Job 18
18
Bilidadi akuwomba kandi na Ayubu
1Pambeli Bilidadi mundu wa mlima wa Shuhi kayangula,
2Wuli, Ayubu ndili dawuleki kuywanga filongu afi?
Cha kwaa wiholi, na yufwi datukuwombeli.
3Nongwa liki yuwi ukutugola kucha vang'ongolu?
Nongwa liki ukutuwona yufwi vasisighi?
4Yuwi ukwigobola umweni kwa maya vaku,
Wuli, mlimawu dawulekiwi kwanongwa ya yuwi?
Awu migonguveli mikomi iwushiwi mahali paki?
5Nakaka, ngesha ya mundu mwafu dayijimishiwi,
lwengi lwa motu waki dawung'aliki ha.
6Mulibudi lyaki damuvi chisi,
na luliku lumlangashila dalujimishiwi.
7Davayendi yendi kwa kwikwala,
na fila fyayilata kugola dafigoleki ha.
8Mawulu vaki mweni davamwingishi mumtambu,
kila payenda akwingila mulyowu.
9Mtambu dawumuwomeshi muchishugupi,
chimsulubu dachimlemileli.
10Vamfifila chimsulubu muuganga,
kateghiliwa mtambu munjila yaki.
11Chipwembwi chikomi chikumkapusha mbembu shosi,
chikumkovikela kokosi kwayenda.
12Avelili mlundamali, lakini ponopa kavahela chindu,
gobuleku siva ndemindemi kumuwisha.
13Utami wa wafu ukulya ngwembi yaki,
utami wa njifwa wukulya fisingu fyaki.
14Vandu vonda vavifyi,
dayeghiwa kwa mutwa wa mikapusha.
15Ponopa kila mundu akuwesha kwikala mulibudi lyaki,
wanatumia chibiliti kugwijusha findu fyosi.
16Mweni kava kucha libiki liyumili,
na mitafyi yaki dayiyumi.
17Pamlima kwahela mundu daghavi na ngumbungumbu na mweni,
wala litawa lyaki dalivi kuliveli ha pamlima.
18Kawushiwa mungesha kadangiwa kulwisa,
kavingivingiwa kutali na mlima.
19Kavahela vana wala vayisukulu,
kwahela mundu yasighalili mumakalu vaki.
20Vandu va uhehi vajinga na chila chimuwonili,
chipwembwi chivakola vandu va kundamba.
21Afi ndi dafivapati vandu va wafu,
pala ndi mahali pavayikala vandu vangajila kumumanya Chapanga.
The Old Testament in Ndamba @The Word for The World International and Ndamba Language translation. All rights reserved.