1е Фессалоникийцам 2
2
Павелым Қыпҳалъҳа Фессалониками
1Ухпықа̄лгутымнъи, лӣсимакаҳси лъпысинун пилъыҳпут тымңиңунӷитка̄гуқ. 2Иўырңа сивунӷани лъпысинун пилъымта, лӣсимакаҳси Филиппыми икфиқлъӣҳтыстыкақӣнкутлъю, сыӷлықӯқақӣнкутлъю. Тама̄нлъюта қайўа углялӷӣм югым аӷулӣҳнақуткыӷңӣлъю Кияӷныӷым илютустыкақӣнкутлъю, ынка̄м уңипа̄сяҳтуӷамси Пинилӷӣның Уңипа̄мың Кияӷныӷым. 3Уңипақилъыҳпут ипаңӯқ. Иқлъыңиқңунӷитукут лъпысинун, сыӷлыӷмың пиюкыхкӣтукут лъпысинун, пӯҳнақуткигатамси. 4Йыӷлыги, уңипақақапут Пинилӷӣт Уңипат қаюҳлъяк Кияӷныӷым итагнақлъюта ныӷьюкуткақӣ хўаңкунъун. Акузилъымтыхун ыфқуҳнақуткыңъунӷитапут югыт, иўырңа ыфқуҳсюкаҳпут Кияӷныӷӯқ, нанқихтиңалӷӣ илюмта сюмыҳтаӷалъҳаның. 5Лӣсимакаҳси усюқӯҳсяҳтӯнӷитамси налиӷмың сякыңвиксяҳтӯнӷитамси. Кияӷнық лӣсимакистыкаҳпут. 6Усюқыся̄юхтыңъунӷитукут югның, лъпысиның, налиӷмың кинкуның. 7Апостолыңутымнъың Христосымун, туңсиӷнӣӷвиксяҳқақсяӷамси сямың алңунак. Иўырңа лъпысинилъюта якумаңилъиқуткумаңитамси, йыӷлыги мамаҳтикаюгыстун на̄стун афлъыңакилӷӣстун таӷнуҳаӷмыхның аюқыхка̄гукут. 8Пиниқыпихтамси, ынка̄м қуякусиқинаӷлюку лъпысинун лӣсимакысюгапут Кияӷныӷым Пинилӷӣт Уңипӣ. Пинилӷӣңина̄т Уңипат пихпынаки, қуякусиқинаӷлюку сямың тамаҳа̄ның каюсиӷьюглюси аюқамси, қаюҳлъяк пиниқсялӣткақамси. 9Ухпықа̄лгутымнъи, нықамикаҳси натын аңка̄н қыпҳалъыҳпутлъю, уӷлыӷӣлъыҳпутлъю! Қыпҳақа̄гукут унухтӯма̄н, аӷныҳтӯма̄н қаюҳлъяк лъпысинун уқихтуқутңуюнӷилңӯкут; лъпысинисималюта уңипақика̄гукут Пинилӷӣның Уңипа̄мың Кияӷныӷым.
10Лъпысилъю, Кияӷнықлъю лӣсимакистыкамси. Лъпысини ухпықани кияҳтыка̄гукут пылюңилъюта, ипапиҳқылъюта, анахутылъңуна̄мта. 11-12Лӣсимакаҳси катам атам афлъыңакилъҳатун таӷнуҳаӷминың, хўаңкуталъю тамаҳаҳпыси таўатын катам афлъыңакыхкақамси. Кайымыхкақамси, илютуҳсяқақамси, қылӷута̄тақақаҳпут лъпысинун атуқысқылъюку кияҳта̄лъық ыфқуӷналӷӣ Кияӷныӷми. Туқлъю̄ңўӣси илятысқылъюси лъми катам Атаныҳпагулъыӷминунлъю, пиниӷналъыҳлъягминунлъю.
13Игамсиқаюгвикумаңина̄ңўа̄ҳпутлъю Кияӷнық уна апалъюқлъюку: хўаңкунъың нагақуӷлюку тугуклъиӷаҳси Кияӷныӷым уңипа̄. Лъпыси тугуклъиӷаҳси Кияӷныӷмың уңипа̄, нака̄н югның уңипа̄люку. Та̄наңӯқ Кияӷныӷым уңипаҳпига̄ қыпҳалӷӣ лъпысини ухпықилӷӣни. 14Ухпықа̄лгутымнъи, лъпыси таўатытуси ухпықистыңистун Христос Иисусым қырңуӷуткаюгның юӷаӷвигитни Кияӷныӷым Иудеями. Нуналгутыхпыси икфиқыстыкақӣси катам Иудеит икфиқыстылъҳистун ухпықат Иудеями. 15Иудеяңӯт туқутикат Атаныӷмың Иисусымың, ӯкналиқистыныңлъю, амьюқыта̄ткыхкақӣлъюлъю. Ыфқуҳныӷита̄т Кияӷнық, кипулъхина̄ӷӯтлъю тамаҳа̄нун югнун 16аӷулӣҳнақуткылъыӷмыхтыхун уңипақилъыҳпут язычнигнун югулилъыңнаюката. Таўатын пилъыӷмыхтыхун илямаңинаӷӣт сыӷлыҳқылъытың ынка̄м қынўатлъю Кияӷныӷым угумиягутыҳлъяглюки қантаӷақун аӷью̄ҳлъықӣ.
Павелым Ля̄лиҳфикынқихсюкаңи Фессалоникаӷмӣт
17Ухпықа̄лгутымнъи, амьюқыта̄ткистымта аӷуляқыстақңамикут Фессалоникамың, пылъҳутутыстӣнкутлъю, иўырңа паниның сюмыӷмикақамси. Ысҳаӷьюпихтақсяӷамси хинасилъю 18ынка̄м такунақуткақсяӷамси. Хўаңа, Павел, такунақутка̄таӷақсяӷамси иўырңа Туӷныӷа̄м амигиӷаҳтақӣнкутлъю. 19Лъпыси сиӷималъқамси, қуясиқамси, қаҳпакамсилъю. Та̄на қаҳпа хўаңкута қука̄югусиқылъықаҳпут мануңани Атанымта Иисусым тагикан. 20Ипапыста̄қ лъпыси қука̄югусиқамсилъю, қуясиқамсилъю!
© 2022, Wycliffe Bible Translators, Inc. All rights reserved.