थरप्या तका का काम 25

पोलुस की दरबार का हामे आपणी बात राकणी

1फेसतुस वीं देस में आयो अन तीन दन केड़े केसरियाऊँ यरूसलेम ग्यो, 2तद्याँ मोटा याजकाँ अन यहूदियाँ का मुक्य लोगाँ वींका हामे पोलुस पे लगाया ग्या दोस बताया अन वींऊँ हाता-जोड़ी करन 3अरज किदी के पोलुस ने वो यरूसलेम लावे, काँके वीं वींने गेला मेंईस मारबा की अटकळ लगा मेली ही, 4फेसतुस जवाब दिदो, “पोलुस केसरिया में रुकवाळी में हे, अन मूँ खुद भी वटे जट परो जाऊँ।” 5पछे क्यो, “थाँकामूँ थोड़ाक नेता मारा हण्डे चाले, अन यद्याँ पोलुस कई गुनो किदो वे, तो वीं वींपे दोस लगावे।”

6वटे वो नो दस दन रेन केसरिया परोग्यो, अन दूजे दन राजिपो करबावाळी गादी पे बेटन पोलुस ने वटे लाबा को हुकम दिदो। 7जद्याँ पोलुस वटे आयो तो जो यहूदी यरूसलेमऊँ आया हा, वीं वींका च्यारूँमेर ऊबा वेन जोर का घणा दोस लगाबा लागा, पण वाँने साबत ने कर सक्या। 8पण पोलुस जवाब दिदो, “ने तो में यहूदियाँ की वेवस्ता का विरोद में, ने मन्दर अन नेई रोम का माराजा का हामे कई गुनो किदो हे।”

9तद्याँ फेसतुस यहूदियाँ ने राजी करबा की वाते पोलुसऊँ क्यो, “कई थूँ छावे हे के, आपीं यरूसलेम चाला ताँके वटे थाँरा पे लगाया ग्या दोस को न्याव कराँ।”

10पोलुस क्यो, “मूँ अबाणू रोम का राजा केसर के राजिपो करबावाळी गादी का हामे ऊबो हूँ, जटेइस मारो न्याव वेणो छावे। ईं बात ने थूँ हव तरियाऊँ जाणे हे के में यहूदियाँऊँ कई खोटो ने किदो हे। 11यद्याँ में कई गुनो किदो वे अन मारबा के जस्यान काम किदो वे, तो मूँ मरवऊँ आगो-पाछो ने वेऊँ। पण जीं बाताँ को ईं मारा पे दोस लगावे हे, यद्याँ वणा मूँ कई भी बात हाँची ने वेवे तो कुई भी मने वाँका हाताँ में ने हूँप सके। मूँ केसरऊँ हाता-जोड़ी करणो छारियो हूँ।”

12तद्याँ फेसतुस मोटा मुक्याऊँ बाताँ करन जवाब दिदो, “थें केसरऊँ हाता-जोड़ी किदी हे, ईं वाते थूँ केसर नकेईस लेजायो जाई।”

राजा अग्रिपा अन बिरनीके के हामे पोलुस

13थोड़ाक दन व्या केड़े अग्रिपा अन बिरनीके फेसतुसऊँ मलबा ने केसरिया आया 14वणा ने वटे नरई दन व्या केड़े फेसतुस पोलुस का मुकदमा का बारा में वाँने बतायो, “अटे एक मनक हे, जिंने फेलिक्स केदी का रूप में छोड़न ग्यो हो, 15जद्याँ मूँ यरूसलेम में हो, तो मोटा याजकाँ अन यहूदियाँ का बुड़ा-ठाड़ा पोलुस पे दोस लगान ओ छायो के वींने दण्ड देवे। 16में वाँकाऊँ क्यो, ‘रोमियाँ में अस्या रिति-रिवाज कोयने हे के, दोस लगाया तका मनक ने वाद-विवाद करन वींने बंचबा को मोको दिदा बनाई वींने दण्ड का वाते हूँप्यो जावे।’ 17ईं वाते जद्याँ वीं अटे भेळा व्या, तो में मोड़ो ने किदो, पण दूजे दनईस न्याव की गादी पे बेटन वीं मनक ने अटे लाबा को हुकम दिदो 18जद्याँ वींपे दोस लगाबावाळा ऊबा व्या, तो वणा अस्यी खराब बाताँ को दोस ने लगायो, जस्यी मूँ हमजतो हो। 19पण वीं आपणाँ धरम की एक-दो बाताँ लेन अन ईसू नाम का कणी मनक का बारा वींऊँ माता-फोड़ी करता हा, जो मरग्यो हो पण पोलुस वींने जीवतो बतावे हे। 20मूँ होचरियो हो, के अणा बाताँ को पतो कस्यान लगऊँ, ईं वाते में वणी मनकऊँ पूँछ्यो, ‘कई थूँ थाँरा पे लागा तका दोस को राजिपो कराबा वाते यरूसलेम जाबा ने त्यार हे?’ 21पण जद्याँ पोलुस अरज किदी के मारा मुकदमा को फेसलो रोमी राजा का दरबार मेंईस वेवे, ईं वाते में हुकम दिदो के जद्याँ तईं वींने राजा का नके ने खन्दाऊँ तद्याँ तईं वींने जाप्ता में राक्यो जावे।”

22तद्याँ अग्रिपा फेसतुसऊँ क्यो, “मूँ भी वीं मनक की बाताँ ने हूणणो छारियो हूँ”,

वणी क्यो, “थूँ काले वींकी हूणी।”

23दूजे दन जद्याँ अग्रिपा अन बिरनीके, सरदारा अन नगर का खास मनकाँ का हाते गाजा-बाजा का हाते दरबार में आया, तद्याँ फेसतुस पोलुस ने अटे लाबा को हुकम दिदो। 24फेसतुस क्यो, “हो राजा अग्रिपा अन हो हंगळा लोगाँ जो अटे माँके हाते हो, थाँ ईं मनक ने देकरिया हो, जिंका बारा में यरूसलेम का अन अटे का हंगळा यहूदियाँ वींका ऊपरे दोस लगायो अन हाका-भार करन क्यो के ‘अबे ईंको जीवतो रेणो हव कोयने।’ 25पण में जाण लिदो के वणी अस्यो कई ने किदो के, वींने मारबा को हुकम देवाँ। वणी खुदईस रोमी राजा का दरबारऊँ अरज करबा वाते क्यो हो तो में वींने अटूँ खन्दाबा वाते ते किदो। 26मने वींका बारा में अस्यी कई बात ने मली के जिंने लिकीन आपणाँ दरबार रोमी राजा केसर नके खन्दऊँ। ईं वाते में वींने थाँका हामे, खासतोरऊँ थाँका हामे राजा अग्रिपा, वींने मूँ लायो हूँ के, वणीऊँ जाँच-पूँछ करे, ईंऊँ मने कई लिकवा ने मले। 27काँके कणी भी केदी ने बना पाका दोसपतर त्यार करन दरबार का हामे पेस करणो हव ने हे।”

Voafantina amin'izao fotoana izao:

थरप्या तका का काम 25: एम टी आर

Asongadina

Hizara

Dika mitovy