थरप्या तका का काम 15

यरूसलेम की सबा

1पछे थोड़ाक मनक यहूदियाँऊँ आन वाँने हिकावा लागा, “यद्याँ मूसा का रिति-रिवाजऊँ थाँको खतनो ने वेतो तो, थें बंचाया ने जाता”।#15:1 7:8 में देकज्यो 2जद्याँ पोलुस अन बरनबास वाकाँऊँ बात-बच्यार किदी अन वाँका में लड़ई वेगी, तो ओ चुण्यो के, पोलुस अन बरनबास अन वाँका मूँ थोड़ाक मनक ईं बात को फेसलो करबा का वाते आपणाँ थरप्या तका अन बड़ाबा नके यरूसलेम जाई।

3विस्वास्याँ की मण्डली का मनक वाँने खन्दाया। वीं फिनाके अन सामरिया देस में जाता तका, जो यहूदी ने हा वणा जस्यान विस्वास किदो, वो मण्डली में बताता ग्या, तो मण्डली का लोग ओ हुणन घणा राजी व्या। 4जद्याँ वीं यरूसलेम पराग्या, तो वटा की मण्डली का थरप्या तका अन बड़ाबा वाकाँऊँ घणा आणन्दऊँ मल्या अन वीं मनकाँ ने बतावा लागा के, परमेसर माकाँ लारे कस्या-कस्या काम किदा। 5पण फरीसियाँ जणा विस्वास किदो हो, वाकामूँ नरई जणा ऊबा वेन क्यो, “जो यहूदी ने हे वाँ लोगाँ ने खतनो कराणो छावे अन मूसा का नेमा को पाळन करणो छावे।” 6तद्याँ थरप्या तका अन बुड़ा-ठाड़ा मनक वीं बात पे बच्यार करबा के वाते भेळा व्या। 7#थर 10:1–43तद्याँ बात-बच्यार व्या केड़े पतरस ऊबो वेन क्यो, “हो भायाँ, थाँ जाणो हो के, नरई दन पेल्या परमेसर थाँकामूँ मने चुण्यो के, माराऊँ जो यहूदी ने हे वीं हव हमच्यार हुणन विस्वास करे। 8#थर 10:44; 2:4मन ने जानबावाळे परमेसर आपणाँ जस्यान वाकाँने भी पुवितर आत्मा देन वाँने भी अपणा लिदा। 9वणी आपाँ अन वाँका में कुई दूज-भराँत ने राकी अन वाँका पापाँ ने माप किदा काँके वणा विस्वास किदो। 10तो अबे, थाँ काँ परमेसर की परक करो के विस्वासी पे अतरो बोज नाको के, वींने ने तो आपणाँ बापदादा अन ने आपीं तोक सका। 11पण, माँ ओ विस्वास कराँ हा के, माँ परबू ईसू की करपाऊँ बंचाया ग्या हा, जस्यान के वे।”

12तद्याँ हंगळा सबा का लोग छाना-माना वेग्या अन पोलुस अन बरनबास की बाताँ हुणबा लागा, के परमेसर वाकाँऊँ जो यहूदी ने हे वाँका में कस्यान हेन्याण अन अचम्बा का काम कर दिकाया। 13जदी वीं के चुक्या, तो याकूब ऊबो वेन केबा लागो, “हो भायाँ, मारी बात हुणो, 14अबाणू थोड़ीक दाण पेल्याँ समोन ओ बतायो हे के, कस्यान परमेसर पेल्याई पेल्याँ जो यहूदी ने हे वामूँ थोड़ाक लोगाँ ने आपणाँ वाते चुणन आपणो परेम परगट किदो। 15ईं बातऊँ परमेसर का आड़ीऊँ बोलबावाळा की बात मलती-जुलती हे, जस्यान लिक्यो हे के,

16“‘ईंका केड़े मूँ पाछो आन

दाऊद का राज ने पाछो लाऊँ,

ढूँण्डा पड़्या तका ने पाच्छा बणान ऊबो करूँ,

17ईंका वाते हारी दनियाँ का लोग जो बंच्या तका हे, वीं परबू ने होदे

जो यहूदी ने हे, वाँने में बलाया हे, वे हारई मारा नके आई।

18वेईस बाताँ हे, ज्याँने मूँ पेल्याऊँ केतो आरियो हूँ।’”

19याकूब पाछो क्यो, “ईं वाते में ओ धारियो हे के, जो यहूदी ने हे, वीं परमेसर का आड़ी आवे, तो आपाँने वाँने दुक ने देणो छावे, 20#निर 34:15–17पण वाँने आपाँ ओ लिकीन खन्दावाँ के, थाँ मूरताँ पे चड़ई तकी चिजाँ ने मत खाज्यो अन कूकरमऊँ छेटी रेज्यो, गळो मरोड़िया तका को माँस ने खावो, अन लुई ने पीजो। 21सरुआतऊँ मूसा का नेमा ने हरेक सबद का दन यहूदियाँ का परातना घर में भण्यो जावे हे अन नगर-नगर में परच्यार वेतो आरियो हे।”

जो यहूदी ने हे वाँका वाते कागद

22तद्याँ थरप्या तका, बुड़ा-ठाड़ा, हंगळी विस्वास्याँ की मण्डळ्याँ के हण्डे आपणाँ मूँ थोड़ाक मनकाँ ने चुणन पोलुस अन बरनबास के हाते अन्ताक्या खन्दाबा का वाते फेसलो किदो। अन वणा भायाँ मूँ जाणिता मनक, यहूदो जो बरसबा केवावे, सिलास ने चुणन वाँका हण्डे खन्दाया। 23वाँकाणी वाँका हाते ओ लिकन खन्दायो,

“अंताकिया, सिरिया अन किलिकिया में रेबावाळा जो यहूदी ने हे, वाँ विस्वास्याँ ने थाँका भई थरप्या तका अन बड़ाबा को नमस्कार। 24माँ हुण्यो हे के, माकाँ मूँ कुई थाँका अटे आन, थाँने वाँकी बाताँऊँ घबरा दिदा अन मन ने पळट दिदा, पण माँ वाँने आग्या ने दिदी ही। 25ईं वाते माँ हंगळा भेळा वेन बात-बच्यार करन आपणाँ मूँ थोड़ाक मनकाँ ने प्यारा पोलुस अन बरनबास के हाते थाँका नके खन्दावाँ। 26ईं अस्या मनक हे, जो आपणो जीव ने परबू ईसू मसी का नाम के वाते दुक में नाक्यो हे। 27ईं वाते माँ यहूदा अन सिलास ने खन्दाईरा हा, जो आपणाँ मुण्डाऊँ ईं बाताँ के देई। 28पुवितर आत्माने अन माने बड़िया लागो के, थाँका पे जरूरी बाताँ ने छोड़न, कई ओरुँ दूजो बोज ने मेलाँ 29के थाँ मूरताँ के चड़ई तकी चिजाँ, अन गळो मरोड़िया तका को माँस ने खावो, कूकरमऊँ छेटी रेज्यो अन लुई ने पीजो। ईंऊँ थाँको भलो वेई, अबे माँ विदा लेवा।”

30पछे वीं वटूँ हिक लेन अंताकिया ग्या, अन वटे मनकाँ ने भेळा करन वो कागद वाँने दे दिदो। 31धिजो बन्दाबावाळा कागद ने भणन वाँने घणो आणन्द व्यो। 32यहूदा अन सिलास जो परमेसर का आड़ीऊँ बोलबावाळा हा, वाँने ओरी उपदेस देन वाँने धिजो बन्दान विस्वास में गाटा किदा। 33वीं वटे थोड़ाक दन रेन, वटा का मनक वाँने परेमऊँ पाच्छा जटेऊँ आया हाँ वटे खन्दा दिदा। 34(पण सिलास ने वटे रेणो बड़िया लागो।)#15:34 कुई जूनी पोत्याँ में ओ बचन ने हे।

35पण पोलुस अन बरनबास अंताकिया में रिया, अन दूजाँ मनकाँ के हाते परबू का बचन हिकाता अन हव हमच्यार को परच्यार करता रिया।

पोलुसऊँ बरनबास को अलग वेणो

36थोड़ाक दन केड़े पोलुस बरनबासऊँ क्यो “आपाँ जणी-जणी नगर में परबू को बचन हुणायो हो, वटे चाला अन देकाँ के आपणाँ वीं भई कई कररिया हे।” 37तद्याँ बरनबास यहुन्ना ने जो मरकुस केवातो हो वींने हाते लेबा को बच्यार किदो। 38#थर 13:13पोलुस वींने ले जाणो हव ने हमजो काँके मरकुस पंफुलिया नाम का नगरऊँ वाँने छोड़ दिदो अन परबू का काम का वाते वाँका लारे ने ग्यो। 39ईंऊँ अस्यी माता-फोड़ी वेगी अन वीं एक-दूजाऊँ अलग वेग्या, अन बरनबास मरकुस ने हाते लेन जाँजऊँ साइपरस परोग्यो। 40पण पोलुस सिलास ने चुण्यो, अन विस्वासी भायाँ पोलुस ने परबू की करपा में हूँप दिदो अन वीं वटूँ पराग्या। 41अन पोलुस सिरिया अन किलिकिया में जातरा करतो तको विस्वास्याँ की मण्डळ्या ने धिजो बन्दातो तको परोग्यो।

Voafantina amin'izao fotoana izao:

थरप्या तका का काम 15: एम टी आर

Asongadina

Hizara

Dika mitovy