Dejla 8
8
O Savle progoninela i crkva
1A o Savle odobringja e Stefaneskoro mudariba. I taro adava dive počmingja baro progonstvo protiv i crkva ko Erusalim, i sa o vernikija, osven o apostojla, rasturinge pe ko thana tari Judeja hem tari Samarija. 2Nesave pobožna manuša parunge e Stefane hem silno runge leske. 3Ama o Savle počmingja te uništinel i crkva. Džala sine taro kher ko kher, ikalela len sine silaja e muršen hem e džuvlen hem čhivela len sine ko zatvor.
O Filip vakerela bašo Hristos ki Samarija
4A okola so sine rasturime, propovedinena sine o evangelije kaj i te džan. 5Agjar o Filip hulilo ko jekh gradi e Samarijakoro hem adathe propovedingja lenge e Hristostar. 6Koga o manuša šunge e Filipe hem dikhle o čudija so kerela len sine, sarinen šunena sine šukar adava so phenela. 7Adaleske so, o lošna duhija vikaja iklona sine bute manušendar so sine opsednime, a sasljovena sine but manuša so sine paralizirime hem bange. 8Hem uli bari radost ko adava gradi.
O Simon o magjišari
9A ko adava gradi više nesavo vreme o manuš so vikinela pe sine Simon kerela sine magije so lencar o manuša tari Samarija sine iznenadime. Falinela pe sine deka tano baro manuš, 10hem sa o manuša taro najtikno dži ko najbaro, šukar šunena le sine hem vakerena: “Akava manuš čače tano e Devleskiri sila so vikinela pe Baro.”
11Ola džana sine palo leste, soske but vreme iznenadinela len sine pe magijencar. 12Ama koga verujnge e Filipe, so propovedinela sine o evangelije bašo carstvo e Devleskoro hem bašo anav e Isuse Hristoskoro, sine krstime murša džuvla. 13Hem korkori o Simon verujngja hem krstingja pe hem sekat sine uza ko Filip. Ov sine iznenadimo taro bare znakija hem taro bare čudija so dikhela len sine.
14Koga o apostojla ko Erusalim šunge deka o manuša tari Samarija prifatinge o lafi e Devleskoro, bičhalge e Petare hem e Jovane ki Samarija. 15Koga ola resle adathe, molinge pe e neve vernikonge te priminen o Sveti Duho, 16soske o Sveti Duh panda na hulilo nijekheske lendar, adaleske so ola sine krstime samo ko anav e Gospodareskoro e Isuseskoro. 17Togaš o Petar hem o Jovan, čhige pe vasta upro lende hem ola priminge o Sveti Duh.
18Koga o Simon dikhla deka o manuša priminena o Sveti Duh adaleja so o apostojla čhivena pe vasta upro lende, ov e apostolenge mangla te del pare 19vakerindor: “Den man da adaja sila te šaj sekaske so ka čhivav me vasta te priminel o Sveti Duh.”
20A o Petar odgovoringja leske: “Neka uništingjoven te pare barabar tuja, soske mislingjan deka šaj te kine e Devleskoro daro parencar. 21Tut nane tut pravo ki akaja buti, adaleske so to srce nane šukar anglo Devel. 22Adaleske pokajn tut bašo to lošnipe hem molin tut e Gospodareske nadaja deka ka oprostinel tuke so isi tut asavki misla ko srce. 23Soske dikhava deka sijan pherdo kerkjipe hem deka sijan phandlo ko grevo.”
24A o Simon odgovoringja: “Molinen tumen e Gospodareske baši mange te na ovel ništo mancar taro adava so vakergjen.”
25Palo adava, koga propovedinge o lafi e Gospodareskoro, o Petar hem o Jovan irange pe ko Erusalim hem drumaldan propovedinena sine o evangelije ko but gava e Samarijakere.
O Filip hem o manuš tari Etiopija
26Togaš o angeli e Gospodareskoro vakergja e Filipeske: “Spremin tut i dža ko jug taro drumo e pustinakoro so legarela taro Erusalim ki Gaza.”
27O Filip spremingja pe hem gelo. Hem ko drumo arakhla jekhe manuše tari Etiopija, evnuho, baro manuš so sine čhivdo bašo barvalipe e caricakoro e Kandakijakoro. Ov alo ko Erusalim te slavinel e Devle. 28Iranindor khere taro Erusalim, bešla ko po grastano vrda hem čitinela sine o lil taro prorok Isaija.
29Togaš o Duho vakergja e Filipeske: “Dža uza ko adava vrda hem ov paše uza leste.”
30O Filip prastandilo uza ko vrda, i koga šungja deka o manuš tari Etiopija čitinela o lil taro prorok Isaija, pučlja le: “Svatineja li adava so čitineja?”
31A ov odgovoringja leske: “Sar šaj te svatinav koga nane koj te objasninel mange?” I vikingja e Filip te uklel hem te bešel leja.
32A ko adava than taro Sveto Lil so čitingja o manuš, pišinela sine akava:
“Sar bakhro sine legardo ko čhiniba,
hem sar so o tikno bakhro kjutinela,
anglo okova so šišinela le,
agjar ov da na phravgja po muj.
33Sine ponizimo hem na sudinge leske pravedno.
Nikoj nane te vakerel taro leskoro seme,
soske leskoro životo sine lelo tari akaja phuv.”#Isa 53:7-8.
34A o evnuho pučlja e Filipe: “Molinava tut, vaker mange, baši kaske vakerela o proroko akava? Baši peske ili javereske?”
35Togaš o Filip, počmindor taro isto lil, vakergja leske o evangelije bašo Isus.
36Dži kote džana sine e drumoja, resle uza ko jekh pani, i o evnuho vakergja: “Akje pani! So šaj te čhinavel man te na ovav krstimo?”
37[A o Filip odgovoringja leske: “Šaj te krstine tut – ako verujneja sa te srceja.”
A ov vakergja: “Verujnava deka o Isus Hristos tano o Čhavo e Devleskoro.”]#8:37 Nesave rakopisija nane len akava stiho.
38Togaš naredingja o vrda te ačhol hem solduj džene, o Filip hem o evnuho, hulinge ko pani, i o Filip krstingja le. 39A koga iklile taro pani, o Duho e Gospodareskoro taro jekh puti lela e Filipe hem o evnuho više na dikhla le, nego gelo pe drumoja radosno.
40A o Filip pojavingja pe ko gradi Azot, i propovedinela sine o evangelije ko sa o gradija kotar so nakhla sa dži kote na resla ki Cezarija.
