लूका 19

चुंगी लेबावाळो जक्कई

1जद्याँ ईसू यरीहो नगर में वेन जारिया हा। 2अन वटे जक्कई नाम को एक मनक हो, ज्यो चुंगी लेबावाळा हो अन वो घणो रिप्यावाळो हो। 3वो ईसू का दरसण करणो छावतो हो के, “वीं कस्याक दिके हे?” पण भीड़-भाड़ का मस वो देक ने सकतो हो, काँके वो ठेगणो हो। 4ईं वाते वो वाँने देकबा का वाते आगे जान एक गुलर का रूँकड़ा का ऊपरे चड़ग्यो, काँके वीं वणीस गेलाऊँ जाबावाळा हा। 5जद्याँ ईसू वणी जगाँ पूग्यो, तो ऊपरे देकन वणीऊँ क्यो, “ए जक्कई फटा-फट रेटे उतर, काँके आज मने थाँरा घर में रकणो घणो जरूरी हे।” 6वो उतावळो वेन उतरन राजी वेतो तको वाँने आपणाँ घरे लेग्यो।

7यो देकन हाराई लोग-बाग मन में बड़बड़ान केबा लागा के, “वी तो एक पापी मनक का अटे रकरियो हे।”

8जक्कई ऊबो वेन परबूऊँ क्यो, “ओ परबू जी, देको, मूँ मारी कमई को आदो हिस्सो गरीब-अनाता ने देवूँ हूँ अन यद्याँ किंको भी मन दुकान लिदो हे, तो वींने च्यार-गुणो पाछो दी देवूँ।”

9तद्याँ ईसू वणीऊँ क्यो, “आज अणी घर में छुटकारो आयो हे, काँके अणी विस्वास करन ओ बता दिदो हो के, ओ भी अबराम की ओलाद हे। 10#मत्ती 18:11मूँ मनक को पूत गमाया तका ने होदबा अन वाँने बंचाबा का वाते आयो हे।”

दस मोराँ की केणी

(मत्ती 25:14–30)

11जद्याँ वी ईं बाताँ हुणरिया हा, तो ईसू एक केणी में वाँने क्यो काँके वी यरूसलेम का नके हा अन मनक हमजता हा के, परमेसर को राज अबाणू आबावाळो हे। 12ईं वाते ईसू वाँने क्यो, “एक रिप्यावाळो मनक दूर देस परोग्यो, ताँके वो पाछो राजा वणन आवे। 13अन वणी आपणाँ नोकर-चाकर मेंऊँ दस जणा ने बलान वाँने एक-एक मोराँ दिदी अन वाँने क्यो, ‘मारे पाच्छे आबा तई थाँ लेण-देण करज्यो।’ 14पण, वींके नगर का रेवासी वणीऊँ वेर राकता हा, ईं वाते पाच्छे दूतऊँ हमच्यार खन्दायो के, ‘माँ ने छावाँ के, यो माकाँ ऊपरे राज करे।’ 15जद्याँ वो राजा को पद लेन पाछो आयो। तो कई व्यो के, वणी आपणाँ नोकर-चाकर ने बलाया, ज्याँने वणी मोराँ दिदी ही के, वणा कई लेण-देण करन कमायो। 16जद्याँ पेले नोकर आन क्यो, ‘हो मालिक थारी मोरऊँ में दस मोराँ ओरी कमई हे।’ 17वणी वींने क्यो, ‘धन्न हे हव दास, थने धन्न हे। थूँ थोड़ाक मेई विस्वास राक्यो। अबे थूँ दस ठिकाणा ऊपरे अदिकार राकी।’ 18दूजे नोकर आन क्यो, ‘हो मालिक, थारी मोरऊँ में पाँच मोराँ ओरी कमई हे।’ 19वणी वींने भी क्यो, ‘थूँ भी पाँच ठिकाणा को हाकम बणी।’ 20तीजे नोकर आन क्यो, ‘ओ मारा मालिक, थाँकी मोर या हे। जिंने में आपणी पेटी में हपई राकी ही। 21काँके मूँ थाँकाऊँ दरपतो हो। ईं वाते के, थूँ घणो गाटो मनक हे। जटे थूँ ने मेले, वटूँ थूँ ली लेवे हे। अन ज्यो थें ने वायो, वटूँ काटे हे।’ 22वणी वींने क्यो, ‘ए बुरा दास, मूँ थाराईस मुण्डाऊँ थने दोसी मानूँ हूँ। थूँ मने जाणतो हो के, मूँ गाटो मनक हूँ। जटे मूँ ने मेलू, वटूँ मूँ लेवूँ हूँ अन जटे ने वावूँ, वटूँ काटे हूँ।’ 23तो थें मारी मोर हवकारा का नके कई लेबा ने मेली के, मूँ आन ब्याज का हाते मूँळ पूँजी भी ली लेतो? 24अन ज्यो लोग-बाग नके ऊबा हा, वाकाँऊँ मालिक क्यो, ‘या मोर अणीऊँ लिलो अन जिंका नके दस मोराँ हे। वींने दिदो।’ 25वणा वींकाऊँ क्यो, ‘ओ मालिक, वींका नके तो दस मोराँ हे।’ 26#मत्ती 13:12; मर 4:25; लूका 8:18मूँ थाँकाऊँ केवूँ हूँ के, ‘जिंका नके हे, वींने ओरी दिदो जाई अन जिंका नके ने हे, वणीऊँ ज्यो भी वींका नके हे, ले लिदो जाई। 27#मत्ती 25:14–30पण, मारा वणा दसमणा ने जी ओ ने छावे हे के, मूँ वाकाँपे राज करूँ, वाँने मारा हामें लावो अन मार नाको।’ ”

यरूसलेम में राजा मसी का रूप में ईसू को परवेस

(मत्ती 21:1–11; मरकुस 11:1–11; यहुन्ना 12:12–19)

28ईं बाताँ क्या केड़े ईसू चेला का आगे-आगे यरूसलेम का आड़ी चालबा लागा। 29अन जद्याँ वी जेतुन नाम का मंगरा में बेतफगे अन बेतनियाँ का नके पूग्यो, तो वणा आपणाँ चेला मेंऊँ दो जणा ने आ बात केन खन्दाया के, 30“आगे वाळा गाम में जावो अन वणमें जाताई थाँने एक गदेड़ी को बाछरो जणी ऊपरे कुई भी कदी सवारी ने किदी वे। वो थाँने बन्दयो तको मली। वींने खोलन लावो। 31अन यद्याँ कुई थाँकाऊँ पूछे के, ‘ईंने कई लेबा ने खोलो हो’, तो वाँने अस्यान केज्यो के, ‘परबू ने ईंकी जरूत हे।’ ”

32जी अणी काम का वाते खन्दाया ग्या हा। वणा जान जस्यो वाँने क्यो हो वस्योईस वणा वटे पायो। 33जद्याँ वी गदेड़ी का बाछरा ने खोलरिया हा, तो वींके मालिक वणाऊँ पूँछ्यो, “ईं गदेड़ी का बच्या ने काँ खोलरिया हो?”

34वणा वींकाऊँ क्यो, “परबू जी के, ओ बाछरो छारियो हे।” 35पसे वीं वींने ईसू का नके लेन आया अन आपणाँ चादरा वणी बाछरा ऊपरे नाकन ईसू जी ने वींका ऊपरे बेटा दिदा। 36जद्याँ वी जारियो हा, तो मनक आपणाँ गाबा बिछाता जारिया हा।

37वो जेतुन का छापर में पूग्यो। तो भगताँ की हारी टोळी जणा वाँका परच्या आपणी आक्याँऊँ देक्या हा। वी राजी वेन ज्योरऊँ हाको करन परमेसर की बड़ई करबा लागा के, 38#भज 118:26“धन्ने हे वो राजा, जो परबू का नामऊँ आवे हे। हरग में सान्ती अन आकास में मेमा वेवे।”

39जद्याँ भीड़-भाड़ मेंऊँ कुई फरीसी ईसुऊँ केबा लागा, “ओ गरुजी, थाँका चेला ने हाका-हूक करबाऊँ रोको।”

40ईसू वींने जबाव दिदो, “मूँ थाँकाऊँ केवूँ हूँ, यद्याँ ईं छानारिया, तो ईं भाटा हाका-हूक करबा लाग जाई।”

यरूसलेम का मनकाँ का वाते ईसू को रोवणो।

41जद्याँ ईसू यरूसलेम का नके आया, तो वींने देकन वी रोबा लागा। 42अन क्यो, “कतरो, भलो वेतो के, थूँ अणा दनाँ की हव बाताँ ने ओळकतो जीं थाँरा वाते सान्ती लाती, पण, अबे भी वी थारी आक्याँऊँ ओजल हे। 43काँके वी दन थाँरा ऊपरे आई के, थाँरा दसमण एगट करन थने गेर लेई अन च्यारूँमेरऊँ थने दबाई। 44अन थने अन थाँरा छोरा-छोरी ने जी थाँरा में हे, धुळा भेळा करी अन थाँरा में भाटा पे भाटा भी ने रबा देई। काँके, थें वणी घड़ी जद्याँ परमेसर थाँरा पे दया किदी ही तो थें ने ओळकी ही।”

मन्दर में ईसू

(मत्ती 21:12–17; मरकुस 11:15–19; यहुन्ना 2:13–22)

45पसे ईसू मन्दर की चोकी में आन वोपार करबावाळा ने बारणे काड़बा लागो। 46#यसा 56:7; यर 7:11अन वणाऊँ क्यो, “लिक्यो तको हे के, ‘मारो घर परातना को घर वेई।’ पण, थाँ ईंने ‘चोरा को ठाणो’ बणा दिदो हे।” 47#लूका 21:37अन वी हरेक दन मन्दर में उपदेस दिया करता हा अन मुक्य याजकाँ, मूसा का नेमा ने हिकाबावाळा अन दाना यहूदी नेता वाँने मारबा को गेलो होदबा लागा। 48पण वाँने मारबा को कई मोको ने मल्यो, काँके हाराई मनक मन लगान वाँकी बाताँ हूणता हा।

Voafantina amin'izao fotoana izao:

लूका 19: एम टी आर

Asongadina

Hizara

Dika mitovy