काम 6
6
सात मदद करबाळानै टाळबो
1बा दिना म जद परमेसरनै मानबाळा बिस्वास्या की गिणती बढरी ही, जणा यूनानी रिती-रिवाजानै मानबाळा यहूदि इबरानी रिती-रिवाजानै मानबाळा यहूदिआ प बड़बड़ाबा लाग्या क म्हारी खाली होईड़ीया क सागै रोजकी बरतबाळी चिजा बाटबा म दोगलचारो होर्यो ह। 2जणा बे बारा भेजेड़ा चेला सगळा बिस्वास्यानै एक सागै बुलार बोल्या, “म्हारै ताँई ओ चोखो कोनी क म्हें परमेसर का बचन को परचार छोडर थारै ताँई खाबा-पीबा की चिजा को बाटो करां। 3इ ताँई यहूदि भाई-भाणो, थारै मऊँ थे सात चोखी पेठहाळा मिनखानै टाळल्यो जखा म पबितर आत्मा अर बुदी होवै अर बानै इ काम की जिमेदारी आपा दे देस्यां। 4अर म्हें म्हारो सगळो टेम अरदास करबा अर बचन को परचार करबा अर सीखाबा म लगास्यां।” 5भेजेड़ा चेला की आ बात सगळी बिस्वासी मंडळीनै चोखी लागी। जणा बे सतफनुस नाम का एक मिनखनै जखो बिस्वास अर पबितर आत्माऊँ भरेड़ो हो, अर फिलीप, परखोरस, निकानोर, तिमोन, परमिनास अर अंताकीया को रेह्बाळो निकोलस जखो यहूदि धरम पंथ म रळगो हो, आनै टाळ लिआ। 6अर आनै भेजेड़ा चेला क सामै लेज्यार खड़्या कर दिआ जणा बे बापै हात धर'र अरदास कर दिनी। 7अंय्यां यरूसलेम म परमेसर को बचन दिन-दिन फेलतो गयो। अर परमेसरनै मानबाळा की गिणती दिन-दिन बढती गई, अर घणकराक याजक बी ईसु प बिस्वास करबा लाग्या।
सतफनुस को पकड़्यो जाबो
8सतफनुस परमेसर की दया अर बिकाळी ताकतऊँ भरेड़ो हो अर मिनखा म बडा-बडा चमत्कार अर अचरजभर्या काम कर्या करतो हो। 9पण अजाद बिस्वासी मंडळी#6:9 अजाद बिस्वासी मंडळी ईसु का जलम क 33 साल पेली क्युंक यहूदि मिनखानै रोम नगरी म लेज्यायो गयो हो , अर बानै बेच दिओ गयो हो। इकै पाछै बानै अजादि मिली ही। नाम की एक यहूदि अरदास करबाळी झघा का क्युंक यहूदि मिनख जखा कुरेन, सिकन्दरिआ, कलिकीया नगर्याऊँ अर एसिया परदेसऊँ आएड़ा हा, बे बिकै सागै जिरै करबा लाग्या। 10पण सतफनुसनै जखी पबितर आत्मा दियड़ी ही अर जि बुदीऊँ बो बाता कर्या करतो जणा बे बिकै सामै कोनी टिक सक्या। 11जणा बे क्युंक मिनखानै बिकै खिलाप भड़कार खुवायो क, “म्हें इनै मूसा अर परमेसर की बुराई करता सुण्या हा।” 12अंय्यां कर बे यहूदि मिनखा, यहूदि नेता अर सास्तरानै सीखाबाळा का कान भर दिआ जिऊँ बे भड़कग्या अर चिड़गा अर बिनै पकड़र यहूदि पंचायत म लेग्या। 13अर बे झूठी गुवाई देर बोल्या क, “ओ मिनख सदाई पबितर मनदर अर मूसा का नेम-कायदा क खिलाप बोलै ह। 14म्हें इनै आ खेता सुण्या हा क नासरत को ईसु इ मनदरनै ढाह देसी अर मूसा का दियड़ा रिती-रिवाजानै बदल देसी।” 15जणा पंचायत म बेठ्या सगळा मिनख आपकी आँख्या बिका मुंडा प गाड दिनी अर बानै बिको मुंडो ईस्बर नगरी दुत की जंय्यां दिख्यो।
Voafantina amin'izao fotoana izao:
काम 6: एस डब्लु वी
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
(c) 2010-2017, New Life Computer Institute. All rights reserved