Jirimaya 41
41
Katay Gidalaya
1Bè yóm deng ghituhen bulón bè yóm halay yó, lemwót Ismaél yóm ngà Nitaniya logi témê Ilisama, gdek bè Gidalaya bè Mispa mung du yóm sfolò kem tau. Nim Ismaél ni, tau semfu gu bè yó kem tau hol geta setles mogot yóm benwu Juda ne du se sotu tau tehe genlal Sidikaya. Yóm igò le mken bè gónô Gidalaya, 2lemwót Ismaél ne yóm sfolò kem tauhen tódô kento dilot le sudeng le, hnatay le Gidalaya yóm tau deng nélék yóm tau hol geta kmamal bè Babilun mò gubérnor bè Juda. 3Omin le gotu hewà bè yó ne gotu hnatay le yóm kdéen tau Israél genlal bè yó, gomong yó kem sendalù Babilun nô bè Gidalaya bè yó bè Mispa.
4Hayahen bè yó gu laan kem tau là deng temngón du yóm katay Gidalaya, 5wen wolu folò tau gdek bè yó lemwót le gu bè Sékém ne gu bè Silu ne gu bè Samarya. Yó nógów le na le e tmaba bè Gónô Dwata bè Jirusalim, lenangag le yóm deng kegbaen. Deng gotu nki le bnget le ne kensê le nes le ne hnalì le knô le. Wen halay nwit le ne insinsu mò blay le ebè Dwata. 6Kewót Ismaél bè yó bè Mispa senlongen lu igoen mkik, monen mò kul, “Hol ye slob bè gónô Gidalaya.”
7Okóm tikóng le deng gotu husek elem yóm syudad yó, tódô hnatay Ismaél lu ne tek sfolò tebel bélê le. Gotu bot le elem yóm sol gónó le gel hemyu él lówó yó kem tau deng hnatayen. 8Okóm yóm sfolò kem là matayen hkodu le bè Ismaél, mon le mò du, “Hol béem hnatay mi. Wen halay blay me kóm ne wen hnolohen ne wen tneb deng eles ten-ginof me. Sulék blay me kóm.” Tahu se, là hnatayen kul. 9Yóm sol él gónó Ismaél mbot lówó yó kem tau deng hnatayen yó koni, tehe hokol yóm tehe Asa yóm tau hol geta mò gónó le hemyu él bè yóm tehe kundugen du Baasa yóm tau hol geta bè Israél. Yóm sol él yó, tódô hennok Ismaél lówó yó kem tau deng hnatayen.
10Omin Ismaél lemwót gotu negefen yó kem ngà libun boi Sidikaya, dalang se yó kem dumu tau tebel bè yó bè Mispa, tô nwiten lu ebè benwu Amun. Ni kem tau negefen ni, hono kem tau deng hogot Nibusaradan ke Gidalaya, yóm Nibusaradan kmandér bè yó kem sendalù Babilun.
11Okóm tikóng gungol Juhanan yóm ngà Kariya logi ne yó kem dumu genlal bè yó kem sendalù mung béléen yóm deng nmò Ismaél yó, 12gotu nwit le yó kem sendalù nogot le anì ktes le lu. Ton le Ismaél bè busung Gibyun. 13Tikóng ton yó kem tau negef Ismaél Juhanan ne yó kem sendaluen, ya tey kehligal le mensag. 14Tódô kdê yó kem tau negef Ismaél lemwót bè Mispa, gotu le mlóy ebè le Juhanan anì tnóbóngen lu. 15Lemwót Ismaél ne wolu bè yó kem dumuhen gotu le mlóy etu bè benwu Amun, henlóy le Juhanan.
16Lemwót Juhanan yóm ngà Kariya logi ne yó kem genlalen, gotu nwit le lu yó kem tau deng lenwà le yó koni, kem sendalù ne kem libun ne kem ngà ne yó kem tehe genlal bè gónô bong yóm tau hol geta mogot kul. 17Gotu nwit le lu etu bè Girut-kimham, moni bè Bitlihim. Bè yó gónó le htifes mógów ebè Idyip. 18Likò le bè yó kem sendalù Babilun ke gungol le yóm deng khatay Ismaél ke Gidalaya yóm gubérnor deng nélék yóm tau hol geta kmamal bè Babilun.
Voafantina amin'izao fotoana izao:
Jirimaya 41: tbl
Asongadina
Dika mitovy
Mampitaha
Hizara
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2007, Wycliffe Bible Translators, Inc. All rights reserved.