Idi Ufa 64
64
Isaraee maqannaasa Anutufa dadaaqianifeera innaaru quu ufafa.
1Oo Anutu, qinee ummaaraki maridaqa, qini innaaru qirana iria.
Qini namuqaa dariranara rufiaidaqa, anee qini marirana dadaaqia.
2Manda oosana maree mariasa tipundaari
mariasakinaana qini mareeqee kukeeqaqisaa.
Aaqee mariasa faaqa fuisee qida qini darirari marianasaa faqa ititaqisaa.
3Mi fasiqausa nári nifauru nimaakiri faaqaanara foora aaruqu maqaafanoo maridanoo.
Misa ufa fannoo feefa dindasaa quqasee rakisiandee qini rakisi qimaqaidaqa.
4Miqi maria manda fasiqausa qumee ooqa andeeqara fasiqa naridaqa.
Misa rufiarana siaisa kaqi tautumaki naridaqa.
5Misa nariqa suqufifaqa manda oosanara narí pooduqee narí pooduqee idaqa.
Misa kukeeqara ufaana fufira oosanara amiqimmasee
iriqaraasammasee maaqi qidaqa, sia moo fannoo maasa ufaana qafaannoo fee qidaqa.
6Misa manda ainaina auqarara tipundaaridaqa.
Misa nariqa tipundaariranara andeeqanoo maridanoo fee qidaqa.
Faiqí faiqi kukeeqara irirafa farumara foora meemai uqnaurinoo maridanoo.
7Anutufa mi manda faiqausa narí feefannai naruannoo.
Dauni misa naru quqasaannoo.
8Misa manda ufa akiiqara kuridi nimaqaannoo.
Aiqamausa misa mi narirana niqafamasee boo firaa ainaina kambiqee maqi qifaranoo.
9Misa aiqamausa misa narirana qafamaseeqa rufieeqa
misa Anutuna ainainiranara iridaqa kooroommasee mina ainainiranara qimannimifaranoo.
10Andeeqarausa Yaaweefa auqoo ainainara irisee asasifaranoo.
Misa Yaaweenaki amiqimmasee marirana paqurifaranoo.
Aiqama andeeqarausa mina amooqifaranoo.
© 2017 Wycliffe Bible Translators, Inc. All rights reserved.