1 करिंथ 8
8
मूर्तीलाक येक्पीचिनेद आन्नाम
1'इप्पुड मूर्तीलाक येक्पिचीने नंजुर बद्दल, दिन बद्दल मनाक आंदारकी येरका उंडाद की इदी आनिनेद माटा उंडाद; पण आदी ज्ञान मनशीन घमंडी बनाय मतुताद, तर प्रेम मंदीन विश्वासला प्रोत्साहित शेस्ताद. 2मनाक वगा माटा येरका उंडाद, येवानकी इल्ला वाटास्ताद की, वानकी येमाना येरका उंडाद पण वानकी आल्ला येरका लेद यल्ला वानकी येरका बेक. 3पण येवाडाना द्यावारमिंदा प्रेम शेस्ताड तर आ मनशीन द्यावार गुरुतु फटताड. 4दिन कसोम, मुर्तींला मुंदार येक्पिचिने माटलु तिने बद्दल मनाक येरका उंडाद की, “खरेम आंटे दुन्यामला मूर्तीद येमीच अस्तित्व लेद” इंगा “वगान इडशी इंगा येवाडच द्यावार लेड,” 5काही मंदी इल्ला आंटार स्वर्गला इंगा पृथ्वी मिंदा शेंगेम द्यावारलु उंडाय, येनटीक की काही मंदी शेंगेम द्यावारलाद इंगा शेंगेम प्रभुलाद पुजा शेस्तार,
6पण मनाकसोम फक्त वक्काडे द्यावार उंडाड, येवाड मना आब्बाड उंडाड.
वानकसोमे मनाम जगास्ताम इंगा
वाडे आंता बनाय मतनाड
इंगा वक्काडे प्रभु येशु ख्रिस्त उंडाड.
वाननोट आन्नी माटलु अस्तित्वला वच्चीनाय इंगा वाननोटे मनाद जीवन उंडाद.
7पण इदी ज्ञान प्रत्येक मनशी देगार लेद येनटीक की काही मंदी इप्पुड पण मूर्तीला संगा इंता जुडाशी उंडार, तर वार यप्पुड मुर्तिलाक येक्पिचिनेद आन्नाम तीन्टार वारकी वाटास्ताद की इदी मुर्तिलाक येक्पिचिनेद उंडाद इंगा वारदी विवेक निर्बल उंडीने कसोम अशुद्ध आय फोइताद. 8पण आन्नाम मनालनी द्यावार देगार येकाफोद, मनाम आदी तिनाक उंटे तरी येमीच नुकसान लेद इंगा तिन्टे येमीच फायदा लेद. 9पण मिद इदी स्वातंत्र विश्वासला कमजोर उंडीने मंदी कसोम, यादबी प्रकारे, अडखळन कावाराद आंकेन काळजी तिस्कोंडा. 10जर येवारदी आना विवेक कमजोर उंडाद इंगा वाड नी लेकोन ज्ञानी मनशीन मुर्ती उंडीने गुडीला तीनेताप्पुड सुसते, तर वाड मुर्तिलाक येक्पिचिनेद आन्नाम तिनदेंक उत्साहित काका फोई येम? 11इंगा नी इल्लोन ज्ञान कसोम विश्वासला कमजोर उंडीने नी तम्मुळलाद इंगा शेल्यांलाद आत्मिक रुपता नाश आय फोई येवार कसोम ख्रिस्तड जेम इडश्या. 12पण मीर यप्पुड इल्ला मी विश्वासी तम्मुळला इंगा शेल्यांला विरुद्धला पाप शेशी वार कमजोर विवेक की तकलीफ इस्तार, आप्पुड मीर ख्रिस्तन विरुध्दला पाप शेस्तार. 13दिन कसोम, जर नाद तिनेद आन्नाम ना विश्वासी तम्मुन इंगा शेल्याल कसोम पापदी कारण आयताद तर नीन वार कसोम पाप शेशेद कारण कावाराद दिन कसोम नीन वापस यप्पुडूच नंजुर तीनाक फोयान.
Šiuo metu pasirinkta:
1 करिंथ 8: Wrr
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
CC BY SA