Hebrews 4
4
Kiyaghneghem Akequsaa Meghnaalilleq
1Kiyaghneghem akequsaa yugnun aghuliituq iitghesqelluki meghnaalivigminun. Iwernga alingelta luuraq nalighsi nuughhunnayukan iteghpenani meghnaaliviganun. 2Pinilghii ungipaq Kiyaghneghem meghnaaliviganeng ayuqelghii nagaquqaqaghput katam tamaakustun yugestun Moses‑em maghyaghquqiistun Egypt‑meng. Iwernga pinilghiim ungipam kayusiitellghitii qayughllak ugpequmangitaat nagaquqaghteng. 3Whangkuta ugpelghiini iteghllequkut Kiyaghneghem meghnaaliviganun. Iwernga Kiyaghneghem akuzitkegkaqii ugpeqillghilnguut whaten,
“Sakritngulunga akeqikaagunga allangughsaghqaanghilngughmeng.
Whaten piinga,
‘Iteghnaanghitngwaaghtut meghnaalivigkamnun.’”
Tawaten akuzikaaguq qepghaqani apeghiiqaqeghngaaghmiki ima nunangllalleghmineng. 4Naantuq Akuzitni Igaqegkani igaqluni maaghraghvinliitanga aghneghem whaten, “Kiyaghneq meghnaalikaaguq tamaaghhaaneng qepghaqamineng maaghraghvinliitangani aghneghem.” 5Akuzitnillu Igaqegkani Kiyaghneq pikaaguq, “Iteghnaanghitngwaaghtut meghnaalivigkamnun.”
6Paninang ilangi yuget iteghllequt Kiyaghneghem meghnaaliviganun. Iwernga nagaquusuwhaaqat pinilghiimeng ungipameng, itellghitut meghnaalivigmun qayughllak qaatkutellghilnguut Kiyaghneghmun. 7Tamaaken apalluqluku Kiyaghneghem nekegtekaqaa ilanga aghneq, atilqelghii “Aghneghmi.” Kingurugllaganeng Moses‑em, Kiyaghneghem akuzitkegkaqaa taana aghneq David‑kun. Uteghpagtanka David‑em igaqegkii Akuzitni Igaqegkani whaten,
“Aghneghmi whani nagaququfsigu Kiyaghneghem menga,
pineghlliqegpenasi sivuneghpesistun.”
8Joshua‑m maghyaghqullghitii yuget tawavek meghnaalivigmun. Liisimakaghput qayughllak taam kingunganeng Kiyaghneghem akuzitkegkaqaa ilanga aghnegha meghnaalillghem. 9Tamaaken apalluqluku taawa Sabbath‑a aghuliituq, meghnaalivik Kiyaghneghem yugitnun. 10Kina alngunak iitqumi Kiyaghneghem meghnaaliviganun, meghnaalillequq qepghaqamineng katam tawaten Kiyaghneghem meghnaalillghatun. 11Tamaaken apalluqluku iteghnaqeghllagelta Kiyaghneghem meghnaaliviganun. Qaatkenghitefqaan pilteggu Kiyaghneq sivunemta pillghistun.
12Akuzitangi Kiyaghneghem unguvaat qepghaagut. Iipgataghaghtut alngunak inglugtun ipegsaqaneng savigpagneng. Kaaputkayuguut qamaverugllak unguvasimllu taghneghamllu kaatutngallghegkenun, naflutlu paatghetlu kaatutngallghitnun. Kiyaghneghem akuzitangi nanqigtikayuguut yugem sumeghtaghallghanengllu sanaqellghanengllu. 13Sangwaa qamagtengngwaaghluni Kiyaghneghem ulimaagha iighnganghituq Kiyaghneghmeng. Aliitut, whateghlluwaaghuutlu iyegkeni. Ellnganun qayvighqesaghqaqaput salleput qamaglluki.
Jesus High Priest‑eghllakaghput
14Tamaaken apalluqluku High Priest‑elegllaguukut qilagmun mayuqameng. Jesus‑nguuq, Ighnegha Kiyaghneghem. Enkaam ugpeqilleghmetekestaalta aapqamnni yugnun. 15High Priest‑emta liigikngwaaqaqii kayaalliqusiput, qayughllak nunamelluni nanghiiqullengegkaaguq whangkutestungwaaq. Naqamllu seghleghqumangituq. 16Enkaam tetullngunaamta aglaalta umiilgusignun aqumutagkenun Kiyaghneghem, allgeghusaghqaaluta nangllegtallghanun. Tawani nangllekelleqiinkut, kayusighlleqiinkutlu aklukillemnni.
© 2018, Wycliffe Bible Translators, Inc. All rights reserved.