रोमियों 7

ब्याव को उदारण

1हो मारा भायाँ, थाँ तो जाणो हो के, मूँ वाँने केवूँ हूँ ज्यो नेमाने जाणे हे के, जद्याँ तईं मनक जीवतो रेवे हे तद्याँ तईं वींपे नेमा को हक रेवे हे। 2जस्यान के एक ब्याव किदी तकी लुगई ब्याव का नेमा का जस्यान आपणाँ धणी का हाते वींके जीवतो रेवा तईं बन्धन में बन्दी तकी हे, यद्याँ वींको धणी मर जावे तो, वाँ ब्याव का हाराई नेमाऊँ आजाद वे जावे हे। 3यद्याँ वाँ आपणाँ धणी का जीवता रेताई कणी दूजाँ मनक का हाते वेवार करले, तो वाँ कुकरमी केवावे हे पण यद्याँ वींको धणी मरी जावे तो, ब्याव का नेम वींपे लागू ने वेवे हे अन पछे यद्याँ वाँ कणी दूजो का हाते नातो करले, तद्याँ भी वाँ कुकरमी ने केवावे हे।

4हो मारा भायाँ हुणो, मसी की देहऊँ थाँ भी मूसा का नेमा का वाते मरग्या हो। तो अबे थाँ कणी दूजाऊँ जुड़ सको हो, वणीऊँ जिंने मरिया तकाऊँ पाछो जीवतो किदो हे। जणीऊँ आपाँ परमेसर का वाते फला फूला। 5काँके जद्याँ आपाँ मनकाँ का हाव-भाव का जस्यान जीरिया हा, तो आपणी पापऊँ भरी मरजी ज्या नेमाऊँ अई ही, वाँ आपणाँ अंगा में काम करबा लागगी। जणीऊँ आपणो अंत मोत वेवे, 6पण अबे आपाँने नेमाऊँ छुटकारो मलग्यो हे। काँके जणा नेमा को आपणाँ पे हक हो, वींका वाते आपाँ मरग्या हा। ताँके पुराणा लिक्या तका नेमाऊँ ने, पण आत्मा की नुवी रितऊँ परमेसर की सेवा करा।

नेम अन पाप

7 # निर 20:17; वे.वि 5:21 तो आपाँ कई केवाँ? कई नेम पाप हे? कदी ने हे। काँके यद्याँ नेम ने वेता तो मूँ जाण ने पातो के, पाप कई वेवे हे? यद्याँ नेम ने बताता के, लोब मती करो, तो हाँची में मूँ जाणीई ने पातो के, लोब कई हे? 8पण मोको मलताई पाप नेमा को नफो उठान मारा मयने हरेक तरियाँ को लोब नाक दिदो। नेम ने वेबाऊँ पाप तो मरियो तको हे। 9एक टेम ही, जद्याँ मूँ बना नेमा के जीवतो हो, पण जद्याँ आदेस आया तो पाप जीवग्यो अन मूँ मरग्यो। 10अन मने पतो पड़ग्यो के, वो आदेस ज्यो जीवन देबा वाते हो, मारा वाते मोत लायो। 11#उत्प 3:13काँके पाप ने मोको मलग्यो अन वणी वीं आदेसऊँ मने भरमायो अन वणीऊँस मने मार नाक्यो।

12ईं वाते वीं नेम पुवितर हे, अन आदेस पवितर, धरमी अन सई हे। 13तो पछे ईंको कई मतलब व्यो के, ज्यो सई हे वोईस मारी मोत की मस व्यो? हाँची में ने। पण पाप वीं हव आदेस का जरिये मारी मोत को कारण ईं वाते बण्यो के, पाप ने ओळक्यो जा सके। ताँके नेमा का आदेस का जरिये वो पाप ओरी हेलो पाप बड़ग्यो।

मन की लड़ई

14काँके आपाँ जाणा हा, नेम आत्मिक हे, पण मूँ हाड़क्या माँस को मनक हूँ ज्यो पाप की गुलामी करबा का वाते वक्यो तको हे। 15#गला 5:17में ने जाणूँ हूँ के, मूँ कई कररियो हूँ काँके मूँ ज्यो करणो छावूँ हूँ वो ने करूँ पण मूँ वो करूँ हूँ, जणीऊँ मूँ घरणा करूँ हूँ। 16अन यद्याँ मूँ वोईस करूँ हूँ ज्यो मूँ ने करणो छारियो हूँ। तो मूँ मान हूँ के, नेम सई हे। 17पण हाँची में मूँ वो ने हूँ, ज्यो यो हारोई कररियो हूँ, पण पाप मारा में वस्यो तको हे, वोईस यो करे हे। 18हाँ, मूँ जाणूँ हूँ के, मारा पापी देह में कुई भी हव चीज वास ने करे हे। भलई करबा की मरजी तो मारा मयने हे पण भला का काम माराऊँ ने वेवे हे। 19काँके ज्यो हव काम मूँ करणो छावूँ हूँ वीं तो मूँ ने करूँ पण जतरा बुरा काम मूँ ने करणो छावूँ, मूँ वींइस करतो रेऊँ हूँ। 20अन यद्याँ मूँ वीं काम करूँ हूँ ज्यो मूँ करणो ने छावूँ तो हाँची में वाँने करबावाळो मूँ ने हूँ, पण पाप हे, ज्यो मारा मयने वास करे हे।

21ईं वाते मूँ ओ नेम पावूँ हूँ के, मूँ जद्याँ भी हव करणो छावूँ, तो मूँ मारा में बुरई पावूँ हूँ। 22काँके मूँ मारी अंतर-आत्मा का मयने तो परमेसर का नेमाऊँ घणो राजी रेवूँ हूँ। 23पण मूँ मारी देह में एक दूजाँ नेमा ने काम करता देकूँ हूँ जीं मारा मन का नेमाऊँ लड़े हे अन मने पाप का नेमा में बन्दी बणा लेवे हे। ईं नेम मारी देह में काम करे हे। 24मूँ एक अभागो मनक हूँ। मने अणी मोत की देहऊँ कूण छुटकारो देवाड़ी? 25मूँ आपणाँ परबू ईसू मसीऊँ परमेसर को धन्नेवाद करूँ हूँ। काँके मूँ ईं हाड़क्या माँस की देह में पाप को दास हूँ, पण मूँ मारी अकलऊँ परमेसर का नेमा को दास हूँ।

Voafantina amin'izao fotoana izao:

रोमियों 7: एम टी आर

Asongadina

Hizara

Dika mitovy

Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra

Hahafantatra misimisy kokoa momba ny नुवो नेम (मेवड़ी नया नियम)