Mărko 3

Bija Acukhò thĭ Dòkhò̆b́è Dèbwè

(Mattĕo 12.9-14; Lŭka 6.6-11)

1Kîd́ò̆ Jezŭ lenī d́ŏ Sinagŏgā abu tapla be. Kî bija acukhò thĭ dòkhò̆ dèbwè ògè d́ŏ nu. 2Kî cè tòcò tcai Jezŭ, b́eḿĕ Zè gè̄ mèhmage bija Munisòd́è̆ nu d́ō zî kî̄ phîbò̄ dèkèḿè Zo kho nu. 3Jezŭ d́ògè bija acuthĭ dòkhò̆ dèbwè nu, “Sò̆hto ò d́ŏ athaklăḿè̆bŭ jo.”

4Mèhwă Cè d́è̆gè bija tòcò, “Munisòd́è̆ nu amò mè ḿîgè mè dè aè ā? Ḿî dèkî̆kkè ā? Mèhlô̆hta dè atha ā? Mèthĭmèhlè̆mè̄ dè ā?”

Barasă cè tòcò òzòlò tèpwè lò. 5Za tca khwèb́a hwă bija d́ŏ dèthèhtè abu d́ō, co othagè d́ŏ cè tòcò atha agādŭ khi akhoacè̆, Cò d́ògè bija acuthĭ dèbwè, “Tad́ăhta nu cukhò.” Ca tad́ăhta zu cukhò kî aège danā lò. 6Pharizè̆pho tòcò hèhtadanā akhlŏ kî d́ò̆saigè Èrŏdè abija tòcò cab́ô̆htè zè gè̄ mèkè̆b́è Jezŭ cadè̄ cadè̄ nu.

Bija Aboahò Lôkô Jezŭ Ale

7Jezŭ kî zo bōhmubicè tòcò geb́age d́ŏ pèllèwe dòkhò̆, kî bija aboahò aò d́ŏ Galilĕage, Judĕage 8kî Jerŭsalèm u abu tòcò, Idumĕage kî Jòrdăno gòlò̄wē tòcò lôkôgè ze le. Kî bija aò d́ŏ Tĭro kî Sidŏna U tòcò thîhè̆b́è Jezŭ adèphîdèmè tòcò d́ō ze lehtîgè lōwa. 9Jezŭ hmèlagè Zo bōhmubicè tòcò kò̄ òi dòlò khlĭ dokho. Manè̄, bija aboahò òè akhoacè̆ Cè b́èhjŏ kî za gā sathîńî lōwa. 10Jezŭ mèhmage bija òèòò akhoacè̆ ada hma ńò tòcò thaè tòb́è tèpwè Cè. 11Dèscidèhnè ada tcă ńò tòcò tcahtîgè Cè d́ō gò̄la b́îtèd́è Cò hlò̆mò̄ kî kèwohta, “Nî ḿî Kib́ĭcè apho.”

12Jezŭ hmèlad́îd́ă tèpwè cè tòcò cab́ô̆htè Zè gè̄ dè hè d́òibò̄ htè Jezŭ ḿî bò̄bwè nu.

Dèrôhta Bōhmubicè Scigībwè

(Mattĕo 10.1-4; Lŭka 6.12-16)

13Jezŭ hta hwă khòlò̆kho d́ō Zo jo ladēplo bija htè Zo rôhtagè tòcò nu. 14Zo rôhta bōhmubicè scigībwè cab́ô̆ agè̄ hè òkô Ca kă kî Zo gō thodŏlebò̄ lōwa tòcò agè̄ hè d́òŭd́ò̆sa dè nu. 15Ci ilagè lōwa aphlŭathere agā hna hèhtakè̆ dèscidèhnè tòcò nu.

16Bija ajo tòcò ḿî Simŏnè, htè za htăge lōwa ami Petru, 17Zebedi apho Zăkomo, kî cî ṕîkò̆ Zowănnī, htè Za htăge lōwa ami Boaneges, ahtabohtab́ă ḿî “hlăpho”; 18Andrĕa, Philĭpo, Bartolomĕo, Mattĕo, Tomăzo, Alphĕu apho Zăkomo, Thadĕo, Simŏnè Kananĕopho; 19kî Jŭdas Iskariŏta htè ahô̆lăgè Cè dèbwè nu.

Jezŭ kî Bilzabŭba

(Mattĕo 12.22-32; Lŭka 11.14-23; 12.10)

20Mèhwă Jezŭ legè d́ŏ hi dawa nu. Kîd́ò̆ bija aboahò ladēplo d́ò̆ tapla be htô̆kî bōhmubicè tòcò ta a tò ò̆khlu ńò nu. 21B́ĕ khwĭkhò̆ tòcò thîhè̆b́è dè ajo d́ō, le òkôgè Jezŭ akă, manè̄ kòd́òdo dō, bija d́ò cè, “Zu blu htŏ” akhoacè̆ nu.

22Kî Skrĭbāpho htè aò d́ŏ Jerŭsalèm u kî ala tòcò d́ò, “Dèhnè Bilzabŭba ò Zî hîklè̆. Kî Za hna hèhtaphlòḿĭ dèhnè d́ŏ dèscidèhnè asaphra ami abu nu.”

23Zo jo ladēplo hwă lōwa tòcò d́ō, cò d́ò̆sagè lōwa tòcò dègèlè dèdè̆, “Sătana gā hna hèphlòḿĭ za Sătana cadè̄? 24Htĭge dege gē bēpha ma ane d́ō, akò̄ òhmeòglo kèhtad́ò̆ cadè̄? 25Hi dawa abu lò, dèbēpha kò̄ ò ma d́ō, atò òhmeòglo kèhta mè ńò. 26Sătana gā htad́ĕd́ò dò̆ ma ane d́ō, cè kè̄ b́è bēpha kî zò dò sò̆hto ò kèhta mè ńò. Zi htĭ ze ge gū kŭdu tèpwè.

27“Bija de lenī kèhta mè akhob́ăădo dèbwè ahi kî ăwūăthèphlè cè ńò. Ḿî cè b́ècŏb́ègjî̄ ŭsu lōwa hwă khaĺè kā ăwūni zakò̆.

28“Jò dò̆sa thĭ adî̄ahma, bija tòcò adèkhòwè kî ze dèjî̄b́è htad́ĕd́ò Kib́ĭcè kè̄ b́è dèb́ahlô̆ lŏ tèpwè. 29Barasă bija ad́òkè̆d́òôgè Spirito Tcahtĭ tòcò nu, di nib́è za dèkhòwè adèb́ăplè ńò. Manè̄, zè dèkèḿè nu alahtŭlablo lò.” 30Manè̄, bija tòcò d́ògè Cè, “Dèscidèhnè acîpô ògè Zî hîklè̆.”

Jezŭ Amo kî Athè̆buwe Tòcò

(Mattĕo 12.46-50; Lŭka 8.19-21)

31Jezŭ amo kî athè̆buwe tòcò le kî sò̆htoògè d́ŏ akhlŏ nu, hnagè bija gē lejo ni cè lōwa. 32B́ĕnu bija aboahò sańă khwèb́agè Cè d́ō, Cò d́ò lōwa, “Tcabò̄, No Mo kî Nè thè̆buwe tòcò ò d́ŏ akhlŏ nu kî za wācăhlè Nè.”

33Jezŭ d́òge cè tòcò alī, “Jo Mo kî Jè thè̆buwe tòcò ḿî bò̄bwè?”

34Za tcawè̄ hwă bija aboahò awe khwè̆b́a Cè tòcò d́ō, cò d́ò, “Tcabò̄ Jo Mo kî Jè thè̆buwe tòcò jo. 35Gajă bija amèkô Kib́ĭcè adèthaèni akă dèbwè nu, zi ḿî tèpwè Jè thè̆buwe kî Jo Mo lò.”

Voafantina amin'izao fotoana izao:

Mărko 3: GRNT21

Asongadina

Hizara

Dika mitovy

Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra

Geba Roman New Testament © Bible Society of Myanmar, 2021.

Hahafantatra misimisy kokoa momba ny Geba Roman New Testament