लूका 3

बतिस्मो देबावाळा यहुन्ना को परच्यार

(मत्ती 3:1–12; मरकुस 1:1–18; यहुन्ना 1:19–28)

1दरबार केसर तिबिरियस का राज को पन्दरवा वर में पुन्तियुस पिलातुस यहूदा परदेस को राजपाल हो। हेरोदेस गलील परदेस को हाकम हो। अन वींको भई फिलिपुस इतुरिया अन त्रखोनितिस परदेस को हाकम हो अन लिसानियास अबिलेने परदेस को हाकम हो। 2अन हन्ना अन केफा मोटो याजक हा, वणी टेम परमेसर को बचन हुन्ना काँकड़ में जकरय्या का बेटा यहुन्ना का नके पूग्यो। 3तद्याँ यहुन्नो यरदन नंदी का अड़े-भड़े का नगराँ में ग्यो अन परच्यार करबा लागो के, “पापऊँ मन फेरो अन बतिस्मो लो जणीऊँ परमेसर थाँका पाप माप करी।” 4#यसा 40:3–5जस्यान के, परमेसर का आड़ीऊँ बोलबावाळा यसाया की किताब में लिक्यो हे के,

“हुन्ना काँकड़ में एक बोलबावाळा को हाको हुणारियो हो के,

‘परबू को गेलो त्यार करो

अन वींकी हड़क हुदी करो

5हरेक घाट्याँ ने भर दिदी जाई

अन हाराई मंगरा-मंगरिया ने हिदा कर दिदा जाई।

जीं वाँका हे, वी हूँदा अन ज्यो उबड़-खाबड़ हे, वीं हम्मा किदा जाई।

6अन हाराई मनक परमेसर की मुगती ने देकी।’”

7 # मत्ती 12:34; 23:33 ज्या मनकाँ की भीड़ यहुन्ना का नके बतिस्मो लेबा ने अई वाँकाऊँ वणी क्यो, “ओ, हाँप का बच्या। थाँने कणी हेंचेत कर दिदा हे के, थाँ परमेसर की आबावाळी रीसऊँ बंच निकळो? 8#यहु 8:33थाँको वेवार अस्यो वेणो छावे के, थाँ मन फेर लिदो हे। थाँ आपणाँ-आपणाँ मना में यो मती होचो के, ‘आपीं अबराम का बंस का हा।’ मूँ थाँकाऊँ केऊँ हूँ के, परमेसर अणा भाटाऊँ अबराम का वाते ओलाद जण सके हे। 9#मत्ती 7:19अबे रूँकड़ा की जड़ा काटबा का वाते कराड़ो मेल्यो ग्यो हे। जीं रूँकड़ा हव फळ ने देई वाँने काट्या जाई अन वादी में नाक दिदो जाई।”

10जद्याँ लोगाँ वणीऊँ पूँछ्यो के, “अबे माँने कई करणो छावे?”

11यहुन्ने वणाऊँ क्यो, “जिंका नके दो कुरता हे एक जिंका नके ने हे, वींने दे देवे अन जिंका नके खाणो हे वीं भी अस्यानीस करे।”

12 # लूका 7:29 लगान लेबावाळा भी वींका नके बतिस्मा लेबा आया। वणा यहुन्नाऊँ क्यो, “हो गरुजी, माँ कई कराँ?”

13यहुन्ने वणाऊँ क्यो, “ते किदा तकाऊँ लगानऊँ हेलो मती लेज्यो।”

14कुई अदिकारियाँ यहुन्नाऊँ क्यो, “माँ कई करा?”

यहुन्ने वणाऊँ क्यो, “किंका नकेऊँ भी ज्योर-जुलमऊँ रिप्या मती लो। अन नेई किंपे जूटो आरोप लगावो। थाँ आपणी तनकाऊँ सन्तोक राको।”

15मनक मसी के आबा की वाट नाळरिया हा अन यहुन्ना का बारा में होचबा लागा के, “कटे योईस तो मसी ने हे।” 16यहुन्ने वणाऊँ क्यो, “मूँ तो थाँने पाणीऊँ बतिस्मा देरियो हूँ। पण, ज्यो आबावाळो हे, वो माराऊँ घणो ज्योरावर हे। मूँ वींके अतरोक लायक भी ने हूँ के, वींकी पंगरख्या ने खोल सकूँ। वी पुवितर आत्मा अन वादीऊँ थाँने बतिस्मो देई। 17वींको छाणो वींका हाताँ में हे अन वो आपणाँ खळा ने हव तरियाऊँ साप करी। वो धान ने बकारी में नाकी पण, डन्कळ्याँने कदी ने बजबा वाळी वादी में बाळ देई।” 18अस्यान वो नरी तरियाऊँ वणा मनकाँ ने हमजान हव हमच्यार हूणातो हो।

19 # मत्ती 14:3,4; मर 6:17,18 हेरोदेस आपणाँ भई की लुगई हेरोदियासऊँ ब्याव कर लिदो अन ईंके अलावा नरई बुरो काम किदा। ईं वाते यहुन्ने वींने तापड़्यो, 20तो हेरोदेस वणाऊँ भी हेलो बुरो काम किदो के, यहुन्ना ने पकड़न जेळ में नाक दिदो।

ईसू को बतिस्मो

(मत्ती 3:13–17; मरकुस 1:9–11)

21अणीऊँ पेल्याँ जद्याँ हाराई मनक यहुन्नाऊँ बतिस्मा लेरिया हा। तद्याँ ईसू भी बतिस्मो लिदो। जद्याँ ईसू परातना कररिया हा, तद्याँ आकास खुलग्यो। 22#उत्प 22:2; भज 2:7; यसा 42:1; मत्ती 3:17; मर 1:11; लूका 9:35अन पुवितर आत्मा परेवड़ा का जस्यान रूप में आन वाँका ऊपरे उतरी। अन आकासवाणी वींके, “थूँ मारो लाड़लो पूत हे, मूँ थाँराऊँ घणो राजी हूँ।”

ईसू को खानदान

(मत्ती 1:1–17)

23जद्याँ ईसू खुद की सेवा सरू किदी तद्याँ वीं तीस वर का हा। अन मनक अस्यान होचता के, वो युसुप को बेटो हे। युसुप एली को बेटा हे। 24अन एली ज्यो मतात को, मतात ज्यो लेवी को, लेवी मलकी को, मलकी यन्ना को, यन्ना युसुप को, 25युसुप मतियाह को, मतियाह आमोस को, आमोस नहूँम को, नहूँम असल्याह को, असल्याह नोगह को, 26नोगह मात को, मात मतियाह को, मतियाह सिमी को, सिमी योसेख को, योसेख योदाह को, 27योदाह योनान को, योनान रेसा को, रेसा जरुब्बाबेल को, जरुब्बाबेल सलतियेल को, सलतियेल नेरी को, 28नेरी मलकी को, मलकी अद्दी को, अद्दी कोसाम को, कोसाम इलमोदाम को, इलमोदाम एर को, 29एर यहोसु को, यहोसु एलीएजर को, एलीएजर योरिम को, योरिम मतात को, मतात लेवी को। 30लेवी समोन को, समोन यहूदा को, यहूदा युसुप को, युसुप योनान को, योनान एल्याकिम को। 31एल्याकिम मलेयाह को, मलेयाह मिन्ना को, मिन्ना मतात को, मतात नातान को, नातान दाऊद को। 32दाऊद यिसे को, यिसे ओबेद को, ओबेद बोअज को, बोअज सलमोन को, सलमोन नहसोन को, 33नहसोन अमीनादाब को, अमीनादाब आदमीन को, आदमीन अरनी को, अरनी हेस्रोन को, हेस्रोन फिरिस को, फिरिस यहूदा को, 34यहूदा याकूब को, याकूब इसाक को, इसाक अबराम को, अबराम तेरह को, तेरह नहोर को, 35नहोर सरेग को, सरेग रऊ को, रऊ फिलिग को, फिलिग एबेर को, एबेर सिलह को। 36सिलह केनान को, केनान अर्पग्यत को, अर्पग्यत सेम को, सेम नूह को, नूह लामेक को, 37लामेक मथूसलेह को, मथूसलेह हनोक को, हनोक येरेद को, येरेद मेहललेह को, मेहललेह केनान को, 38केनान एनोस को, एनोस सेत को, सेत आदम को अन आदम जिंने परमेसर रच्यो हो।

Voafantina amin'izao fotoana izao:

लूका 3: एम टी आर

Asongadina

Hizara

Dika mitovy