Populiarios Biblijos eilutės iš Lii Lolo nèti Dhèu Pajuu-paleha 20

Dalintis

De dènge jꞌara aaꞌi-aaꞌi se, jaꞌa padꞌelo le jꞌara, sèna ka miu kahèi madhutu soru-bara dhèu dhu unu aadꞌo sèra. Sanèdꞌe paie lii padhai Lamatua Yesus, dhu peka na, ‘Beꞌa risi, èdhi hia, nèti èdhi sèmi tare.’ ”

Ka jaꞌa keꞌa mema le, lula Lamatua Yesus ka dhu hia jaꞌa dui sasabꞌa ne ètu kabela-kao jaꞌa, sèna ka jaꞌa laku lole Lii Lolo Beꞌa, peka na, Lamatua sue èdhi, aa dꞌara Na hua iia kahèi dènge èdhi. Ladhe jaꞌa madhutu boe dadꞌèi Na, ho paꞌèle sasabꞌa Na neꞌe, jaꞌa ngee, na, mamuri jaꞌa guna boe ngaa-ngaa ciki sa.

Nèti èèna ka, miu nanene paie. Jaꞌa paꞌèle le sasabꞌa-laꞌa jaꞌa mi miu. De limuri ne, miu ka dhu pakako taruu sasabꞌa èèna. Nèti èèna ka, ladhe abhu ètu talora miu, dhu jꞌajꞌi mèka dhèu unu Lamatua, èèna na, miu tago mere. Èèna na, sasala jaꞌa aadꞌo heka. Sanèdꞌe paie! Jaꞌa peka le dènge miu dadꞌèi Lamatua aaꞌi-aaꞌi. Jaꞌa pahuni boe èci sa. De miu hudꞌi laladhe paie mamuri miu, aa jꞌaga paie-iie dhèu-dhèu dhu Roh Lamatua dhu Mola-Mèci pangèdꞌu mi miu ho ladhe-leru si. Baku bhèlu, peka na, Lamatua Yesus madhe le ho sui pamaꞌète dhèu sèra dènge raa Nèngu mesa Na. Nèngu ka dhu pajꞌujꞌu le miu, sèna ka ladhe-leru si, sama sèmi ana madhenga badha dhu lalau-laloꞌo kahibꞌi-kalèbho ra.

Dꞌai le lodꞌo èdhi pacèri kèna. De jaꞌa pangèdꞌu miu asa adhe-aai Lamatua, sèna ka Na ladhe-leru miu. De miu hudꞌi kèpe paꞌèra ku aaꞌi-aaꞌi dhu nèti uru èèna jaꞌa peka le dènge miu, nèti babeꞌa dꞌara Lamatua. Lamatua dènge koasa ho paꞌèra dꞌara miu. Na moa le kahèi, ho hia mamèngi mi dedha dhèu unu Na. De ladhe miu madhutu taruu Nèngu dènge dꞌara mera-milu, tatu miu abhu mamèngi Na kahèi.