Revelation 4
4
Maniguutelleq Qilagmi
1Taagken tamaakut kingungitneng taawa esghaghaqa qilagmi amik qelpalnguq!
Ma nagatkaqa qalghightaatetun ayuqelghii, whaten piiq, “Mayaa whavek. Elpenun esghaghtesnaqanka sangwaat piyaghqat.” 2Tawaninginaq Taghneghagnitunga. Taawa qilagmi esgaghagka umiilgusik aqumutak, kina aqumgaftuq. 3Aqumgalghii umiilgusigni esghaqaaluni iqeghtagketun jasper‑enkuk carnelian‑enkuk ayuquq. Uvitangani umiilgusim taawa agluk iqeghtakek emerald‑etun ayuqlutek. 4Uvitangani umiilgusim aqumutaghllagem taawa yuginaq estamat siipneqluki umiilgusit aqumutalghutet. Taakutgun aqumgatngaftut yuginaq estamat siipneqluki elder‑et qatelghiimeng atkuyaaghulluteng, gold‑mengllu qaghpaluteng. 5Umiilgusim aqumutaghllagegkeneng kallugem nighwaagpagtii, leveklugtii, tengngaagtiillu piit. Sivugkeni umiilgusim aqumutaghllagem taawa maaghraghvinlek torch‑et kumangalghiit, taakut maaghraghvinleguftut taghneghii Kiyaghneghem. 6Umiilgusim aqumutaghllagem sivugkeni taawa kelliisugnilnguq qergesa, meghraakegtaq crystal‑estun.
Umiilgusim aqumutaghllagem uvitangani, tamaghhiitni sanigkeni, taawa estamat Unguvalghiit, iyeghllaguftut saaymegteggunllu aqsagemegteggunllu. 7Sivuliq Unguvalghii lion‑esugniteftuq, tuunglighhaa Unguvalghii ox‑esugniteftuq, pingayaat sangwaa Unguvalghii gginalguftuq yugem gginaaneng, enkaam estamiitangat Unguvalghii tengaakayugtun qawaagpagtun ayuqeftuq. 8Enkaam estamat Unguvalghiit tamaghhaghmeng aghvinlegneng yaqulgututeftut, elngaatall yugusiit iyeghllaguftut talwa qamavek yaqghwita asingitnun. Aghneghtuuman unugtuumaan taaqigalnguut ilaganeghmeng,
“Agleghnalghii, agleghnalghii,
agleghnalghii,
Atanghuuq Kiyaghneq,
Aghtughyaghqaghhaanghiteghllak,
ellnganguuq maaten,
ellnganguuq sivunghani,
ellnganguuq tagiyaghqaq!”
9Taakut estamat Unguvalghiit ilagaghtut ilagaatngitneng usuqillghem, quulvaghillghem, iqamsiqayullghem aqumgalghiimun umiilgusigni aqumutaghllagegni, kiyaghlleghhiimun quunperugllak kenlengunaan. Tawaten pinghata 10yuginaq estamat siipneqluki elder‑et niinghutaqut sivungakun aqumgalghiim umiilgusim aqumutaghllagegkenun, manigughaqaat kiyaghlleghhii quunperugllak kenlengunaan. Taakut elder‑et qaghpateng mataghlluki lliiqiit sivungakun umiilgusim aqumutaghllagegkenka, enkaam ilagaghaqut,
11“Whangkuta Ataneghput Kiyaghneghput!
Elpek tugupestaaghyaghqaqaten usuqelleghllaget, quulvalleghllaget,
iqamsiqayulleghllaget aghtughyaghqaanghilleghpenun.
Ulimakaqutegpeneng sangwaa qamagtengngwaaghluku,
piyukelleghpetun kiyaghllequt enkaam allgeghullequtlu unguvalleghmeng.”
© 2018, Wycliffe Bible Translators, Inc. All rights reserved.
