James 4
4
Tuunitek Elpesineng Katam Kiyaghneghmun
1Saam aaghtiiraaghutestaqisillu, pillugutestaqiisillu? Apalluqaqaghsi, seghleghem piyukelleghpesi pilluwaghaqii pinilghiit piyukellesi. 2Qiliighaqusi avanginneghpesini enkaam yugtaghyaghqaghtaqusi allgeghhnaluki qiliiqegkasi. Qiliighllagaqusi taawanginaq allgeghtepagningitaqasi enkaam aaghtiiraaghutaqusi, pilluwutaqusi. Allgeghusigatusi Kiyaghneq aapsigatutegpesineng. 3Talwa aapteghngaaghpesigu Kiyaghneq allgeghsigatasi qayughllak seghleghmun atughqaaluki aaptaqelghiisi. Piyukegkaghsi elpesi katam piyukegkaghhiinaghpesinun ayuqaqelghii. 4Ukughsi ataasiighneghilngughni! Liisimakenghistegguu piniqegkufsigu nunam seghlegha, ugumikaghsi Kiyaghneq? Kitum alngunak piniqegkumigu nunam seghlegha anguyaguuq Kiyaghneghmun. 5Sumeghtaghaghpenasi Akuzitet Igaqegkat temnginguniluku whaten pillghat, taghneghak kiyaghlleghhiik ilumnni aqinanaqneghtuuk. 6Tamaaken apalluqluku Kiyaghneghem kayusiitaghaghaqiinkut nuqetutesqelluki piyukelleluput. Iwernga Akuzitet Igaqegkat piit,
“Kiyaghneghem kayusighaqii qusevegngalghiit puuru kipullegmun piiqii qukaayugneghet.”
7Tuunlusi elpesineng katam Kiyaghneghmun. Ayaklighteggu tughneghaq, anagniighllequq elpesineng. 8Qantaghalliighaghtek Kiyaghneghmun, Kiyaghneq qantaghalliighaghllequq elpesinun. Seghleghqesteni, uughtughtek! Elpesi ataasiightellghilngughni, ukmangighteki ilusi qaamkut. 9Quyanghitek, asemeghqitek, qiyatek! Nenglaghqiqellesi qiyallghughteki, quyallesi quyanghilnguughtesteki. 10Qusevegtek Ataneghmun, quulvaghlleqiisi.
Nanqigtutegpenasi
11Ugpeqaalgutemni, seghlequughutegpenasi. Kitum alngunak seghlequuqumigu ugpeqaalguteni, seghlequughlleqii Liilightuusat. Nanqigtekumigullu ugpeqaalguteni nanqigtengngwii Liilightuusat. Nanqigtekufki Liilightuusat qaatkengngunghitaten. Yeghlegi Liilightuusat nanqigtistekaaten. 12Kiyaghneghhiinaaguq Liilightuusangllaghta, nanqigtisiiluki atuqaqii, enkaam sanganꞌngam nanqigsigu yulguten? Kiyaghneghhiinaaguq yugulighiyaghqaq, naafqiyaghqaq.
Nallukaghput Unaami Salleghqaghput
13Ilasi whaten piiqut, “Aghneghmi nalighmeng unaami tawavek nunamun aghulaqellequnga. Tamaanllequnga ataasiq ayumiqulleq, maningllaghllequnga.” 14Iwernga nallukaghsi unaami salleghqaghsi! Talwa nallukaghsi unguvalleghpesi tagtalkaghqaa. Unguvalleghsi takesqughhaaguq, agepsughruggaghestun ayuquq, mulugpenani aviighutkayuk. 15Itupill whaten piiqitek, “Atanghem piyukelqegkagu unguvakestaghllequkut enkaam apeghiighutaqellequkut sameng alngunak.” 16Tawaten pinghilkufsi aangaayugllequsillu qanangullequsillu. Tamaakut aangaayugtellghet seghleghuut.
17Enkaam kitum alngunak liisimakeghngaaghmigu pinitun pilleq atuqenghilkumigu, seghleghqengnguuq.
© 2018, Wycliffe Bible Translators, Inc. All rights reserved.