကက(လ်) နနိန်ရက်ပိုဟေကားအတိုင်း အဆန်ရက်၊ အမှာရာရက် ငါဟေ။" ငါးဂို ငါ့လင်ကဟေ။ 40အိမ်မဒေလေငါ့ဂို အမာကတာဟူး အတာရက်အာငါ့ဟေကား ဒဏ်ရာရက်အင် ဆနပ်လင်ကဟေ။ 41တပည့်တော်ရက်အ(လ်) တဗျင်းဝမ်းမြောက်ဝမ်းသာဂိုး အယုံကြည်လှုဇာရောက် မှ အံ့ဩတုန်းလင်ကဟေ။ ကိုယ်တော်ယေရှုနာ အမာရက်အင် "ဆာကဇတ် ဆူဝါးပါဆာငါဟေလဲ" ငါးဂို့ ကတာလင်ကဟေ။ 42အိမ်မအခါ အမာရက်စာ တာနာကင်တစ်ပိုင်းငင် အီနက်ကရပ် 43ကိုယ်တော် နာ အမှာရက်ကရှေ့ယာဆာနပ်ကဟေ။ 44ကျီးကအိမ် ကိုယ်တော်ယေရှုနာ "မောရှေကပညတ်ကျမ်း၊ အရိယာသူတော်စင်ရက်ကကျမ်းအိမ်၊ ဆာလံကျမ်းရက်အာ ငါကအကြောင်းငင် ဖေါ်ပြပီးဟေကအတိုင်း အမှန်တကယ်ဖြစ်လင်ကငါ့ဂို့ နနိန်ရက်အင် ငါငါ့ဆနပ်ဒက်ကအကြောင်းအရာရက်နာ မှအဖြစ်အပျက် ရက်မယ်ဖြစ်ဟေ"ငါ့ကို ငါ့လင်ကဟေ။ 45မှနောက်အာ ကျမ်းစာယင် နားလည်ဇိစ်ကအတွက် ကိုယ်တော်နာ တပည့်တော်ရက်အင် ဆုံးမကိုအီလင်ကဟေ။ 46မှနောက်အာ အမာရက်အင် " ကျမ်းစာရက်အာ ကယ်တင်ရှင်မေရှိယနာ ဆင်းရဲဒုက္ခရက်အင် ခံစားပိုကို့ သုံးရက်မြောက်ဟေကရယက် အာ ဆိန်းကမဘင်း အဆက်ပြန်ကို့ဆိမ်းလင်ကား။ 47နောင်တတရားအိမ် အပြစ်ဒုစရိုက်ရက်ကအတွက် ခွင့်လွတ်ကလှုကအတွက် ဂျေရုဆလင်မြို့ယာဘင်းစကို လူမျိုးအပေါင်းရက်အင် ဟောဆနပ်လင်ကား ငါ့ကို ဆနပ်ပီဟေ။ 48မှအကြောင့် နနိန်ရက်အ(လ်) မှအဖြစ်ပျက်စုတ်ရက်ကအတွက် သက်သေရက် ဖြစ်ဟေ။ 49ငါနာ ငါကအဗာ(ဖ်)အီပီးဒက်ဟေကားကတိအတိုင်း နနိန်ရက်ကမား ဉာဏ်အလင်းတော် ယင် ဖြောက်နက်အန်ကား။ မှအကြောင့် နနိန်ရက်နာ ရွှေမြို့တော်ယာဘင်း တန်ခိုးတော်အီပီဒက်က အချိန်ထိ ဂျေရုဆလင်မြို့ယာ စောင်တုန်းငင်" ငါးဂို ငါ့လင်ကဟေ။ 50မှနောက်အာ ကိုယ်တော်ယေရှုနာ တပည့်တော်ရက်အင်အော်ဂို့ 'ဗေသနိ' မြို့အပြင်တစ်နေရာ ကြွလင်ကဟေ။ အိမ်မနေရာထုန်ဟေကအခါ တပည့်တော်ဆန်းစူရက်ကအတွက် တဟူးဝါးမြှောက်ကိုး ကောင်းချီးအီလင်ကဟေ။ 51မှနောက်အာ ကိုယ်တော်ယေရှုနာ နိဗ္ဗာန်ရွှေမြို့တော်ယာ ကြွလင်ဂါဟေ။ 52တပည့်တော်ရက်နာ ကိုယ်တော်ယေရှုယင် ပုတ်ကို့ဆာဗား(ဖ်)ကျီးကရပ် ရွှင်လန်းဝမ်းမြောက်ဂို့ ဂျေရုဆလင်မြို့ယာ ပြန်းလင်ကဟေ။ 53အမာရက်စာ ဂျေရုဆလင်မြို့ယာ ထုန်ဟေကအခါ ဗိမာန်တော်ယာ ဘုရားရှင်ကဂုဏ်တော်အပေါင်းငင် အမြဲမပြတ် ချီးမွမ်းဂိုတုန်းလင်ကဟေ။
Voafantina amin'izao fotoana izao:
Luke 24: ttpv-rv
Asongadina
Hizara
Mampitaha
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
This translation of the Thet Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
