Idi Ufa 139
139
Anutufa innisaimbaqara amiqimmasee iriseenoo amiqimmasee rakisidanoo.
1Oo Yaawee anee qini qimuqusaki diuqummaseenana qiniara irimariananoo.
2Qini ooqu marirana faqa findifirana faqa aiqama ainaina auqee marunnanara faqa anee irimariananoo.
Anee nianaindari qini
Anee nianaindari qini qitikurakin
Anee nianaindari qini qitikurakinaa
Anee nianaindari qini qitikurakinaa iriranara irimariananoo.
3Anee qinee ainaini marunnana faqa idooee marunnana faqa diuqimariananoo.
Anee qinee aiqama ainaina auqee marunnanara irimariananoo.
4Oo Yaawee qinee moo ufa qianeerunana anee faasai mi ufana aiqama irimarianafa mariananoo.
5Anee qini fiqu fiqu ina datina aiqamatinai mariananoo.
Anee aneenna afeekannai qini itita qimaqee mariananoo.
6Ani qiniara irirafa kaaqa firaafa uriqaranoo maridanoo.
Ani mi irirafa qini irirana faqa fiaaqaranoo maridanoo.
7Qinee ani Yaaweena maraquna minnisee yaifee moosaa fuanauree.
Qinee ani afu saaqari yaifee moosaa fuanauree.
8Qinee innaarunai ooru firaree qianana anee minni faqa marinnaranoo.
Qinee kuqirausa mariannai firaree qianana anee minni faqa marinnaranoo.
9Qinee qaqamaree suani afu ururee marina ooqiaaqarama fuanana anee minni faqa marinnaranoo. Suani keeqee marina fiaaqaraanana anee miqoo faqa marinnaranoo.
10Qinee mitinai marianana anee miqoo maridana qini aana muqunimma qisarara faqa miqoo marinnaranoo.
11-12Qinee asukunara kukeeqa qimaqaannee qimasee kaaqa qarafa qini fiqu fiqu inoo marifa quandaki asukunaikiannee qiananoo asukuna fannoo sia ani afusaa asukunara foora maridanoo.
Asukuna fannoo faasaanara foora kaaqa qaannoo.
Asukuna faqa kaaqa qarafa faqa ani afusaa amana amana kai maridanoo.
13Anee Yaaweefa kai qini daundurakinaa ainaina aiqama auqunafa mariananoo.
Anee qini qinoona aranandaki qini qifaaqa moodaanaki ootupama qisaananoo.
14Aniara rufiee mariafa mariannanara ani amooqidaqa.
Anee aiqama ainaina auqee marianafa mookira ainaina naaquqara ainaina auqee marianafa mariananoo.
Qinee minara qeeqa aiqama qimuqusannoo iridaqa.
15Qini qimudaani moodaanaki ootupee marufana anee ireeda qini qinoona aranandaki moodaanaki quqaqisanau.
Qinee miqoo kukeeqaranaki innooqee mariafanana anee qinee mariafannanara iri marinau.
16Anee sia kambiqaqa mariafana qiqafanau.
Qinee naaru moodaa moodaa faasaana auqaanna ainainara ani papiqaki akara rinoo maridanoo.
Mi moodaa moodaa faasaanafa sia kambiqanoo marufanoo miqoo ani papiqaki akararinoo maridanoo.
17Oo Anutu ani iriranara irunanoo firaaqoo ummaara darinoo.
Moomoo uqanna maridanoo.
18Qinee asaana ruananoo nukuda faqa arusee fiqaranoo mariannoo.
Qinee faiqaqee marii findi fiqa ani mi iriranara kaqi kai irimaree fidaqa.
19Oo Anutu anee mandoosana maree mariasa narinnaranoo fee qidaqa.
Faiqí fidika ruqiqee mariasa qini quqasee fififaqa qeeqaraa marianauree qidaqa.
20Misa manda ufa ani qimamaqaidaqa.
Misa oosana oosana manda ufa ani auquara qidaqa.
21Oo Yaawee aniara fidiaqaa imariasa qinee misa fidiqaqmma nimaqaidaqa.
Ani ufamau firanara ititammasee aanoo qimariasara qinee firaaqoo qikooqaidanoo.
22Qinee miqimariasara kaifaa firaaqoo uqanna fidiaqaamma nimaqaidaqa.
Qinee misara qini namuqaauqee qidaqa miqidaqa.
23Oo Anutu qini diuqummasee qini iriranara iria.
Anee qini qimanammasee qini irirana oosanara iria.
24Qini daunduraki manda ainaina qafamaseenana naaru marira aanaindari qinisaa rakisiqisaa.
© 2017 Wycliffe Bible Translators, Inc. All rights reserved.
