റോമറ് 5
5
നിമ്മ്തിയും കൂയും
1കർത്താവാഞ്ഞ ഏശുകിര്ശ്തുവീല് തെയ്‌വം നമ്മ്ക്ക് വേണ്ടി ചെയ്ഞ്ഞത് നമ്മ നമ്പീത് കൊണ്ട് നമ്മ നീതിയൊള്ള ആള്കള് ആകത്തം തെയ്‌വത്തോട നമ്മ്ക്ക് നിമ്മ്തി ഒണ്ടാകത്തം ചെയ്ഞ്ഞത്. 2ഈ പുത്തൻ പൊളപ്പ് നമ്മ്ക്ക് കിട്ടീത് അവന്റ കിറ്പയിലാണും; ഈ പുത്തൻ പൊളപ്പ്നപ്പെറ്റി നമ്മ പെര്മപ്പെടന്റത് കൊണ്ട് തെയ്‌വമകത്തത്തീല് നമ്മ പങ്ക്കാറാഞ്ഞം ഇന്റ് നമ്മ ആശിക്കന്റം. 3അത്കൊണ്ട് ആ പൊളപ്പ്നപ്പെറ്റി മാട്ട്ക്ക്മില്ല നമ്മ്ക്ക് വെന്റ പുത്തിമുട്ട്കളപ്പെറ്റി നെനച്ചം പെര്മപ്പെടണം; എന്തനിന്റെ ആ പുത്തിമുട്ട്കള് പൊറ്‌പ്പാനിക്കൊള്ള കയിവ് തെരും. 4പൊറ്പ്പ് മനക്കര്ത്തും മനക്കര്ത്ത് ആശയം തെരും. 5ആ കാത്തിര്പ്പ് നാന് നാണംകെട്ട് പോവ്നോ ഇന്റൊള്ള പേടി ഇല്ലാണ്ടിയാക്കും; ഏശു നമ്മ്ക്ക് വേണ്ടി എന്തൻ ചെയ്ഞ്ഞാര് ഇന്റ് നമ്മ നമ്പ്‌വിനിക്കി തെയ്‌വത്ത്ന്റ ശ്‌നേകം തെയ്‌വത്ത്ന്റ ഉശ്റീല് നമ്മള പൊളപ്പീല് തെരും. ആണ ഈ ശൊവാവങ്ങളൊക്ക നമ്മള പൊളപ്പ്ക്ക് വന്ത് ചേരും.
6എന്തനിന്റെ തെയ്‌വത്തീല് അണവേറ്റ് പൊളപ്പാനിക്കി പെറ്റാത്തത് കൊണ്ട് നമ്മ ശക്ക്തിയില്ലാത്താള്കളും ഒറപ്പില്ലാത്താള്കളും ആഞ്ഞപ്പൻ കിര്ശ്തു നമ്മ്ക്ക് വേണ്ടി വീന്നാര്. 7ചെലപ്പ് നീതിയൊള്ളവനാഞ്ഞ ഒരത്തന്ക്ക് വേണ്ടിയോ എന്തനീങ്കിലും നെല്ലത് ചെയ്ഞ്ഞതാഞ്ഞ ഒരത്തന്ക്ക് വേണ്ടിയോ ചാവാനിക്കി ഏവനീങ്കിലും തുനിവ്റാകും. 8ഇന്റെ നമ്മ തെറ്റ്കുറ്റം ചെയ്ഞ്ഞ് നടന്നപ്പൻ ആണും ഏശുകിര്ശ്തു നമ്മ്ക്ക് ശെല്ലി ചത്തത്; അവൻ എത്തറമാട്ട്ക്കും നമ്മള ശ്‌നേകിക്കിന്റാൻ ഇന്റ് നമ്മ്ക്ക് ഇതീല് തിക്കൊണ്ടാവാനിക്കി പെറ്റും.
9അത്കൊണ്ട് അവന്റ എലത്തത്തീല് നമ്മ നീതിയൊള്ള ആള്കള് ആഞ്ഞത്കൊണ്ട് തെയ്‌വത്ത്ന്റ മൂച്ചീനെന്റും നമ്മ രച്ചപെട്ടം ഇന്റൊള്ളത് തിട്ടമാണും. 10ഏശു നമ്മ്ക്ക് ചെയ്ഞ്ഞത് നമ്മ നമ്പന്റത്ക്ക് മുന്തി നമ്മ ഏശുവ്ന്റ ശത്ത്റ്ക്കാറാഞ്ഞം; നമ്മ അത് നമ്പീപ്പൻ നമ്മ്ക്ക് തെയ്‌വത്തോട കൂട്ടാവാനിക്കി പെറ്റീത്; അത്‌മാട്ട്ക്ക്മില്ല അവൻ ചാവീനെന്റ് നെന്റ് ഉശ്റ്‌വന്ത് എള്മ്പിയാൻ ഇന്റ് നമ്മ നമ്പിയപ്പൻ നമ്മള എപ്പന്‌മൊള്ള ചാവീനെന്റ് രച്ചപെട്‌വാനിക്കി നമ്മ്ക്ക് പെറ്റീത്. 11അത്കൊണ്ടാണും കർത്താവാഞ്ഞ ഏശുകിര്ശ്തു കാറണം നമ്മ്ക്ക് തെയ്‌വത്തോട കൂട്ടാവാനിക്കി പെറ്റീതം അവൻ നമ്മള ഉശ്റ്ന കാപ്പാത്തീത്‌നപ്പെറ്റി പെര്മപ്പെട്‌വാനിക്കി പെറ്റന്റതം.
ആതാമും കിര്ശ്തുവും
12അത് ഏണയിന്റെ ആത്തീത്തീ മന്ശ്‌നാഞ്ഞ ആതാമ് തെറ്റ്കുറ്റമം ചെയ്ഞ്ഞത് കൊണ്ടാണും ഒക്കളം തെറ്റ്കുറ്റം ചെയ്യന്റാള്കളാഞ്ഞ് ചാവീല് അമ്പട്ടത്. 13നായപ്റമാണം മന്ശൻമാര്ക്ക് കിട്ടന്റത്ക്ക് മുന്തിയേ തെറ്റ്കുറ്റം ഒലകത്തീല് ഒണ്ടാഞ്ഞ്ത്; ഇന്റെ നായപ്റമാണം അന്റ് ഇല്ലാണ്ടിയിര്ന്ന്ത് കൊണ്ട് തെറ്റ്കുറ്റത്ത്ന തെറ്റ്കുറ്റമാഞ്ഞ് എണ്ണിയില. 14ഇന്റാലും ആതാമ് തൊട്ട് തെയ്‌വത്തീനെന്റ് നായപ്റമാണം കിട്ടിയ മോശ വെരയം ഒള്ള ആള്കള്ക്ക് അവങ്ങള തെറ്റ്കുറ്റത്ത്ന തെറ്റ്കുറ്റമാഞ്ഞ് എണ്ണിയില ഇന്റാലും അവങ്ങയം ചാവാനിക്കി എടവന്ത്ത്; ആതാമ് വെര്‌വാനൊള്ളവനാഞ്ഞ ഏശുകിര്ശ്തുവ്ന്റ ഉര്‌വമാണും. 15അത് ഏണയിന്റെ ആത്തീത്തി മന്ശ്‌നാഞ്ഞ ആതാമ് തെയ്‌വനേമത്ത്ന്റ ചൊല്ല്ക്ക് നെക്കാഞ്ഞ്ത്കൊണ്ട് ഒക്കളം ചത്താര്; അത്പേലതിന്ന നമ്മളയം ചാവീനെന്റ് നെന്റ് രച്ചിപ്പാനിക്കി വേണ്ടി റണ്ടാമത്തി മന്ശ്‌നാഞ്ഞ ഏശുകിര്ശ്തുവ്ന തെയ്‌വം മനശോട തന്താര്. 16ഒര മന്ശ്‌ന്റ തെറ്റ്കുറ്റത്തനശെല്ലി നമ്മ്ക്ക് ഒക്കളക്കും ചാവ് ശിച്ച കിട്ടീത്; ഇന്റാലും മന്ശൻമാര് പെര്കീപ്പൻ തെറ്റ്കുറ്റമം പെര്കീത്. ഇത്‌ന്റ നെട്‌വീല് മന്ശചാതിക്കി ശമ്മാനമാഞ്ഞ് തെയ്‌വം ഏശുവ്ന തെരത്തം ആണ നമ്മ്ക്ക് നീതിയൊള്ള ആള്കള് ആവാനിക്കൊള്ള ഒര വെയ്യും തൊറന്ന് തന്താര്. 17എന്തനിന്റെ ഒര മന്ശ്‌ന്റ തെറ്റ്കുറ്റത്തനശെല്ലി ചാവ് ഒക്ക മന്ശൻമാരയം വായ്‌ന്റ്; ഇത് ശത്തിയം ആണിങ്ങി തെയ്‌വം ശമ്മാനമാഞ്ഞ് തന്ത നീതിയൊള്ളവനാഞ്ഞ ഏശുകിര്ശ്തു ഇന്റ് പേശന്റ ഒരത്തന ശെല്ലി ഒക്ക ആള്കളും ചാവീനെന്റ് നേടി എപ്പനെപ്പനം ഉശ്റോട ഇരപ്പാനിക്കി പെറ്റ്മിന്റൊള്ളത് എത്തറമാട്ട്ക്കും ശത്തിയമാണും. 18അത് ഏണയിന്റെ ഒര മന്ശൻ തെയ്‌വത്ത്ന്റ വാക്ക്കള് കേക്കാണ്ടിയിര്ന്നത് കൊണ്ട് നമ്മ ഒക്കളം ചാവ് ശിച്ചയില് അമ്പട്ടം; അത്പേലതിന്ന ഏശു ഇന്റ് പേശന്റ ഒരാള് തെയ്‌വത്ത്ന്റ വാക്ക്കള് കേട്ടത്കൊണ്ട് അവനീല് നമ്പിയ നമ്മ്ക്ക് ഒക്കളക്കും എപ്പനെപ്പനം പൊളപ്പാനിക്കൊള്ള ഉശ്റും കിട്ടീത്. 19അത് ഏണയിന്റെ ഒര മന്ശൻ തെയ്‌വത്ത്ന്റ വാക്ക് കേക്കാണ്ടിയിര്ന്നത് കൊണ്ട് ഒക്ക മന്ശൻമാരും തെറ്റ്കുറ്റം ചെയ്യന്റാള്കളാഞ്ഞാര്; അത്പേലതിന്ന തെയ്‌വത്ത്ന്റ വാക്ക് കേട്ട ഏശു ഇന്റ് പേശന്റ ഒരത്തന ശെല്ലി നമ്ക്കൊക്കള്ക്കും നീതിയൊള്ളവൻ ഇന്റൊള്ള പേരും കിട്ടീത്. 20അത്‌മാട്ട്ക്ക്മില്ല നായപ്റമാണം കിട്ടീപ്പൻ നമ്മള ചൊല്ല്കേടും തെറ്റ്കുറ്റമം പെര്കിപ്പെര്കി വന്ത്ത്; ഇന്റാലും തെയ്‌വം ഏശുകിര്ശ്തുവീല് നമ്മളോട അവന്റ വെലീ കിറ്പ കാട്ടിയാര്. 21അത്കൊണ്ടാണും നമ്മ ചെയ്ഞ്ഞ തെറ്റ്കുറ്റം കാറണം നമ്മ ചാവീല് അമ്പ്ട്‌വാനിക്കി എടയാഞ്ഞ്ത്; ഇന്റെ കർത്താവാഞ്ഞ ഏശുകിര്ശ്തു കിറ്പ കാട്ടീത് കൊണ്ട് നമ്മള ആ കെണിയീനെന്റ് കാപ്പാത്തി എപ്പനെപ്പന്‌മൊള്ള ഉശ്റ് കിട്ട്‌വാനിക്കി എടവന്ത്ത്.
Voafantina amin'izao fotoana izao:
റോമറ് 5: മുതുവാൻ
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© New Life Literature