К Ефесянам 2
2
Туқулъыӷмың Уңувалъыӷмун
1Сивунӷани таӷныӷаси туқуңаяҳтут қаюҳлъяк қа̄ткумаңилъкыси Кияӷнық, сыӷлыҳқыстыңуяҳтусилъю. 2Таўатысяҳтуси кияҳтыңъулюси нунам сыӷлыӷмун иглыӷныӷанун. Қа̄ткыңъуяӷаҳсилъю иглыӷутистыңат туӷныӷа̄т қилягамылңӯт. Лъңаңӯқ а̄ңылъыҳпигақ туӷныӷақ иглыӷутилӷӣ югның қа̄ткусигалңуӷның Кияӷныӷмун. 3Қамахлъюта кияҳтыка̄гукут тама̄кустун югыстун. Атуқыхкақапут сыӷлыҳқыңъалӷӣт пиюкылъҳи югусимталъю, умьюгамталъю. Ынка̄м қамахлъюта алъхықа̄тымнъың сыӷлыҳқыстыңулюта, аӷью̄лъыңнақңуяҳтукут Кияӷныӷым сякша̄лъҳакун.
4Иўырңа Кияӷнық наңлъыхтаҳлъяхтуқ, пиниқыпихтӣлъхуқлъю. 5Қайўа таӷныӷапут туқуңаяӷңӣта апалъюқлъюки сыӷлыҳқылъыпут, Кияӷныӷым уңуваҳтӣлъю малигулъюта Христосымун. (Югулика̄гуси Кияӷныӷым наңлъыкылъҳакун.) 6Кияӷныӷым уңуваҳтӣлъю малигулъюта Христос Иисусымун, хўаңкунъунлъю ақумылгусиҳтыста̄ қилягми. 7Кияӷнық таўатын пика̄гуқ киңулӣӷаӷнун лӣтысқылъюку пиниқылъыӷрукута̄ҳлъяни хўаңкунъун Христос Иисусыкун. 8Кияӷныӷым наңлъыхталъҳакун югулика̄гуси ухпықилъыҳпысигун. Югулилъыҳси лъпысиның пилъқынӷитаҳси, Кияӷныӷым тунусяқа̄ лъпысинун. 9Югулилъҳитӣси апалъюқлъюку сялъыҳси, ынка̄м қука̄югуткысяҳқақынӷитаҳси. 10Кияӷныӷым улима̄қӣлъю таўатылъюта. Христос Иисусыкун улима̄қӣлъю қыпҳӣсқылъюки пинилӷӣт қыпҳақат. Сивунӷани та̄кут пинилӷӣт қыпҳақат ята̄ҳқыңъўа̄қақӣ хўаңкунъун қыпҳӣсқылъюки кияҳтылъымнъи.
Ата̄сӣҳтылъық Христосыкун
11Нықамиклъюку язычнигыңулюси алъхықа̄гуси. Иудеит атиӷақӣси «обрезаниялъҳилңӯт», лъңит атиқаюгӯт «обрезаниякат». (Обрезаниялъҳат югусиҳӣнӣтнитуқ.) 12Нықамиклъюку тама̄ни пилъыӷни налъюксяӷаҳси Христос кинаңутаңа. Нуната̄яҳтуси Израилыӷмӣнун ынка̄м илятылъҳисяҳтуси Кияӷныӷым акықусяқыхка̄нун лъңитнун. Нунами хўани кияҳтыңъуяҳтуси сиӷималъңунасилъю, Кияӷныңунасилъю. 13Иўырңа ма̄тын пилъыӷми Христос Иисусымун илясима̄си. Сивунӷани аўавансяҳтуси Кияӷныӷмың, иўырңа ма̄тын пилъыӷми туӷа̄ӷусима̄си лъңанун Христосым а̄ўакун. 14Христос лъңа катам ныкыхмылъқаҳпут. Лъңаңӯқ ата̄сӣҳтыстилӷӣ Иудеяныңлъю, язычнигыныңлъю. На̄фқыхкақа̄ миңлъюта а̄фтилӷӣ хўаңкунъың, ынка̄м аңуякунъаниҳқыхкақӣлъю. 15Христосым туқулъыӷмикун атӯнаниҳқыхкақӣ Иудеит Лӣлиҳтӯсӣтлъю қылӷусӣтлъю. Таўатын пика̄гуқ Иудеитлъю, язычнигытлъю ата̄сӣҳтысқылъюки лъмикун. Ынка̄м ныкыхмылъыңыстыкақӣ. 16Туқулъыӷмикун қақӯракун, Христосым угумикунъаниҳқӣ Иудеитлъю, язычнигытлъю. Та̄хкын ата̄сӣҳтыстӣ, илялӣӷутыстӣлъю Кияӷныӷмун. 17Христос тагилюни уңипақика̄гуқ ныкыхмылъыӷмың лъпысинун язычнигнун, аўавантыңъуялӷӣси Кияӷныӷмун. Уңипақика̄гуқлъю ныкыхмылъыӷмың Иудеянун, қантаӷантыңъулӷӣт Кияӷныӷмун. 18Ынка̄м Христосыкун Иудеянилъю, язычнигнилъю тагияқлъыгуҳтукут Атамун ата̄сикун Таӷныӷакун.
19Ынка̄ңам лъпыси язычнигни нуната̄наниҳтуси. Итупилъ нуналгутка̄ҳтӣси Кияӷныӷым югита, илятусилъю ныңлъюгутаңанун Кияӷныӷым. 20Мыңтыӷа̄тун аюқуси ныкыфтыкат тумыңлъяқӣтхун апостолынилъю, ӯкналиқистытлъю. Христос Иисус лъңа катам каңиӷам уйӷака̄. 21Қамахлъютың мыңтыӷам налиӷныӷи ныкыҳқӯтңа̄т қырңаӷмың Христосыкун. Та̄кут налиӷныӷыт нуляялӷӣмың храмыңуҳтыңъӯт Атаныӷмун. Та̄на храм аглыӷнаҳтуқ. 22Илятңалъыҳпысигун Христосымун, малигулъюси иляңитнун ухпықанун ныкыфтыңъӯси мыңтыӷамун Кияӷныӷым кияҳфиганун Таӷныӷагмикун.
© 2022, Wycliffe Bible Translators, Inc. All rights reserved.
