Jagillo 27
27
Moosesol Joosuuwal gamoro aiko toru mallo'moneyokwe kuu'maiyo toru'no ajesoka tovinokwono
18-19 #
Moll. 24:13
To'no'gwowi Gooti Yawel Moosesollu kuudokaikono. “Gumoro aiko toru mallo'moneyokwe Nuunolluro muugunyo Joosuuwallu momworaro'bi yiuwi'nokai Isuraiyolda'ai a'mwo abolo togai'aro pris womdokwe Eleyasareke'aro tonyuro sumdollu toru domolludapiyono. Muugunyo Joosuuwallu moro Kuullo tool kuulomwalodowodekono. Toro toollu molludapiyo'bi yiuwi'nokai ton muugonagwo'dopure toga gamoro mido tovi ato tokwe uubogai'no'bi kuu'maiyo toru'no dojesono. Toro ajesubi tool gumoro aiko toru marowo'ji Isuraiyolda'ai a'mwo abolo tonyu mido mollomwalmwalonekono. 20Aki toro toollu jeso'moneyokwe guu yiuwi'nokai Isuraiyolda'ai a'mwo abolo tonyu aro wuudubinekugono. “Kevu mi numjunodupudo kubalno a'mwo aka kwollu kuruv aval'no neya duumjunogaulo.” Wuudubinekugono.” Kuudokaikono. 21Gooti Yawel Moosesollu toro wuujuno sumaiyokwe aki aro kuudokaikono. “A'mwo ajesubi su tool mido mollomwalo tov gavnokweyolluro kuudo tovida'ai mamomjomwekovlawonekono. Toro kwol kuruv moro ilaiyo nyunodowo'jure tovi uumjunyo'moneyokwe su toolno'gwowi pris Eleyasarollu yomuugojoma'mwalonekono. Toro te yamuugojo kuudogano'ji toga Pris aguto Eleyasarol ilomoropiyo'moneyokwe sel ago tovi judo tool kuulawo'ji nuu Gooti Yawenyuro sumdollu toru kuulodawonekono. Toro kuulodawo'ji gamoro kupolmdo toru yesodowodo tovida'ai sulo tollal adolmwogapiyo'ji toga moro ilaiyo nyunodowo'jure tovi uumjunyo'mo tovino kuudo tov nokwo youromaronekono. Toro me'no youromarowo'ji toga Joosuuwallu nokwo biluudonekono. Toro abiluudo'ji tovi Joosuuwal wuu'nowo'ji yiuwi'nokai Isuraiyolda'ai a'mwo abolo tonyu kuuguudo su tokwe wuudumwalonekono. Toro wuudodowo'jure tovi nokwo uumjunmwalpinogano.” Kuudokaikono. 22Gooti Yawelluro kuudoka su tovi Moosesol kuvinono kuumjunokaikono. Toro tool Joosuuwallu doma'no sumaiyokwe pris Eleyasareke'aro yiuwi'nokai a'mwo abolo togai'aro tonyuro sumdollu toru amolludapiyokaikono. 23Toro da'mduke toolluro mido tovi Moosesol ato kuubogai'nokaikono. Toro kuubogai'noka su tomgu'aro gamoro aiko toru mallo'moneyokwe Joosuuwallu kuu'maiyo toru'no ajesokaikono. Moosesol Gooti Yawelluro me'no kuudoka tovi kuvinono kuumjunokaikono.
© 2022: Ethnos360 Sanford, Florida