Revelation 15
15
Moses‑enkuk Penniighaghaankuk Ilagaatngak
1Taagken qilagami aliightuq sangwaa saghiighanapiglleghhii liisimakusighqaghput piyaghqamun. Taawa maaghraghvinlek yaqulget, tagitilghiit maaghraghvinlegneng seghleliilleghllagneng. Taakut seghleliilleghllaget taaqniitkeftii Kiyaghneghem sakraalleghllagan.
2Taagken esghaghaqa kelliisugnilnguq meghraakegtaq siqinwaaghestun, akumngalghii keneghmeng. Esghaghankallu kayaalqiikat teghikusalluugmeng, nangaghneghaneng, aatghanllu number‑nganeng. Nekevghatnguftut saaghwaghni kelliim, harp‑elightuulluteng Kiyaghneghem tuunegkiitneng ellngitnun. 3Ilagaghaqeftut ilagaatanganeng Moses‑em, (Kiyaghneghem qepghaghtenga), ilagaatanganengllu Penniighaghaam:
“Kaay, Ataneq Kiyaghneq Aghtughyaghqaghhaanghiteghllak,
qepghalleghten seghleghllaguut, allaaghlluwhaghllaguut!
Kaay, umiilgat nunam yugita,
elpek salleghten elqughutngaatlu ipanguutlu!
4Ataneq, qamagtengngwaaghluteng yuget alikelleqaaten,
quulvaghlleqaatlu aatghen!
Ellnginaaguten agleghnalghii!
Qamagtengngwaaghluteng nunatat manigughyaghtughlleqaaten,
qayughllak liisimakegkangat nanqigtilleghten elqughutngalghiit!”
Kinguliit Maaghraghvinlek Seghleliilleghllaget
5Taam kingunganeng esghaghaqa qilagmi qelpeghtekangat Temple‑a. (Agleghnalleghpigaaguq Na, ellngan yugita liisimakusiqaat Kiyaghneq tawanniluku.) 6Taagken maaghraghvinlek yaqulget aanleghaatut Temple‑meng kelqelluteng maaghraghvinlegneng seghleliilleghllagneng. Tamaghhaghmeng atkuyaaghulluteng qateghrakegtameng nighulghiimeng, sakimagmegteggun gold‑meng tafsiluteng. 7Taagken ataasim unguvalghiim estamaneng taakuneng, gold‑meng sagneliqughii maaghraghvinlek yaqulget. Taakut sagneghet imighngaat sakraalleghllaaganeng Kiyaghneghem, kiyaghlleghhii quunperugllak kenlengunaan. 8Temple‑em ilunga agepsughqaagaa Kiyaghneghem nighughqellghanengllu, aghtughyaghqaanghillghanengllu. Kina alngunak iteghnaanghituq Temple‑mun kenlanga maaghraghvinlek seghleliilleghllaget kenletghuutellghitnun, tagitkiit maaghraghvinlek yaqulget.
© 2018, Wycliffe Bible Translators, Inc. All rights reserved.
