Jona 2
2
Jona mbwaakakomba mwida lyanswi. Mbwaakavunwa
1Elyo Jona wakakomba kuli-Jehova Leza wakwe naakali mwida lyanswi. 2Wakati,
Ciindi ncendakapengede ndakakomba Jehova,
Nkabela wakandivwiila.
Nindakali mwida lyakabanda ndakoongolola,
Elyo wakaswiilila ijwi lyangu.
3 #
Int 88:6
Nkaambo wakandiwaala mubulondo bwamaanzi, mukati kalwizi.
Milonga yakalindizyungulukide,
Mayuwe aako ampwampwa zyako zyoonse zyakandiinda kujulu.
4 #
Int 31:22; Is 49:14; 1 Bam 8:38 Lino ndakati, Nditandidwe kuzwa kumeso aako,
Nekubaboobo nkatambye meso kuntempele yako iisalala.
5Maanzi akandinyonoosya cakunjila mumoyo,
Bulondo bwalwizi bwakandizyunguluka.
Matete akandizambilila amutwe,
6Ndakaseluka kuntalisyo zyazilundu,
Ziyako zyanyika zyakandisinkilizya.
Pele wavuna buumi bwangu kulufu, O Jebova Leza wangu.
7 #
Int 18:6; 34:6; 130:2; Jer 2:13 Moyo wangu niwakawizuka, ndakaibulukwa Jehova,
Elyo lukombyo lwangu lwakakusikila kuntempele yako usalala.
8 #
2 Bam 17:15; Int 31:6; Jer 10:8 Basikuyeeya zintu zyabuyo,
Mbombabo baswekelwa luzyalo.
9 #
Int 50:14; 66:13-15; Hos 14:2; Heb 13:15 Pele mebo njoopailila ajwi lyakutembaula,
Eco ncindakasyomezya njoocita nciconya. Lufutuko lulazwa kuli-Jehova.
10 #
Jon 1:17; Mt 8:9 Lino Jehova wakaambila inswi, nkabela eyo inswi yakaluka Jona anyika injumu.
The Bible in Tonga (Zambia) © United Bible Societies, 1963.