प्रेरित.कामी 4

पंचोरा रआ पंचाईत रे पतरस आउर जोहन

1पतरस आउर जोहन होड़कु लोः बाते केनाकिन गी ची, पुरोहित आउर बड़े बिनती ओड़ाअ रिनकु सिपाहीकु आलकु सरदार आउर सदुकी हुंकिन दुबाःड़े हीःग नेनाकु। 2हुंकू मुरुक कयराव ताही नेनाकु, एता लःअय ची, हुंकू होड़कु के सिखाव कु केनाकु, ची गोएःग उनकु मेसे जिवीःड-बिरिःड कोआकु, जे लकान ईसु गोएःग उनकु तरअः जिवीःड तनाय। 3हुंकू पतरस आउर जोहन के सःब केते, बकिर आयुःब नेना लःअय, दुसरा हिला जगुत जेहेल रे दोहो ताही लिकनाकु। 4बकिर बचन आ-आयुमकु, मेसे ढेर होड़ बिसवास ताही लअकु, आउर हुंकू गनती रे पाँच हजार लकान हेरेल हुयाव नाकु।

5दोसरा हिला जिरोसलेम नोकान नेना ची हुंकू आलकु सरदारकु, हेतरअ अगुवाकु आउर धरम पुथी सि-सिखावकु 6आउर महापुरोहित हन्‍ना, आउर कैफस, जोहन आउर, सिकेन्दर आउर जेतना महापुरोहित घराईता रिनकु ताही नेनाकु जामाकु जिरोसालेम रे जवार नेनाकु। 7हुंकू पतरस आउर जोहन के ताला रे तिंगु केते, “आबेन ओका सवांग रे, आउर ओका नुमू रे नोकान कामी तदाबेन?” मेन केते कुली लिकिनाकु।

8-9होले पतरस पबितर आतमा तरअः पेरेःग केते, हुंकू के बेता लिकुआय, ए होड़कु आलकु सरदारकु हेतरअ अगुवाकु, आले मियांड लंगड़ा होड़ आला भलाई तदाले, आउर नुई एतान लकान छुटाव आमीन नाय, तिसिंग आले तरअः कुली गथाअ देलेआकु, 10आपे जामा आउर इसराइल रिनकु जामे होड़कु नोःआँ पाड़ी केपे, ची नासरत रिनी ईसु ख्रीस्त आला नुमू रअः सवांग रे नुई होड़ बेस आमीन कोअते, आपे मड़ांग रे तिंगु तनाय। आपे हुनी के कुरूस रे रकाःब लियापे, बकिर परमेसर हुनी के गोएःग उनकु तरअः जिवीःड बिरिःड लियाय। 11#सिरिंग 118:22होना,

“‘हिना टुकू हेके, जेके आपे करीगारकु उडुंग थिलाअपे,

आउर हिना कि गीई परमेसर कोना रेनअः सिरा टुकू बनाव लियाय।’

12जाहें एटाअ होड़ तरअः पाप तरअः उधार एरे भेटाअः, एता लःअय ची सिरमा लतार गोटा दुनिया रे, ईसु आला नुमू बाई केते, होड़कु के जहान एटाअ नुमू एम लअः कनोआँ, जेकर से ची आबु के पाप तरअः उधार भेटाव सकाआ।”

13पतरस तेकर जोहन आला डिड़गार के नेल केते, आउर बेगार पढ़ाव गंवार हेके के पाड़ी केते, आउर ईसु लोः साँघे ताही चुकाव थिनाकिन के चिनहा केते छकित नाकु। 14हुनी होड़ के जे बेस आमीन थिनाय, हुंकिन लोः तिंगु नेल केते हुंकू बिरोध रे काकु साड़ी नेना। 15आउर पतरस तेकर जोहन के पंचाईत तरअः बाहरी उड़ूंगोः आचु केते हुंकू आकु-आकु सालह दाकु। 16“आबु नुकू लोः एतानेआबु? जिरोसलेम रे तहीनोः कु जामे पाड़ी केदाकु, ची नुकू तरअः मियांड नामी चिनहा हुयाव ताना, आबु नोःआँ के ईरबु इनकार सकाया। 17सेरे होः नोःआँ होड़कु रे बगरा आलु डंकायोअ हिना लःअय, आबु नुकू के ईसु आला नुमू रे नहाअः तरअः ओके केहोः एतान होः आलपे कंहड़ी के, मेन केते जोर से चेतावन एमा कुआबु।”

18हुंकू पतरस हेतरअ जोहन के राअः केते, ईसु आला नुमू रे कहियो एतान होः आलबेन कंहड़ी के, आउर ना ची सिखाव कुबेन मेन केते, चेतावन एमा केते हुकूम एमा लिकनाकु। 19पतरस तेकर जोहन “आपे गी फैसलायापे, नोःआँ परमेसर हेनाःड रे उचित एदनाअ, ची परमेसर आला बात के बाई केते, आपे आला बात के मना-आले,” मेन केते हुंकू के उतारा एमा लिकुआकिन। 20“बकिर आले जे नेल तदाले आउर आयुम तदाले, होना के कोवान, क-कंहड़ी आले एरेले दड़ीआ।” 21बकिर हुंकू पतरस तेकर जोहन के धमकाव केते, आउर डांड़ एमोअ लकान एतान दोस होः काकु नाम केते, होड़ रअः बोरते बाई लिकनाकु, एता लःअय ची होना जे हुयाव ताहिनेना चलते, जामे होड़कु परमेसर आला बड़ाई केनाकु 22हुनी होड़ जेकर एड़े बेसोः रअः चिनहा हुयाव ताहिनेना, हुनी आला उमाईर चालीस बरीस तरअः जादे ताहिनेना।

बिसवासीकु आला बिनती

23होंड़े तरअः छोड़ाव केते पतरस तेकर जोहन, अकिन आलकु गाती दुबाःड़े हीःग नेनाकिन, आउर महापुरोहित तेकर अगुवाकु, हुंकिन के जे बेता थिलकिनाकु, होना जामा के कंहड़ी उदूः लिकुआकिन। 24#उइठ 20:11; नहे 9:6; सिरिंग 146:6हुंकू नोःआँ आयुम केते, जामे मिसा-तेरे जोर से परमेसर के हकाव लियाकु, “ए जामा तेङ रे अधिकार दोदोहोई परभु, सिरमा आउर धरती तेकर समुदर, आउर जे होंड़े एदनाअ नोःआँ जामा के आम सिरजाव तदाम! 25#सिरिंग 2:1,2आम गी पबितर आतमा तरअः अपन धाँगड़ आले आली पुरखा दाऊद आला आहा तरअः कंहड़ी थिलाआय,

“‘एटाअ जाईतकु एता लःअय मुरुक कयरअ तनाकु,

राईज-राईज रिनकु होड़ एता लःअय बेकार जोजना बनायाकु?

26धरती रिनकु राजा,

आउर हाकिमकु मिएड़े जवार नाकु,

तेकर परभु आली ख्रीस्त रअः बिरोध रे बिरिःड नाकु।’

27 # सं.लुका 23:7–11; सं.मत्‍ती 27:1,2; सं.मर 15:1; सं.लुका 23:1; सं.जोह 18:28,29 एता लःअय ची सचे आम आली पबितर धाँगड़ ईसु आला बिरोध रे, जेके आम ख्रीस्त केते सिध थिलयाम, हेरोद तेकर पुनतियुस पिलातुस एटाअ जाईतकु आउर इसराइली होड़कु लोः मिलाव कोअते, नोःआँ सहर रे जवार नाकु। 28हुनी नोःआँ लकान जे कुछ आम आला सवांग, आउर जोजना रे जे पहिल तरअः तेयार लअः ताहिनेना के पुराव लःअय। 29नहाअः दो, ए परभु, हुंकू आला धामकी के नेलेमे, आउर अपन बंधाउवाकु के, आम आला वचन के बेगार बोर भाव रे सुसुनाव लःअय, डिड़ एमा लेमे। 30आम अपन पबितर धाँगड़ ईसु आला नुमू रे चचंगा लःअय, चिनहा तेकर छकरित कामी ककामी लःअय, तीः ताम के जिलिङगेमे।”

31हुंकू बिनती उसार नाकु दो, हुंकू जे ओड़ाअ रे जवार थिनाकु होना हिलाव ना। आउर जामे पबितर आतमा तरअः पेरेःग नाकु, आउर परमेसर आला बचन बेगार बोर भाव ते सुनाय केनाकु।

ख्रीस्तीयकु आला मिजुट

32 # प्रे.कामी 2:44,45 बिसवासी खुड़हा रिनकु मि-मन, तेकर मि-चित्‍त वाला ताही नेनाकु। जाहें होः अपन धन-खुरजी के अपन काकु कंहड़ी केना, बकिर जामा धन-खुरजी जामेकु आला सझेदार ताहिनेना। 33प्रेरित बड़ा सवांग रे परभु ईसु आला जिवीःड-बिरिडोः रअः गोवाह एमे केनाकु, आउर हुंकू जामा तेङ रे परमेसर आला आगम दया ताहिनेना। 34-35हुंकू मेसे ओके होः रांगे:ग काकु ताहिनेना, एता लःअय ची जेकर दुबाःड़े ओत चाहे ओड़ाअ ताहिनेना, हुंकू होना के आखरिंग केते, होना रअः दाम के आगु केते, प्रेरितकु के एमा कु केनाकु, आउर जेके जाईसन दरकार पड़ाअ केना, हिना मोताबिक जामे बिसवासीकु के हाटिङोः कु केनाकु।

36जोसेफ नुमू रिनी मियांड, जेकर लेवी खानदानी साईप्रस रिनी ताही नेनाय, जेकर नुमू प्रेरितकु बरनाबस, होना रेनअः मतलोब “ढाढ़स-एमोई होपोन बेताई केनाकु।” 37हुनी आला अपन कटिःग ओत ताहिनेना, होना के हुनी आखरिंग केते होना रेनअः दाम रअः ढिबुवा तेके आगु केते प्रेरितकु एमा लिकुआकु।

선택된 구절:

प्रेरित.कामी 4: ASR

하이라이트

복사

비교